Read Aghem Dzɔ̌n 7 Bible Online

Dzɔ̌n 7 - Aghem bible

Dzɔ̌n 7

¹A m bùghò ghəa ghən tsəghà tsughu, Yɛso n nùghùu ndùw aleŋgəā kaŋlo aŋ Galèlîi; ù mò yo aleŋgəā an Dzùdîa, bòʼ Dzûu tə̀ mò kəŋo dzì alewī wə̄n.

² À n lo mo Dzûu tə̀ so e bùghò zə zə kə Ntùghu.

³Waazə̂ a Yɛso ghə n dzɛ̀ â wə̄n enyəa, “Nùghu tsughu ndùw an Dzùdîa tò tsə̀təndə̄ghā tə̀ghà tə̀ kôʼ fwàʼ wəla ghù fwàʼa ghè wò.

⁴Tɔŋlo enyəa abugho ghùw ləghaa enyəa ghî à kelê fəgha kə̀là ù fwàʼa ghè kò, ù ki dzə yo alenalā fwaʼā. Abugho ghù ghəə̄ŋ ghəa gho tò ghən, e dee səa nduw ghue wʉ̀a wò.”

⁵Waazə̂ à ka fə bûʼ bǒo fùghù sùghò â wə̄n.

⁶Yɛso n dzɛ̀ â ghee enyəa, “Nəghā zaŋa e kāam kpe dzə̀, yia a bughò ghɛ, abugho à lò ko zən, to ghɛ̀ nduw an Yɛ̀lusalɛ̀m.

⁷Ghî a mbī yo alebɛ̀ ghɛ̀, ghe bâa nù mugho bòʼ Ǹ dzâa fùghuu wò ghəa a ghee à biigh ghəla ghe ghəŋlo.

⁸Ndǔuw ko nlò ghɛ fughu an zə kə te ko; Ŋ̀ kaam kɔʼɔ yo fughu an lùʼù kə kəzə̄ kən, nu nəgha zaŋā e kaam tɔ̀ʼ kpè mɛ̀ʼɛ̀.”

⁹Ghəa ù dzɛ̀ tsughu êzə̀, ù n dòʼòdòʼò tsùghù aŋ Galèlîi.

¹⁰Ghəa waazə̂ Yɛso à nughù kɔʼ nduw fughu an lùʼù kə kəzə̄ chì, ù n daŋso nùghù kɔ̀ʼ ndùw è sugho, à fə̀ kuuwn yo an ndɛ, ù fə̀ nan kɔʼ nû.

¹¹Ghî à ne a Tə̀dzǔu tə̀ ŋ kəŋo wə̄n fughu an lùʼù kə kəzə, bvʉa kaŋlo enyəa, “Ù lò ghɛ?”

¹²Ghî ghə̀ n tsoo waʼn kə̀a kǎaŋ tsə̀ghà ghəa a wə̄n fughu am bvʉa zə aghì. Ghî à li ghə n dzâa enyəa, “Ù lo ghùw ù dzùŋ.” À lì ghə kuuwn n dzɛ̀ enyəa, “Ù tsʉ̀a bǒon kaaŋ tsə̀ghà àghì.”

¹³Ghùw ù lì ŋ kuuwn yò alekə̀aa səā kɔʼ ghəa e wə̄n an ndɛ, ghe màʼa fə̀ tsəŋo ghî à ne a Tə̀dzûu ghò.

¹⁴A m bùghò ghe sô zə nyə kəŋo ndûw zə ko alo fətsə̀tèʼè, Yɛso n nùghù kɔ̀ʼ ndùw am ndùghù è Kə̀zə̀ è nē an Yɛ̀lusalɛ̀m, daŋso kɔ̀ʼ kàʼ ndùw ghî à tsʉā gho fughu.

