Read Aghem Dzɔ̌n 5 Bible Online

Dzɔ̌n 5 - Aghem bible

Dzɔ̌n 5

¹A m bùghò ghəa ghən tsəghà tsughu, zə kə Tə̀dzûu kə̀ li kə m kpee wò, Yɛso n nùghù kɔ̀ʼ ndùw an Yɛ̀lusalɛ̀m.

²Tsəm kə mmùghu kə̀ kə lo tsighā an Yɛ̀lusalɛ̀m kə̀ fə̀ kuʼù lo a fughu a fǔughɔ̄ŋ wə enaʼ wəla ghe fə̀ tɔŋlo enyəa à lǒ Fuū u ughɔ̄ŋ u Təndzì, ghe fə̀ tɔŋlo an shwaʼ u Hibùlù enyəa à lǒ Bɛ̀dsǎedà. Kə fə̀ ki ufwala u twɛ̀.

³Am fwala wən, à n lo nduw ko ghî ghəla ghe tɔʼɔ̀ tughūu yo — ghî à foō gho, ghî a bâ kə̀ mɔ̀ʼ, ùkwə̀ŋlo. [Ghe fə̀ ləmlo enyəa mùghù n noʼn kɔʼ;

⁴bòʼ tsə̀ndə̄ghā è Mughu ù te fə̀ bughōo fughu an tì kə̀ li ko, zə̀ n nyə̀ tsùghù fwə̀n kɔʼ tsəm kə te ko. Ghùw ù dzàŋa wəla ù nyə tsughu an tsəm kə te ko esə̄ n dzàŋ è tughu, abugho ù mò buʼù dzaŋà ko dzâŋ è ghɛ zo.]

⁵Tûwbʉ̀ghà ù lì n lo fughu mò ù n dzàŋ tsɛ̀lɛ̀ aŋ ghə̀m n tə̀nùu n təgha à nùu tò efāa.

⁶A m bùghò Yɛso kòʼ tsughu wə̄n mò ù nyə̌ŋ fughu, ù mô è kele enyəa gha kə n sə aŋghəa ghəla ghùw wə̄n nyə̂ŋ tsəgha fughu. Yɛso m bvʉ â wə̄n enyəa, “Ghù lə̀ghaa nù aletughu a?”

⁷Ghùw ù dzàŋa vʉ m bɛ̀lɛ̀ ndùw wə̄n enyəa, “Mughu ù te, Ŋ̀ ki yo ghùw wəla ù lò alenìi nyəā tsughuu ndûw mùghò an tsəm kə mmùghu kən abugho kə nughù fwə̂ən kɔʼ ghue wo. M̀ fɛ lǒ, mùghò mo e dzaʼā səā ndûw ko kə̀ghuw enyə, ghùw nùghù n daŋso tɛ̀ tsə̀ghà ndùw â sə ko.”

⁸Yɛso n dzɛ̀ ndùw â wə̄n enyəa, “Nùghu teme kɔ̀ʼɔ̀, ghù ŋgwuun nughuu kɔʼ ghâm fə̀ghà fò, ghù bwii sə nduw.”

⁹Tûwbʉ̀ghà vʉ n daŋso dzàŋ tùghù tən kɔʼ ko an nə̀gha e te zo, ù n daŋso nùghù ŋgwǔun nùghù kɔ̀ʼ ghâm fə wə̄n, bwìi nùghù ndùw am fwee e wə̄n. Tsuʼ u te wə n lo êzə̀ mò à lò Tsuʼntsə̄ u Tə̀dzûu.

¹⁰ Tuw ù Tə̀dzûu tə̀ n dzɛ̀ â ghùw vʉa ghe mô baāŋ kɔʼ enyəa, “Nɛ lò Tsuʼntsə̄, lâŋ kə̀ kâ bǒo dzə̀ enyəa ghù boʼo kele kɔʼ ghâm fə̀ghà fò.”

