Read Aghem Dzɔ̌n 9 Bible Online

Dzɔ̌n 9 - Aghem bible

Dzɔ̌n 9

¹Ghəa Yɛso bwìi daŋso nduw, ù ŋ koʼ tsùghu ghùw mo ghe fə̌ wə̄n dzə wo mò ù m fò.

²Tsə̀təndə̄ghā tə wə̄n tə m bvʉ â wə̄n enyəa, “Mughùbè, à fə̀ bo e ghəəŋ ghùw wən ŋkāa à fə̀ lo tselè ghèe zə̀ à, e màʼâ fə̀ lô enyəa ghe fə̌ wə̄n dzə mò ù m fò a?”

³Yɛso m bɛ̀lɛ̀ tsùghu ghee enyəa, “À yo dzə̂ enyəa ghùw wə̄n fə̀ ghəəŋ bo è loʼ zo ŋkāa à fə̀ lo tsele ghèe zə̀, ghe fə̂ wə̄n enyə dzə wo aledèe tsughu daʼa kə Kə̀zə̀ a zəŋò wə̄n.

⁴Êzə̄ŋ wəla à naām lô â tsə̀ tò, sɛ̀ ki alembaā fwaʼà tsughu fwàʼ kə ghùw wəla ù tum wô mugho, nu tsuʼ u dzəa wò nù mò ghùw kòom bùʼ yò aleghə̂əŋ ghəa è li zo.

⁵ Tò aŋghəa Ǹ naām lô fɛ am mbī, Ǹ lo tsə â mbī.”

⁶A m bùghò ù dzɛ̀ tsughu êzə̀, ù n tsə tsughu ntəghà a ghueetsə̄, nɔm kɔʼ kətsaʼ an təghà n te mò, zɔʼ ndùw an sə a ghûw vʉ̀.

⁷Aŋghəa Yɛso zɔʼ nduw tə̀ghà mò an sə a ghûw vʉ̀, ù n dzɛ̀ â ghùw vʉ enyəa, “Nduw tsughu sǔuw kɔʼ sʉ wʉ̀a wò an tsəm kə Silwàm.” (Silwàm mòʼnlò enyəa, Ghùw ù tum). Ghùw ù vʉ n ndùw tsùghù sùw kɔ̀ʼ wò è sugho, nùghù wò èbàm mò ù kòʼò tə̀luʼū.

⁸Ghî a kɔn a wə̄n ghèe ghê ghì ghəla ghe mò bûʼ kwo tsəgha ghùw wən enyəa à lò nɔ̀ɔ kə̀ nɔ̄e m bvʉ aŋ ghùe e ghee enyəa, “Wən mgbàŋ yǒ ghùw wəla ù dòʼ tsəghà a fiā, nɔɔ kə̀nɔe a?”

⁹Ghî à li ghə n dzɛ̀ enyəa, “À lo wə̄n.” À li ghə ŋ kuuwn dzɛ̀ enyəa, “Hǎe dzə̂, à kǔuwn lǒ fwèen kə wə̄n.” Ghuūghùe ù ghûw ù te wə n dzɛ̀ enyəa, “À lò mugho ghùw ù te.”

¹⁰Ghe m bvʉ â wə̄n enyəa, “Ghù kàʼ tsughu ênzə̂n alekoʼo luʼū to a?”

¹¹Ù m bɛ̀lɛ̀ ndùw ghee enyəa, “Ghùw wəla ghe tɔŋlo enyəa à lò Yɛso mò nam kɔʼ kətsaʼ, nɔ̀m wò an sə ghaŋā, vʉ̀a ù dzɛ̌ â mùghò enyəa, ‘Tsughu ndùw an tsəm kə Silwàm, ghù suw kɔʼ sʉ wʉ̀a wò.’ Yìa Ǹ n ndûw sûw sə kɔʼ sugho, daŋso kaʼ ndùw alekòʼ tə̀luʼū.”

¹²Ghî a te ghə m bvʉ â wə̄n enyəa, “Ghùw ù te wɛ̂ɛ?” Ù dzɛ̀ â ghee enyəa, “Ŋ̀ kwo yo.”

¹³Ghe n nì ndùw ghùw vʉ̀a ù mo bûʼ fô doʼō avʉ̀a ghì a Falàsîi ghò.

¹⁴À n lo êzə̀ mo tsuʼ fə̀la Yɛso fə nî kɔʼ tsaʼ ko nɔ̀m ndùw an səa a ghuw vʉ̀, ghùw ù te kàʼ ndùw luʼu tə̀ koʼo to fə̀ lo Tsūʼntsə̄ u Tə̀dzûu.

