Read Aghem Kə̀fwàʼ 2 Bible Online

Kə̀fwàʼ 2 - Aghem bible

Kə̀fwàʼ 2

¹A m bùghò tsuʼ u Pɛntɛ̄kɔ̀st ù kpe tsughu, tsə̀təndə̄ghā tə n dzeŋe dòʼ alo kəlùʼù kə mɔ̀ʼ ghee a dzə̀m.

²Ghe mo e zuw dəm kə̀ li kə nughù kwûu sə tsughu wô alo kəwālā to zəŋ lô tsəghāa, kə n nyə̀ ŋgwùu tsùghu ndughu zəa ghe mò doʼ a te e dzə̀m.

³Saʼà tə li tə m gbə̀n sə kɔʼ fughu am bvʉ e ghee tò saʼà tə uwə̀n, sə̀ sɛ̀ɛ è tsughu, nyàʼa dòʼò kǎaŋ ndùw an tuw u ghee yì à dzə̀m.

⁴Zuʼ tə̀ Zɔlɔ tə̀ m bùghò avʉ̀a ghee yì à dzə̀m, ghəŋlo è tsughu ghe ŋ kàʼ ndùw alesaʼā kâaŋ sàʼà tə nàʼà tə̀ nughù tò.

⁵À fə̀ an nə̀gha zən lǒ mò Tə̀dzûu, ghî ghəla ghe gaʼ tsughu fə̀ŋ aŋ ghəa e Kəzə, mughu an Yɛ̀lusalɛ̀m, ghe sə kaaŋ wo an nàʼà mə̀n n dzə̀m fɛ am mbī.

⁶Ghî ghə̀n à dzə̀m n zuw tsughu dəm kən, nyə̀ŋ zùŋlò è wo, bùghò těe enyə dzəəm, bòʼ chìa fə̀ zuuwkɛlɛ nduw shwaʼ u enaʼ u wə̄n an dzughu a ghee ghəla ghe mò boō fughu tsughu â Yɛso.

⁷Ghəa zə n tsə̀ghàsə ghee, ghe mo an tùw kə̀ kpuuw ko enyəa, “Ghən mgbàŋ yò ghî a Galèlîi a dzə̀m ghe kə̂aa ghəa gho a?

⁸À sə̀ lǒ kwò ghe kə̂aa kaāŋ ghəa gho an sàʼà tə nàʼà tə sɛ̌ a?

⁹Ghàʼ sə kaaŋ wò an nàʼà n nùghù mò, am Patìa, am Mɛdɛ̀s wò, an Elamàet àsùghò ghì ghəla ghe mughu am Mɛ̀sòpòtɛmìa, an Dzùdîa àsùghò Kàpàdoshìa, Pontùs, àsùghò an Ɛshìa,

¹⁰am Flaedzìa àsùghò am Pàmfilìa, an Edzìpt àsùghò an də̀ŋò kə Lebìa kəla kə lo a tsəlà Sìlêen, àsùghò ghì ghəla ghe bwîin nyə wo, ghe nughù wo an Lumà.

¹¹mò ghî à li yia a lô Dzûu àsùghò Tòʼò zò mo ghəəŋ ndùw ghəa a zə̀ kə Dzùdîa, ghàʼ à li yia a sə wo an Kə̀lêt àsùghò ghì Alàb ghò — ghe yia ghe kə̂aa ghəa gho, ghàʼ a dzə̀m yia a zuuw nduw ghee ghe kə̂aa wô ghəa gho an sàʼà tə tənàʼà taʼa aŋghəa ghe dzâa kɔ tə aghəa tə̀ səŋò təla Zə̀ kə̀ lo mo kə m fwàʼ.”

¹²Dzughu zə n zuu ghee a dzə̀m, tuw kə m kpuuw sùghò ghee, ghe m bvʉa tsughuu ko alo eghùe enyəa, “Zən lò ghə̀a è kwò zò enyəa à?”

¹³À li ghə ŋ kuuwn lò ko təma ko nduw enyəa, “Ghî ghən kala nù.”

¹⁴Pità fi daŋso nyɛʼɛ nùghù těe tsə̀ghàsə̀ wò nù ghèe ghê tum tə̀ li tì èghəm à ghè zò e mɔ̀ʼ, dzɛ̀ kɔ̀ʼ â nɔ̀e kə aghì chi an dzə̂ è tughu enyəa, “Dzûu tò, à ghɛ̀ à li ghə̀n à dzə̀m ghɛ̀ mughù fɛ an Yɛ̀lusalɛ̀m, tsʉ kɔʼ nlò tuūŋ wɛʼɛ wo, ghɛ̀ zəən tsughu shwaʼ waŋa wo.

¹⁵Ǹ so Ŋ̀ kûu dzâa wô â ghɛ̀ enyəa ghî ghən kala dzə̀ yò aŋghəa ghɛ̀ moʼō.