¹¹Tûw vʉ m fwə̀n bɛ̀lɛ̀ ndùw ghee enyəa, “Ghùw wəla ù mò ghəŋlo enyəa Ǹ dzaŋà tughu, mô dzɛ̀ â mùghò enyəa, ‘Nǐi kɔʼ ghâm fə̀ghà fò ghù bwii nughu nduw.’ ”

¹²Ghe m bvʉ â wə̄n enyəa, “À lǒ ghùw ù ghɛ̌ wò ù mò dzɛ̂ â ghù enyəa, ‘Nǐi kɔʼ ghâm fə̀ghà fò ghù bwii nughu nduw a?’ ”

¹³Lò èzə̀, ghùw vʉa ghe mô baāŋ tsughu n lo mò ù kwò yo ghùw wəla ù mò baāŋ ghee, tɔŋlo enyəa à fə̀ lo mo Yɛso n saŋ am bvʉa e saʼ kə aghì chia kə mò lo fùghu èzə̀.

¹⁴A m bùghò nəgha zə tsəghà tsughu, Yɛso ŋ kòom kòʼ tsughu ghùw vʉ̀ an Ndùghù è Kə̀zə̀ è nē an Yɛ̀lusalɛ̀m, dzɛ̀ â wə̄n enyəa, “Kòʼô, ghù n dzàŋ tughu! E kwo ko ghù lò kôom ghəə̄ŋ bo zo, fɛ̀ɛn kə eghəa kə̀ biigh kə lô kôom səā a zəŋò ghù.”

¹⁵Tûwbʉ̀ghà vʉ n nughù è tsughu, ndùw dzɛ̀ â Dzûu tə te to enyəa, à mò lò Yɛso ù mò ghəŋlo yia e dzâŋ tughu.

¹⁶Zən lò e ghee Dzûu tə fə̀ kaʼ tsughu alefughūu kaaŋ Yɛso â tsù wò, bòʼ ù fə̀ ghəə̄ŋ tsughu ŋgòʼ èghəa tò zən Tsuʼntsə̄ u ghee.

¹⁷Yɛso m bɛ̀lɛ̀ ndùw ghee enyəa, “Bəghà nǎam fwàʼà nù, yia M̀ fwaʼà sugho.”

¹⁸Zən lo e ghee Dzûu tə fə̀ fəghaān nughù sə kɔʼ enyəa ghe wii tsughu nû wə̄n, bòʼ ù fə kaa zaʼa ko yo lâŋ kə Tsuʼntsə̄ ko, ù fə̀ tɔɔŋ nduw sugho Kə̀zə̀ enyəa à lǒ Tselè ù wə̄n, naaŋ ndùw ghue u wə̄n enyəa ghèe Zə̀ kə̀ bâan nù.

¹⁹Yɛso n dzɛ̀ â ghee enyəa, “Kùmkùm, ghəa Ǹ dzâa wô fɛ â ghɛ̀, Wɛ yo aleghə̂əŋ ghəa è li zo an daʼa kə wə̄n, mò à bɔ̌ɔm yò ko fəgha kə̀là ù kòʼ ni aŋ wo ghùu Tsele; tɔŋlo enyəa, fəgha kə̀là Tsele ghəə̄ŋ tsughu, Wɛ m bɔɔm ghəəŋ tsùghù sùghò ghè kò.

²⁰Tsele ləghaa Wɛ, dèe wə̄n â ghəa ghə̀n à dzə̀m ghuūghùe u wə̄n u ghəŋlo; dèe wə̄n â ghəa ghəla a tughu tsəghàsə ghən gho enyəa tuw kə lo e kpuuw ghɛ a te.

²¹Aŋghəa Tsele bɔɔ̄m zôo nughùun kɔʼɔ̄ ghî à kpuuwn gho alo evʉ̄, naaŋ wò ghee â tuw ko, wɛ bɔɔm fughuu sùghò êzə̀ mughù zò â ghì ghə̀là ù tsə̀m tsughu.

