Read Aghem Dzɔ̌n 8 Bible Online

Dzɔ̌n 8 - Aghem bible

Dzɔ̌n 8

¹A m bùghò ghe sɛ̂ɛ nughù nduw an ndughu tə ghee, Yɛso kuuwn nughùu kɔ̀ʼ ndùw aŋ kwàʼ u tə̀ Olèf.

²Â zùwzùw kə tsuʼ ko, ù ŋ kòom ndùw ebàm an Ndùghù è Kə̀zə̀ è ne an Yɛ̀lusalɛ̀m. Aghî a dzə̀m m bùgho tàʼ zùuŋ kɔʼ wə̄n, ù n tsughu doʼo è tsughu kàʼ ndùw tsʉ e fughu zo â ghee.

³Ghê dèekə̀làŋ à li gho ghèe ghê ghì a Falàsîi à li ghə n ni wò wìzən ù lì a fughu a vʉ̀a Yɛso, enyəa ghe kwu tsughu wə̄n mò vʉ̀a ù nyəŋ ghèe ghùw ù nùghù mò à yò num ù wə̄n, ghe n nì tiso naŋa sə̀ wò wìzən ù te an tsə̀tèʼè fə ghee.

⁴Ghe m bvʉ â Yɛso enyəa, “Wàdè, kôʼ wìzən wəla a kwu tsughuu, mò ù nyə̌ŋ ghèe ghùw ù nughù nùghù mò à yǒ num u wə̄n à.

⁵Lâŋ kə Musî kə̀ dêe enyəa a ki aletəə̄m wi ŋgòʼ è wìzən wən alo atiā. Ghù dzɛ̀ èndugho a te à?”

⁶Ghe fə̀ êzə̀ bvʉa ndùw alemɔ̀ɔ kôʼ Yɛso, ghe sô kəŋo enyəa ù kə̀a bôon tsughu ghəa è li zo, to ghe kwu wə̄n. Yɛso m fuʼu è tsughu kàʼ ndùw ghəa à tɔɔ gho alo kəbvʉ̄nlō an wàakə̀ghu u wə̄n.

⁷Ghəa ghe sô mgbɛɛ ko enyəa u fughu wo ghe a fə̀n kə edzughu ko, ù n daŋso nughu těe è kɔʼ, dzɛ â ghee enyəa, “Ghùw wəla ù kwò enyəa e kaām ghəəŋ boon kòʼ ghəa zo, u doʼò tsughu ghùw ù kə̀sə aletəma ndûw wìzən wən alo etiā.”

⁸U m fuʼu kpeʼe è tsughu, naam kâʼ ndùw ko ghəa à tɔɔ gho a ghueetsə̄.

⁹A m bùgho ghe zuw tsughu êzə̀, ghe ŋ kôom tǐin nùghù è tsùghù, fə mɔ̀ʼ fə̀ mɔ̀ʼ, mò à kàʼ nùghù tsùghu a yînoo esə̄, naŋa taʼa tsughu wìzən vʉ̀ wə̄n à nəŋ ko ghèe Yɛso.

¹⁰Yɛso n nùghù těe è kɔʼ, bvʉ à wìzən vʉ enyəa, “Êwɛ̀, ghe kôom ghɛ̀ɛ à? Ghùw ù ghee ù li u mɔ̀ʼ kà dzɛ̀ â ghù enyəa ghù kì alekpūw a?”

¹¹Wìzən vʉ̀ m bɛ̀lɛ̀ ndùw wə̄n enyəa, “Ɛ̂ŋgaŋ a Mùghu ù te, ghùw ù lì kâ dzɛ̀ dzə̀ êzə̀.” Yɛso n dzɛ̀ â wə̄n enyəa, “Ghuūghùe waŋā, Ǹ yo sugho tò mùghò è dzâa sughò êzə̀; nùghu e zəghà zò, e kuuwn kwo ko ghù lò so e kôom ghə̀ŋlo èbo.”

