Read Aghem Kə̀fwàʼ 16 Bible Online

Kə̀fwàʼ 16 - Aghem bible

Kə̀fwàʼ 16

¹Pôl m bùgho sùgho an Dɛbì àsùghò an Listə̀là. Ghùw ù li m mughu fughu ù boō â Zə̀ kò zən e wən e fə̀ lô Timotì; wɛ ù zəla Dzûu, tsele mò kuūwn lo ghùw ù Gə̀les.

²Zwɔ̂ŋ u wən wə m fuŋu aŋ ghəa à dzûŋ ghò am bvʉa e ghì ghəla ghe boō fughu â Kə̀lestò fughu an Lystla àsùghò Ekonìum.

³Pôl n ləghaa enyəa to Timotì mò nughu wô a bàâ ghee; ù ŋ ghəŋlo è tsughu ghe n sugho tsughu tigh kə Timotì bòʼ Dzûu təla tə mò mughù kaŋlo an lùʼu tə te to, nu ghee a dzə̀m mò kwo nû enyəa tsele ù Timotì lǒ ghùw Gə̀les.

⁴Ghəa ghe bwiī dzi, nyəa ndùw naʼatənaʼa, ghe n naʼn ndùw fəgha kəla tsə̀təndə̄ghā tə mò boō naŋa ghèe ghê tum tə Kə̀lestò tò an Yɛ̀lusalɛm enyəa à lò fəgha kəla kə lo tò lâŋ kəla ghe ki alenaŋa.

⁵Êzə ko, êzə ko, ghe n dzəlà ndùw ghì a ndughutəkəzə̀ â sə̀ŋ zò am boo e ghee, kɔ̂n kə ghee ki n noom səa ndùw sùgho tsuʼu mən n dzə̀m n dzə̀m.

⁶A m bùgho Zuʼ tə̀ Zɔlɔ tə tue enyəa ghe ka ghəa gho am mbùʼ è Ɛshìa kə̂aa, ghe n tsə̀gha sə̀ ndùw dzi am Fə̀legia àsùghò aŋ Galɛshia.

⁷A m bùgho ghe bugho tɛ tsughu an twee u Myshia, ghe n se nyəa ndûw am mbùʼ è Bìtinìa, Zuʼ tə Yɛso tə̀ ŋ kè boo;

⁸ghe fi tsəghà tɔɔn daŋso nyə ndùw Myshia, sə tsughu daŋso ndùw an Təloas.

⁹A m bùghò â tsuʼ wo, Pôl ŋ kòʼ ghùw Masɛdonia ù lì tò ù koʼ an dzǒo mò vʉ̀a ù ti, buʼu wò kəghu â wən enyəa, “Dàŋa wò an Masɛdonia ghù bugho yoso ghaʼ.”

¹⁰A m bugho Pôl koʼ tsughu ghəa yi ezə̀, ghàʼ n daŋso tee ko alo efwee aledàŋ am Masɛdonia, ghàʼ sô nî ndûw enyəa Zə̀ kə̀ ghaʼ fɛ tɔŋɔ tsughu nû enyəa a ndûw naʼa tum è dzùŋ è te â ghee.

¹¹Ghàʼ n nì kɔ̀ʼ kəkwə̀n, zə̀ghaa tsùghu Təloas, tiso ndùw ko èghue an Samotəlàs, tsʉtsʉ vʉ̀ a n lo an Nǐapolìs.

¹²A n zə̀ghaa tsùghu fughu nyə̀ ndùw am Filippi, naʼ zəla e lô tuw kə enaʼ ko am mbùʼ è Masɛdonia, mo e kuuwn lò a tsəlà naʼ e Lumà zò. A n tsùuŋ dòʼo kəŋo ndùw ntsuʼu fūghu alo enaʼ.

¹³A m bùghò Tsuʼntsə̄ ghàʼ n zə̀ghaa è tsughu ndùw an twee wə enaʼ a ŋgùŋ è dzùghù, a màʼa kwo enyəa luʼu kə ghì a Dzûu kə̀ nduw gɔɔŋ kə lo fūghu, ndùw gàʼ dòʼo è tsughu, kàʼ ndùw ghəa à kəā gho â yìzən à li gho ghe mò zûuŋ doʼ a fughu.

¹⁴Wìzən ù lǐ n lo aŋ ghìzən yia ghe mò zəə̄n shwaʼ wāʼa vʉ̀ mo zən e wən e lo Ledìa, mò ù sə̀ an naʼ e Tìatilà, fèen tsə̀ghà wən â ndzʉ təla tə ləŋō tò alɔ̂m. Nughò vʉ n lo mò ù kɔ̀ʼso tsə̀ghà Kə̀zə̀. Mughu ù te n tsʉ kɔʼ fə̀ŋ è wən enyəa ù tɔ̀ʼɔ̀ zuw fəgha kəla Pôl mò kəaa ghè kò.