¹⁵Ghî a Falàsîi ghə̀ m bvʉ kpeʼe ndùw sùghò â wə̄n enyəa ù mò kaʼ ênzə̂n alekoʼō luʼū to. Ù n dzɛ̀ â ghee enyəa, “Ù mò nɔ̀m wò kətsaʼ an sə ghaŋā, yia Ŋ̀ n sûw maʼà tsughu ghue wo, yìa Ǹ daŋso kàʼ nduw alekòʼ tə̀luʼū.”

¹⁶Ghî a Falàsîi à li ghə n dzɛ̀ aŋ ghùe e ghee enyəa, “Ghùw wən kâ nùghùu wò dzə̀ a vʉ̀a Zə̀ kò, bòʼ ù nǎaŋ yo lâŋ kə Tsuʼntsə̄ ko.” À li ghə ŋ kuuwn dzɛ̀ enyəa, “Ghùw ù bǐigh lo ênzə̂n aledeē ŋgò è tsə̌a tən to a?”

¹⁷Ghe ŋ kòom bvʉ kpeʼe ndùw â ghùw ù fǒo vʉ enyəa, “Yia a bughò ghû, ghù dzɛ̀ êndūghō kùu ndùw wə̄n a, aŋghəa à lǒ wə̄n ù mo tsʉ sə ghəa ghò a?” Tuwbʉ̀ghà vʉ n dzɛ̀ â ghee enyəa, “Ù lǒ ghùwshʉ̀ghà ù Kə̀zə̀.”

¹⁸Ghî à ne a Tə̀dzûu a ka fə kaam boo dzə̀ enyəa ghe fə̀ ghùw wə̄n dzə mò ù fù dòʼò nù, vʉ̀a ù kòom kaʼ alekòʼ èzə̄ŋ, sěe ghe sô telè tɔɔ̄ŋ tsughuu tsele ghèe zə̀,

¹⁹bvʉ â ghee enyəa, “Wən lô wɛ wɛʼɛ wəla ghɛ so enyəa ghɛ̌ fə̀ dzə mò ù fò dòʼò nù a, e sò lǒ ênzə̂n enyəa ù kòʼò tə̀luʼū a?”

²⁰Ghê tsele m bɛ̀lɛ̀ tsughù enyəa, “Ghàʼ kwo nû enyəa wə̄n lo wɛ waʼā, a fə wə̄n dzə wo mò ù fò dòʼò nù.

²¹Yia abugho dzì zəla ù kaʼ a te alekòʼ, ghà sô kǔuwn kwo yo, ŋkāa ghùw wəla ù tsʉ sə a wə̄n gho, ghàʼ kwo sugho yo. Bvʉ ndùw nlò â wə̄n, ghuūghùe u wə̄n u dzâa wo, nu ù mô êzə̄ŋ noo kpē sùghò aŋ ghûw.”

²²Ghê tsele fə̀ ghəa ghən enyə kəaa ghe sô tsəŋō ghî à ne a Tə̀dzûu ghò, nu ghî ne a Tə̀dzûu a te a mafə̄ ki ge naŋā enyəa abugho ghùw kè tɔ̂ʼ dzɛ̂ sə wo enyəa Yɛso lǒ Kə̀lestò, ghe n dzùm sə ghùw ù è vʉ̀ an Ndùghène è Tə̀dzûu.

²³Zən lò e ghee ghê tsele fə̀ dzɛ̂ enyəa, “Ù n noo kpē aŋ ghûw, tɔ̀ʼɔ bvʉ tsughu ko nlǒ â wə̄n.”

²⁴Ghe n tɔŋɔ kpeʼe tsughu ghùw vʉ̀a ù mò fô doʼo alendùw sə alo tənəgha tə bəgha dzɛ̄ â wə̄n enyəa, “Dzǎa wò səŋò zò alefughu ŋkɔʼso â Zə̀ kò, nû ghàʼ kwo nû enyəa ghùw wə̄n lo ghùw ù bǐigh.”

²⁵Tûw vʉ m bɛ̀lɛ̀ ndùw ghee enyəa, “Ŋ̀kāa ù lǒ ghùw u bǐigh, ŋkāa ù yǒ, Ǹ yo tò mùghò è kele. Ghəa e lo ko e mɔ̀ʼ Ŋ̀ kwo, enyəa mùghò fə̀ fo doʼo nû, êzə̄ŋ yia Ŋ̀ koʼo.”

²⁶Ghe m bvʉ â wə̄n enyəa, “Ù mò ghəŋlo êndūghō â ghù a? Ù mò sə ghə̀a à tsʉ ênzə̂n?”