¹⁵Dzughu zə n zuu Tə̀dzûu aŋ ghəa a te gho, ghe bvʉ enyəa, “Tûw wə̄n ghəa ghən kele ênzə̂n mò ù kaam tso nyə̀ kôʼ mwàʼsò kò a?”

¹⁶Yɛso m bɛ̀lɛ̀ tsùghù ghee enyəa, “Tsʉ̂ zəla M̀ fughuu fɛ â ghɛ̀, à yò dzə̂ ghəa a nʉ̀ghà ghaŋa, à lò tsʉ̂ e ghûw wəla ù tum wô mugho.

¹⁷Abugho ghùw tsə̀m tsughu alefwàʼ fəgha kə̀là Zə̀ kə̀ ləghaa ghè kò, to ù kele enyəa tsʉ̂ e te e nughù wò aŋ ghùu Zə̀ kò, ŋkāa Ŋ̀ kə̂aa wò ghəa a kəghu ghaŋā.

¹⁸Ghùw wəla ù kə̀aa ghəa a wə̄n a kəghū gho, ù kə̀ŋo ŋkɔʼso aŋ ghùe u wə̄n, wəla ù kuūwn kəŋo kɔʼso mò â ghùw wəla ù tum wo wə̄n lo ghùw wəla ù kə̀aa səŋò zò, nyàaŋ fə dzʉ fə̀ li fə yo aŋ ghəa a wə̄n à ghəəŋ gho.

¹⁹Musî ka fə ghɛ̀ â làŋ kə̀ mgbaŋ fughu a? Ghùw wɛʼɛ u mɔ̀ʼ vʉ̀a tsoō naāŋ yo lâŋ kə te ko. Ghɛ̀ mugho kəŋo kaŋlo alewī bòʼ kwò a?”

²⁰Ghî a te ghə n dzɛ̀ enyəa, “Ghù ki zə̀a fə̀ biigh fo. À kə̀ŋo ndugho dzì alewī ghu a?”

²¹Yɛso m bɛ̀lɛ̀ ndùw ghee enyəa, “Mugho mò ghəəŋ tsughu eghəa e mɔ̀ʼ, dzughu ghə n zùm ndùw ghɛ̀ a dzə̀m ènyə a te.

²² Musî fə̀ de tsughu â ghɛ̀ enyəa a sughoo tsə̀ghà tiigh kə ghûw (à yò dzə̂ enyəa à fə̀ lo ghəa e Musî, e fə nughūu nduūŋ wo aŋ ghùu ghê tsele), ghɛ̀ yia sughōo tiigh kə ghûw kò Tsuʼntsə̄.

²³ Abugho ghe lo alesugho tigh kə ghûw Tsuʼntsə̄, enyəa ghe lô bvuʼū lâŋ kə Musî kò, à sò lò kə kwò ghɛ̀ sô pfʉsō nə̀ghà mò enyəa zəŋò mùghò mò M̀ baaŋ kɔʼ ghùw an Tsuʼntsə̄ a?

²⁴E kwo ghɛ̀ lô saʼā ghî ghò aŋghəa ghɛ̀ kòʼò nduw ghee a te, e kuū saʼa tsughuu nlǒ saʼ zəla è lò tsəghatsəgha.”

²⁵Ghî a Yɛ̀lusalɛ̀m à li ghə n daŋso bvʉ enyəa, “Wən gbàŋ yǒ ghùw wəla ghe kəŋo dzì alewī a?

²⁶Wəlà, ù kə̀a ghəa gho an ndɛ, ghee yia buw alebvʉ̄ wə̄n â ghəa zo! À lò enyəa ghî à ne a sô yia kwo to nû enyəa wə̄n kùum lǒ Kə̀lestò à?

²⁷Lò êzə̀, yia a kuūwn mgbaŋ kwo luʼū wəla ghùw wən sə a te, abugho Kə̀lestò ù te kê bugho, ghùw ù mɔʼɔ kê kele yo luʼū kəla ù nùghù wo a te.”

