Read Aghem Kə̀fwàʼ 19 Bible Online

Kə̀fwàʼ 19 - Aghem bible

Kə̀fwàʼ 19

¹Ghəa Apolòs lò aŋ Kɔlèent, Pôl n tsə̀gha kɔʼ ndùw naʼ ènaʼ ndùw nyə̀ ndùw an naʼ zə Ɛfɛsus. Ù n ndùw kòʼ ndùw tsə̀təndə̄ghā tə Yɛso tə̀ li to fughu.

²Ù m bvʉ â ghee enyəa, “Zuʼ tə̀ Zɔlɔ tə mafə nyə a zəŋò ghɛ̀ aŋghəa ghɛ̀ mò boō tsughuu a?” Ghe mo enyəa, “Ɛ̂ŋgaŋ dzə̂, ghàʼ kaam bûʼ zùw kòʼ enyəa fəgha kə̀ li lo nû tò Zuʼ tə̀ Zɔlɔ to.”

³Ù n daŋso bvʉ â ghe, “À kǔuwn lǒ ŋgòʼ è mùghù ŋ Kə̀zə̀ ŋ ghɛ̀ mò ghe mò fughu â ghɛ̀ a?” Ghe mo enyəa, “À mò lo mùghù ŋ Kə̀zə̀ kùu ndùw ghəa ghə̀là Dzɔ̌n fə̀ zoʼnlō.”

⁴Pôl n dzɛ̀ â ghee enyəa, “Dzɔ̌n fə̀ fughuu mùghù ŋ Kə̀zə̀ â ghì ghəla ghe lo mo ghe ti kuwnlo fə̂ŋ tə ghee tə̀ biigh to, dzàa ndùw â ghî ghò enyəa ghe boō fughu tsughu â ghûw wəla ù mò ki alebùghò a bǎa wə̄n, tɔɔŋ Yɛso.”

⁵A m bùghò ghe zuw tsughu shwaʼ wə̄n wo, ghe m boo è tsughu, ghe fughu tsughu ghee â mùghù ŋ Kə̀zə̀ mò an zən e Mughù u te Yɛso.

⁶A m bùghò Pôl daŋso gaʼ tsughu ghu a wə̄n gho an tuw u ghee, Zuʼ tə̀ Zɔlɔ tə n daŋso nyə tsughu a zəŋò ghee; ghe ŋ kàʼ ndùw alesāʼ saʼà tə nàʼà tə̀ nughù tò, kə̀aa ndùw shwaʼ u Kəzə̀.

⁷Ghe fə̌ fughu dzeŋe lo tǒ aghî èghəm à ghè ghò a bə̀ghà.

⁸Pôl n nì kɔ̀ʼ tədzɔŋɔ tə təgha mò ù mgbɛ̌ɛ ndùw nyəa dòo kə̀aa ko aghəa ghèe ghee an ndughenē, pfʉa tsə̀ghà èdzughu fughu ghèe ghee, mgbɛɛ ko aŋ ghəa e fɔ̀e ù Kəzə̀ an ndughune.

⁹A m bùghò ghee à li a tughūu â tuw ko, tuu alebōo, ndzɛlɛ kə̀aa sùghò shwaʼ ù biigh wo kùu ndùw Dzì zəla Mughu ù te ləghaa, Pôl n zə̀ghàa tàʼà tsùghu ghee, nì nùghù ndùw tsə̀təndə̄ghā tì, ghèe ghee ndûu kə̀aa zêe àghəa an sàŋkpàa kə Taelānùs.

¹⁰Ghəa ghən n nì kə̀bala alo tənùu tə bə̀ghà, ghî ghə̀n à dzə̀m ghe mughu an Ɛshìa, Tə̀dzûu ghèe ghê ghì Gə̀lês ghò, ghe n zuw tsughu shwaʼ u Mughu ù te enyə.

¹¹Zə̀ kə̀ m fughu tsughu Pôl â daʼa ko, ù n dêe ndùw nsə̀ghàa mo ghe kaān kôʼ kòʼ.

¹²Ghî ghə̀ nîi kɔ̀ʼɔ bàa mə̀ ndzʉ məla Pôl mò zêe sʉ u wə̄n wo a te, àsùghò mwaʼnlo u kəfwàʼ u wən ndùw zìi ndùw a zəŋò ghì à dzaŋā gho, dzaŋà tə̀ n zəghàan ghee, zʉ̀ ù biigh wə n sə̄a nùghùnlò a zəŋò ghee.

¹³Dzûu tə̀ li to ghe mò dzûu sə̌a kaaŋ wò zʉ̀ ù biigh wo a zəŋò ghì ghò, ghe n nùghù kaʼ tsughu aletɔɔŋ kaaŋ zən e Mughu ù te Yɛso an tuw u ghì ghəla ghe ki zʉ̀ ù biigh wo, ghe n dzâa tsùghuu enyəa, “M̀ dzɛ̂ enyəa ghɛ̀ sə nughu an zən e Mughu ù te Yɛso wəla Pôl zɔ̀ŋɔ̀ kaŋlō.”