¹² Yɛso ŋ kə̀a kpèʼe ndùw àghəa â ghee enyəa, “Ǹ lo kəkɛ̀ʼɛ̀ â mbī. Ghùw wəla u nì ghuw kaŋā ko kê yò alebwiī alo kələ̄m. Ù lo kuuwn ki tsə̀ am mùghù e wə̄n.”

¹³ Ghì a Falàsîi ghə̀ n dzɛ̀ â wə̄n enyəa, “À ghəa a ghùe ghə̂a à kə̂aa wò ko ghù, à fi lo enyəa fəgha kəla ghù kə̀aa wo bò ghù yò dzə̂ èsəŋò.”

¹⁴Yɛso m bɛ̀lɛ̀ ndùw ghee enyəa, “Ghəa à bùʼù teso dzâa wo ko mugho ghəa a ughùe ghaŋā gho fɛ, shwaʼ waŋa u lo èsəŋo bòʼ Ŋ̀ kwo nû luʼū kəla Ǹ nughù wô a te àsùghò kəla Ǹ nduūw a te. Lò êzə̀ mò ghɛ̀ bùʼ kwò yo luʼū kəla Ǹ nughù wo a te ŋkāa kəla Ǹ nduūw a te.

¹⁵Ghɛ̀ saʼa mùghò an dzì zəla ghî a mbī a saʼā ghî ghò a te. Yia bùghò mugho, Ǹ saʼa yo ghùw.

¹⁶Abugho M̀ bûʼ saʼ ko ghùw, Ǹ lo tsəghatsəgha, tɔŋlo enyəa Tsele waŋā wəla ù tum wô mugho fwàʼa ghàʼa wə̄n.

¹⁷ An laŋ kɛʼɛ ghe tɔ̀m naŋa enyəa abugho aghî a bə̀ghà dzeŋe teso dzɛ̂ ghəa zo, zən lo èsəŋò.

¹⁸Ǹ teso dzàa wò ghəa a ughùe ghaŋa, Tsele waŋā wəla ù tum wô mugho vʉ̀a ù ti sugho ghàʼ à wə̄n.”

¹⁹Ghe m bvʉ ndùw a wə̄n enyəa, “Tsele wʉ̂a u tè lo ghɛ?” Yɛso m bɛ̀lɛ̀ ndùw ghee enyəa, “Ghɛ̀ kwo yo mugho ŋkāa Tsele waŋā. Abugho ghɛ̀ mô kwo mugho, to ghɛ̀ mô kwo sugho Tsele waŋā.”

²⁰Yɛso fə̀ ghəa ghən kəaa an lùʼu kəla ghe naāŋ kua wo a te aŋghəa ù fə̀ zoʼn ghî ghò Ndùghù è Kə̀zə̀ è ne an Yɛ̀lusalɛ̀m. Ghùw ù lì n yo alekwū wə̀n bòʼ nəgha e wə̄n e ka fə kaam kpē.

²¹Yɛso ŋ kòom dzàa â ghee enyəa, “M̀ fɛ̀ nùghùun nù. Luʼū kəla Ǹ nduūw a te, ghɛ̀ yo alebùghò fughu. Ghɛ̀ kəŋ mugho, ghɛ̀ è kəŋo keē, ghɛ̀ ke kpuwnlo am bòo tɛʼɛ.”

²²Dzǔu tə m bvʉ tsughu aŋ ghùe e ghee enyəa, “Ù lo yia so e wi nû ghue u wə̄n wo ŋkāa, ù sò dzâa wô enyəa, ‘Luʼū kəla Ǹ nduūw a te ghɛ̀ yo alebùghò fughu a?’ ”

²³U n dzɛ̀ ndùw a ghee enyəa, “Ghɛ̀ sə fɛ etsən, yìa Ǹ sə tsughu wô edzūŋ. Ghɛ̀ lo ghî a mbī gho, Ǹ yo dzə̂ ghùw ù mbī.