²⁷Tùw vʉ m bɛ̀lɛ̀ ndùw ghee enyəa, “Mùghò m mgbàŋ dzɛ̀ â ghɛ̀, ghɛ̀ yia ləghaa yo alebōo, à sò lò kə kwò ghɛ̀ kôom ləghaa alezuūw kpeʼè à? Ghɛ̀ ləghaa sùghò aledòʼò tsə̀təndə̄ghā tə wə̄n a?”

²⁸Ghî a Falàsə̂ ghə̀ n shə̄n wə̄n enyəa, “À lò ghû tsə̀ndə̄ghā è wə̄n, ghàʼ kuuwn lǒ tsə̀təndə̄ghā tə Musî.

²⁹Ghàʼ kwo nû enyəa Zə̀ kə mafə̄ ghəa gho â Musî kə̀a. Yia kuūwn bugho â ghùw wə̄n, ghàʼ bûʼ kwò yo luʼū kəla ù sə a te.”

³⁰Ghuw ù te m bɛ̀lɛ̀ tsùghù enyəa, “Ghəa è səŋò zə̀a. Ghɛ kwo yo luʼū kəla ù nùghù wo a te, vʉ̄a ù tsʉ sə ghaŋa gho.

³¹A kwo nû enyəa Zə̀ kə̀ zuuw yò shwaʼ u ghì à biigh gho. Zə e kuūwn lô enyəa, abugho ghùw kɔʼso Zə̀ kò, ghə̂əŋ ghəa ghə̀là Zə̀ kə̀ ləghaa, Zə̀ kə n zə̂ən shwaʼ u ghûw ū te.

³²Tò aŋghəa mbī fə̀ kàʼ, a kāam zuw kòʼ enyəa ghe fə̀ dzə wo ghùw mò ù fò dòʼò nù, ghùw ù lì m bughò tsʉ̀ kɔ sə a wə̄n.

³³Abugho Zə̀ kə̀ mô doʼŋ̀kè tum ghùw wə̄n, to ù mò yo aleghə̂əŋ ghəa è li zo.”

³⁴Ghe n dzɛ̀ â wə̄n enyəa, “Ghî fə̀ biigh fən, mo ghe fə̀ fə̀fùghù dzə alo ebō, fə̀fùghù fə̀ n noo sùghò alo ebōʼ, ghù so e bughò zoʼn ghàʼ à?” Ghe n dzùm nùghù sə ghùw ù fǒo vʉ̀ an Ndùghène è Tə̀dzûu.

³⁵Yɛso n zuw tsughu enyəa ghe n dzûm nùghù sə ghuw ù te an Ndùghène è Tə̀dzûu. A m bùghò Yɛso ndùw kôʼ tsughu ghùw vʉ̀, Yɛso m bvʉ â wə̄n enyəa, “Ghù m boo fughu â Wɛ ù Ghùw?”

³⁶Ù n dzɛ̀ â Yɛso enyəa, “Dzǎa wò mugho â ghùw wəla Wɛ ù Ghùw lô ghè wò a Mughùbè, tò M̀ boō fughu ndûw â wə̄n.”

³⁷Yɛso n dzɛ̀ â wə̄n enyəa, “Ghù ŋ wə̄n kôʼ, à fɛ lo wə̄n ù kə̀aa wô ghəa gho êzə̄ŋ â ghù.”

³⁸Ghùw ù te n dzɛ̀ enyəa, “Mughu ù te, mùghò m boo fughu.” Ù m fughu Yɛso â kɔʼso mò.

³⁹Yɛso n dzɛ̀ enyəa, “M̀ fɛ bùghò alebùghò saʼ ghî a mbī; enyəa ghî ghəla ghe fô doʼo e lo alekoʼo luʼū to, asùghò enyəa ghəla ghe moʼò enyəa ghe koʼò nù luʼū to, e lo alefòo doʼò.”

⁴⁰A m bugho ghî a Falàsî ghəla ghe mò kuʼù ti am bùghò e Yɛso zuw tsughu ghəa ghən gho, ghe n dzɛ̀ â Yɛso enyəa, “Tò à fɛ lo enyəa ghàʼ fô dòʼò sùghò nù a?”

⁴¹Yɛso m bɛ̀lɛ̀ nduw ghee enyəa, “Abugho ghɛ̀ mô boōm tsughuu enyəa ghɛ̀ fôo dòʼò nù, to ghɛ̀ mô ki yò bo e li zo. Êzə̄ŋ wəla ghɛ̀ dzɛ̂ enyəa, ‘Ghàʼ koʼò nù luʼū to.’ Bôo tɛʼɛ tə naam lò ko nû.”