¹⁴Ghî à li ghəla ghe mò ghəəŋ sughò ghəa ghən fə̀ lo wɛ a Shevà à nûu ghò sə̀ghàmbəgha, Sheva wəla ù mò lo Tuw kə Fɔ̀e kə Tə̀dzûu kò.

¹⁵Tsuʼ ù li wo ghe ghəəŋ kaaŋ wô sugho ghəa ghən, zə̀a fə̀ biigh fə̀ te fə m fwə̀n bɛ̀lɛ̀ wò ghee enyəa, “Ŋ̀ kwo nû Yɛso, yìa ŋ kwo sughò Pôl; ghɛ̀ kuuwn lò ghê ndùghò?”

¹⁶Ghùw wəla zə̀a fə̀ biigh fə te fə̀ mò lo a zəŋò wən n nùghù nùghù ndùw a zəŋò ghee, bu tsughu ghee, bàan màʼà tə̀ndzʉ a zəŋò ghee, tùghù tsə̀ghà tsùghù ghee, ghe n tiin sə fughu an ndughu mo ghe lo ko fəŋ a fəŋ, à ghue è zum zo.

¹⁷Tə̀dzûu àsùghò Tòʼò zən è dzə̀m ghe mò mughu an Ɛfɛ̄sùs n zuw ghəa ghən, fə̂ŋ tə̀ n sə tsughu ghee a dzə̀m ènyə: ghe daŋso kaʼ ndùw alefughu ŋkɔʼso â Mughu ù te Yɛso.

¹⁸Ndə̀m è àghì aŋ ghì ghəla ghe mò boō fughu tsughu m bùghò zɛ̀ vùŋ u ghee dzàa fùghuu wò ghəa ghəla ghe mò lo mo ghe maā ghəŋlo.

¹⁹Ghî à li gho sughò aŋ ghi ghəla ghe mò ghəə̄ŋ ghəa à fəən gho, ghe ŋ kuum wò mwàʼsò ù ghəa a ghee a te gho bùghò kpàa kɔ̀ʼ an sə kə ghi ghə̀n à dzə̀m; ghe n taŋ tsughu kɔ̂n kə mwàʼsò kə te ko, kə m fughu kɔʼ kua ù səŋò wò.

²⁰Êzə ko, êzə ko, shwaʼ u Mughu ù te wə n noom kɔʼɔ mìan ndùw; kele ndùw àghaŋ am bvʉa e aghì.

²¹Aŋghəa ghəa ghən a dzə̀m ndòʼ tsəghà tsughu, Pôl n tsə̀m tsùghù am fə̂ŋ è wə̄n enyəa e tsəghàa sə̌a ndùw dzì am Masɛ̀donìa àsùghò an Àkaeyà, e ndûw an Yɛ̀lusalɛ̀m, ù mo enyəa, “Abugho Ǹ lo ndûw tɛ̂ tsughu fughu Ǹ lo ki sugho alekòʼ Lumà.”

²²Ù n daŋso nì kɔ̀ʼ Timotì ghèe Elastùs, ghî ghəla ghe mò tɔ̂ɔm wo wə̄n, təma zə̀ghàa ndùw ghee am Màsɛ̀donìa, ghuūghùe u wə̄n wə ŋ kuuwn tsùuŋ dòʼò kə̀ŋo ndùw an Ɛshìa.

²³An tì kə te ko tsû wəla u mò nughù sə kɔʼ a fughu an naʼ zə Efɛsùs kùu ndùw Dzì è Mughu ù te fə̀ yo dzə̄ nyàaŋ fə utsù.

²⁴Tûwbʉ̀ghà ù lì ù fə̀ lo tsə̀anàm mo zən e wən e lo Də̀metə̀lùs, mò ù tsəa tsəgha nyàaŋ mə̀ n ndughu u zə̀ kə̀ zən kəla ghe fə̀ tɔŋlo enyəa à lò Atɛmìs, ù fə̀ ghəəŋ nû ghî a kəfwàʼ a te ghə ŋ kuu an nàm chìa ù mò tsəā.

²⁵Tûw wən n tɔŋɔ zùuŋ nàŋa tsughu ghî yì a dzə̀m ghe mò tsəa sughò nâm kò tǒ wə̄n, dzɛ̀ â ghee enyəa, “Waazə̂ ghò, ghɛ̀ kwo nû enyəa kən lǒ fwàʼ kə̀là sɛ̀ zəā a te.

²⁶Ghɛ̀ koʼò nù, ghɛ̌ yəa zuuw sughò enyəa à kà yò ko fɛ an Ɛfɛ̄sùs Pôl wən lo mo ù n nɔɔm nùghù ndə̀m è àghì, à lò an mbuʼ Ɛshìa e dzə̀m, enyəa so zʉ̀ wəla a bɔɔ̄ tsughuu aŋ ghu yo dzə̂ uzʉ̀.

