Read Aghem Kə̀fwàʼ 10 Bible Online

Kə̀fwàʼ 10 - Aghem bible

Kə̀fwàʼ 10

¹Ghùw ù lì n lo aŋ Kàesalìa ghe mò tɔŋlo enyəa à lǒ Kɔ̀nelìus, mò ù lǒ ghùwnē an saʼ kə təsùghugòʼ kəla kə mò sə wo an Etalì.

²À mò lo ghùw ù gaʼ fə̀ŋ aŋ ghəa e Kə̀zə̀, ghèe ghê kèndughu kə wə̄n ko kə dzə̀m m fughuu ŋkɔʼso â Zə̀ kò; ù m mwaʼà, fughuu àghì â yòsò zò, gɔ̀ɔŋ zěe sùghò â Zə̀ kò.

³Tsuʼ ù li wo an nə̀ghà tə ezūuw tə təgha â tsə̀ to, dzoō wə n nùghù tsə̌ən wò wə̄n, ù ŋ kòʼ tsùghu tsə̀ndə̄ghā è Kə̀zə̀ e nyəā wo, dzàa wò â wən enyəa, “Kɔ̀nelìus.”

⁴Ù n lɛɛn ko tsə̀ndə̄ghā zə alo etsə̄ŋ alo etsə̄ŋ, nùghù bvʉ tsughu enyəa “À lǒ kwò à Mughùbè?” Tsə̀ndə̄ghā zə m bɛ̀lɛ̀ tsùghù enyəa, “Zə̀ kə̀ tsoʼn nù am fwàʼ kə̀a kə̀ dzûŋ kə̀là ghù fwàʼa, chia kə zuw sughò gɔ̂ɔŋ zə̀ghà zò.

⁵Ezə̄ŋ, tum ndǔw ghùw an naʼ e Dzopà, to ghe ndûw tɔŋɔ fughu wô ghù â ghùw ù lì a fughu ghe tɔŋlo enyəa à lǒ Sǎemòn Pità.

⁶Ù mò nduw nyə alô Sǎemòn, ghùw ù lì ù fwàʼà aŋ gùw tə nyòm, ndùghù è wən ti a ŋgùŋ è dzùghùntsòʼ.”

⁷A m bùghò tsə̀ndə̄ghā zə̀ è mò kə̂aa ghəa gho â wə̄n nughù tsughu, ù n tɔŋɔ sə̀ wò kɔ̀ ŋ wə̄n m bə̀ghà àsùghò sùghugòʼ è wə̄n e mɔ̀ʼ mò ù bǒo fùghù sùghò aŋ ghəa a Kəzə̀, mò ù fə̀ lo ghùw u mɔ̀ʼ an sùghugòʼ təla tə fwaʼa â wə̄n,

⁸Ù n dzɛ̀ tsughù fəgha kəla kə mô tsəgha kə dzə̀m â ghee, daŋso tùm ndùw ghee an naʼ e Dzopà.

⁹A m bùghò â ŋgàlà tsə̀ to an tsuʼù lì vʉ̀, aŋghəa ghe lo an dziī, mo ghe sô kùʼso ndùw naʼ e te zo, Pità n nùghù kɔ̀ʼ ndùw aŋ gɔ̀ŋ kə ndughu alekɔʼɔ̄ gɔ̂ŋlò.

¹⁰Dzə̀ŋ n za tsughu wə̄n, ù n ləghaa alezəā ndûw kə̀fəgha. A m bùghò ghe naām biān ghəa a te gho, tɔ u wən wə n nùghù sòʼ sə̀ kɔʼ dzwoō wə n tsəaa wò wə̄n.

¹¹Ù ŋ kòʼ ndùw wala kə nughù tsʉ tsughu, fəgha kə̀ li ko tǒ mgbàʼà kə mbà kə kəfəgha kə̀ li ko, kə n səa tsughuu wò mò à sèe tsùghuu wò buw ghə a dzūghū a te gho a chìakò.

¹²Nyôm tə̀n tə̀ dzə̀m tə bwiī, təla tə ghâaŋlo, àsùghò nwə̀n mò, ghe n lo am fəgha kə te ko.

