Read Aghem Kə̀fwàʼ 11 Bible Online

Kə̀fwàʼ 11 - Aghem bible

Kə̀fwàʼ 11

¹Tum tə Yɛso à waazə̂ a ghî a Kəzə̀ à li ghəla ghe mò lo an Dzùdîa n zuw tsughu enyəa Toʼò zə̀ m boo sùghò shwàʼ u Kəzə̀ wò.

²A m bùghò Pità sò kɔʼ nduw an Yɛ̀lusalɛ̀m, Dzûu təla tə mò lo mo ghe m boo Zə̀ kò ŋ kàʼ ndùw wən a lùʼù saʼa wo,

³dzàa ndùw â wən enyəa, “Ghù mò nyəa zəaa dzəəŋ kaaŋ ghɛ̀ à ghê Tòʼò zò an ndughu tə ghee.”

⁴Pità ŋ kàʼ è tsughu, teso dzɛ̀ kɔ̀ʼ ndùw biso kə eghəa kəla kə fə̀ sə ghè kò â ghee, enyəa,

⁵“Mùgho mò lo an naʼ e Dzopà, mùghǒ ŋ gɔ̂ŋlò, ghəa à li ghə n ndùw ghə̌əŋ wò mùghò ènyə tò udzoō, mùghò ŋ kòʼ fəgha kə̀ li ko tǒ mgbàʼà kə mbà kə kəfəgha kə səā tsughuu wô alo kəwālā, mo ghe yia fughuu səa tsughuu wô am buw a fəgha kə te ko a chìakò; kə n sə̀ tsùghù bùghò tɛ̀ tsùghù a vʉ̀a mùghò.

⁶Aŋghəa Ǹ tɔ̂ʼ fwê nyə tsughu, mùgho ŋ kòʼ nyə tsughu nyòo mə̀n n dzə̀m n dzə̀m, təla ghî à nyəsō, tə ŋgwə̄n to, tə̀ ghaāŋ to, àsùghò nwə̀n mò.

⁷Mùghò n daŋso nùghù zuw tsughu dzə̀ è ghùw ù lì, zə̀ n dzâa wò â mùghò enyəa, ‘Nùghu kɔʼɔ̄ Pità, ghù wiin pfʉ.’

⁸Mùghò m fəŋso bɛ̀lɛ̀ tsughu ko enyəa, ‘Ǹ dɔ̂m yò aleluʼ a Mughùbè, nu Ŋ̀ kaām fəgha ko an dzughu zaŋā gaʼ kòʼ mo a baa tsə̀ghà nù.’

⁹Dzə̀ è te n dzɛ̀ tsughu kpeʼe wò alo kəwālā enyəa, ‘E kwo ko ghù lo nî fəgha ko enyəa kə dzəa nù, mò Zə̀ kə̀ ŋ ghəŋlo enyəa kə e zɔlɔ.’

¹⁰Ghəa ghən fə̀ sə tənəghā tə təgha; ghe n daŋso kòom sè nùghù kɔ̀ʼ ndùw fʉgha vʉ̀ ù dzə̀m alo kəwālā.

¹¹An nə̀gha e te zo ghî ghə̀ n ndùw bùghò an ndughu zəla ghǎʼ mò lo a te ghee a təgha, ghe tum wo a vʉ̀a mùghò, ghe nughù sə wo aŋ Kàesalìa.

¹²Zuʼ tə̀ Zɔlɔ tə n dzɛ̀ â mùghò enyəa Ǹ nughù ndûw ghàʼ à ghee mò Ŋ̀ kâ sə̀mlò. Ghàʼ à ghê waazə̂ ghaŋa à nûu à li ghən tǔu ghe mò lo mo ghe m boo fughu, ghe nughùu wo an Dzopà, ghàʼ à ghee n təəm ndùw sùghò èghue à dzə̀m an Kàesalìa, a n ndùw nyə̀ ndùw an ndughu alô Kònelìus.

¹³Ù n dzɛ̀ wò â ghàʼ aŋghəa ù mò kôʼ kɔʼ tsə̀ndə̄ghā è Kə̀zə̀ è ti an ndughu alô wə̄n, zə̀ n dzâa wò enyəa, ‘Tum tɔŋɔ wò ghùw ù li an Dzopà ghe tɔŋlo enyəa à Sǎemòn Pità tò u bùghò —

¹⁴ù bùghò kə̂aa wô ghù â shwaʼ ù li wo, ghù kè zəa tuw ko a te ghɛ̀ à ghê ghì ghə̀a ghò a dzə̀m an ndughu.’

¹⁵A m bùghò Ǹ daŋso kaʼ tsughu ghəa à kəaa gho, Zuʼ tə̀ Zɔlɔ tə n tsùghù bùghò nyə̌ən tsughu a zəŋò ghee, to aŋghəa tə fə̀ nyəə̄n sughò ghaʼ a te, sûesʉ.

¹⁶ Mùgho n daŋso tɛ̀ mòʼn wo shwaʼ u Mughu ù te aŋghəa ù fə̀ dzɛ̂ enyəa, ‘Dzɔ̌n fə̀ ghî ghò â mùghù ŋ Kə̀zə̀ m fughuu alo mmùghu, ghe lô ghɛ̀ â mùghù ŋ Kə̀zə̀ kuuwn fughuu an Zuʼ tə̀ Zɔlɔ to.’

