Read Aghem Kə̀fwàʼ 15 Bible Online

Kə̀fwàʼ 15 - Aghem bible

Kə̀fwàʼ 15

¹ Ghî à li ghə ŋ kòom ndùw nùghù tsùghù ko an Dzùdîa, bùghò kàʼ wò ghì ghəla ghe boō fughu â Kə̀lestò an Antìok a lùʼù tsʉā wo enyəa, “À gɔ̀ʼɔ̀ mo ghe sugho tigh kə̂a aŋ ghəa bughōo kə Musî kə̀ deē, ghù yò dzə̂ alezə̄ kə̄tūw.”

²A m bùghò Pôl ghèe Bànabàs ŋge zughūu aŋ ghəa a te gho ghèe ghê ghì yì, ŋge pfʉ tsughu edzughu enyə à tè, ghî ghəla ghe boō fughu â kə̀lestò n tsɔʼ kɔʼ ghee a bə̀ghà àsùghò ghì à li gho enyəa ghe kɔʼɔ ndûw an Yɛ̀lusalɛ̀m ghe kɔʼɔ̄ koʼò ndûw tə̀tum à tsoʼ to aŋ ghəa e te zo.

³A m bùghò ghe sô lo an dziī ghəa ghî a Kə̀lestò à tum sə tsughu ghee, ghe n tsə̀ghà nyə̀ ndùw dzì am Fòenishìa àsùghò an Sàmalìa, nàʼn ndùw ghəa Toʼò è fəlà doʼn wô ghî à Kə̀lestò ghò a te. Shwaʼ wən n dzə̀n ndùw kə̀duʼnlo am fə̀ŋ tə waakə̀lestò yì à dzə̀m.

⁴A m bùghò ghe bughò nyə wo an Yɛ̀lusalɛ̀m, ghî a Kə̀lestò ghə̀ m kpènì ghee ghèe ghê tum to à tsoʼ to, ghe n dzɛ̀ tsùghù ghəa ghə̀n à dzə̀m Zə̀ kə̀ yôsò kɔʼ ghee enyəa ghe ghəə̄ŋ ndûw.

⁵Ghî à li gho an dzeŋe kə Falàsîi ghe fə̀ boō fughu tsughu â Kə̀lestò, n nùghù è kɔʼ kàʼ ndùw alekə̀aa enyəa, “E dzɔ̂ɔ nù enyəa to Toʼò è mô sùghoo tsūghûu twii e ghee, ghe e naaŋ tsughuu lâŋ kə Musî kò.”

⁶Tum tə n zùuŋ tsùghu ghèe ghê tsoʼ to alebùghò lɛɛ̄n nyəā tsughu ghəa zən.

⁷A m bùghò ghe pfʉ dzughu zo aŋ ghəa e te zo, pfʉ; Pità n nùghù è kɔʼ dzɛ̀ â ghee enyəa, “Waazə̂ ghaŋa gho ghɛ̀ kwo nû enyəa sûesʉ Zə̀ kə fə̀ shiā sə wo mugho am bvʉa zɛʼɛ̄ enyəa Ǹ naʼà ndûw shwaʼ ù dzûŋ wən â Tòʼò zò, to ghe zuw, ghe boō fughuu tsughu.

⁸Zə̀ kəla kə kwo fə̀ŋ è ghùw, kə n dè wò e m boo, fùghù ndùw sùghò ghee â Zuʼ tə̀ Zɔlɔ to, aŋ ghəa ù fə̀ bɔɔ̄m fughu sugho â sɛ̀;

⁹Ù n sùw màʼà sùghò bòo tə ghee bòʼ ghe gaʼ tsughu fə̀ŋ aŋ Kə̀lestò. Ù bàa yò kpiī wo sɛ̀ à ghê Tòʼò zò.

¹⁰À sò èzəŋ lo kwò ghɛ̀ sô lo tò ghɛ̀ mɔ̂ɔkòʼò Kə̀zə̌ a alenìi boʼò fughuu tsughu kəmbùŋ â tsə̀təndə̄ghā to mò ghê tselè sɛ̀ mò yo alebòʼò, sɛ̀ yia yô sughò alebòʼò lo a?

¹¹Sɛ̀ fɛ kuuwn kwo ko enyəa sɛ̀ lo zəa nù tuw ko am bàm e dzùŋù m Mughùbè Yɛso, aŋ ghəa Toʼò è lo bɔɔ̄m zəā sugho.”

¹²Ghî yì à dzə̀m m bɔɔm zuuw ko mɔŋ; zəəŋ ndùw ko â Bànabàs ghèe Pôl aŋ ghəa ghe taŋsō sə̀ghà mə̀là Zə̀ kə̀ lo mo kə n dè â Tòʼò zò am bàm e ghee.

