Read Aghem Kə̀fwàʼ 13 Bible Online

Kə̀fwàʼ 13 - Aghem bible

Kə̀fwàʼ 13

¹Aŋ ghì a Kə̀lestò ghən an Antìok ghiīshʉ̀ghà a Kəzə̀ a fə̀ lo a te ghèe ghê wàdè; Bànabàs ghèe ghê Sǎemòn (wəla ghe mò tɔŋlo enyəa à lǒ Ghùw ù Lə̀ŋo), àsùghò Lusìus, (ghùw ù Sìlêen), ghèe ghê Mànâen (mò noo a tsəlà Hɛlɔ̀d wəla ù fə̀ lô gɔvə̀nò), àsùghò Sôol.

²Ghəa ghe kɔʼsō Mughubè ù te, baa sùghò èdzughu, Zuʼ tə̀ Zɔlɔ tə n dzɛ̀ tsùghù enyəa, “Tsɔʼ naŋa sə̀ wò nlǒ Bànabàs ghèe Sôol am fwàʼ kə̀là Ǹ lo mò mùghǒ ŋ ghee a te tɔŋɔ.”

³Êzə̀ŋ ghəa ghe bɛ mɛʼɛ̀ tsughu dzughu zo, gɔ̀ɔŋ mɛ̀ʼɛ̀ è tsughu, ghe ŋ gaʼ tsughu ghu a ghee an tuw u ghee, gɔ̀ɔŋ tsùghù enyəa Zə̀ kə̀ bughuso tsughu ghee, zə̀ghàa ndùw ghee.

⁴Êzə̀ŋ ghəa e màʼa fə̀ lo mò à ghee tum sə tsughu Zuʼ tə̀ Zɔlɔ to, ghe n tsùghù ndùw an Sɛ̀lusìa; ghe n nùghù tsùghu fughu, ghe m bàŋ dàŋ sə̀ ndùw ghee alo kəkwə̀n an Saepə̀lùs.

⁵A m bùghò ghe ndûw tɛ̂ tsughu aŋ kɔn u Sàlamìs, ghe n nàʼà ndùw tùm è Kə̀zə̀ a fughu an Ndughutə̀ne tə Tə̀dzûu tò. À n lo mo ghe maā Dzɔ̀n Mâk nî kɔ̀ʼ enyəa ù è tɔɔ̄m wo ghee am fwàʼ kə te ko.

⁶A m bùghò ghe tsəghà sə mɛʼɛ̀ nduw naʼà fìa dzùghù mò dzə̂əŋ ŋgəa kɔʼ ndùw lɔ̀ʼsò tɛ̀ mìasò ndùw am Pafòs, ghe n ndùw kpěen tsughu ghèe ghê ghùw ù fə̀nlo ù lì, ghùw Dzudà ù lì ù fɔɔ̄ tsəghà sə a ghì ghò enyəa e lo ghùwshʉ̀ghà Kə̀zə̀. Zən e wə̄n e mò lo Bal-Yɛso.

⁷Ù n lo ghùw fə̀n ù ghùw wəla ù mò lô tuw ko am mbùʼ è te, tɔɔŋ Sɛ̀dzius Pàolùs. Sɛ̀dzius Pàolùs wən mò lo ghùw ù tɔ̌ɔ ù lì ù mò tɔŋɔ̄ naŋā tsughu Bànabàs ghèe Sôol enyəa e ləghaa alezə̂ən shwaʼ u Kəzə̀.

⁸Ghùw ù ghə̀a à fəən vʉ̀, ghe mò tɔɔ̄ŋ sughò enyəa à lǒ Ɛ̀laemàs an shwaʼ u Gə̀lês, ŋ kuuwn komso ndùw ghee, də̀mà ko enyəa e təghàsò maʼà to gɔvə̀nò lò naāŋ wô tuūŋ ko an Làbəlà è Dzùŋ zə̀ ù lò boōm fughuu wo a te.