²²Tsele ù te saʼa yo ghùw ù lì, ù ŋ kuuwn fughu Wɛ â daʼà ko enyəa ù è saʼa ghî ghò,

²³enyəa ghî ghə̀n à dzə̀m è fughuu nduw wɛ â kɔʼso mò aŋ ghəa ghəla ghe bɔɔ̄m kɔʼso sugho Tsele ù te a te. Ghùw wəla ù fughu yo wɛ â kɔʼso mò fi kɔʼso sùghò yo Tsele wəla ù tum wo wə̄n.

²⁴Kùmkùm, aŋghəa Ǹ dzâa wô fɛ â ghɛ̀, ghùw wəla ù zuw shwaʼ waŋa wo, boo fùghù ndùw â wə̄n wəla ù mò tum wô mugho lo kele nù mughù è doʼn təla zo, ghe kê dzùuw màʼn yǒ wə̄n; tɔŋlo enyəa ù n nùghù sə̀ wò alo evʉ̄, dòʼò wò â tuw ko.

²⁵Kùmkùm, M̀ fɛ dzàa wò nù â ghɛ̀, nəgha e te e kpee wò nù, zə m bùʼ kpē, mo ghî à kpuwnlo a kê zǔuw wô dzə̀ è Wɛ̀ ù Kə̀zə̀, ghəla ghe zuw tɔ, ghe lo zôo doʼò wò â tuw ko.

²⁶Nu ghəa Tsele ù te bɔɔ̄m ki mughùu zò a zəŋò wə̄n, vʉ̀a ù m boo sùghò enyəa Wɛ̀ kele tsughuu sughò èmùghùu a zəŋò wə̄n,

²⁷vʉ̀a ù fughu tsughu sugho wə̄n â daʼa ko aletsaʼā ghî ghò, bòʼ ù lǒ Wɛ ù Ghùw.

²⁸E kwo tuw kə lô so e kpuuw ghɛ̀ aŋ ghəa zən; tɔŋlo enyəa nəgha e te e kpee wò nù ghî à kpuuwn ghən à dzə̀m ghe nyə̂ŋ alo təshìaa, ghe lo zuūw tsughuu dzə̀ è wə̄n,

²⁹ ghe zôo səā kɔʼɔ̄ wô; ghəla ghe mo ghəə̄ŋ dzɔ̂ zò lo e zoōm kele wo mughù è doʼn təla zo, ghəla ghe mò ghəə̄ŋ bo zo lo e zoōm wo, ghe n sāʼ ghee, naŋa ghee aŋ ŋgōʼ.”

³⁰“Ǹ yo aleghə̂əŋ ghəa è li zo an daʼa kaŋā. Ǹ saʼa ko saʼ zaŋā aŋ ghəa ghəla Zə̀ kə̀ dzâa wo â mùghò, zə n l tsəghatsəgha, bòʼ Ǹ dəmà dzə̀ yò alefwàʼ ghəa ghaŋa a nʉ̀ghà ghò, Ǹ dəmà ko alefwàʼ ghəa a wə̄n wəla ù tum wô mugho.

³¹Abugho Ǹ teso dzâa ghəa zo, mò Ŋ̀ kə̂aa ghəa a ghùe ghaŋā, ghəa e te e fi yo dzə̂ êsəŋò.

³²Ghùw ù nùghù lò nû, ù teso dzâa ghəa ghaŋa gho, yìa Ŋ̀ kwo enyəa ghəa ghə̀là ù teso dzâa bòʼ mùghò lǒ èsəŋò.

³³ Ghɛ̀ maā ghì ghò a vʉ̀a Dzɔ̀n tum ndùw, ù n teso dzɛ̀ wò â ghɛ̀ fəgha kəla kə lo èsəŋò bòʼ mùghò.