¹⁵A m bùghò ghe bughò fughu tsughu wə̄n â mùghù ŋ Kə̀zə̀ mò ghèe ghê nùm à wɛ a ghee gho, ù n dzɛ̀ à ghàʼ enyəa, “Abugho ghɛ̀ kôʼ tsughu enyəa — Ǹ lo nû ghûw zɔ̀lɔ an sə kə Mughu ù te, ghɛ̀ m bùghò dòʼò alô mùghò an ndughu.” Ù ŋ ghəəŋ ko êzə̀, kɔɔŋ nùghù ndùw ghàʼ.

¹⁶A m bùghò tsuʼ fə̀ li fo aŋghəa ghàʼ nduūw an lùʼu kə̀ gɔɔ̄ŋ ko, kɔ̂ɔ fə̀ zən fə̀ li fə m sə kpeen wò ghàʼ à ghee mo fə ki zə̀a fə̀ biigh fo, fə ghəŋlo enyəa ù e dzaā nyaʼ fo, ù ŋ kelê ndə̀mà tə ukʉa an nyaʼ fìa ù dzâa.

¹⁷Ù n nùghù nùghù wò a bàâ ghaʼà ghê Pôl, buʼn wò m̀bɔ̀ŋ enyəa, “Ghî ghən lo kɔ̀ɔ n Zə̀ kə̀ Ghaʼa kən kə̀ dzə̀m, ghe naʼn wô ghɛ â dzì è zə̌a è kə̀tūw.”

¹⁸Zən fi ŋ ghə̂əŋ ghəa ghən an ndə̀mà ntsùʼu. Nʉghà wə̀ n nùghù pfʉ kɔʼ Pôl, ù n nùghù fə̀n dzɛ̀ ndùw â zə̀ kə te ko enyəa, “An zən e Yɛso Kə̀lestò, Ǹ dzɛ̂ enyəa ghù sə nughu a zəŋò wə̄n.” Zə̀ kə te kə n sə̀ nùghù wò a zəŋò wə̄n an nə̀gha e te zo.

¹⁹Ghəa ghî ghəla ghe ki wə̄n kôʼ tsughu enyəa ghe ŋ gùŋù zə zəla ghe mò zəā aŋ ghùu wən, ghe ŋ kwu kɔʼ Pôl ghee Saelàs; sè ndùw ghee a vʉ̀a tsoʼ to am fwànlò;

²⁰a m bùghò ghe nî nduw ghee a vʉ̀a ghê sàʼàtə̀saʼ, ghe mo enyəa, “Ghî ghən lo ghî a Dzuu, ghe yia fəmso kaāŋ naʼ e sɛ̀ zò.

²¹Ghe tughuu wò â dzughu zo aŋ ghəa à li gho mo lâŋ kə sɛ̀, tò ghî a Lumà kə kâ bǒo dzə̀ enyəa a boō naŋa ŋkāa a e bwiī a te.”

²²Ndə̀m è àghì n nyə̀ ndùw à tè, ghê sàʼàtə̀saʼ m bàan màʼà tsùghù təndzʉ a zəŋò ghee, tsə̀ghàsò tsùghù kəlâŋ enyəa ghe tsɔʼ ghee alo təkwùu.

²³A m bùghò ghe biso tsɔʼ tsughu ghee, ghe n nì sɔ̌ɔn màʼà nyə̀ ndùw ghee an ndùghùtsāʼ dzɛ̀ tsùghù â gbè enyəa ù è tɔʼɔ̄ chiīn ghee.

²⁴Ghəa gbè zə ni kɔʼ lâŋ chì èzə̀, ù n nì dzə̀n nàŋa mìa nyə̀ ndùw ghee an dzughu e ndughu e tèete zo an ndùghùtsāʼ; nyə̀ kùum nàŋa tsughu fwee e ghee am fwàŋà u efwēe.

²⁵A m bùghò â fə̀ŋ è ùtsùʼ ghəa Pôl ghèe Saelàs ŋ gɔ̂ŋlò, kɔʼso Kə̀zə̀ alo təzòo, ghîidùghùtsaʼ à li yi zəənlo.

