Read Aghem Dzɔ̌n 21 Bible Online

Dzɔ̌n 21 - Aghem bible

Dzɔ̌n 21

¹Aletsùuŋ tsughu, Yɛso m bùghò dè fughu sə kpeʼe wò ghue u wə̄n â tsə̀təndə̄ghā tə wə̄n to an Nyʉ̀ e Tàebɛlìa; ù fə̀ ghue u wə̄n de sə wo an dziī zən enyə.

²tsə̀təndə̄ghā tə Yɛso tə̀ li tə n dzeŋe dôʼ, tɔɔŋ Sǎemòn Pità, Tɔ̀mâs, tɔɔŋ Ŋgɔ̀ɔŋmbɛ, Nàtanɛl, tɔɔŋ ghùw Kànà an Galèlîi, wɛ a Zɛbàdīi à nûu ghò àsùghò tsə̀təndə̄ghā tə Yɛso tə̀ li to tə bə̀ghà.

³ Sǎemòn Pità n dzɛ â ghee enyəa, “M̀ fɛ ndùuw tsəgha tə̀ kwuun to.” Ghe n dzɛ â wə̄n enyəa, “Ghàʼ bughò sùghò nù.” Ghe dzeŋe sə̀ ndùw nyə kɔʼ alo kəkwə̀n, ghe ŋ kè sô kuūwn kwu kəfəgha â tsuʼ wo è vʉ̀.

⁴A m bùghò tsuʼ u zuūw nyəā wo, Yɛso m bùghò tème wò â ŋgùŋ è enyʉ̀, tsə̀təndə̄ghā tə̀ ŋ kè kuūwn koʼòkɛlɛ enyəa à lò Yɛso.

⁵Yɛso m bvʉ â ghee enyəa, “Fən ghaŋā gho, ghɛ̀ sô yia ki nu tsəgha to a fiā a?” Ghe m bɛ̀lɛ̀ ndùw wə̄n enyəa, “Ɛ̂ŋgaŋ dzə̂”

⁶Ù n dzɛ â ghee enyəa, “Aŋghəa ghɛ̀ lo fi alo kəkwə̀n, màʼa tsughu nlò ghuūw tɛʼɛ to am bà kə kwe wɛʼɛ ù təma wo alo enyʉ̀ ghɛ̀ so koʼ tsəgha tə̀ li to.” Ghe m màʼà nyə̀ tsùghù sùghò tə̀ghuūw, kòom bùʼ yò alesèe səā kɔʼ, bòʼ tsəgha tə màʼà fə̀ lo mo tə nyə̀ dùw tsəghàsò a te.

⁷Tsə̀ndə̄ghā zəla Yɛso fə̀ ləgha tsəgha n dzɛ̀ â Pità enyəa, “A lo Mughu ù te!” A m bùghò Pità zuw tsughu êzə̀, ù n nì dzə̀la kɔʼ ndzʉ tə wə̄n (ù mò lo mò ù n tsɔɔn naŋa ndzʉ̄, ù màʼa fə̀ lô alo kəfwàʼ), tɛ̀ nyə tsughu an ndzughù təgha sə kəŋo ndùw â ŋgùŋ.

⁸Tsə̀təndə̄ghā tə̀ li ti ŋ kuuwn sə kəŋo wò ko alo kəkwə̀n, sèe wò ghuūw tə ghee à tsəgha to a te ndə̀m; bòʼ ghe ka fə lɔʼso dòʼò nyə kəŋo ndùw dzə̀ alebùghò tɛ a ŋgùŋ è ènyʉ̀; gha kə te kə fə̀ daā yo.

⁹A m bùghò ghe sə tee wo a ŋgùŋ è enyʉ̀, ghe ŋ kôʼ ndùw chia tə ŋwə̀n àsùghò tsəgha zo e gaʼ a te, àsùghò bɛ ko.

¹⁰Yɛso n dzɛ â ghee enyəa, “An tsəgha təla ghɛ̀ kwu, nìi wo nlò tə li to a te.”

¹¹Sàemòn Pità n nyə kɔʼ ebàm alo kəkwə̀n, sè sə̀ tsùghù wò tə̀ghuūw a ŋgùŋ è ènyʉ̀, ù n taŋ tsughu tsəgha tə te to, tə n lo fəbɔm à ghə̄m mò ŋ tɛ̀ à ghè tò tə təgha. Ghə̂a tə fə̀ bûʼ lo ko an ndə̀m êzə̀, ghuūw ù ka fə te.

¹²Yɛso n dzɛ â ghee enyəa, “Ghɛ̀ bugho doʼo tsughu nlò êzə̄ŋ to sɛ̀ zə təgbə̀làgbə̀la.” Tsə̀təndə̄ghā e mɔ̀ʼ fughu ŋ kè tsoō bvʉ â wə̄n enyəa, “Ghù lò ndugho?” Bòʼ ghe fə̀ kwo nû enyəa à lò Mughu ù te.

¹³Yɛso n ndùw è bugho, nì kɔ̀ʼ bɛ kə te ko, à tsəgha e te zo, fùghù ndùw â tsə̀təndə̄ghā tə wə̄n to.

¹⁴Zən êzə̄ŋ mò fɛ ghəəŋ tsughu tənəghā tə təgha aŋghəa Yɛso bùghò dêe ko ghue wo â tsə̀təndə̄ghā tə wə̄n to aŋghəa ù mò kɔʼ sə kɔʼ alo evʉ̄.

