Read Aghem Dzɔ̌n 2 Bible Online

Dzɔ̌n 2 - Aghem bible

Dzɔ̌n 2

¹A m bùghò tsuʼu m kpe tsughu n təgha, ghe ŋ ghəəŋ kə̀male aŋ Kanàn, zə̂ Yɛso n lo fughu an naʼ e Galèlîi.

²À n lo mo ghe n Yɛso à tsə̀təndə̄ghā tə wə̄n to fughu naʼà sùghò.

³A m bùghò lʉ̀ n sɛlɛ̄ tsughu fughu. Zə̂ Yɛso ndzɛ̀ â Yɛso enyəa, “Lʉ̀ ŋ kôom yo fɛ.”

⁴Yɛso n dzɛ̀ â wə̄n enyəa, “Ǒo nughò, ghù lə̀ghaa enyəa to M̀ mô ghɛ kə kwò? Nəgha zaŋa e kaām kpe dzə̀.”

⁵Zə̀ Yɛso n ndùw dzɛ̀ ndùw a kɔ̀ɔ mìa m mò fwaʼā fughu enyəa, “Abugho ù dzɛ̀ ko enyəa ghɛ ko kwò kò, ghɛ̀ ghəəŋ nduw nlò ghəa e te zo.”

⁶À n lo êzə̀ mò tɔ̀e tə mmùghu tə̀ li tə ti fughu tǔu mo ghe bɔm sə kɔʼ alo atia; ghe fə̀ bughò sûuw səā ghue zo a te alezɔlɔ an sə kə Kəzə̀, aŋghəa bughōo kə Tə̀dzûu kə̀ deē, mò tɔ̀e e mɔ̀ʼ lo alenì twom wə̄n m̀mughū ghuū ghûw, ŋkāa ŋghəm n təgha.

⁷Yɛso n dzɛ̀ â kɔ̀ɔ n te mò enyəa, “Dzə̀la lueso kaaŋ wò nlǒ mùghù mò an tɔ̀e ti to.” Ghe n nyoʼn dzə̀n lùeso kaaŋ wò è sugho.

⁸Ù n dzɛ â ghee enyəa, “Tuuw sə kɔʼ sə̀ nlò êzə̄ŋ, ghɛ ni nduw a vʉ̀a ghùw wəla ù lɛɛ̄n ghəa ghən gho.” Ghe n tuuw sə̀ è kɔʼ, nì ndùw sùghò a vʉ̀a wə̄n.

⁹A m bùghò ghùw wəla ù lɛnlo â ghəa a te gho mɔ̂m zuw kɔʼ, à n lo mò mùghù n te mə̀ m fə̂n lʉ̀ mò. Ghue u wə̄n wə ŋ kwo yo luʼū kəla n te mò nlʉ̂ nùghù wô a te (kɔ̀ɔ mi mə̀ ŋ kuuwn kwo). Ghùw vʉ̀a lɛɛn ghəa a te gho n tɔŋɔ tsughuu num ù wìzən,

¹⁰dzɛ̀ â wə̄n enyəa, “A bughoo a n nì wò dzə̀ lʉ̀ n dzùŋ mò esə̄, a mò è bùghò ghî ndôʼ mʉ kuw tsughu, an daŋso nì wò làŋà kə nlʉ̀ kən an nə̀gha zə̀ èzə̀. Ghù vʉ̀a ghù kuūwn naŋā ndùw m dzùŋ mən enyəa ghù so nduw ni wo êzə̄ŋ a.”

¹¹Zən fə̀ lo tsə̌a è Yɛso è sûesʉ u fə̀ dê tsughu aŋ Kanàn an naʼ e Galèlîi, dè kɔ̀ʼ sùghò dwaʼa u wə̄n; tsə̀təndə̄ghā tə wə̄n tə m boo fughu tsughu â wə̄n.

¹² A m bùghò ghə̀a ghə̀n tsəghà tsughu, Yɛso ghèe ghê zə̀ à waazə̂ ghò àsùghò ŋgaŋ tə wə̄n to n nùghù tsùghù ndùw aŋ Kàpɛnòm, dòʼò kə̀ŋo ndùw fughu an tsuʼu n lǐ mò.

¹³ Zə kə̀ zəŋso naaŋ kə Tə̀dzûu kə̀ n suu wò. Yɛso n nùghù kɔ̀ʼ ndùw an Yɛ̀lusalɛ̀m.

