Read Aghem Dzɔ̌n 19 Bible Online

Dzɔ̌n 19 - Aghem bible

Dzɔ̌n 19

¹Paelɛ̀t n daŋso nì fùghù ndùw Yɛso enyəa ghe te sa a wə̄n alo ekwùu.

²Sùghugòʼ tə n nyəm kɔʼ mbɛ kə tə mgbē, dzə̀là tsughu an tuw kə Yɛso, daŋso dzə̀la tsughu wə̄n â dàla è nyə̀ghàan bàŋa zəla à fə̀ dzə̂ən tsəghà ko də̀ŋ kò;

³ghe m bùghò těe wò a vʉ̀a wə̄n, sùuwn nduw wə̄n, dzàa tsùghù enyəa, “Mbɛ̀ɛ, fə̀kâʼ à tuw wo a te, də̀ŋ kə Tə̀dzûu.” Ghe n səghàan bǔu wə̄n an uswɛ̄ɛ.

⁴Paelɛ̀t ŋ kòom tsə̀ghàsə̀ è wo, dzɛ̀ â ghee enyəa, “M̀ fɛ nìi sə̌aa wò wə̄n a vʉ̀a ghɛ̀ enyəa ghɛ̀ kele tsughu enyəa Ŋ̀ ka kòʼ ghəa è biigh è li zo ù ghəŋlo.”

⁵Yɛso fi sə wò nù, à mbɛ chi ko alo kətūw àsùghò dàla è kə̀də̀ŋ zə̀ a zəŋo ughùe. Paelɛ̀t n dzɛ̀ â ghee enyəa, “Ghùw ù te wəlà.”

⁶A m bùghò tuw u təfɔ̀e ghèe ghê gbè tə Ndùghù è Kə̀zə̀ è ne tə kôʼ ndûw Yɛso, ghe n dì sə wò enyəa, “Tə̀ghaa wə̄n alo kədàŋlo, tə̀ghaa wə̄n alo kədàŋlo!” Paelɛ̀t n dzɛ̀ â ghee enyəa, “Ghɛ̀ nduw təghāa nlò wə̄n aŋ ghu kɛʼɛ̄, nuu Ŋ̀ kâ kôʼ ghəa è biigh zəla ù ghəŋlo.”

⁷Ghî a ne a Tə̀dzûu a te ghə̀ m bɛ̀lɛ̀ ndùw wə̄n enyəa, “Ghàʼ ki kəlâŋ, lâŋ kə te dêe enyəa ù ki alekpūw bòʼ ù dzɛ̀ enyəa e lo Wɛ ù Kə̀zə̀.”

⁸Ghəa Paelɛ̀t zuw ndûw ghəa a te gho, ù ŋ kòom tsə̀ŋ mìaso ndùw ènyə

⁹Ù n nùghù nyə ndùw ebàm am mbɛ̀, nyə bvʉ â Yɛso enyəa, “Ghù bìso nùghù wò ghɛ̀?” Yɛso ŋ kè kuūwn bɛ̀lɛ̀ wə̄n.

¹⁰Paelɛ̀t fi bvʉ nû â wə̄n enyəa, “Ghù bɛ̀lɛ̀ yò mùghò a? Ghù kwò yo enyəa Ŋ̀ ki nû daʼa kə te ko alezə̀ghàa maʼà ghù, ghù nughu a, ŋkāa àsùghò alenìi təghàa ghù alo kədàŋlo a?”

¹¹Yɛso m bɛ̀lɛ̀ ndùw wə̄n enyəa, “Ghù yò alekelê daʼa kə̀ li ko a zəŋò mùghò mo kə ka sə̀ tsùghù wò aŋ ghùu Zə̀ kò; e fi lo nû enyəa à dùw tsə̀ghà bo e ghùw wəla ù nì fughu sə wô mugho aŋ ghulô ghɛ̀.”