²⁴M̀ maā dzɛ̂ a ghɛ̀ enyəa ghɛ̀ lo kpuuw am bòo tɛʼɛ. Alekùu nîi tsughu, ghɛ̀ lo kpuuw nu am boo tɛʼɛ abugho ghɛ̀ tâʼkè boo enyəa Ǹ lo ghùw wəla M̀ mô dzɛ̂ â ghɛ̀ â sə ko.”

²⁵Ghe m bvʉ â Yɛso enyəa, “Ghù bìso lò ndugho a?” Ù m bɛlɛ̀ ndùw ghee enyəa, “Ǹ lo ghùw wəla M̀ mô bûʼ dzɛ â ghɛ̀ enyəa Ǹ lo ghè wo.

²⁶Ŋ̀ ki ndə̀mà tə aghəa alekə̀a kùu wò ghɛ̀ asùghò alesāʼ ghɛ kùu ndùw ghəa a te gho. E fɛ kuuwn lò enyəa ghùw wəla ù tum wô mugho kə̀aa êsəŋò, M̀ bɔɔ̄m naʼn wô ko fəgha kəla mùgho mò zuw ghè kò aŋ ghùu wə̄n â ghì a mbī gho.”

²⁷Ghe ka fə zuwkɛlɛ enyəa ù ghəa a fɛ kə̀aa kùu ndùw Tsele ù te (Kə̀zə̀).

²⁸Yɛso fi dzɛ̂ nù a ghee enyəa, “Abugho ghɛ̀ lo kɔʼsō kɔʼ Wɛ ù Ghùw, ghɛ̀ lo daŋso kele tsughu enyəa Ǹ lo ghùw wəla Ǹ dzɛ̂ enyəa Ǹ lo wə̄n, àsùghò enyəa Ŋ̀ ghəəŋ yo ghəa è lī zo aŋ ŋgəŋ zaŋā tsə̀ghàa sə̌a ko yo fəgha kəla Bəgha mo de â mùghò.

²⁹Ghùw wəla u tum sə wô mugho lǒ ghàʼ à wə̄n. Ù kê zə̀ghà màʼà kòʼ yò mugho, mugho à nəŋ ko bòʼ enyəa M̀ fwaʼà kô fəgha kəla kə tsəmsō fə̀ŋ è wə̄n.”

³⁰Ghəa ù kə̀a sə wo shwaʼ u wə̄n wo, ndə̀mà tə aghì tə m boo fughu ndùw â wə̄n.

³¹Yɛso n daŋso dzɛ̀ ndùw â Dzûu təla tə mò lo mo tə m boo fughu â wə̄n enyəa, “Abugho ghɛ̀ bɔɔ̄m bwîi nduw dzə an tsʉ̀ zaŋa, ghɛ̌ fi kûum lǒ tsə̀təndə̄ghā taŋā,

³²ghɛ̀ lo e kwo səŋò zò, səŋò e te e lo bəghāasə̄ ghɛ.”

³³ Ghe m bɛ̀lɛ̀ ndùw wə̄n enyəa, “Ghaʼ lo wɛ a awɛ ghə Abə̀làhâm, ghàʼ kaām doʼò kòʼ am fàŋa kə ghùw ù lì. Ghù lò ênzə̂n aledzaā wo â ghàʼ enyəa, ‘Ghe lo bəghāsə̄ ghɛ a?’ ”

³⁴Alebɛ̀lɛ̀ ndùw ghee, Yɛso n dzɛ̀ â ghee enyəa, “Kùmkùm, ghùw wəla ù ghəəŋ bo zo lo kəkɔ̂ â bo zo.

³⁵Kɔ̂ kə mùghùun dòʼn tə̀la tsə̀gha yò an ndughu lô Mughùbè ù wə̄n, wɛ ù mughùbè kǔuwn lò tən nû an ndughu lǒ ghee.

³⁶À fi lo enyəa, abugho Wɛ ù Ghù zè zəghàa ghû, ghù fi kùum nɔ̀sə̀ nû, ghù n lo fwè.