²⁸Ghəa Yɛso sò zoʼn ghî ghò an Ndùghù è Kə̀zə̀ è nē an Yɛ̀lusalɛ̀m, ù n dzɛ̀ sə̀ wò an dzə̀ è tughu enyəa, “Ghɛ̀ mbaŋ kwo nû mugho, ghɛ̀ yia kwo sugho ghùw wəla ù tum wô mugho. E sô fɛ kuuwn lò enyəa, Ŋ̀ kâ fɛ bughò dzə̀ aŋ ŋgəŋ zaŋā, ghùw wəla ù tum wô mugho kəaa êsəŋo, ghɛ kuūwn kwo yo wə̄n.

²⁹Ŋ̀ kwo nû wə̄n, bòʼ Ǹ nughù wò a vʉ̀a wə̄n, tɔŋlo enyəa à tǔm wò wə̄n mugho.”

³⁰A m bùghò ù dzɛ̀ tsughu êzə̀, ghe ŋ kəŋo dzì alekwu wə̄n, ghuw u mɔ̀ʼ m buw alemɔ̀m wə̄n, bòʼ nəgha e wə̄n e fə̀ lo mo e kaām kpe.

³¹Lò êzə̀, ndə̀mà tə aghì tə n naam boo fughu ndùw ko â wə̄n. Ghe m bvʉ enyəa, “Abugho Kə̀lestò kè bugho, ù lo yia dêe nǔ sə̀ghà mò, mò mə̀ n tsə̀gha sə məla ghùw wə̄n lo mò ù m dè à?”

³²Ghî a Falàsîi ghə̀ n zuw aŋghəa ghî a shwəən kə̂aa kaāŋ ghəa gho a te kùu nduw Yɛso, ghee, ghèe ghê tuw u təfɔ̀e wə̀ n tum tsughu təgbè enyəa tə ndûw kwuū wô wə̄n.

³³Yɛso n dzɛ̀ â ghì ghò enyəa, “Ǹ naam lò nu sɛ̀ aŋ kə̀mà fə kəgha, sěe Ǹ lo nughùun nduw ebàm a vʉ̀a ghùw wəla ù tum wô mugho;

³⁴Ghɛ̀ e ke kəŋo mugho kòʼò yò. Luʼū kəla Ŋ̀ kê lo a te, ghùw wɛʼɛ u mɔ̀ʼ kè yo alebùghò fughu.”

³⁵Ghî ne a Tə̀dzûu à mo aŋ ghùe e ghee enyəa, “Ghùw wən yia so e boʼò ndûw ghɛ̀ an lùʼu kəla a buw alekəŋo kôʼ wə̄n a te à? Ù sò yia moʼò alendùw saŋe doʼo ndùw ghèe ghê Tòʼò zò à, ù e zoʼn nduw ghee a?

³⁶Ù sò yia moʼnlò èndugho aledzàa tsughu enyəa, Ghɛ lo e kəŋ mugho, ghɛ̀ è koʼo yo. Àsùghò enyəa, Luʼū kəla Ǹ nduūw a te, ghuw wɛʼɛ u mɔ̀ʼ yò alebùghò fughu?”

³⁷ Tsuʼ fəla zə kə mîanlo a te n lo tsuʼ fə̀ ne fo, Yɛso n nùghù těe è kɔʼ, dzɛ̀ sə wò an dzə̂ è tughu enyəa, “Ghùw wəla fə̀ŋ zuʼso wə̄n ù bùghò nyəma tsughu aŋ ghùu mùghò.

