Read Aghem Kə̀fwàʼ 1 Bible Online

Kə̀fwàʼ 1 - Aghem bible

Kə̀fwàʼ 1

¹ Am mwàʼsò kə sʉesʉ kəla mùgho fə̀ tɔm wô â ghù a Tǐofilùs, mùgho fə̀ tɔm ghəa ghəla Yɛso fə̀ ghəŋlo alenìi nughù wô,

²bùghò tɛ̀ wò tsuʼ fəla ghe mò nî kɔʼ nduw wə̄n alo kəwālā, mo daʼa kə Zuʼ tə̀ Zɔlɔ kə ŋ wən ghəəŋ tsughu ù m fùghù tsùghù dzə̀ ètsʉ̀ â tum tə wə̄n təla ù fə̀ shîaa kɔʼ.

³A m bùghò ù zuw mɛʼɛ̀ tsughu ŋgoʼ, ù ŋ kɔ̀ʼsə kɔʼ alo evʉ̄, bùghò dè wò ùghue â sə à tughu gho â ghee an ndə̀mà tə tədzǐi, gbə̀nsə kaŋlo a vʉ̀a ghee aŋ ghə̀m mə̀ ntsùʼu n te mò n chìakò, kə̀aa ndùw ghee â ghəa e fɔ̀e u Kəzə̀ zò.

⁴ A m bùghò ù lǒ ghèe ghee, tsuʼ ù li wo, ù m fughu tsughu kəlâŋ â ghee enyəa e kwo ghe lô so e zəghàan Yɛ̀lusalɛ̀m, nyəa ghe doʼò tsughuu ko fughu, ghe ləmā tsughu to kə Tsele. Ù n dzɛ̀ â ghee enyəa, “Zən lò zəla ghɛ̀ zuw an dzughu zaŋā;

⁵Dzɔ̌n fə̀ ghî ghò â mùghù ŋ Kə̀zə̀ m fughuu alo mmùghu, gha kə kôom sə̌a yo aŋghəa ghe lo kuūwn fughuu ghɛ â mùghù ŋ Kə̀zə̀ mò alo təzùʼ.”

⁶A m bùghò tsuʼ ù li wo tsətəndə̄ghā tə zûuŋ doʼò tsughu ghèe ghê Yɛso, ghe m bvʉ tsughu â wən enyəa, “Mughùbè, zən lò nəgha zəla ghù se fughuu tsəghàa ndûw fɔ̀e u te wo â Ezə̀lɛ̂ hò à?”

⁷Ù m bɛ̀lɛ̀ tsùghù enyəa, “À yò dzə̂ ghɛ alekele ènəghā àsùghò tì kəla Tsele ù te naŋā tsughu an daʼa kə wə̄n.

⁸ Ghɛ̀ lo kuuwn kele tsughuu ùdwaʼa abugho Zùʼ è Zɔ̀lɔ lo bughò tsɛ̀ʼɛ̀ ghɛ; ghɛ̀ lo daŋso doʼō tsughu ghɛ̀ è mʉā fughuu gùw zaŋa an Yɛ̀lusalɛ̀m, an Dzùdîa e dzə̀m à Sàmalìa e dzəm, àsùghò alendùw tâa ndûw aŋ kàlà tə mbī ten tə̀ dzə̀m.”

⁹ A m bùghò ù dzɛ̀ tsughu ghəa ghən gho, ghe n toʼn nùghù kɔ̀ʼ ndùw wən e dzuŋ mo tsə̀təndə̄ghā tə wə̄n tə lɛɛn ndùw nù, ù ŋ kɔ̀ʼ sàŋà nyə̀ ndùw am mbàʼ, ghe ŋ kôom yò alekòʼ wə̄n.

¹⁰Ghəa ghe naām lɛɛn kɔʼɔ̄ ndûw wala ko aŋghəa ù kɔʼɔ̄, ghe n nùghù tɛ̀fìi kɔ̀ʼ ghî à li gho a bə̀ghà ghe ti ghèe ghee à ndzʉ tə̀ fəmā to a zəŋo e eghùe.

¹¹Ghî yi m bvʉ â ghee enyəa, “Ghî a Galèlîi ghò, ghɛ̀ sô mgbɛɛ ti enyə lɛɛn kɔʼɔ ndùw kəwala à? Yɛso wən, wəla ghe nî nughù kɔʼ fɛ aŋ ghùu ghɛ̀, nì nùghù kɔ̀ʼ ndùw â wən alo kəwālā, ù kè bɔ̌ɔm bùghòo sùghò an dziī è mɔ̀ʼɔ aŋ ghəa ghɛ̀ koʼ ù kɔʼ ndûw a te alo kəwālā.”

¹²A m bùghò ghe zəghàa tsughu kwâʼ u Olēvɛ̀t wò, nùghù ndùw èbàm an Yɛ̀lusalɛ̀m; kwâʼ u Olevɛ̀t ù kuʼù dòʼò tsughu ko ghèe Yɛ̀lusalɛ̀m, mò ghùw bwìi tò ebəghaa e mɔ̀ʼ (bwìi e tsuʼ u Sabàt u mɔ̀ʼ), alenùghù tsughu an Yɛ̀lusalɛ̀m ndùw tɛ̀ fughu.