²⁷Tsəŋ e fɛ kà yò ko dzə̂ enyəa fwàʼ kə sɛ̀ kən lo alebō, to tsughu e Atɛmìs, zə̀ kə sɛ̀ kə̀ səŋò kò bəlā bughò doʼò bəla kə̀ zum ko, àsùghò enyəa ghe lo alenìi nughù kɔʼso məla ù ki ghè mò, wən wəla Ɛshìa e dzə̀m kɔʼsō à mbī e dzə̀m.”

²⁸A m bùghò ghe zuw tsughu ghəa ghən ghe n zùghù ndùw ènyə kaʼ tsughu bɔ̀ŋ m bǔʼn mò dzàa tsùghù enyəa, “Altɛmìs wəla a kɔʼso fɛ am Ɛfɛsus ghaʼ tsəgha ùzʉ̀ u dzə̀m!”

²⁹Naʼ e te e fi daŋso tee kɔʼ nû alo efwēe, ghe n daŋso mbà nyə̀ŋ zùuŋ wò an sàŋ ghee, mo ghe ŋ Gayòs kwù kɔ̀ʼ ghèe Àlestālkùs, wɛ a Màsɛ̀donìa ghe mò dzeŋe bwîi kaāŋ wo ghèe ghê Pôl.

³⁰Pôl n ləghaa enyəa e nyəā tēe tsughu an sə kə saʼ kə aghì chì, ghî ghəla ghe fə̀ boo fughu ŋ kè kuūwn boo.

³¹Ghî à ne à li gho fughu am mbuʼ ghe fə̀ lô fən a Pôl ghò, ghe n tum nàʼà wò sùghò â Pôl enyəa e kwo ù lò luʼū alenyə fughu an sàŋ.

³²A n lo ezə̀, ghe n tughuu fughu â dzə̀ tò, chia ŋ kə̂aa ndùw e wə̄n zo, wàazə̀ ŋ kə̂aa ndùw e wə̄n zo; nu ndughu è te fə̀ ti alo efwēe, tɔŋlo enyəa ndə̀m è ghee à li a mò buʼ kwo yo fəgha kəla kə nî wo ghee fughu.

³³Dzûu tə̀ li tə n dzɛ̀ enyəa Àlɛ̀kszandà səā kə̂aa wô àghəa, Àlɛ̀kszandà m fòʼn ndùw àghu enyəa ghe doʼò tsughu mɔŋ, to e teso fəgha kəla kə lo ghè kò.

³⁴A m bùghò ghî a te a kôʼ tsughu enyəa ù lǒ Dzûu ghe n nùghù dzeŋe tughu sə kɔʼ â dzə̀ tò tǒ ghùw u mɔ̀ʼ enyəa, “À tsə̀ghà Atɛmìs ù ghì a Ɛfɛ̄sùs!” Ghe ŋ ghə̂əŋ ghəa yì kɔ̀ʼ sə̀ ndùw tǒ tàm tə ezūuw tə bə̀ghà.

³⁵Ghùwkə̀mwàʼsò wə̀ enaʼ è te ŋ ke naŋa tsughu ghee, dzɛ̀ â ghee enyəa, “Oō ghî ghə Ɛfɛ̄sùs gho, à lò ndugho ù məghāa enyəa naʼ e ghì a Ɛfɛ̄sùs è lo ghî ghəla ghe lɛɛ̄n tsughu Atɛmìs wəla ù ghaʼā, chìin sùghò tia è baa zəla e tsughu wô alo kəwālā à?

³⁶Ghəa e lo dzə̂ enyəa a kôom yò aletuū maʼà, dzɔ̀ lò ko enyəa ghɛ̀ doʼo tsughu ko mɔŋ, ghɛ̀ ka tsû ù sôʼ.

³⁷Ghɛ̀ ghî ghən fɛ nì wò mo ghe kâ fəgha kə tsɔŋ dzə̀ an tsughu e sɛ̀, ghe kâ zə̀ kə sɛ̀ kə̀ tso sùuwn sùghò.

³⁸Abugho à lò enyəa Dèmetelìus ghèe ghê ghì a wə̄n a ki sāʼ ghèe ghê ghùw, tsuʼn tə̀saʼ n lo nû à ghì à saʼa gho, ghe ndûw kwuū ndûw ghue e ghee fughu.

³⁹Mò à kǔuwn lò enyəa ghɛ̀ kôom kə̀ŋô ghə̀a è li zo, am bian ko an ndughùnē.

⁴⁰Nu ghəa a lô fɛ ghe lo alebəlā kwū sɛ̀ nɛ enyəa sɛ̀ sôʼ kə̀ndə̀m, sɛ̀ ki yo ghəa zo aledzɛ̀ aŋ ghəa ghəla a dəmà fɛ a tè.”

⁴¹A m bùghò ù kə̀aa tsughu ezə̀, ù n dzɛ̀ enyəa ghe sɛ̂ɛ.