¹³A m bùghò ghe ndôʼ kə̂aa mɛʼɛ̀ tsughu, Dzɛ̂ms m bɛ̀lɛ̀ ndùw enyəa, “Waazə̂ ghò, zuw tsughu nlò ghɛ;

¹⁴Sǎemòn n teso kɔ̀ʼ wò ghəa Zə̀ kə̀ mò zeʼē bâŋ kôʼ Toʼò zò, shìa sə̀ wò àghì am bvʉ e ghee enyəa à lò ghî a wə̄n.

¹⁵Ghəa ghən fɛ bɔɔm boo dzə̄əŋ ndùw ghèe shwaʼ u ghǐishʉ̀ghà wəla ghe tɔm naŋā enyəa Mughu ù te mò dzɛ enyəa,

¹⁶ ‘Abugho ghəa ghən tsəghà tsughu, Ǹ lo bughò èbàm, M̀ bughò bəghāa kɔʼ ndùghù è Dɛvìd, zəla è lǒ mò è sɛ̀ɛ dòʼò nù; Ǹ lo kôom zûuŋ kaāŋ wô kèndughu kə te ko M̀ bəghāa tiso kɔʼ,

¹⁷to ghî à li ghən kəŋo wô sughò Mughò, àsùghò Tòʼò zə̀n è dzə̀m Ǹ tɔŋɔ̄ enyəa ghe doʼò tsughu ghî ghaŋa.

¹⁸Mughu ù te mò ghəəŋ tsughu enyəa ghî à kelê ghəa ghən â wǐiwì.’ ”

¹⁹Dzɛ̂ms ŋ kə̀a ndùuŋ ndùw enyəa, “Moʼn zaŋa e mô fɛ lo enyəa e kwo sɛ̀ lô fəmsō Toʼò zəla e lo mo zə m boo â Zə̀ kò,

²⁰a laām tɔɔ̄ dzâa ndûw â ghee enyəa e kwo ko ghe lô zəā fəghàzəa ko mo ghe n sɛ̀ alo uzʉ̀kɔ̂ŋ, ghe ka e nuūŋ kaŋlo, ghe ka e pfʉa nyòm mo ghe bɔe wī nû, ghe ka mʉ sùghò kâŋ tò.

²¹Sʉ̂esʉ ghî a fə̀ lo tsəgha nû an nàʼà tə̀n tə̀ dzə̀m ghe mò dêe tsəghà ghəa ghən an làŋ kə Musî an ndughutə̀ne to tsuʼntəntsə̄ tən tə̀ dzə̀m.”

²²Tum tì ghèe ghê tsoʼ to àsùghò ghì ghəla ghe boō tsughu ŋ kòʼ tsùghù enyəa e dzɔ̂ɔ nù enyəa to ghe mô dzə̂a kɔʼ aghî am bvʉa e ghee ghe tuū ndûw an Antìok ghèe ghê Pôl à Bànabàs. Ghe n tsɔ̀ʼ sə̀ wò ghì ghəla ghe mò lɛɛ̄n ghî ghò am bvʉa e waakə̀lestò e te zo a bə̀ghà. Ghe n nì sə̀ wò Dzudàs wəla ghe fə̀ tɔŋlo enyəa Bàsabàs àsùghò Silàs, tùm è nduw,

²³à mwàʼsò kò kə dzâa tsughuu enyəa, “Ghàʼ tə̀ tum, à tsoʼ to, waazə̂ ghɛʼɛ, ghàʼ tum tɔ̄ɔŋ wò waazə̂ ghaʼa a dzə̀m ghəla ghe dzə tsughu tò Etoʼò; ghəla ghe mughu an Antìok, an Sylìa, àsùghò an Cilisìa.

²⁴Ghəa ghàʼ lô mò ghǎʼ n zuw enyəa ghî à li a mò sə kɔʼ fɛ am bvʉa zaʼā bùghò fə̀mso ghɛ̀ an tsʉ̀ è li zo, sàʼ màʼà tsùghù môʼn zɛʼɛ, mò à kà ghǎʼ ghee bûʼ tùm sùghò.

²⁵Ghəa ghàʼ tsughu doʼò tsughu an dzə̂ e mɔ̀ʼ yia kôʼ tsughu enyəa e dzɔ̂ɔ nù enyəa a dzə̂a kɔʼ aghî, a tuū wô a vʉ̀a ghɛ̀ ghèe ghê waʼwawāʼ Bànabàs àsùghò Pôl.

²⁶Ghən lò aghî mo ghe n nəgha nyəfo aŋ ghəa e Mughùbè ù sɛ̀ Yɛso Kə̀lestò.