¹³Pità mo ezuw ghùw ù lì sò dzàa wò â wən enyəa, “Nùghu kɔʼ a Pità, winlô, ghù pfʉ.”

¹⁴Pità mo enyəa, “Ɛ̂ŋgaŋ a Mughùbè; Ŋ̀ kaām zə kòʼ fəgha ko mo kə dzɔ̂ɔ yò ŋkāa mo bughōo kə enaʼ kə kâ bǒo.”

¹⁵Ghùw vʉ n dzɛ̀ kpèʼe wò â wən enyəa, “Fəgha kə̀là Zə̀ kə̀ sûw naŋā tsughu ghù kì yo aledzɛ̀ enyəa bughōo kə enaʼ kə kâ bǒo.”

¹⁶Ghəa ghən n sə tənəghā tətəgha, ghe n daŋso nì nùghù kɔ̀ʼ ndùw fəgha kə te ko alo kəwālā.

¹⁷Ezə̄ŋ, ghəa tuw kə naām kpuūw Pità aŋ ghəa ghəla e lô aleghəə̄ŋ səā kɔʼ am fəgha kəla e kôʼ tsughu an dzǒo, ghî ghəla Kɔ̀nelìus tum wo m fùw sə̀ èkɔʼ. Ghe n ti a fù u ughɔ̄ŋ ghəa ghe bvʉʉ̄n kele kɔʼ ndùghù è Sǎemòn.

¹⁸Ghe n tɔɔŋ nyəa wò an dzə̂ è tughu alebvʉā zuw enyəa Sǎemòn wəla ghe tɔŋlo enyəa à lò Pità lò kpɛʼɛ̄ mughu a fughu.

¹⁹Ghəa Pità naām kəŋo tuw ko aŋ ghəa yì ù kòʼ tsughu an udzǒo, Zuʼ tə̀ Zɔlɔ tə te tə n dzɛ̀ â wən enyəa, “Ghù wɛ̀ɛ, tuw tə aghì tə̀ li tə lo fɛ tə təgha, ghe kəŋo ghû.

²⁰Nùghù kɔʼ êzə̄ŋ, sə tsùghù ndùw, ghù nyoʼn nughu nduw ko ghɛ̀ à ghee mò ghù kà sə̀mlò; tɔŋlo enyəa Ŋ̌ ghee tum nû.”

²¹Pità fi sə tsùghù kòʼ ndùw nù ghî yì gho, dzɛ̀ â ghee enyəa, “Ǹ lo ghùw wəla ghɛ̀ kəŋo ma; à ghɛ̀ fɛ nì wò kwò à?”

²²Ghe m bɛ̀lɛ̀ tsùghù enyəa, “Komndzughu ù tə̀ sùghugòʼ Kɔ̀nelìus tùw wò ghàʼ, u lǒ ghùw ù dzùŋ, vʉ̀a ù boō fughu sugho â Zə̀ kò, Dzûu tia tə fughuu sugho wə̄n â kɔʼso mò. Tsə̀ndə̄ghā è Kə̀zə̀ mò teso tsughu â wən enyəa ù tuū tɔŋɔ wô ghù enyəa ghù bugho alô wə̄n, e zuw ghəa ghə̀là ghù ki alekə̀a.”

²³Pità fi tɔŋɔ nyə wò nǔ ghee, dè ndùw ghee â luʼū kə̀ bwii ko. Tsuʼ ù li vʉ̀ ù n nùghù nùghù ndùw ghèe ghee, waazə̂ à li ghəla ghe boō fughu sugho â Kə̀lestò an naʼ e Dzopà n nùghù ndùw ghèe ghee.

²⁴Ghe n nyəaa ndùw aŋ Kàesalìa an tsūʼ ù li vʉ̄a u dzûum wo. Ghəa Kɔ̀nelìus mò kwo enyəa ghe bughòo nù, ù n nàʼà tsùghù tom a wə̄n, àsùghò fə̀n a wən à tughu gho.

²⁵Aŋ ghəa Pità nyəa ndûw ènyə, mò Kɔ̀nelìus sə̀ tǐ ghèe wə̄n daŋso tə̀m ndùw tə̀ŋguʼ a tsəlà wə̄n, fùghù ndùw wən â kɔʼso mò.