³⁷Ŋ̀ kwo nû enyəa ghɛ̀ lo wɛ a awɛ ghə Abə̀làhâm, ghɛ yia naām kəŋo ko dzì alewī mugho, bòʼ enyəa shwaʼ waŋa u ki yo bəla ko am fə̀ŋ tɛʼɛ.

³⁸Ŋ̀ kə̀aa ghəa ghəla Ŋ̀ kôʼ nî kɔʼ aŋ ghùu bə̀ghà, ghɛ̀ yia kuūwn ghəə̄ŋ ghəa ghəla ghê tsùgho mò zoʼn ghɛ a te.”

³⁹Ghe bɛ̀lɛ̀ ndùw wə̄n enyəa, “Abə̀làhâm lo tsele waʼā.” Yɛso n dzɛ̀ â ghee enyəa, “Abugho ghɛ mô lô wɛ gho Abə̀làhâm ghò, to ghɛ̀ mô ghə̌əŋ sùghò ghəa ghəla Abə̀làhâm fə̀ ghəŋlo.

⁴⁰Êzə̄ŋ, ghɛ̀ yia sô kuūwn kəŋo dzì alewī mugho, bòʼ Ǹ dzâa wò ghɛ â səŋo zəla Ǹ zuw wo aŋ ghùu Zə̀ kò; ghəa ghəlà ghɛ̀ ghəŋlo yo dzə̂ tò ghəla Abə̀làhâm fə̀ ghəŋlo.

⁴¹Ghɛ̀ ghə̂əŋ ghəla tsele wɛʼɛ fə̀ ghəŋlo.” Ghe n dzɛ̀ â Yɛso enyəa, “Zə̀ kə̀ lo ko tsele waʼā wəla ghàʼ ki, ghǎʼ yia kûum lô wɛ a wə̄n gho.”

⁴²Yɛso n dzɛ̀ â ghee enyəa, “Abugho Zə̀ kə̀ mô lo tsele wɛʼɛ, to ghɛ̀ mô lə̀ghāa mùghò. Bò enyəa Ŋ̀ kâ fɛ bùghò dzə̀ aŋ ŋgəŋ zaŋā, à mùghò tum ghue ū Kə̀zə̀.

⁴³À sò lǒ kwò ghɛ̀ kuūwn zuūwkɛlɛ̄ yo ghəa ghə̀là Ŋ̀ kəaa. À lǒ bòʼ ghɛ̀ n tue enyəa ghɛ̀ zuuw yo shwaʼ waŋā wo.

⁴⁴Ghɛ̀ lo ko tǒ tsele wɛʼɛ, tɔɔŋ Satàn, moʼn zɛʼɛ zə e bɔ̄ɔm lǒ ko alefwàʼ fəgha kə̀là tsele wɛʼɛ ləghaa ghè kò. Alenìi nughù wô, ù fə̀ wii tsəgha aghî, tuu màʼnlò èsə̀ŋò, bòʼ səŋò è li e yo zəŋò wə̄n. Abugho ù kaʼ gha zo, ù fi kə̂aa ghəa ghəla a kpe am mùghù e wə̄n, bòʼ àgha a dzəa wə̄n, vʉ̀a ù lǒ ghùw wə̀ àghā.

⁴⁵Ghɛ̀ kuuwn boom fughu wò yò â mùghò bòʼ Ǹ sô dzâa səŋò zò.

⁴⁶À lò ndughoo am bvʉa zɛʼɛ̄, ù lò aledèe wò bo zəla Ŋ̀ ghəŋlo a? Abugho à lò enyəa Ŋ̀ kə̂aa èsəŋò, à lǒ kwò ghɛ̀ sô boōm fughu wô yo â mùghò à?

⁴⁷Ghùw wəla ù lo ghùw ù Kə̀zə̀, ù zǔuw shwaʼ u Kə̀zə̀. Zə zəa e sô lô enyəa ghɛ̀ yo dzə̂ ghî a Kəzə̀ gho, zə lo e ghee ghɛ̀ yo alezuw shwaʼ wən.”