¹²A m bùghò Paelɛ̀t zuw tsughu êzə̀, ù ŋ kàʼ alekə̄ŋ tə dziī alezə̀ghàa maʼà Yɛso. Dzuū tə ŋ kuuwn tughuu səa kɔʼɔ ko â dzə̀ tò enyəa, “Abugho ghù zə̀ghàa maʼà nduw ghùw wə̄n, à fi lo enyəa ghù dɔ̀ɔm yò dzə̂ fən ù Də̀ŋ kə Lumà kò; nu ghəəŋ tsə̀ghà dzə̀ ghùw fɛ alo enaʼ enyəa e lo kədə̀ŋ, à fi lo enyəa ù tsʉ̂ʉn tuw kə Də̀ŋ kə Lumà.”

¹³Ghəa Paelɛ̀t zuw ndûw shwaʼ u te wo, ù n nì tìso sə̀ wò Yɛso, tsùghù dòʼò tsughu am ndàŋ zəla ù saʼā ghî ghò a te, mò è ki mgbàʼà kə ebugho, ghe tɔŋlo an shwaʼ u Hibùlù enyəa à lǒ Gàbatà.

¹⁴An nə̀gha zə̀ èzə̀, am bən lò â zuw e kɔʼɔ teme zo, an tsuʼ fəla zə kə̀ zəŋso naaŋ kə bvʉ̂a bwiī a te, Paelɛ̀t n dzɛ̀ â Dzûu tò enyəa, “Də̀ŋ kɛʼɛ kə̀là.”

¹⁵Ghe n tughuu səa kɔʼɔ ko â dzə̀ enyəa, “Wi wə̄n, wi wə̄n, təgha wə̄n alo kə dâŋlo!” Paelɛ̀t m bvʉ â ghee enyəa, “A wi dəŋ kɛʼɛ a?” Tuw u təfɔ̀e wə m bɛ̀lɛ̀ ndùw wə̄n enyəa, “Ghaʼ ki yo də̀ŋ kə̀ li ko, à gɔ̀ʼɔ̀ ko yo Də̀ŋ kə Lumà kò.”

¹⁶Paelɛ̀t fi daŋso nì fùghù tsə̀ghà ndùw nû Yɛso â ghee enyəa ghe ndûw təghàa alo kədàŋlo.

¹⁷Sùghugòʼ tə̀ n daŋso nì kɔ̂ʼ Yɛso aŋ ghu kə ghee. Ghe n nì sə̀ ndùw Yɛso mò u m bòʼò kèle dâŋ ko, nì ndùw wə̄n aŋ kwàʼ u kaŋ kə kətuw, mo e moʼnlò an shwaʼ u Hibùlù enyəa à lò Gɔɔlgɔtà.

¹⁸Ghe n tə̀ghà kɔ̀ʼ Yɛso fughu èzə̀. Tə̀ghà dzə̌əŋ kɔʼ ghî à tsɔŋɔ à li gho am bùghù tə wə̄n a bə̀ghà [u mɔ̀ʼ aŋ kwe ù təma wo, ù lì aŋ kwe ù kwûu wò].

¹⁹Paelɛ̀t n tɔ̀m tsùghù sùghò àghəa alo kəbaŋlo enyəa, “Yɛso, ghùw ù Nazalɛ̀t, də̀ŋ kə Tə̀dzûu!” Ghe m bɛ naŋa kɔʼ edzūŋ an dǎaŋ kə wə̄n.

²⁰Ghe fə̀ wə̄n bɛ kɔʼ am bùghù e dziī, ndə̀mà tə Tə̀dzûu n tsəghàa tɔ̌ɔŋ dàŋà tsə̀ghà ghəa a te gho; a màʼà fə̀ lô an shwaʼ u Hibùlù, Gə̀lêʼ, àsùghò an shwaʼ u Latə̀n.

²¹Fɔ̀e tə̀ tughu tə Tə̀dzûu tə̀ n dzɛ̀ â Paelɛ̀t enyəa, “Kà tɔm dzə̀ enyəa à lǒ də̀ŋ kə Tə̀dzûu, tɔm tsughu enyəa, ‘Ù mò dzɛ̀ enyəa, “Ǹ lo də̀ŋ kə Tə̀dzûu.”