¹⁷E kûu zɔ̀lɔ nù êzəŋ enyəa Zə̀ kə fə̀ fughu sugho Toʼò e te zo â namso kə̀ mɔʼɔ̄ kəla Ù fə̀ fughu â sɛ̀ aŋghəa sɛ̌ fə̀ boō tsughu â Mughu ù te, Yɛso Kə̀lestò, mùgho mò lo ndughoo aletə̀ghàsò Kə̀zə̀ aŋ ghəa ghəla kə mò ki aleghəŋlo à?”

¹⁸Ghəa ghe zuw tsughu ghəa ghən gho, ghe m bughu naŋâ ghəa ghəla ghe mô kəaa ghè ghò, kàʼ ndùw alefughu ŋkɔʼso â Zə̀ kò, dzàa tsùghuu enyəa, “Zə̀ kə̀ m fùghù sùghò ghî ghəla ghe yô Dzûu tò â bùʼ kò alemàʼà bòo tə ghee, to ghe kelê mùghù zəla e doʼò tən.”

¹⁹ Ghî ghəla ghe fə̀ tiīn sɛ̂ɛ tsughu bòʼ aŋghəa ghe fə̀ fɔeso tsughu Sìtofɛ̀ a te, ghe m bwìi ènyə lɔʼso ndùw sə̀ mìasò ndùw am Fɔ̀enishìa, àsùghò an Saepə̀lùs, àsùghò an Antìok, kòom kə̀aa yò shwaʼ u te wo â ghùw ù lì, kə̀aa tə̀la ko â Dzûu tò.

²⁰Ghî a Saepə̀lùs à li gho àsùghò a Sìlêen ghò, ghəla ghe boō fughu â Kə̀lestò, ghe ŋ ŋgəəŋ lò sugho am bvʉa e ghì yì an Antìok, ghe ŋ kə̂aa ndùw ghəa a Mughùbè Yɛso â Tòʼò zò.

²¹Zə̀ kə̀ m fughuu ghee â daʼa ko, ndə̀mà ndəmà tə aghì tə m boo fughu â Kə̀lesto, fə̀n dòʼò wò ghì a Mughu ù te.

²²Ghî a Kə̀lestò ghən an Yɛ̀lusalɛ̀m n zuw làbəlà zən, tùm ndùw Bànabàs an Antìok.

²³A m bùghò ù bùghò kôʼ tsughu enyəa Zə̀ kə̀ mò ti an tuw kə ghee, ù mo èduʼnlo, fəghaan tɔ̀ʼ tsʉ̀ tsùghu ghee enyəa ghe nəghāa kɔʼ fənyə aŋ ghəa e Mughu ù te, ghe teē təla tsughu a te am fə̂ŋ è ghee e dzə̀m;

²⁴tɔŋlo enyəa ù fə̀ lo ghùw ù dzùŋ mò à wən ki tən ko Zuʼ tə̀ Zɔlɔ, tughuu sùghò am fə̂ŋ zəla ù gaʼ tsughu aŋ Kə̀lestò. Ghe m fəghaan nì kpèʼe wò ndə̀mà tə aghì a vʉ̀a Mughu ù te.

²⁵Bànabâs n daŋso nùghù ndùw an Talsùs alendùw kəŋ Sôol.

²⁶A m bùghò ù ndòʼ kôʼ tsughu sugho wə̄n, ù n nì wò wən an naʼ e Antìok. Zə m bughò dòʼò tsùghù nû enyəa nûm kə te ko kə dzə̀m ghe n ndûw dòʼn zěe tsə̀ghà ko ghèe ghê ghì a Kə̀lestò ghò, zoʼn tsughu ndə̀màndə̀mà tə aghì ènyə. À n lo sugho fɛ an naʼ e Antìok ghe fə̀ zeʼē tɔŋɔ̄ tsughu ghî ghəla ghe boō fughu â Zə̀ kò enyəa à lò Ghî a Kə̀lestò.

²⁷An tì kə te ko ghiīshʉ̀ghà a Kəzə̀ à li ghə n nùghù tsùghù an Yɛ̀lusalɛ̀m tsùghù wò an Antìok.

²⁸Ghùw ù ghee u mɔ̀ʼ zən e mò lô Àgabùs n nùghù těe è kɔʼ, dzɛ̀ wò ùshʉ̀ghà enyəa dzə̀ŋ è bǐigh è bǐigh è lì kê nyə̌a am mbī e dzə̀m; ghəa ghən m bɔɔm bùghò sə̀ ko an dzə̂ è wə̄n an tì kəla Kòlodìus fə̀ lo də̀ŋ ne ko.

²⁹Tsə̀təndə̄ghā tə te tə m boo tsughu enyəa, aŋ ŋgəŋ è ghee chìa è də̀mà tsughu ko aletuū fughuu ndûw èyòsò â ghì ghəla ghe mughu aŋ Dzùdîa mo ghe m boo fughu sùghò â Kə̀lestò.

³⁰Ghe ŋ ghəŋlo è tsughu, tuu fughuu ndùw ko aŋ ghùu tsoʼ tə dzeŋe kə ghì a Kəzə̀ tò an Yɛ̀lusalɛ̀m, ghe n ndûw fùghuu ndùw â Bànabàs ghèe Sôol.