Read Aghem Kə̀fwàʼ 14 Bible Online

Kə̀fwàʼ 14 - Aghem bible

Kə̀fwàʼ 14

¹Pôl ghèe Bànabàs ndùw nyə tsughu an ndùghùne è Tə̀dzûu an Ekonìum, kə̀a àghəa a fughu an dziī zəla ndə̀mà tə Dzûu ghèe ghê Gə̀lêk tə̀ m boo fughu ndùw â Kə̀lestò.

²Dzûu təla ghe mò kuūwn boōm yo n tsùʼ sòʼ kɔ̀ʼ Etoʼò, tsʉ̀ bǒon tsughu ghee, ghe n nùghù nùghù ndùw an tuw kə tsə̀təndə̄ghā.

³Ghê Pôl n dòʼò fùghù èzə an də̀ghàa kə kəgha, dòo kə̀aa ko àghəa kùu ndùw Mughu ù te. Mughù ù te n dè fùghù wò ghəa a te gho a dzə̀m enyəa à lò êsəŋò an sə̀ghàa məla ghe mò deē.

⁴Ghî ghəla ghe mughu fughu alo enaʼ n nùghù ndzùghùun dòʼò è tsughu; à li ghə n tàʼ ndùw ghèe ghê Dzûu tì, à li ghə n tàʼ ndùw ghèe ghê tum to.

⁵Ghəa Toʼò è nughù fôʼn kɔʼ ghèe ghê Dzûu tò à dwə̀ŋ u ghee wo enyəa ghe se ndzaŋso ghee, ghe təə̄m tsughu ghee alo atīa,

⁶tum tə ŋ kelê ghəa yì, tì nùghù ndùw an naʼ e Lystlà àsùghò an naʼ e Dɛbì, naʼà tə Lìkaunìa, àsùghò aŋ ŋgwə̀là tə te to;

⁷ndùw dàŋso ko â sə ko alenaʼn nduw tùm è dzùŋ è te.

⁸Ghùw ù lòʼ n doʼ an Lystə̀là mo fwee e fwaʼà yòʼ, mò ù kaam tso bwìi sə̀ kòʼ wò, nu ghe fə̌ wə̄n dzə sə tsughu wo ko mò ù lǒ kə̀ŋgwûundughu.

⁹Ù n zə̂ən kô shwaʼ u Pôl, Pôl n tɔʼɔ̀ fwèe sùghò wə̄n, ghəa ù kòʼ tsughu enyəa ù m fə̀ŋ gaʼ aŋ Kə̀lestò vʉ̀ ù kpe to a e baŋlo wə̄n.

¹⁰Pôl n nùghù dzɛ̀ sə kɔʼ an dzə̂ è tughu enyəa, “Nùghu tee kɔʼ edzūŋ am fwee zəghà.” Ghùw vʉ n daŋso ghàʼ nùghù těe è kɔʼ, bwìi sə̀ è nduw.

¹¹A m bùghò nɔ̂e wə aghì yi kôʼ ghəa yia Pôl fwàʼ tsughu, ghe m buʼnlo m̀bɔ̀ŋ an shwāʼ u tə Lỳkaunìa enyəa, “Zʉ̀ wə̀ n sə̀ tsùghù wò a vʉ̀a sɛ̀ aŋ ghuè e aghì.”

¹²Ghe n tɔŋɔ ndùw Bànabàs enyəa à lò Zêus, tɔŋɔ ndùw Pôl enyəa à lò Hɛ̂ɛms, bòʼ à mò ghəa a biso kəā wə̄n.

¹³Fɔ̀e è Zêus, wəla tsughu e wə̄n e mò kuʼù doʼò sə ndûw ko a fǔuŋghɔ̄ŋ wə enaʼ, n ndùw nì wò num a təmbɔ̀ŋ à twii u sə̀ŋ wò, bùghò těe wò â fʉgha vʉ a fǔeghɔ̄ŋ; ghèe ghê nɔ̀e kə aghì chi n ləghaa alefughu ghê Pôl â fughu ko.

¹⁴A m bùghò Bànabàs ghèe Pôl zuw tsughu ghəa yì, ghe n sùʼn bàan màʼà tsùghù təndzʉ a zəŋo e eghùe e ghee, nyə̀ŋ nyə̀ ndùw am bvʉa e ghee buʼn ndùw m̀bɔ̀ŋ enyəa,

¹⁵ “Ghɛ̀ ghəa ghən ghəŋlo aŋ kwò a naʼ zo a? Ghàʼ lo sugho aghî, aghî ènyə tò ghɛ sùghò, ghàʼ fɛ bughò alebùghò naʼà wô ghɛ̀ â Làbəlà è Dzùŋ, enyəa ghɛ̀ koom ni nughu wo fə̂ŋ tɛʼɛ to aŋ ghə̀a à kwu ghən, ghɛ̀ doʼo wo ghɛ̀ à ghê Zə̀ kəla kə lô â tuw ko; Zə̀ kəla kə bɔm wala ko à ghueekətsə̄ ko, bɔ̀m sùghò tədzughù, àsùghò fʉgha wə̀n ù dzə̀m u lo a te.

