Read Aghem Dzɔ̌n 20 Bible Online

Dzɔ̌n 20 - Aghem bible

Dzɔ̌n 20

¹A m bùghò an tsuʼ fə̀ sʉesʉ fo alo ewə̄n, Mèle Maʼdàlɛ̂n n ndùw chì wò ùtsuʼ alo eshìaa, bùghò kôʼ wò mo ghe m bəŋso nùghù tìa zo an dzughu zə eshìaa.

²Ù n daŋso nyə̀ŋ ndùw kòʼ ndùw Sǎemòm Pità ghèe ghê tsə̀ndə̄ghā è lì zəla Yɛso mò ŋgeē ləghaa, ù n dzɛ̀ â ghee enyəa, “Ghe ŋ gwən e Mughu ù te è nî nùghù sə alo eshìaa, yia kwo yo luʼū kəla ghe ndûw naŋā wə̄n a te.”

³Pità, ghèe tsə̀ndə̄ghā è li zə n sə̀ nùghù ndùw fughu alo eshìaa.

⁴Ghe n sə̀ tsə̀ghà tsùghù â nyəŋ zo, tsə̀ndə̄ghā e li zə ŋ kuuwn nyə̀ŋ tsə̀ghà tsùghù Pità, tɛ̀ ndùw fughu alo eshìaa esə̄,

⁵ghəa ù sò ghaā tsughu enyəa e lɛɛ̄n nyəā ndûw, ù ŋ kòʼ nyə̀ ndùw kô mbəghalaŋ kə̀ gha ko kə ŋgwuūn doʼō fughu. Ù ŋ kè kuūwn nyəā ndûw dzə̂ fughu.

⁶Sǎemòn Pità n daŋso ndùw bùghò a bâà wə̄n, shùaa nyə̀ daŋso ndùw ko ùghue fughu alo eshìaa, nyə̀ kòʼ tsùghù sùghò mbəghalaŋ kə te ko, kə zîi doʼō,

⁷à bà kə ndzʉ kəla ghe mò gaʼ tuw kə Yɛso kò a te, mo kə nyoʼn ŋgwuun dòʼò nə̀ŋònə̄ŋ.

⁸Tsə̀ndə̄ghā zə̀a è mò bughò tɛ̂ sə ko fughu alo eshìaa n daŋso nyə̀ ndùw èsugho, kòʼ è tsughu daŋso boo è fughu;

⁹nu ghe fə̀ lo mo ghe kaām tɔ̂ʼ kèle shwaʼ u Kəzə̀ wəla u dzɛ enyəa Yɛso ki alekpuuw kɔʼɔ̄sə̄ alo evʉ̄.

¹⁰Tsə̀təndə̄ghā ti tə n daŋso nùghù ndùw èbàm an ndughu tə ghee.

¹¹À n lo mò Mèle mô nǎam ti fughu â vʉa èshìaa, dìi, ghəa ù sò diī êzə̀, ù ŋ ghaa tsughu alelɛɛ̄n nyəā ndûw fughu alo eshìaa,

¹²ù ŋ kòʼ nyə̀ ndùw tsə̀təndə̄ghā tə Kəzə̀ tə bə̀ghà mo tə n la ghue zo an ndzʉ tə̀ fəmā to, dôʼ an luʼù kəla Yɛso mò nyə̂ŋ a te; u mɔ̀ʼ alo kətuw, u mɔ̀ʼ a tsəla efwēe.

¹³Tsə̀təndə̄ghā tə Kəzə̀ ti m bvʉ â wə̄n enyəa, “Wizən, ghù sə̀ ŋ kûu ŋ kwò mò?” Ù n dzɛ̀ â ghee enyəa, “À lǒ bòʼ ghe n nì nùghù gwə̄n e Mughù waŋā zo, yìa Ŋ̀ kwo yo luʼū wəla ghe nî naŋā wə̄n a te.”

¹⁴A m bùghò ù kə̀a tsughu êzə̀, ù mo e fə̀là tsùghu ùghue, ù ŋ kòʼ kɔ̂ʼ Yɛso mò vʉ̀a ù ti, ù n sô kǔuwn kwo yo enyəa à lò Yɛso.

¹⁵Yɛso m bvʉ â wə̄n enyəa, “Wìzən, ghù sə̀ ŋ kuu ŋ kwò mò? Ghù kəŋo ndùghò fɛ à?” A m bùgho Mèle sô mòʼò enyəa à lǒ ghùw ù sum ù lì, Mèle n dzɛ̀ â wə̄n enyəa, “Mughùbè, abugho à lǒ mò ghù ŋ gwən e wə̄n e boʼò nùghù, ghù n teso wò luʼū kəla ghù ndùw nyə̂ŋsò naŋā wə̄n a te, tò Ǹ ndûw boʼò nughù.”

¹⁶Yɛso n tɔŋɔ tsughu wə̄n enyəa, “Mèle.” Mèle m fə̀n tsùghù ughue, tɔŋɔ ndùw wə̄n an shwaʼ u Hibùlù enyəa, “Làbonì!” (Mo e moʼnlò enyəa à lǒ Wàdè).