⁹Zuʼ tə̀ Zɔlɔ tə ŋ ghəəŋ tsughu Sôol wəla ghe tɔɔ̄ŋ sughò enyəa à lò Pôl ù n tughùsò lɛ̌ɛn tɔɔn nyəa ndùw ko ghùw ù fə̌ən vʉ tsəghatsəgha alo asə,

¹⁰dzɛ̀ â wən enyəa, “Wɛ̀ ù àvʉatsə̄a wə̄n, ghùwkə̀tuw â ghəa a tsəghatsəgha ghən à dzə̀m, dziī tə̀ tseē tə aghì tə̀n tə̀ dzə̀m, à tə̀ wiin tə aghì tò, à kwò nduw ko ghû, à lò enyəa ghù wən bughuu naaŋ yo aleŋgɔɔ̄n maʼn kaaŋ dziī tə tsəghatsəgha tə Mughu ù te to a?

¹¹Êzə̀ŋ kòʼô, Mughù ù te baa tsughuu mbɛ an tuw kə̂a, ghù fòo nù, ghù doʼo gha ko mò ghù kòʼò yò luʼū to.” Dzən kə n daŋso nùghù bvʉ̀ wò an sə a wə̄n àsùghò ləm ko, ù ŋ kaʼ tsughu alekə̄ŋ ghùw wəla ù lò aletɛ̀ɛ ndûw wən aŋ kwē.

¹²A m bùghò gɔvə̀nò kòʼ tsughu ghəa yia a sə kɔʼ, ù m boo fùghù è nduw, tɔŋlo enyəa ghəa ghəla ghe mò zoʼnlō kùu ndùw Mughubè ù te a mò kpuuw wə̄n â tuw ko.

¹³Pôl n daŋso nì kɔ̀ʼ kəkwə̀n ghèe ghê ghì a wə̄n gho zə̀ghàa tsùghù Pafòs dàŋ sə̀ wò am Pɛlgà am Pàmfilìa. Dzɔ̌n Mâk m bùghò zə̀ghàa tàʼà tsùghu ghee a fughu, nùghù ndùw èbàm an Yɛ̀lusalɛ̀m;

¹⁴ghe ŋ kuūwn nùghù dàŋso è nduw, zə̀ghàa tsùghù Pɛlgà, nyə̀ wò am Antìok am mbùʼù Pìsidìa. A m bùghò tsuʼntsə̄ ghe n ndùw nyə̀ gàʼ dòʼò tsùghù an ndùghùnè.

¹⁵Ghəa ghe tɔɔ̄ŋ mɛʼɛ̀ tsughu ghəa ghəla ghe nî sə kɔʼ an làŋ kə Musî àsùghò am mwàʼsò u ghì ghǐishʉ̀ghà tuw kə ndùghùne kə n tùm wò tùm è lì â ghee enyəa, “Waazə̂ ghaŋa ghò, ghàʼ mô lə̀ghaa enyəa ghɛ̀ lô kpaʼ ki ghəa zo aletoōn ndûw ghì ghə̀n a te, ghɛ̀ ŋ kə̀a è nduw.”

¹⁶Pôl fi nughù těe kɔʼ nû, fòʼn ndùw aŋ ghu enyəa ghe doʼò tsughu mɔŋ, kàʼ ndùw ghəa à kəaa gho, “Wo ghî ghə Ezə̀lɛ̂ ghò, àsùghò ghɛ̀ à li ghə̀là ghɛ̀ tsəŋō Zə̀ kò, zuw nlo ghɛ a.

¹⁷ Zə̀ kə ghì ghə Ezə̀lɛ̂ kə̌ fə̀ ghê tselè sɛ̀ shiāa kɔʼ nû, ghəəŋ tsughu ghî a te ghə n tughuu, ghəa ghe mò mughù tsəgha an naʼ zə Edzìpt, ù n nì nùghù sə̀ wò ghee an daʼa kə wə̄n kə̀ səŋò kò.

¹⁸ Ù n lɛ̄ɛn kɔ̀ʼ wò ghèe ghee aŋ ŋgwən aŋ ghə̀m n tə̀nùu n chìakò.

¹⁹ A m bùghò ù bu sâʼ tsughu naʼà tò sə̄ghāmbə̄ghā aŋ ghueekətsə̄ kə Kanàan, ù n nì fughu tsughu ghueekətsə̄ kə te ko â ghee enyəa ghe kele.

