Read Aghem Kə̀fwàʼ 12 Bible Online

Kə̀fwàʼ 12 - Aghem bible

Kə̀fwàʼ 12

¹A m bùghò sùghò an tì kə te ko, Hɛlɔ̀d, kə̀də̀ŋ n nùghù kaʼ tsughu aletsəm ghaŋ a ghì a Kə̀lestò à li gho.

²Ù n dzɛ̀ enyəa tsuʼn wi Dzɛ̂ms alo fənyə̄, tɔɔŋ wàazə̀ Dzɔ̌n.

³Ghəa ù kòʼ tsughu enyəa Dzûu tə mò duʼn nû aŋ ghəa e te zo, ù ndùw dàŋso ko â sə ko enyəa e kwuu sùghò nù Pità. (Ghəa ghən fə̀ lo mo ghe zə̂a Zə kə bɛ kəla mbvùŋ buw a te.)

⁴A m bùghò ghe kwu kɔʼ Pità, ghe n dzə̀n ndùw wə̄n an ndùghùtsāʼ, fughu naŋa ndùw wə̄n enyəa swaʼ u təsùghugòʼ u chùakò è chiīn wə̄n, kwo enyəa abugho Zə kə̀ zəŋso naaŋ kə tsəghà kɔʼ, e nîī fughuu səa wô wə̄n an tia e saʼ an sə kə a ghì.

⁵Pità fi kɔʼ nu ndùghùtsāʼ, ghî a kèlestò ghə̀ ŋ kuuwn dòʼò tsughu ko fɛ̀ è bàm mgbɛɛ gɔ̀ɔŋ ko Kə̀zə̀ an tuw kə wə̄n.

⁶A m bùghò â tsuʼ wo vʉa Hɛlɔ̀d lo so e gbəla nughù nîi fughuu səā wô wə̄n â ghì ghò, à n lo êzə̀ mo Pità nyə̀əŋ bwǐi tsə̀ghà am faʼnlo e sùghugòʼ tə̀ li to tə bə̀ghà, mo ghe ŋ wən kûm nàŋa alo tətsāʼ tə bə̀ghà, chì tə̀ n ti a fǔundughu ghe chiīn ndùghùtsāʼ.

⁷Tsə̀ndə̄ghā è Mughu ù te n tsò vùuŋ gbə̀n sə kɔʼ ko enyə a sə̀a Pità, tsə̀ è lì n nùghù tughu tsughu a fughu an ndughu fə kələ̄m. Tsə̀ndə̄ghā zə m mɔ̀ɔm tsùghù Pità alo ebùghu, zòm nùghùu kɔʼ wə̄n, dzɛ̀ â wə̄n enyəa, “Mba nùghu kɔʼɔ̀.” Tsaʼ tə te tə n daŋso tsɔʼn sə tsughu aŋ ghu a wə̄n.

⁸Tsə̀ndə̄ghā zə n daŋso dzɛ̀ â wən enyəa, “Dzə̀la kɔʼ ndzʉ to àsùghò gûw tə̀ghà tò.” Pità n dzə̀là kɔ̀ʼ ufʉgha. Tsə̀ndə̄ghā zə n dzɛ̀ â wən enyəa, “Dzə̀la kɔʼ ndzʉ tə edzūŋ təghà tò, ghù bugho a bàâ mùghò.”

⁹Pità n nùghù sə̀ wò a bǎà wə̄n, sə̀ nùghù wò an ndùghùtsāʼ, kwo sugho yo enyəa ghəa yìa tsə̀ndə̄ghā zə ghəŋlo lo kùmkùm tə aghəa, kuuwn kwo enyəa à wən waa tsənlo ùdzoō.

¹⁰A m bùghò ghe tsəghà kɔʼ chì tə sûesʉ to àsùghò təla tə məghàa wo, ghe m bùghò tɛ̀ tsùghù a fǔughɔ̄ŋ u ubvūʼ, u səa nduw enaʼ. Wə n tsʉ tsughu ghee â mughu ko, ghe n daŋso tsə̀ghà sə̀ è wo, bùghò nì ndùw dzì è lǒʼ a fughu, tsə̀ndə̄ghā zə n daŋso zə̀ghàa tsùghu wə̄n.

¹¹Tɔ u Pità wə̀ ŋ kwə̀n nyə̀ è wo, ù n nùghù dzɛ̀ tsùghù enyəa, “Mùgho n tɔ̀ʼ kèle êzəŋ enyəa Mughu ù te tum wò tsə̀ndə̄ghā è wən, zə̀a è bùghò bəghasə̄ tsughu mugho aŋ ghùu Hɛlɔ̀d àsùghò aŋ ghəa ghən à dzə̀m Dzûu tə̀ mò moʼò enyəa a so e nî kə̀bala.”