²⁶Pità n nîi nùghùuŋ kɔ̀ʼɔ wə̄n dzàa tsùghuu enyəa, “Nùghu tee kɔʼ edzūŋ; Ǹ lo sugho ghùw.”

²⁷A m bùghò ù kə̀aa ndûw ghəa gho ghèe wə̄n ù n tsə̀ghà nyə̀ ndùw an ndughu, nyə̀ kòʼ ndùw àghì mo ghe n tsūŋ.

²⁸Ù n dzɛ̀ â ghee enyəa, “Ghuē è ghùe zɛʼɛ̄ e mgbaŋ tɔ̀ʼ kwò sugho nû enyəa lâŋ kə̀ kâ bǒo dzə̀ enyəa ghùw Dzûu dòʼò dzəŋlo ŋkāa ù ndùw bwîin kôʼ Ètòʼò; Zə̀ kə̀ ŋ kòom dè tsùghù â mùghò enyəa e kwo Ǹ lô niī ghùw ù lì tǒ làŋà kə ghûw ŋkāa tò udzʉ bòʼ bughōo kə enaʼ kaŋā.

²⁹Zən lò e ghee aŋ ghəa ghe mò tum tɔŋɔ̄ wô mugho, mùghò n daŋso sə̀ tɛ̀ wò ko nù, kè sə̂mlò. Êzə̄ŋ, Ǹ lo nû alekpaʼā bvʉā tsughu ghəa zəla ghɛ̀ tɔŋɔ̄ mugho fɛ à tè à?”

³⁰Kɔ̀nelìus m fùghù ndùw fə̀n kə edzughu â wən enyəa, “A fə̌əgh ù lǐ ù vʉ̂, an nə̀gha zən sùghò ènyə, mùghò ŋ gɔ̂ŋlò an nə̀ghà tə ezūuw tə təgha â tsə̀ alô mùghò an ndughu, mùghò me kôʼ ghùw sə̀ tì an sə kaŋā an ndzʉ̄ tə̀ nyəghaan to.

³¹Ghùw vʉ mo enyəa, ‘Kɔ̀nelìus! Zə̀ kə̀ ŋ gɔ̀ɔŋ zə̀ghà è zuw, chia kə kòʼ sugho fughu kə̂a kò.

³²Tum ndùw ko ghùw êzəŋ an Dzopà ù ndùw bvʉā tsughu Sǎemòn; wəla ghe tɔŋlo enyəa à lò Pità; ù mùghù an ndughu alô Sǎemòn, ghùw ù lì ù fwàʼà aŋ gùw tə tənyòm, a ŋgùŋ è dzùghùntsòʼ.’

³³Mùghò n daŋso tum tsughu ghùw enyəa ghe mbaā bughò tɔŋɔ̄ fughu ghû, ghù vʉ̀a ù tso ŋge dzɔ̂ sugho, è bugho. Ghàʼ fɛ êzəŋ lo nû, an sə kə Zə̀, alezəə̄n mɛʼɛ̀ ghəa ghə̀n à dzə̀m Mughubè ù te dzɛ̂ enyəa ghù kəaa wo.”

³⁴Pità fi kaʼ tsughu nû ghəa à kəaa gho. Ù n nì tsùghù enyəa, “Kùmkùm mùghò ŋ kòʼ enyəa Zə̀ kə̀ bâa yò kpiī wo,

³⁵abugho à tso lô ko ndugho, an nàʼà mə̀n ndzə̀mdzə̀m, ù tsəŋ tsughu wə̄n, ghəəŋ ndùw ghəa ghəla a lô tsəghatsəgha, ù n nì nàŋa wə̄n.

³⁶Ghɛ̀ kwo nû tum zəla ù fə̀ tum nduw â ghì ghə Ezə̀lɛ̂ ghò, tsʉ̀a ndùw àghì aŋ ghəa ghe lô alekele èbughunlo a te am bàm e Yɛso Kə̀lestò (ù lò Mughùbè ù ghì ghə̀n à dzə̀m).