³⁴À yò dzə̂ enyəa Ǹ ləghaa nù enyəa ghî ghə̀ teso dzâa kaaŋ tsəgha ghəa ghaŋā gho, Ŋ̀ ghəa ghən laam kə̀a wò enyəa to ghɛ̀ mo zə tuw ko.

³⁵Dzɔ̌n fə̀ lo tò təsɛnlo, tə m bəghanlo, bàŋà dzɔ̀ɔ sùghò, ghɛ̀ n ləghaa sùghò aletsùuŋ duʼn tsughu an tsə̂ è wə̄n è te.

³⁶Ghəa ghə̀là Ŋ̀ kuūwn kə̀aa wò â ghɛ̀ tsəghàtàʼà sə a Dzɔ̌n à teso gho; tɔŋlo enyəa fwàʼ wəla Tsele waŋā fughu enyəa M̀ fwaʼà mɛʼɛ̀, à lo fwàʼ ù mɔʼɔ̄ wəla M̀ fwaʼā, fwàʼ u te dêe nù enyəa Tsele waŋā m mùghò tum.

³⁷Tsele wəla ù tum wô mugho n teso dzɛ̂ sughò ghəa ghaŋa gho. Ghɛ̀ kaām bûʼ zùw kǒʼ dzə̀ e wə̄n, ghɛ̀ kaām kôʼ kòʼ sùghò kôʼ e ghùe u wə̄n zo,

³⁸ghɛ̀ yia ki sughò yo shwaʼ u wə̄n wo am fə̀ŋ tɛʼɛ, bòʼ ghɛ̀ boom fughuu ndùw yò â wə̄n wəla ù tum wo.

³⁹Ghɛ̀ kəŋo kô ghəa ghəla a lô am mwàʼsò kə Kəzə̀, bòʼ ghɛ̀ sô moʼò enyəa à lò a te ghɛ̀ kele mughù è doʼn təla zo; mò à mgbàŋ lò ko mwàʼsò kə̀ mɔʼɔ̄ kən ko kə teso dzâa wô ghəa ghaŋa gho.

⁴⁰Ghɛ̌ yia naām tuū alebùghò a vʉ̀a mùghò tò ghɛ̀ kele mughù è doʼn təla zo.

⁴¹Ŋ̀ kəŋo dzə̀ yo enyəa ghî ghə̀ è fughuu mugho â kɔʼso mò.

⁴²Ŋ̀ kuuwn kwo nû enyəa ghɛ̀ ki yo ləgha zo â Zə̀ kò am fə̂ŋ tɛʼɛ.

⁴³M̀ bughò an daʼa kə Bəghà, ghɛ̀ yia bōom yô ghəa ghaŋa gho; abugho ghùw ù lì ndùw bugho aŋ ŋgəŋ è wə̄n, ghɛ̀ ŋ kuuwn nì nàŋa wò wə̄n.

⁴⁴Ghɛ̀ sô lǒ ênzə̂n alebōo à, mò ghɛ̀ dwaʼa wɛʼɛ u nîi kǎaŋ wò aŋ ghùe zɛʼɛ lo, kuuwn kəŋo yo alekelê daʼa kəla Zə̀ kə̀là à mìa ko ghè kò fughuu â ghɛ̀ a?

⁴⁵Kà nlò môʼ enyəa Ǹ lo sɔ̀ʼɔ̀ wò kə̀ghu a zəŋò ghɛ̀ an sə kə Bəghà; à ghɛ̀ kɔlɔ̀ ko lwàŋ u Musî wəla ghɛ̀ tɔ̂ʼ boō fughu tsughu a te.

⁴⁶Abugho ghɛ̌ fə̀ boōm fughuu â Musî, to ghɛ̀ mâa bǒo fughu â mughò, nu ù fə̀ tɔm ghəa ghaŋa.

⁴⁷Abugho ghɛ̀ tâʼkè kuūwn bôo ghəa ghə̀là ù fə̀ tɔm naŋā, ghɛ̀ sô lǒ ênzə̂n alebôo shwaʼ waŋā à?”