²⁷Zən lò e ghee ghàʼ tum wô Dzudàs ghèe Saelàs, enyəa ghuūghùe e ghee e bughò dzâa wô ghəa è mɔʼɔ̄ zo alo edzughu.

²⁸E mò dzɔ tsughu nû â Zuʼ tə̀ Zɔlɔ to aŋ ghəa tə mò ghəə̄ŋ tsughu enyəa ghàʼ koʼò tɔɔ̄ kɔʼ enyəa to a kâa bòʼò fùghù dzə̀ ghɛ â kə̌a kə̀ dalā ko tsə̀ghàsə̌a ghəa ghən:

²⁹nyəa ghɛ̀ bughu naŋa alezə̄a fʉgha wəla ghe sâa ndûw alo uzʉ̀kɔ̂ŋ, kǎ nlò è mʉa kâŋ tò, kǎ nlò pfʉa nyòm zəla ghe wi mo ghe bɔe wī nû, ghɛ̀ zəghaa maʼa sugho ghəa à nu kaaŋ gho. Abugho ghɛ̀ zəghàa maʼà tsughu ghəa ghən, à lo lǒ dzɔ̀ â ghɛ̀. Dòʼo nlò kədzûŋ.”

³⁰Ghe fi tum sə̀ ndùw nǔ ghee, ghe n tsùghù ndùw an Antìok; a m bùghò ghe zûuŋ naŋā tsughu waakə̀lestò yi alo fətùʼù ghe n dzə̀ fùghù ndùw mwàʼsò kə te ko.

³¹A m bùghò ghe daŋso tɔɔ̄ŋ kɔʼ, ghe n tsoʼn ndùw ènyə an shwaʼ vʉa ghe dzə̂n wo fə̀ŋ è ghee a te.

³²Dzudàs ghèe Saelàs, mo ghuūghùe e ghee e lo sugho ghê wàkə̀a, ghe m fəghaan kə̀aa kpèʼe ndùw ndə̀mà tə aghəa tə̀ li to â ghee, dzə̀n kpèʼe ndùw fə̀ŋ tə ghee, dzə̀n ndùw sùghò ghee â sə̀ŋ zò.

³³Ghəa ghe tsûuŋ doʼò kəŋo ndûw sugho fughu ghèe ghee, ghe mo e ndûuw èbàm a vʉ̀a ghì yia ghe mò tum ghee, waakə̀lestò yi n ndòʼ tə̀ma kɔ̀ʼ sùghò ghee, dzɛ̀ â ghe enyəa ghe ndûw kədzûŋ.

³⁴[Saelàs ŋ kòom nùghù ləgha tsughu aledòʼòdoʼò fughu.]

³⁵Pôl ghèe Bànabàs n dòʼòdòʼò tsùghù an Antìok, tsʉ̀a ndùw àghì, kə̀aa ndùw sùghò shwaʼ u Mughu ù te, ghèe ghê ndə̀m è àghì à li gho sughò.

³⁶A m bùghò tsuʼu n tsəghà tsughu n sòʼ ènyə Pôl n nùghù dzɛ̀ tsùghu â Bànabàs enyəa, “Bùghò sɛ̀ kôom ŋgəa bwîin koʼò kaāŋ ndûw waazə̂ a sɛ̀ an nàʼà tə̀n tə̀ dzə̀m sɛ̀ lo mo an ndùw nàʼà kǒʼ tùm è Dzǔŋ fughu, a ndûw kôʼò kaāŋ wô enyəa ghe fughu lo kaaŋ nduw ênzə̂n.”

³⁷Bànabàs n ləghaa alenìi kɔʼ Dzɔ̀n wəla ghe mò tɔŋlo enyəa à lò Mâk enyəa ghèe ghee ndûw à dzə̀m.

³⁸Pôl ŋ kuuwn mòʼò enyəa e mô dzɔ̀ɔ yò alenì ghùw mò ù mò bugho kōom nughu nduw ebàm am Pàmfilìa, kè mîasò kə̀fwàʼ ghèe ghee.

³⁹Ghe n nùghù nǔum zùghùu tsùghu fughu alo eghùe, daŋso sɛ̀ɛ è tsughu; Bànabàs n nì kɔ̀ʼ Mâk nùghù dàŋ ndùw ghèe wən an Saepə̀lùs alo kəkwə̀n,

⁴⁰Pôl ŋ kuuwn shìa kɔ̀ʼ Saelàs, waazə̂ à li ghən ŋ gɔ̀ɔŋ tsùghù enyəa Mughu ù te e nyaŋlo â ghee, daŋso tə̄mā zə̀ghàa kɔ̌ʼ ghee.

⁴¹Pôl n tsə̀ghà nyə̀ ndùw dzì an Sylìa àsùghò an Sìlishìa, dzə̀là ndùw ghì a Kə̀lestò â sə̀ŋ zò.