³⁷Ghe n nàʼà tùm è te an Dzùdîa e dzə̀m, alenìi nughù tsughu aŋ Galèlîi an nə̀ghā zəla Dzɔ̌n fə̀ naʼā mɛʼɛ̀ tsughu mùghù ŋ Kə̀zə̀ mò.

³⁸Ghɛ̀ kwo nû ghəa ghə̀là Zə̀ kə fə̀ tsuʼ tsughu Yɛso, ghùw ù Nazalɛ̀t wə̄n, fughu tsughu wən â Zuʼ tə̀ Zɔlɔ to àsùghò dwaʼa wo. Ghɛ̌ yia kwo sughò ghəa ù mò ŋgəaa ghəə̄ŋ kaāŋ ndûw dzɔ̂ zò, baāŋ ndùw ghì ghəla vʉatsə̄a a naŋā ŋgòʼ a zəŋò ghee, tɔŋlo enyəa Zə̀ kə̀ mò ti a bǎà wə̄n.

³⁹Ghàʼ lo ghî ghə̀là ghàʼ kwo ghəa ghə̀là ù mò ghəŋlo an naʼ e Tə̀dzûu e dzə̀m àsùghò an Yɛ̀lusalɛ̀m. Ghe ŋ wi tsughu wə̄n mo ghe wə̄n təghàa kɔ̀ʼ alo kədàŋlo;

⁴⁰Zə̀ kə̀ ŋ kòom nì nùghù kɔ̌ʼ wə̄n an tsuʼ u kə̀təgha wo, zə̀ghàa tsùghù enyəa ù dèe wô ùghue.

⁴¹Ù ka mo ghue wo â ghì ghò a dzə̀m dê dzə̀, ù mò de wo ko â ghàʼ ghəla ghàʼ tɔ̂ʼ ti aŋ ghəa e wə̄n Zə̀ kə̀ mò tsɔʼ naŋā, aghî ghe mò zə dzə̄ŋlō, mʉ dzəəŋ sùghò ghèe ghee, ghəa ù zòo nughù wo alo evʉ̄.

⁴²Ù n dzɛ̀ â ghàʼ enyəa ghàʼ è kəaa nduw shwaʼ ù dzûŋ wò â ghì ghò, dzàa fùghuu ndùw enyəa Yɛso lǒ ghùw wəla Zə̀ kə̀ mò tsuʼ naŋā enyəa ù è saʼa tuw u ghì ghəla ghe lô â tuw ko à ghì à kpuuwn gho.

⁴³Ghiīshʉ̀ghà ghə̀n à dzə̀m fə̀ fɛ kâa ko wə̄n enyəa ghùw wəla ù boō fughu tsughu dzə̄ â wə̄n, ghe n ghuuw màʼà bòo tə wə̄n bòʼ Wə̄n.”

⁴⁴Ghəa Pità naām kə̂aa ghəa gho, Zuʼ tə̀ Zɔ̀lɔ tə n tsughu nyəə̄n tsughu a zəŋò ghì yì à dzə̀m ghe mò zəə̄n shwaʼ vʉ̀.

⁴⁵Dzûu təla ghe mò boō fughu tsughu, nùghù wò a bǎà ghê Pità, dzughu zə n zuu ghee, bòʼ ghe mò kwən fughu dāŋso sugho Etoʼò â namso kə Zuʼ tə̀ Zɔlɔ to;

⁴⁶nu ghe mò zuuw nduw ghe kə̂aa ghəa gho an sàʼà tə tənàʼà tə̀ nughù tò, ghe kɔʼso Zə̀ kò. Pità n daŋso dzɛ̀ sə̀ wò enyəa,

⁴⁷“Ghùw ù lì lò nû alekòom kwuū naŋâ mùghù ŋ Kə̀zə̀ ŋ ghì ghən mo ghe n Zuʼ tə̀ Zɔlɔ tə kele sùghò tò sɛ̀ mò kele a?”

⁴⁸Ù fi dzɛ̂ nù enyəa ghe fughu ghee â mùghù ŋ Kə̀zə̀ mò an zən e Yɛso Kə̀lestò. Ghe n daŋso nàʼà tsùghu wə̄n enyəa ù muʼn doʼò kəŋo ndûw ntsuʼu ghèe ghee.