⁴⁸Dzûu tə̀ dzɛ̀ ndùw â wə̄n enyəa, “Ghǎʼ fi lo nû tsəghatsəgha aledzɛ̀ enyəa ghù lǒ ghuw ù Sàmalìa, ghù vʉ̀a ghù ki sugho zə̀a fə̀ biigh.”

⁴⁹Yɛso m bɛ̀lɛ̀ ndùw ghee enyəa, “Ŋ̀ ki yo zə̀a fə̀ biigh fo, M̀ fughuu ŋkɔʼso â Bə̀ghà, ghɛ̌ yîa kuūwn lʉghāa mugho.

⁵⁰Ŋ̀ kəŋo yo kɔʼso mò aŋ ghùe waŋā; ghuw wəla ù kəŋo kɔʼso mò â mùghò lò nû, à lǒ wə̄n ù lo saʼā ghî ghò.

⁵¹Kùmkùm, Ǹ dzâa wô â ghɛ̀, ghùw wəla ù zuw nî shwaʼ waŋa wo kè kpùw yo.”

⁵²Dzûu tə̀ n dzɛ̀ â wə̄n enyəa, “Ghàʼ kwo nû êzə̄ŋ enyəa ghù ki zə̀a fə̀ biigh fo. Abə̀làhâm ghèe ghê ghǐishʉ̀ghà à mafə̄ kpuwnlo, ghù vʉa ghù so enyəa, ‘Ghùw wəla ù zuw nî shwaʼ waŋā wo kè kpùw yo.’

⁵³À lò enyəa ghù tsə̀ghàsə nû tsele waʼā Abə̀làhâm ghèe ghê ghiīshʉ̀ghà a Kəzə̀ ghəla ghe fə̀ kpuwnlo a? Ghù mòʼò enyəa ghù lò ndugho a?”

⁵⁴Yɛso m bɛlɛ̀ tsùghù enyəa, “Abugho M̀ mô sô Ŋ̀ kɔʼso ghue waŋā, à yò dzə̂ ghəa è li zo, à lò Bəghà ù kɔʼso mugho, wəla ghɛ dzɛ̂ enyəa à lo Zə̀ kɛʼɛ.

⁵⁵Mò ghɛ̀ kaām wə̄n ŋ kele, yìa Ŋ̀ kwo wə̄n. Abugho Ǹ dzɛ̂ enyəa Ŋ̀ kwo yo wə̄n, M̀ fi bɔɔm lò sugho ghuw wə àgha tò ghɛ. Ŋ̀ kuuwn kwo no wə̄n, yìa m bwiī an dzə̂ è wə̄n.

⁵⁶Tsele wɛʼɛ, Abə̀làhâm fə̀ tsoʼn nû enyəa e lo kòʼò nù tsuʼ fəla Ǹ lo bughoo a te. A m bùghò ù kò tsughu, ù n duʼnlo.”

⁵⁷Dzûu tə̀ n dzɛ̀ â wə̄n enyəa, “Ghù kaam kɔʼ kpe ghə̀m n tə̀ nùu mò ntɛ̀, ghù vʉ̀a ghù lǒ mò ghù ŋ kòʼ Abə̀làhâm a?”

⁵⁸Yɛso n dzɛ̀ â a ghee enyəa, “Alekùum nîi tsughu aŋghəa Ǹ dzâa wô â ghɛ̀, to ghe e bughò dzə Abə̀làhâm, à fə̀ lo mò Ǹ lo nû.”

⁵⁹Ghe ŋ kūum kɔʼ atia aletəə̄m wīwə̄n a te. Yɛso ŋ kuuwn nàn dòʼò tsùghù am bvʉa zə aghì, nyɛʼɛ zə̀ghàa tsughu Ndùghù è Kə̀zə̀ è ne zə an Yɛ̀lusalɛ̀m.