¹⁷Yɛso n dzɛ̀ â wə̄n enyəa, “Kà mugho mɔ̀m, nuu Ŋ̀ kaām kɔʼ tɛ̀ dzə̀ a vʉ̀a Bə̀ghà; laam ndùw a vʉ̀a waazə̂ ghaŋa gho, ghù dzɛ â ghee enyəa M̀ fɛ ndùuw a vʉ̀a Tsele waŋa wəla à lò sugho tsùghò, tɔ̂ɔŋ Zə̀ kɛʼɛ.”

¹⁸Mèle n ndùw kòʼ ndùw sùghò tsə̀təndə̄ghā tə Yɛso, dzɛ à ghee enyəa, “Mùghò ŋ kòʼ Mughu ù te.” Ù n daŋso nì dzɛ̀ ndùw shwaʼ u Yɛso vʉ̀ â ghee.

¹⁹An nə̀gha è guŋso zo an tsuʼ fə te fo, mò à fə̀ lo tsuʼ fə sûesʉ fo alo ewə̄n, tsə̀təndə̄ghā tə Yɛso tə̀ n lo an ndughu mo ghe n dzùa nàŋa gbâʼ wò, ghe sô tsəŋo ghî à ne a Tə̀dzûu ghò, Yɛso m gbən sə kɔʼ an sə kə ghee, dzɛ â ghee enyəa, “Bughuun zə lo ghɛ̀ à ghee.”

²⁰A m bughò ù dzɛ̀ tsughu êzə̀, ù dè ndùw ghu a wə̄n, à ti e bùghū e wə̄n zo. Tsə̀təndə̄ghā tə te tə n daŋso dòʼò tsughu aleduʼnlo aŋghə̂a ghe kôʼ kɔʼ Mughu ù te.

²¹Yɛso n dzɛ̀ kpèʼe ndùw â ghee enyəa, “Bughuun zə e lo ghɛ̀ à ghee. Ghəa bəghà mò tum wô mugho, à lò sugho eghala Ǹ tuū səaa ndûw ghɛ.”

²²A m bùghò Yɛso dzɛ̀ tsughu êzə̀, ù n zwìi ndùw a zəŋò ghee, dzɛ̀ â ghee enyəa, “Nì nlo Zuʼ tə Zɔlɔ to.

²³ Abugho ghùw wɛʼɛ ghuūw maʼà bo e ghûw zò, ghe ŋ ghuuw màʼà sùghò bo e wə̄n; mò ghɛ̀ kâ bo e ghûw ghuuw màʼà, bôo tə wə̄n tə n lo ko nû.”

²⁴Â n lo êzə̀ mò Tɔ̀mâs wəla ù fə̂ lo sugho tsə̀ndə̄ghā è Yɛso, ghe fə̀ tɔɔŋ sugho wə̄n enyəa à lǒ ŋgɔ̀ɔŋmbɛ ŋ kuuwn yò an nəgha zəla Yɛso mò bugho a te.

²⁵Ghəa ù ndùw bugho, tsə̀təndə̄ghā tə̀ li ti fi dzɛ̄ nû â wə̄n enyəa, “Ghàʼ m Mughu ù te kôʼ.” Ù n dzɛ̀ â ghee enyəa, “Ǹ lo boom ko mò mùghò n tɔ̀ʼ kòʼ nyə tsughu nwa u təmbɛ wo aŋ ghu a wə̄n, Ǹ zêen koʼò tsughu, M̀ mɔ̂ɔ ndûw sughò ti ebughū e wə̄n aŋ ghu kaŋa.”

²⁶A m bùghò tsuʼu n tsəghà tsughu efāa, tsə̀təndə̄ghā tə Yɛso tə̀ n lo kpeʼe an ndughu, Tɔ̀mâs n lo ghèe ghee. À n lo mò gbâʼ ù fêen n dòʼò nù, ghe n tɛ̀ fìi kɔ̂ʼ Yɛso mò ù ti am bvʉa e ghee, ù n dzɛ̀ â ghee enyəa, “Bughuun zə lo ghɛ̀ à ghee.”

²⁷Ù n daŋso dzɛ̀ â Tɔ̀mâs enyəa, “Gaʼ wò wɛ u kəghu wʉ̂a fɛ, ghu koʼ ghu ghaŋa gho; dǎan sə wò ghu kə̀a kò, ghù mɔm wo tiibùghu zaŋā zo; kà e lo mò ghù kì yo fə̀ŋ, e ki boo zo.”

²⁸Tɔ̀mâs m bɛ̀lɛ̀ ndùw wə̄n enyəa, “Ghù lò Mughùbè waŋā à Zə̀ kaŋa ko.”

²⁹Yɛso n dzɛ â wə̄n enyəa, “Ghù mô êzəŋ e boo, bòʼ aŋghəa ghù kòʼ wô mugho; Bughunlo e lo â ghì ghəla ghe boō fughu mo ghe kâ bùʼ kòʼ.”

³⁰Yɛso n dè ndə̀mà tə tə̀tsə̌a a sə̀a tsə̀təndə̄ghā tə wə̄n to mo ghe kâ fɛ am mwàʼsò kən tɔm naŋā;

³¹ghe ghəa ghən fɛ kuuwn tɔm naŋa aleghəə̄ŋ tsughu enyəa ghɛ̀ boo fughu enyəa Yɛso lǒ Kə̀lestò, Wɛ u Kə̀zə̀, àsùghò enyəa, am boo zɛʼɛ̄ to ghɛ̀ mo kele mughù zò an zən e wə̄n.