²²Paelɛ̀t n dzɛ̀ â ghee enyəa, “Fəgha kə̀là Ǹ tɔm tsughu, mùghò n tɔ̄m.”

²³A m bùghò sùghugòʼ tə bɛ naŋā kɔʼ Yɛso alo kədàŋlo, ghe n nì kɔʼ ndzʉ tə wə̄n bàan tsùghu alo u gbà u chʉ̀akò, dzùghùun tsùghù aŋ ghùe e ghee. A ŋ kuuwn bùghò alô tə tèetee to, tə n lo mo tə ki yo nyùŋ kò, mo tə bɔɔm dà dàŋso tsùghù ndùw ko nù.

²⁴ Ghe mo aŋ ghùe e ghee enyəa, a ka banlò, a kuuwn təma tsughu bòʼ alekòʼ ghùw wəla ù sò kele. Zən fə̀ lo aleluesō tsughu shwaʼ u Kəzə̀ wəla ghîisùghà a fə̀ tɔm naŋā enyəa, “Ghe m dzùghùu tsughu ndzʉ taŋā an ghùe e ghee, təm zə kɔʼ ndzʉ̄ am bòʼ.

²⁵Kən lò fəgha kə̀là sùghugòʼ tə fə̀ fwaʼ ghè kò.” A m bùghò ghe bɛ naŋā Yɛso êzə̀, ghî ghəla ghe fə̀ ti a vʉ̀a dǎaŋ kə Yɛso kò fə̀ lo ghê zə̀, asùghò wàazə̀ zə̀ ù zən, àsùghò Mèle, tɔɔŋ wi ù Kəlopàs, àsùghò Mèle Màʼdalɛ̂n.

²⁶A m bùghò Yɛso kòʼ ghəa ghəla zə̂ ghèe tsə̀ndə̄ghā è wə̄n zəla ù mò ŋgeē zəla ù ləghaa ti a vʉ̀a wə̄n, Ù n dzɛ̀ â zə̀ enyəa, “Nughò, kôʼ wɛ wʉ̂a lo!”

²⁷Ù n daŋso dzɛ̀ ndùw sugho â tsə̀ndə̄ghā zə enyəa, “Kòʼô, zughù vʉ̀a!” Tsə̀ndə̄ghā zə n daŋso nì ndùw zə̂ an ndughu lô wə̄n.

²⁸ A m bùghò ghəa ghən tsəghà tsughu, Yɛso sò kwo enyəa aghəa a dzə̀m ghə m mǐaa, (aleluesō shwaʼ u Kəzə̀ wəla ghiīshʉ̀ghà a fə̀ tɔm naŋā) ù n dzɛ̀ enyəa, “Fə̀ŋ zùʼso mùghò.”

²⁹Faa kə nlʉ̀ kə̀ li kə n ti fughu am mbɔm, ghe m fan kɔʼ ndùghù zə̀ edzǔu an tɔ̀ŋ kə kəfəgha tsùm sə kɔʼ faa kə nlʉ̀ kə te ko a te, gàʼ ndùw an dzughu e Yɛso.

³⁰Yɛso n swɛ mʉ kɔʼ lʉ̀ n te mò, daŋso dì sə̀ wò enyəa, “Zə mô êzəŋ e mîaa.” Ù n kum tsughu tuw kə wə̄n, daŋso zwìi mɛ̀ʼɛ̀ kɔ̀ʼ è wo.

³¹Aŋghəa tsuʼ fəla ghe fə̀ bɛ Yɛso a te alo kədàŋlo màʼa fə̀ lo tsuʼ fəla zə kə̀ Zəŋso Naaŋ bvʉ̂a bwiī a te, aleghəə̄ŋ tsughu enyəa gwə̄n e li e lô doʼn doʼnlo alo kədàŋlo, (nu tsuʼ u kəzə u mò lo tsuʼ ù nê wo), ghì à ne a Tə̀dzûu tə̀ n dzɛ à Paelɛ̀t enyəa, “Dzɔ̀ lo enyəa to a mô bvuʼn maʼà fwe e ghee, a nîi nughù tsughu wô gwən a ghee.”