¹³ A m bùghò ghe nyə nduw enaʼ, ghe n tsə̀ghà kɔ̀ʼ ndùw an dzughu e ndughu zəla ghe mò mughu a te an ndùghù è kɔ̀ʼɔ daŋso. Ghî ghəla ghe mò lo a fughu mò lo Pità, Dzɔ̌n, Dzɛ̂ms, Andùlù, Felêp ghèe Tɔ̀mâs, Bàtòlòmîa n lo sugho ghèe Matìo, Dzɛ̂ms, wɛ̀ ù Afìus n lo, Sǎemòn Zilɔ̀t n lo sugho, àsùghò Dzudàs, wɛ̀ ù Dzɛ̂ms.

¹⁴Ghee a dzə̀m n dzeŋe gɔ̀ɔŋ tsə̀ghà ko kaʼkəkaʼ ghèe ghê ghìzən à loʼ gho, àsùghò Mèle, tɔɔŋ zə̂ Yɛso, à waazə̂ a Yɛso ghò.

¹⁵An tsùʼu n te mò ko, ghəa ghe zûuŋ wô tsuʼ ù li wo (ghe fə̀ dzeŋe lo bɔm fə aghì à ghì ghò ghuūghûw), Pità n nùghù těe è kɔʼ, dzɛ̀ tsùghù enyəa,

¹⁶“Waazə̂ ghò, lâŋ kə Kəzə̀ kəla Zuʼ tə̀ Zɔlɔ tə tsom kɔʼ Dɛvìd enyəa ù fughuu səā wô an dzughu e wə̄n kùu ndùw Dzudàs wəla ù mò bû wô ghî ghəla ghe mò kwu Yɛso, kə ki aleluesō tsughu ughue.

¹⁷Sɛ̀ à ghee mò lo alo kəfɔ̄e kə mɔ̀ʼ, ghe m fùghù tsùghù sùghò bà kə wən am fwàʼ kən.

¹⁸(Dzudàs maā bəghaa e zue aŋ kua wəla ù mò kele kɔʼ am bo e wə̄n; ghəa ù bvʉ̀ sɔʼ ndûw tuw ko, bùʼù nyə̀ ndùw an nʉ̀ghà, nəghà tə wə̄n tə n tùuŋ sə̀ wò à beē tə dzə̀m.

¹⁹Ghî ghəla ghe mughu an Yɛ̀lusalɛ̀m a dzə̀m ŋ kelê ghəa a te gho, ghe n tɔŋɔ ndùw bəghaa e te zo an shwaʼ wə enaʼ u ghee enyəa à lǒ Àkɛ̀ldamà, mo e moʼò tsùghùu enyəa, Bəghaa e Təkàŋ.)

²⁰ Zən fə̀ ènyə lǒ mbuu ghe tɔm naŋā am mwàʼsò kə tə Ndzàŋ enyəa, ‘Luʼū kə wə̄n kə̀ mughūuŋ kə doʼò tsughu kə̀ zum ko, ghùw è tso buw alemùghùu a te.’ Àsùghò enyəa, ‘To ghùw ù nùghù mò nîi nughù kɔʼɔ̄ sughò luʼū kə wə̄n kə̀ fwaʼa ko.’

²¹À fi lo enyəa ghùw u mɔ̀ʼ aŋ ghì ghəla ghe mò təə̄m kaāŋ wo sɛ̀ an nə̀ghà zən e dzə̀m Mughùbè Yɛso mò tsəghànlo am bvʉ̄a e sɛ̀,

²²alenìi nughù wô an tì kə̀là Dzɔ̌n mò fughuu Mùghù ŋ Kə̀zə̀ mò â ghì ghò, bùghò tɛ̀ wò an tsuʼ fəla ghe mò nî nughù kɔʼ wən a te aŋ ghùu sɛ̀, nùghù kɔ̀ʼ ndùw â wə̄n. Ghùw ù ghee u mɔ̀ʼ kì aledòʼò wô sɛ̀ à ghee tǒ ghùw wəla ù mʉā fughuu sugho gùw è Yɛso aŋ ghəa a wə̄n à zoōm wo gho alo evʉ̄.”

²³Ghe n nì nàŋa sə̀ wò ghee a bə̀ghà, Dzùghùsî, tɔɔŋ Bàsabàs wəla ghe mò tsʉ̂ tsughu zən zo enyəa à lò Dzustùs, àsùghò Màtîas

²⁴Ghe ŋ gɔ̀ɔŋ tsùghù enyəa, “Mughùbè, ghù kwò fə̂ŋ tə ghì ghə̀n à dzə̀m, děe wǒ ghùw wəla ghù shǐaa, aŋ ghì ghə̀n à bə̀ghà,

²⁵alenìi kɔʼ bûʼ kəla Dzudàs bàʼ naŋā kɔʼ enyəa e nughù wən â luʼū to, am fwàʼ kə tsə̀təndə̄ghā kən.”

²⁶Ghe n daŋso təm tsughuu ndzwàʼ an tuw kə ghee, ndzwàʼ m bvʉ̀ tsùghù an tuw kə Màtîas, ghe n nì təmdzəəŋ ndùw wən an tsə̀təndə̄ghā tì èghəm à ghè zò e mɔ̀ʼ.