¹⁶Sʉ̂esʉ, Zə̀ kə̀ n zə̀ghàa tsùghù ghî ghə̀n à dzə̀m enyəa ghee e ghəəŋ nduw ghəa a ghee gho.

¹⁷Ù fɛ kuuwn mgbɛɛ dèe tsə̀ghà ko enyəa e lo nû bòʼ ghə̀a à dzûŋ ghə̀là ù ghəŋlo: ù fùghuu tsughuu wò ghɛ̀ â ghuuw zo alo kəwālā, ghəŋlo enyəa fʉghàzəa wə enomlo an usum an nə̀gha è dzûŋ zò; ù fùghuu ghɛ̀ a fʉ̀ghàzəa wo, dzə̀là wò kə̀tsoʼnlo am fə̀ŋ tɛʼɛ.”

¹⁸A m bùghò ghe bûʼ kə̂a ndûw ko shwaʼ vʉ̀ èzə̀, ghe n naam ŋgè də̀m tsùghù ènyə alebughū naŋa enyəa ghî yi ka nyôm ti sɛ̂ fùghù â ghee.

¹⁹Dzûu tə̀ li tə n ndùw nughù wò an Antìok àsùghò an Ekonìum bughò kòom fɔ tsughu tɔ u ghì yì, ghe ŋ kòom kàʼ ndùw Pôl alo atia aletə̄mlō, sè nùghù sə̀ ndùw wən alo enaʼ mòʼò ko enyəa ù m kpuw.

²⁰A m bùghò waazə̂ à li ghən nyəŋ zûuŋ wo a vʉ̀a wə̄n, ù n daŋso nùghù è kɔʼ, kòom nùghù nyə̀ ndùw è bàm fughu alo enaʼ. A n daŋso nùghù wò tsʉtsʉ vʉ̀ ghèe Bànabàs n nùghù nùghù dàŋso ndùw an naʼ e Dɛbì.

²¹A m bùghò ghe naʼā tùm è dzùŋ zən fughu alo enaʼ kele kɔʼ ndə̀m è àghì, ghe ŋ kòom nùghù ndùw è bàm an Lystlà, ndùw nùghù dàŋso ndùw an Ekonìum, ndùw tsə̀ghà dàŋso ndùw an Antìok.

²²Ghe n dzəlà ndùw tsə̀təndə̄ghā tə ghee â sə̀ŋ zò, toon ndùw ghee enyəa ghe e ti ko am fə̂ŋ zəla ghe gaʼ tsughu aŋ Kə̀lestò. Ghe n dzâa ndùw sùghò â ghee enyəa, “A ki ko alenyə am Fɔ̀e u Kəzə̀ mo an tèlè fàla tsughu dzə̀.”

²³À m bùghò ghe ndûw kôʼ ndûw dzeŋe kə ghì ghəla ghe boō fughu â Kə̀lestò alo kəlùʼu, ghe n tsɔʼ kɔʼ tətsoʼ a fughu an dzeŋe kə te ko, ghe m bam tsughu edzughu è gɔnlo alefughūu zəghàa ndûw ghee â Mughubè ù te wəla ghe boō fughu â wə̄n.

²⁴Ghe n daŋso tsə̀ghà sə̀ ndùw dzì an Pìsidìa, nyə̀ wò am Pàmfilìa.

²⁵A m bùghò ghe kə̂aa tsughu shwaʼ u te wo am Pɛlgà, ghe n nùghù tsùghù ndùw an naʼ e Àtalìa,

²⁶zə̀ghàa tsùghu fughu, nùghù dàŋ ndùw an Antìok alo kəkwə̀n an naʼ zəla ghe mò fughu ghee â dwaʼa u Kəzə̀ wò alendùw fwâʼ fwàʼ chia ghe fwâʼ mɛʼɛ̀ kɔʼ.

²⁷A m bùghò ghe ndûw nyə nduw, ghe n tɔŋɔ naŋa tsughu ghî à Kə̀lestò, dzɛ̀ kɔ̀ʼ ndùw ghəa ghə̀n à dzə̀m Zə̀ kə̀ lo mo kə m fwǎʼ ghèe ghee àsùghò ghəa ù tsʉ tsughu dzì enyəa Toʼò tə̀ è lo alegaʼ a sughò fə̀ŋ aŋ Kə̀lestò.

²⁸Ghe ŋ kòom tso muʼn mùghùu kə̀ŋo ndùw kə̀gha fughu ghèe ghê ghì yia ghe boō fughu tsūghu aŋ Kə̀lestò.