³²Sùghugòʼ tə fi bugho bvuʼn tsughu nû fwee e ghì à li yì à bə̀ghà ghe mò təghàa dzəə̄ŋ kɔʼ ghèe ghê Yɛso.

³³Â ghee alebùghò a zəŋò Yɛso, ghe ŋ kòʼ kɔ̂ʼ enyəa ù māa kì kpuw, ghe ŋ kê kôom bvuʼn fwee e wə̄n.

³⁴Sùghugòʼ e mɔ̀ʼ an sùghugòʼ tə te to n nì kɔʼ eghɔŋ tsuʼ nyə kɔ̀ʼ ndùw ti e ebùghu e Yɛso a te, mùghù mə̀ n sə̀ tsùghù wò a te àsùghò kàŋ tò.

³⁵(Ghùw wəla ù fə̀ kôʼ ghəa ghən gho, mafə̄ bughò teso dzɛ̀ ghəa a te gho — shwaʼ u wə̄n u lo êsəŋò. Vʉ̀a ù ndòʼ kwo sugho enyəa fəgha kəla e teso dzâa wo lǒ êsəŋò — enyəa to ghɛ̀ mô lò aleboō fughu â Zə̀ kò.)

³⁶ Nu ghəa ghən fə̀ enyə sə aleluesō shwaʼ u Kəzə̀ wəla ghiīshʉ̀ghà a Kəzə̀ a fə̀ tɔm naŋā enyəa, “Ghe kê bvùʼ kòʼ yò ghoo kə wə̄n kə̀ li ko.”

³⁷ Mo shwaʼ u Kəzə̀ ù li u dzɛ̂ kpèʼe sùghò enyəa, “Ghe kê lɛɛ̄n kɔʼɔ ndûw ghùw wəla ghe sughùu nyə ndûw ti e ebùghu e wə̄n zo.”

³⁸A m bùghò ghəa ghən bughò tsəghà tsughu, Dzusɛ̀f, ghùw ù Àlìmatìa wəla ù fə̀ tsɔŋ lô sugho tsə̀ndə̄ghā è Yɛso bòʼ ù fə̀ tsəŋō ghî à ne a Tə̀dzûu ghò n ndùw bvʉ̀ â Paelɛ̀t enyəa ù fughuu wô ghee â daʼa ko to e ndûw boʼò nughù gwə̄n e Yɛso. Paelɛ̀t mo è boo, dzɛ̀ â wə̄n enyəa ù ndùw boʼò nughù. Ù daŋso bùghò bòʼò nùghù ndùw gwən e te zo.

³⁹ Dzusɛ̀f m bùghò dzə̌əŋ ghèe Nìkòdɛmùs ghùw wəla ù fə̀ buʼ bughò kôʼ dzə̂ Yɛso â tsuʼ wo an tsuʼ ù li wo. Nìkòdɛmùs m bùghò â fə̀ghà n lə̀mlo n li mò, mo ghe m fɔɔn dzə̄əŋ kɔʼ ghe tɔŋlo enyəa à lò Mayà àsùghò Alòs; mò lò alekwū kwo ù səŋò wò.

⁴⁰Ghe a bəghà n nì bɔm kɔ̀ʼ Yɛso alo kəbəghalāŋ mo ghe n tsoʼso fə̀ghà n lə̌əm mi aŋ gwən e wə̄n, aŋghəa à lò bughōo kə Tə̀dzûu aletsəən ghî ghò êzə̀.

⁴¹À n lo êzə̀ mo sum u kuʼù lô an luʼu kəla ghe mô təghàa Yɛso a te alo kədàŋlo. Shîaa[13] zə̀ n lo fughu an sum mo ghe kaam ghùw a te n tsəla kòʼ.

⁴²Aŋghəa à fə̀ tsən lô sughô tsuʼ fəla zə kə Tə̀dzûu kə̀ bvʉ̀a bwîi a te, shîaa e te zə n nyɔ̂ʼ kùʼ n lò sugho, ghe n tsəla naŋa nyə̀ ndùw Yɛso fughu.