²⁰Ghəa ghə̀n à dzə̀m mò ni bɔ̀m n tə̀nùu n chìakò à ghə̀m n tə̀nùu mò n tɛ̀. A m bùghò zə tsəghà tsughu ù m fùghù kɔ̀ʼ wò ghee â ghì ghəla ghe lɛɛ̄n naʼ zo, bùghò kɔ̀ʼ tɛ̀ wò an tì kə ghùwshʉ̀ghà Sǎmwɛ̀l mò bughò a te.

²¹Ghe n daŋso bvʉ tsughu kədə̀ŋ; Zə̀ kə̀ m fughu tsughu ghee â Sôol, wɛ̀ ù Kîsh, ghùw ù sə an tiigh kə Bɛndzàmɛ̂n, ù n zə ndàŋ aŋ ghə̀m n tə̀nùu n chìakò.

²² Zə̀ n daŋso sùw sə̀so tsughu wə̄n, nì tsuʼ tsughu Dɛvìd an də̀ŋ kə ghee. Ù ŋ kə̀aa ghəa a Dɛvìd, dzɛ̀ tsùghù enyəa, ‘Mùghò ŋ kòʼ Dɛvìd, wɛ̀ ù Dzɛssɛ̀, tǒ ghùw wəla Ǹ ləghaa, ù lò alefwàʼ ghəa ghə̀là Ǹ ləghaa a dzə̀m.’

²³Aŋ waawɛ̄ a tûw wən, Zə̀ kə̀ n nì fùghù sə̀ wò Ezə̀lɛ̂ â Bəghambī ù te, Yɛso, aŋ ghəa ù mò boō naŋā.

²⁴ Tò ù è bughò à n lo mò Dzɔ̀n mafə̄ ghî ghə Ezə̀lɛ̂ ghò a dzə̀m zoʼnlo enyəa ghe maʼà ghəa a ghee à biigh gho ghe nî mùghù ŋ Kə̀zə̀.

²⁵ A m bùghò sùghò aŋghəa Dzɔ̌n sô mîasò tsughu fwàʼ kə wə̄n ko, ù n dzɛ̀ tsùghù enyəa, ‘Ghɛ̀ moʼò enyəa Ǹ lo ndughoo a? Ǹ yo dzə̄ ghùw wəla ghɛ̀ ləmlo wə̄n. Ɛ̂ŋgaŋ, ghùw ù lì bùghòo èbàm; Ŋ̀ kâ bùʼ kɔ̀ʼ kpe alelo ghùw ù kə̀fwàʼ ù wə̄n wəla ù alebuʼu tsɔʼɔ nughuun tsughu ko gûw tə wə̄n to alo kə kəghùw.’ ”

²⁶Ù n nì tsùghù enyəa, “Ghî ghə Ezə̀lɛ̂ ghaŋa gho, wɛ ghə Abə̀làhâm ghò, à Tòʼò zən è dzə̀m ghe kɔʼso Zə̀ kò fɛ, à lò â sɛ̀ ghe tum wô tum zən enyəa sɛ̀ lo zəa nù tuw ko.

²⁷Ghî ghəla ghe mughu aŋ Yɛ̀lusalɛ̀m ghèe ghê ghì ghəla ghe lɛnlō â ghee, ghe fə̀ kwo dzə yo enyəa à lǒ wə̄n Bəghambī ù te ghe ŋ kè zuūwkɛlɛ̄ sughò shwaʼ u ghǐishʉ̀ghà wəla ghe mgbaŋā tɔɔ̄ŋ zeē ko tsuʼntəntsə̄ tən tə̀ dzə̀m. Ghe maā kuuwn ghəŋlo shwaʼ u ghǐishʉ̀ghà wə̀ n sə̀ wò êsəŋò, ghəa ghe dzûw maʼà tsughu Yɛso.

²⁸Ghəa ghe mò doʼŋ̀kè buʼù kôʼò ko èghəa to ghe e tsəghàsò kə̀làŋ enyəa ù kpuw a te, ghe m mgbɛɛ dzɛ̀ ndùw ko â Paelɛ̀t enyəa ù ghəə̄ŋ tsughu enyəa ghe wiī maʼà tsughu wə̄n.