¹⁵Ghəa ghe gbə̄n zə mɛʼɛ̀ kɔʼ, Yɛso m bvʉ â Sàemòn Pità enyəa, “Sàemòn, wɛ ù Dzɔ̌n, ghù ləghaa nù mugho tsəghàsə ghî ghə̀n a?” Sàemòn m bɛ̀lɛ̀ ndùw wə̄n enyəa, “Ghù kwò nû enyəa Ǹ ləghaa nù ghû.” Yɛso n dzɛ â wə̄n enyəa, “Etsʉa ndzì taŋa to.”

¹⁶Yɛso m bvʉ kpeʼe ndùw â wə̄n enyəa, “Sàemòn, wɛ ù Dzɔ̌n, ghù lə̀ghaa nù mugho a?” Sàemòn m bɛ̀lɛ̀ ndùw wə̄n enyəa, “Mughu ù te, ghù kwò nû enyəa Ǹ ləghaa nù ghû.” Yɛso n dzɛ̀ â wə̄n enyəa, “E lɛnlo â ndzì taŋa to.”

¹⁷Yɛso ŋ kòom bvʉ kpeʼe ndùw â wə̄n alendùw sə alo tənə̀gha tə təgha enyəa, “Sàemòn, wɛ ù Dzɔ̌n, ghù lə̀ghaa nù mugho a?” Tuw kə m kpuw Pità aŋghəa Yɛso mgbɛɛ̄ bvʉa ko wə̄n â ghəa è mɔʼɔ zo alekɔʼɔ sə alo tənəghā tə təgha enyəa, “Ghù lə̀ghaa nù mugho a?” Ù m bɛ̀lɛ̀ ndùw wə̄n enyəa, “Mughu ù te, ghù kwò aghəa a dzə̀m; ghù vʉ̀a ghù kwo sugho enyəa Ǹ ləghaa nù ghû.” Yɛso n dzɛ̀ ndùw â wə̄n enyəa, “E lɛnlo â ndzì taŋa to.”

¹⁸Kùmkùm, Ǹ dzâ wô â ghɛ̀ enyəa, ghəa ghù mò naām lo wɛ̂ɛtùghu, ghù n dzə̂ən ndzʉ təghà ghù â nəŋ ko; ndùuw luʼū təla ghù ləghaa alendùw; à kuuwn lò ko enyəa abugho ghù lo dwə̂n tsughu, ghù lo e nəghaan səa nduw kwe zo, ghùw ù nùghù ù lì n dzə̀là fughu tsughu ndzʉ təghà, mbuŋ kɔʼ ghû, nì ndùw ghù an lùʼù kəla ghù mò buʼù ləghaa yo alendùw.

¹⁹(Yɛso fə̀ ghəa ghən kəa tsughu aledè ŋgôʼ è èvʉ zəla Pità lo kpuūw ghè zò, zəla e lo fughu kɔʼso mò a te â Zə̀ kò). Yɛso n daŋso dzɛ â wə̄n enyəa, “Dzûum wò mugho.”

²⁰ Pità mo e baŋà lɛ̌ɛn tsughu nù, kòʼ ndùw tsə̀ndə̄ghā zəla Yɛso fə̀ ŋgeē ləghaa mò zə̀ è bùgho a bǎa ghee. Wəla ù fə̀ doʼò kuʼso nduw an bughu e Yɛso aŋ nəgha zəla ghe fə̀ lo an chìndùghu zəa, ghəa ù fə̀ kwə̄n bvʉ kɔʼ â Yɛso enyəa, “Mughùbè, à ghù so e fêe fughu ndugho a?”

²¹Ghəa Pità kôʼ nduw wə̄n, ù m bvʉ â Yɛso enyəa, “Mughùbè, ghù lò aledzɛ̀ êndūghō kùu ndùw ghùw wən a?”

²²Yɛso m bɛ̀lɛ̀ ndùw wə̄n enyəa, “Abugho Ǹ ləghaa enyəa ù dòʼòdoʼò tò Ŋ̀ kê telè bughò èbàm, à ghù a te fəmso kə̀ kwò? Bùghò a bâà mùghò!”

²³Zwɔ̂ŋ wə̀ m fùŋ mìasò ndùw aŋ ghùe e ghee enyəa, Tsə̀ndə̄ghā zən lo kpuuw yo; dèe êzə̀ mò Yɛso ka fə dzɛ̂ dzə̀ â Pità enyəa, tsə̀ndə̄ghā e te lo kpuw yo. Ù fə̀ laam dzɛ enyəa, “Abugho Ǹ ləghaa enyəa ù dòʼòdoʼò, tò Ǹ lo telè bughò èbàm, à ghù a te fəmsô kə̀ kwò?”

²⁴Zən lo tsə̀təndə̄ghā zəla e fə̀ kôʼ ghəa ghən gho tɔ̀m è naŋa, yia kwo enyəa ghəa ghəlà ù teso dzâa wo lǒ èsəŋò.

²⁵Mo êzə lo, mò ndə̀mà tə aghəa tə̀ li tə lo nû Yɛso fə̀ fwaʼ mo ghe kâ tɔm naŋa; mo mbī e dzə̀m mò yò alekwuū kele mɛʼɛ̀ mwàʼsò u te wo u dzə̀m abugho ghe mò tɔɔ̄ mɛʼn tsughu ghəa ghəla Yɛso fə̀ ghəŋlo.