¹²Ghəa ù kele tsughu dzə̂ ghəa ghən, ù n ndùw an ndughu alô Mèle, zə̂ Dzɔ̌n wəla zən e wə̄n è li e mò lô sughò Mâk, mò ndə̀m è àghǐ m fughu zûuŋ dòʼò, gɔ̀ŋlò.

¹³A m bùghò ù tsʉʉ̄n tsughu fuū u ughɔ̄ŋ wo, kɔ̂ɔ fə̀ zən fə̀ li fo ghe mò tɔŋlo enyəa à lò Lhodà n ndùw bùghò alebùghò tsʉ.

¹⁴Ghəa ù zuwkɛ̄lɛ̄ sə nduw dzə̀ è Pità, ù n duʼn mìasò ndùw ènyə, kè kôom tsʉ kəbâʼ, kòom bàla nyə̀ ndùw â ghuw ko ebàm, nyə̀ nàʼà ndùw enyəa Pità mò tì a fǔughɔ̄ŋ.

¹⁵Ghe mo â wən enyəa, “Ghù zə̀ghaa nù à?” Fə ŋ kuūwn mgbɛɛ dzàa ko enyəa à mò lò Pità. Ghe mo enyəa, “À lǒ tsə̀ndə̄ghā è wə̄n!”

¹⁶Pità n zuuw ko bàʼ kə̀ tsʉʉn ko; a m bùghò ghe daŋso bughò tsʉ tsughu bâʼ kò, ghe ŋ kòʼ kɔ̌ʼ wə̄n, dzughu zə n zum ghee.

¹⁷Ù m fòʼ kɔ̀ʼ aŋ ghu kə wə̄n â ghee enyəa ghe doʼò tsughu mɔŋ, daŋso teso dzɛ̀ ndùw ghəa Mughubè ù te mò nî nughù sə wo wən a te an ndughutsāʼ â ghee. Ù m bùghò bàʼso tsughu enyəa, “Dzǎa ndùw ghəa ghən â Dzɛ̂ms ghèe ghê ghì ghəla ghe lo mo ghe m boo.” Ù n daŋso nùghù è tsughu nùghù ndùw luʼū tə wə̄n.

¹⁸A m bùghò tsuʼ u zuw wo, luʼū tə n nûu enyə â zəŋò sùghugòʼ tò enyəa Pità ndùw ghɛ̌ a.

¹⁹A m bùghò Hɛlɔ̀d kəŋ wə̄n kè kôʼ, ù m bvʉnlo àghəa â chì tò, fughu kəlâŋ enyəa ghe wi ghee. Ù n daŋso zə̀ghàa tsùghu Dzùdîa, tsùghù tsùuŋ mùghùu kə̀ŋo ndùw aŋ Kàesalìa.

²⁰Êzə̀ŋ Hɛlɔ̀d n lo mò ù kì tsəgha kəzùghùu ghèe ghê ghì a Tâe ghò àsùghò ghì a Sidɔ̀n ghò. Ghî a Tâe àsùghò a Sidɔ̀n ghə̀ n ndùw dzeŋe bùghò kòʼ wò wən enyəa ghèe ghee kə̂aa tsughu aghəa; a m bùghò ghe bughò fughu tsughu shwaʼ wo â Bə̀latùs tɔɔŋ chì è tɔʼ, ù n zùw wò â ghee, ù m bùʼ ndùw kə̀ghu enyəa ghe biaān tsughu; nu naʼ e ghee e mò mughu mo fʉghàzəa u ghee u səa wò an naʼ e Hɛlɔ̀d.

²¹A m bùghò tsuʼ fəla ghe naŋā tsughu bùghò kpe tsughu, Hɛlɔ̀d n tə̀m sə̀ wò dàla è kə̀də̀ŋ è wə̄n, kɔʼ nyaʼa kɔʼ an ndàŋ è wə̄n alo kətsāʼ, kə̀a ndùw àghəa â ghee.

²²Ghî a te ghə n tsôo bùʼn ko m̀bɔ̀ŋ, dzàa tsùghùu enyəa, “Zən lǒ dzə̀ è Kə̀zə̀, à yǒ è ghùw!”

²³Tsə̀ndə̄ghā è Mughubè ù te ŋ kùm màʼà wò wə̄n, Ghəa ù dòʼò tsughu mò ù kà fùghù ndǔw kɔʼso n te mò â Zə̀ kò, nyuuŋ tə mùʼ n ko wə̄n enyə, ù m bùghò kpùw è nduw.

²⁴Shwaʼ u Kəzə̀ wə̀ ŋ kuuwn nùghù ndùuŋ ndùw ko alenduūw â sə ko, noom dùuw ndùw ko â sə ko.

²⁵A m bùghò Bànabàs ghèe Sôol daŋso mîasò tsughu fwàʼ kə ghee ko, ghe n nì kɔ̌ʼ Dzɔ̌n, wəla zən e wə̄n è li zən mò lô Mâk, nùghù ndùw ghèe ghee ebàm an Yɛ̀lusalɛ̀m.