²⁹A m bùghò ghe sô ndôʼ fwâʼ mɛʼɛ̀ tsughu sughò ghəa gho a zəŋò wə̄n aŋghəa ghe tɔm naŋa am Mwàʼsò kə Kəzə̀ kùu ndùw wə̄n, ghe n nì nùghùu sə̀ tsùghù wò wə̄n alo kədàŋlo, nì tsə̀la tsughu wə̄n.

³⁰Zə̀ kə̀ ŋ kòom nì nùghù kɔ̌ʼ wə̄n alo evʉ̄,

³¹ù n ndùw dè sə̀ ughue an ndə̀mà tə n tsuʼu â ghì ghəla ghe mò bwîi wo dzì ghèe ghee alenùghù tsughu aŋ Galèlîi bùghò tɛ̀ an Yɛ̀lusalɛ̀m. Ghe êzəŋ fɛ lò ghî ghəla ghe teso dzâa ghəa a wə̄n gho â ghì ghə Ezə̀lɛ̂ ghò.

³²Ghàʼ fɛ bùghò tùm è dzùŋ è te alebùghò naʼà â ghɛ̀,

³³enyə: fəgha kə̀là Zə̀ kə fə̀ to naŋā enyəa e lo ghəŋlo â ghê tselè sɛ̀, ù mo êzəŋ ghəŋlo â sɛ̀ ghəlà sɛ̀ lô wɛ a ghee gho, ghəa ù nì naŋā wô Yɛso â tuw ko. Aŋ ghəa ghe tɔm naŋā an ndzàŋ è kə̀bə̀ghà am mwàʼsò kə n ndzàŋ enyəa, ‘Ghù lǒ wɛ waŋā; tsuʼ u nɛ wə̄n mùghò n dòʼo Tsùghò.’

³⁴ Ghən lò sugho ghəa ghə̀là Zə̀ kə fə̀ dzɛ̂ kùu ndùw ghəa a niī nughūun kɔʼɔ a wə̄n gho alo evʉ̄ enyəa ù lo fìa buŋù yò alo eshìa. Ù fə̀ dzɛ tsughu enyəa; ‘Ǹ lo kùm fùghuu tsughuu ghɛ̀ â bughunlo è zɔlɔ zəla mùgho fə̀ to naŋā â Dɛvìd.’

³⁵ Ù dzɛ̀ tsùghù sùghò an ndzàŋ è lì enyəa, ‘Ghù lo zə̀ghàan yò gwən e kɔ̀ɔ fə̀ghà fə̀ dzûŋ fò e fîa alo eshìa.’

³⁶À fə̀ â Dɛvìd, tɔŋlo enyəa Dɛvìd fə̀ bɔɔm fwaʼ ko fwàʼ u Kəzə̀ ènyə, bùghò kpùw è nduw, ghe n tsəla dzəəŋ tsughu wə̄n ghèe ghê tsele, gwən e wə̄n zə m fìa bùŋ ndùw alo eshìa.

³⁷Zən ka fə kuuwn sə̀ dzə̀ â zəŋò ghùw wəla Zə̀ kə̀ mò nî nughù kɔʼ alo evʉ̄.

³⁸Ghàʼ ləghaa enyəa ghɛ̀ kele tsughu a waazə̂ ghaŋa gho, enyəa à lò am bàm e wə̄n a fughuu wo tùm zən enyəa Zə̀ kə̀ lo ghuuw màʼn nù ghəa a aghì à biigh gho,

³⁹àsùghò enyəa ghùw wəla ù boō fughu tsughu â Zə̀ kò, Zə̀ kə m bəghasə tsughu wə̄n aŋ ghùu bòo tə̀n tə̀ dzə̀m lâŋ kə Musî kə̀ mò yô alezèe zəghàa wən a te.