¹⁴A m bùghò ù lǒ an ndùghù è Kə̀zə̀ è ne an Yɛ̀lusalɛ̀m, ù ŋ kòʼ ghì ghəla ghe fêen mbɔ̀ŋ tò, à ndzì tò, àsùghò ghəla ghe feēn mbuŋū to, a li ghə n lo ghəla ghe kuūwn fughuu kə̀a mò, mo ghe doʼ kaaŋ ko am bəla tə ghee.

¹⁵Yɛso n nyəm kɔʼ ekwûu fùghù èzə̀ am gbaʼ, bù dzùm sə ghee a dzə̀m a beē ghèe ghê nyòm tə ghee to; tə̀mbɔ̀ŋ àsùghò ndzì tò. Ù ŋ kwèlè sàaŋ màʼà kǎaŋ tsə̀ghà kua u ghî ghəla ghe mò fêen səa kua wo â ghì ghò, təghaan màʼà kǎaŋ sùghò ndàŋ tə ghee.

¹⁶Aŋ kuuwn bùghò â ghî ghəla ghe mò fêen mbuŋū to, ù mo â ghee enyəa, “Nîi nùghù sə nlǒ fə̀ghà mən mò fɛ, e kwo ghɛ̀ è fə̂nsò naŋā kɔʼ ndùghù è Bə̀ghà enyəa à lò bekewə̄n.”

¹⁷ Tsə̀təndə̄ghā tə wə̄n tə fi tɛ̂ mòʼn wò nù shwaʼ wəla u lô am Mwàʼsò kə Kəzə̀, u dzɛ̂ enyəa, “Ghɛ̂ zəla Ŋ̀ ki an ndughu è bə̀ghà lo nìi nùghùun nù mugho.”

¹⁸Dzuu tə n daŋso bvʉ â wə̄n enyəa, “Ghu ki tsə̌a è ghɛ zò aledèe wô â ghàʼ a, tǒ ghùw wəla ù ki daʼa ko alefwàʼ ŋgòʼ è ghə̀a ghəla ghù ghəə̄ŋ fɛ a?”

¹⁹ Yɛso m bɛ̀lɛ̀ ndùw ghee enyəa, “Sàʼa màʼa tsughu nlô ndùghù è Kə̀zə̀ è ne zən an Yɛ̀lusalɛ̀m, Ǹ lo kôom bəghā naŋā kɔʼ ebàm, alo ntsuʼ n təgha.”

²⁰Tuw u Tə̀dzûu wə̀ n daŋso bvʉ â wə̄n enyəa, “A fə̀ ndùghù è Kə̀zə̀ è ne zən an Yɛ̀lusalɛ̀m bəgha aŋ ghəm n tə̀ nùu n chìakò à nùu tǒ tǔu, ghù vʉ̀a ghù so enyəa to ghù bəgha naŋa kɔʼ an sə ghə n tsuʼ a təgha kɔʼkɔʼ a?”

²¹À n lo êzə̀ mo ù ndùghù è Kə̀zə̀ è te fi ŋgɔ̂ɔ ghue u wə̄n.

²²A m bùghò aŋghəa ù bùghò kpuw kɔʼ sə kɔʼ alo evʉ̄, tsə̀təndə̄ghā tə wə̄n tə n tɛ̀ moʼn wò fəgha kə̀là ù fə̀ dzâa ghè kò. Ghî a fi kôom fə̀ghaan m boo tsughu nû shwaʼ u Kə̀zə̀ wò àsùghò ghəa ghəla Yɛso fə̀ dzâa tsəgha â ghee.

²³A m bùghò ù sò lô an zə kə̀ Zəŋso Naaŋ ko an Yɛ̀lusalɛ̀m, ndə̀m tə aghî tə m boo fughu ndùw â wə̄n, bòʼ sə̀ghà mə̀lā ù fə̀ deē ghè mò.

²⁴Yɛso ŋ kè sô kuūwn zə̂ ghue u wə̄n ghèe ghee,

²⁵bòʼ ù màʼâ fə̀ kwo ghî ghò a dzə̀m, ù ŋ kôom kə̀ŋo sùghò yǒ ghùw wəla u lo aletesô mwam u ghuw wə̀ nsɔ̌ɔŋnchùw â wə̄n, u maʼa fə kwo zîi fəgha kəla ghùw nsɔ̌ɔŋnchùw lǒ ghè kò.