³⁸ Ghuw wəla ù boō fughu â mùghò aŋghəa mwàʼsò kə Kəzə̀ kə̀ dzaā enyəa, ‘Mùghù mə̀là m fughuu mughù zò lo kuŋu səa wò a zəŋò wə̄n tò fədzughù.’ ”

³⁹Ù fə̀ enyə kəaa kùʼu ndùw Zuʼ tə̀ Zɔlɔ to, təla ghî ghəla ghe fə̀ boō fughu tsughu â wə̄n fə̀ ki alekele. A n lo êzə̀ mo Zuʼ tə̀ Zɔlɔ tə te tə kaām bughò, bòʼ à màʼâ fə̀ naām lo mò Zə̀ kə kaām kwe u Yɛso ù təma wə n nî dè sə̀ kɔʼ aŋ kɔʼso məla Yɛso ki ghè mò.

⁴⁰A m bugho ghe zuw tsughuu ghəa ghən gho, ghî à li ghə n dzɛ̀ enyəa, “Kùmkùm, wə̄n kùum lǒ Ghùwshʉ̀ghà ù Kə̀zə̀.”

⁴¹À li ghə n dzɛ̀ enyəa, “Wən lǒ Kə̀lestò.” À li ghə ŋ kuuwn bvʉ enyəa, “À lò enyəa Kə̀lestò ù te lo səa wò aŋ Galèlîi ŋkāa?

⁴² À lǒ mo mwàʼsò kə Kəzə̀ kə̀ ka fə dzɛ̀ enyəa Kə̀lestò ù te kê sə̌a wò an tiigh kə Dɛvìd[8] à, mò ù nùghù wò am Bɛtə̀lɛ̀hɛ̂m, naʼà fəla Dɛvìd fə̀ sə a te a?”

⁴³Ghe fi nùghù ndzughuun dòʼò tsùghù nû bòʼ Yɛso.

⁴⁴Ghee à li ghə n ləghaa alekwū Yɛso, ghùw ù lì yo alemɔ̀m wə̄n.

⁴⁵Gbè ti tə n nùghù ndùw èbàm kwe è kwe a vʉ̀a ghì a Falàsîi ghò mo ghe lo ghèe ghê à tuw u təfɔ̀e wò. Ghe mbvʉ â gbè ti to enyəa, “À lǒ kwo ghɛ̀ sô doʼŋkè nîi wô wə̄n a?”

⁴⁶Gbè ti tə m bɛ̀lɛ̀ tsùghu enyəa, “Ghùw ù lì kaām ghəa gho enyə kə̂a kòʼ tǒ ghùw wən.”

⁴⁷Ghî a Falàsîi yi ghə m bvʉ̀ ndùw â ghee enyəa, “À lò enyəa ù ŋ ghɛ̀ sê mə̀ŋso sughò à?

⁴⁸À lǒ mò ghɛ̀ kôʼ nǔ ghî à ne à li gho ŋkāa ghî a Falasîi à li gho, ghe boō fughu â wə̄n a?

⁴⁹À sò fɛ kuuwn lò enyəa saʼ kə aghì kəla kə kwo yo lâŋ kə Musî kò, ghe ŋ ghee ləŋ naŋā.”

⁵⁰ Nìkòdɛmùs, ghùw kaāŋsì ù ghee u mɔ̀ʼ wəla ù fə̀ bûʼ ndûw dzə a vʉ̀a Yɛso â tsuʼ wo n bvʉ̀ â ghee enyəa,

⁵¹“A lo enyəa lâŋ kə sɛ̀ kə kɔlɔ̀ nu ghùw mo a kaām dzughu e wə̄n zə zuūw an tia e saʼa? Mo a kaām kəŋ kele kɔ̀ʼ sùghò ghəa zəla ù mò ghəə̄ŋ bonlō a?”

⁵²Ghe m bɛ̀lɛ̀ tsùghù wə̄n enyəa, “Ghù sə̀ sùghò aŋ Galèlîi ŋkāa? Kəŋ sə kɔ̀ʼɔ, ghù so e kele tsughu enyəa ghùwshʉ̀ghà ù Kə̀zə̀ ù lì kê yò alesəa koʼò wô aŋ Galèlîi.”

⁵³Ghe a dzə̀m n sɛ̀ɛ nùghùu ndùw an ndughu tə ghee.