⁴⁰Ghɛ̌ fi ki aleghòom tsughu e kwo ghəa ghəla ghiīshʉ̀ghà a fə̀ kə̂a naŋā wo a lô səa a zəŋò ghɛ̀: Ghe fə̀ dzɛ naŋa enyəa,

⁴¹ ‘Kòʼô nlǒ a ghɛ̀ ghəla ghɛ̀ tsoʼō fəgha kə̀là Zə̀ kə̀ dzaā! Tuw kə ki alekpuūw wī ghɛ, tɔŋlo enyəa an tì kɛʼɛ kən M̀ fwaʼà fwàʼ kə̀ li ko, kə̀fwàʼ ghɛ̀ kê boōm koʼò yo, abugho ghùw bùʼ dzɛ̂ sə wô ko â ghɛ̀.’ ”

⁴²Ghəa Pôl ghèe Bànabàs səā nughùun wo, ghî yi ghə n dîi dzàa wò â ghee enyəa to ghe mô bughò kə̂aa kpeʼē wô ghəa ghən an Tsuʼntsə̄ u vʉa u mò kəə̄ŋ wo.

⁴³A m bùghò dzeŋe kə ndùghùne kə sɛ̂ɛ tsughu, ndə̀mà tə ghì a Dzudà, à ghì ghəla ghe fə̂n doʼò wô Dzûu tò, ghe n sə̀ dzùum ndùw ghê Pôl, ghe ŋ kə̀aa àghəa â ghee dzɛ̀ â ghee enyəa ghe doʼò təla tsughuu ko am mwàʼ e Kəzə̀.

⁴⁴Tsuʼntsə̄ ù li vʉ̀ ghî ghə enaʼ yi m fə̄m to ghe e səā mɛʼɛ̀ wô à dzə̀m alebùghò zəə̄n kô shwaʼ u Mughubè ù te.

⁴⁵A m bùghò Dzûu tə̀ fwə̂n kôʼ tsughu nɔ̂e wo aghì wò, ghe ŋ kàʼ ndùw alemʉnlo; alesùwnlò, alesùwnlò, ghe ŋ waʼn màʼà kɔ̀ʼ ghəa yia Pôl mò kəaa.

⁴⁶Pôl ghèe Bànabàs n daŋso dzeŋe dò kə̀a sə̀ wò àghəa, dzàa ndùw enyəa, “E mô kpè nû enyəa a buʼù kə̂a wô dzə̂ shwaʼ u Kəzə̀ â ghɛ̀. Yia abugho ghɛ̀ tue maʼā, nì tsùghù enyəa ghɛ̀ kâ kɔ̀ʼ kpè tò ghɛ̀ è zə etsɛlɛ̀, ghàʼ fwəlà fùghuu ndùw êzəŋ â Tòʼò zò.

⁴⁷ Nu à lò êzə̀ Mughu ù te dzɛ̂ wò â ghàʼ enyəa, ‘Mùghò ŋ ghɛ̀ naŋa enyəa ghɛ̀ doʼo tsughu kɛ̀ʼɛ̀ kò â Tòʼò zò, ghɛ̀ lô kpɛʼɛ̄ ghəŋlo mbī edzə̀m zə kətuw.’ ”

⁴⁸A m bùghò Toʼò è zuw tsughu ghəa ghən, ghe n duʼnlo, kɛɛ Mughubè ù te bòʼ shwaʼ u wə̄n; ghî ghə̀n à dzə̀m Zə̀ kə fə̀ tsɔʼ naŋā tən enyəa ghe kê zə etsɛlɛ̀, ghe m boo fùghù ndùw à Kə̀lestò.

⁴⁹Êzə ko, ê zə ko, shwaʼ u Mughu ù te wə n nyəŋ ŋgəa tsughu mbùʼ è te e dzə̀m.

⁵⁰Ghî à ne a Tə̀dzûu ghə̀ ŋ kuuwn tsuʼn kaaŋ kô ghì à tughu gho alo enaʼ àsùghò ghìzən à ne ghəla ghe mò lo mo ghe m boo aŋ Kə̀lestò, ghe n nùghù kàʼ ndùw Pôl ghèe Bànabàs alebɛ̀, dzùm sə kɔʼ ghee am mbùʼ è ghee.

⁵¹Ghe fi buʼ màʼà tsùghù nû gbwə̂n kò aŋ ghùw a ghee aledèe tsughu enyəa ghî ghə enaʼ yi kâ bǒo dzə̀ ghəa a ghee gho, nùghù ndùw e ghee zo an Ekonìum.

⁵²Tsə̀təndə̄ghā tə n duʼnlo, Zuʼ tə̀ Zɔlɔ tə n lo ghèe ghee.