²⁶Ghueekətsə̄ kə m vùŋù nùghù nòʼ tsùghu fɛ̀ɛn kə enòʼ kə̀ li ko, ndùghùtsaʼ n nòʼ kǎaŋ wò è dzə̀m; bwâʼ wə̀ n daŋso nùghù tsʉ̌ʉn kaaŋ wò ù dzə̀m, kàʼ mə̀n n dzə̀m m mò fa doʼō am fwàŋà u efwēe u ghee yì à dzə̀m n tsɔʼn sə kaŋlo è wo.

²⁷A m bùghò gbè zə zôo kôʼ ghəa bwâʼ u ndùghùtsaʼ u tsʉʉ̄n doʼō a te, ù n dzaā ko enyəa ghiīndùghùtsaʼ ghə n tiin sə, daŋso tsùghù sɔ̀ŋ kɔ̀ʼ fənyə enyə e wi ghue u wə̄n.

²⁸Pôl ŋ ke kəbɔ̂ŋ, â wəlà, “Kà ghue wʉ̀a ù nomso, ghàʼ a dzə̀m lò nû fɛ!”

²⁹Gbè zə n daŋso bvʉ tsughu kəkɛ̀ʼɛ̀, daŋso zə̀ghà nyə̀ ndùw fughu aŋ ghùe ù tsəəŋ wo, ndùw tìbvʉ̀ ndùw â tsə̀là Pôl ghèe Saelàs,

³⁰nì nùghù sə̀ wò ghee beē bvʉ â ghee enyəa, “Ghêe Mughubè ghaŋa, Ŋ̀ ki aleghəŋlo ênzə̂n tò Ǹ zə kətuw à?”

³¹Ghe n dzɛ̀ â wən enyəa, “Boo tsughu am Mughùbè Yɛso, ghù lo zə tuw ko ghɛ̀ à ghê kèndughu kə̂a kò.”

³²Ghêe Pôl ŋ kə̀aa wən â ghəa gho kə̀aa sùghò â ghì ghə̀n à dzə̀m ghe mò lo an ndughu alô wə̄n kùu ndùw Mughu ù te.

³³Ù n nì kɔʼ ghee an nə̀ghà è mɔʼɔ̄ zə̀ èzə̀ â tsuʼ wo vʉ̀, ndùw sùw fəŋ a ghee, ghe m fùghù tə̀n tsùghù sùghò wən â mùghù ŋ Kə̀zə̀ mò, à ghì a wə̄n gho a dzə̀m an ndughu.

³⁴Ù n daŋso nì kɔ̀ʼ wò ghee alô wən an ndughu, tiso ndùw ùfʉ̀ghàzəa an sə kə ghee; ghèe ghê ghì a wə̄n gho a dzə̀m n duʼnlo enyəa ghe m boo Zə̀ kò.

³⁵A mo kôom bughò â tsə̀, ghê Sàʼàtə̀saʼ n tùm wò tə̀gbə̀le enyəa tə bughò dzɛ̂ enyəa ghe zəghàa maʼà ghê Pôl ghe nughù.

³⁶Gbè zə n nì dzɛ̀ ndùw sùghò ghəa yì â Pôl â wən à, “Ghêe sàʼàtə̀saʼ tum wò tum enyəa a zəghàa maʼà ghɛ̀ ghɛ̀ nughu; à fi lo enyəa ghɛ̀ sə nduw ko nlò nyàʼànyàʼà.”

³⁷Pôl ŋ kòom dzɛ̀ â ghee enyəa, “Ghe ŋ ghàʼ bu an sə kə aghì mò ghàʼ mgbaŋ lò ghî a Lumà mo ghe kâ ghàʼ saʼ, nì dzə̀n ndùw ghàʼ an ndùghùtsāʼ; ghe ghaʼ èzəŋ se tsəŋō sə̄sō nù à? Ɛ̂ŋgaŋ! Na ghue e eghùe e ghee e bughò nîi səā ndûw ghàʼ.”

³⁸Gbə̀ zə n ndùw nàʼà ndùw sùghò ghəa ghən â ghê sàʼàtə̀saʼ, fə̂ŋ tə̀ n sə tsughu ghee enyə ghəa ghe zuw tsughu enyəa ghe lo waakətsə̄ a Lumà;

³⁹ghe fi bughò bùʼ nû ghu ko â ghê Pôl. Ghe n nì nùghù sə̀ ndùw ghee, dzɛ̀ enyəa ghe zəghàa tsughu naʼ e te zo.

⁴⁰Ghe fi sə nùghù tsùghù nû an ndùghùtsāʼ ndùw bwìin kòʼ ndùw Ledìa, a m bùghò ghe ndûw kôʼ tsughu sughò waazə̂ a ghee gho, ghe n dzə̀n tsùghù fə̂ŋ tə ghee, è nughu.