¹⁶Ghən fɛ laam lò ghəa ghəla ghùwshʉ̀ghà Dzûɛl fə̀ dzɛ̂ naŋā enyəa,

¹⁷ ‘Zə̀ kə̀ dzɛ̂ enyəa, “Kən lò fəgha kəla Ǹ lo fwaʼa an tsuʼ məla ŋ gùnsò tsughu; Ǹ lo fughuu tsughûu ghì ghə̀n à dzə̀m â shʉ̀ghà waŋa wo. Wɛ ghɛʼɛ à nûu ghò àsùghò a zən gho e ke naʼn wo fəgha kə̀là Zə̀ kə̀ dzɛ â ghee. Waafəghàŋ ghə̀ e ke koʼo sə gho, dzǒo mə̀ e ke tsəən noo mò məla n dwə̀n tsughu.

¹⁸A kê bughò an tsuʼu n te mò sughò, Ŋ̀ kê buʼù fughuu tsughuu sughò kɔ̀ɔ maŋa n nùu mò àsùghò n zə̌n mò â Zuʼ taŋa to; ghe e ke naʼn nduw shwaʼ waŋa wo.

¹⁹Ŋ̀ kê dêe tsughu nsəghàa alo kəwālā, Ǹ dêe tsughuu sughò tə̀tsə̌a aŋ ghueekətsə̄. Ghî à kê kôʼ nuŋ alo enaʼ, naʼ zə e ke pfʉa, nyoʼ u kê dzʉ̂a tsughu təluʼū;

²⁰Ləm kə kê nughù bvʉ̂a tsughu enyə alo enaʼ, tsə̀ è ke koōm tughuu yo, ndzɔŋ kê nughù baŋà doʼò tsughu enyə tò təkâŋ Ghəa ghən kê nìi dzə̀ kə̀bəla sěe tsuʼu Mughu ù te u kê bughōo, tsuʼ u wən ù nêene wo.

²¹Zəa e ke lo sugho enyəa, mò à kè tɔ̀ŋɔ tsughu ko ndùghò zən e Mughu ù te zo, ù n zə kətuw.”

²²Pità n daŋso dzɛ̀ tsùghù enyəa, “Wo ghî ghə Ezə̀lɛ̂ ghò, zəən wò nlò shwaʼ wə̄n wo. Yɛso, ghùw u Nazalɛ̀t wən fə̀ lo ghùw wəla Zə̀ kə fə̀ boō tsughu, dè sə kɔʼ am bvʉ̄a zɛʼɛ̄, ghəəŋ tsughu enyəa ù è deē sə̀ghàa mò aŋghəa ghuūghùe zɛʼɛ̄ e mgbaŋ kwo sugho.

²³Ghe ŋ kwù fùghù wò Yɛso wən â ghɛ̀ an dziī zəla Zə̀ kə fə̀ fôʼ naŋā, ghɛ̌ yia mò nî fughu nduw wə̄n aŋ ghu kə ghì à biigh ko, ghe n nì tə̀ghàa wì è kɔʼ.

²⁴Zə̀ kə̀ ŋ kwuun zè zə̀ghàa tsùghu wə̄n am fàŋà kə evʉ̄, nì nùghù kɔ̌ʼ wə̄n alo evʉ̄, tɔŋlo enyəa vʉ e kaā kɔʼ kpè dzə̀ alenì wə̄n.

²⁵ Dɛvìd mafə̄ kə̂aa sùghò ghəa gho kùu ndùw wə̄n enyəa, ‘Mùgho fə̀ koʼ ziī nduw Mughu ù te mo ù lò tən tsəghà ko an sə kaŋā alo tənə̀gha tə dzə̀m, nu ù tì aŋ kwe waŋā ù təma wo enyəa fəgha kə lô fəmso mugho.

²⁶Zən lò e ghee fə̀ŋ zaŋa zɔlɔ̄, yìa M̀ fughuu wə̄n â kɔʼso mò an dzə̂ zaŋā; yia m fəghaan mughù sugho, bɔɔm chìi ndùw ko tùʼ am fəgha kəla Zə̀ kə̀ lo ghəŋlo â mùghò:

²⁷Tɔŋlo enyəa ghù kè nǎaŋ tàʼn yò ghue waŋa wo an naʼ zə evʉ̄, ghù kè zə̀ghàan màʼn sùghò yò enyəa Wɛ wʉ̂a ù Dzùŋ fìaa buŋù ndûw.

²⁸Ghù vʉ̀a ghù dè mugho â dzì zəla Ŋ̀ ki alekele èmùghùu a te; Ghù lo ghəəŋ tsughuu nù mùghò è ŋgee duʼnlo aŋghəa ghù lǒ ghàʼ à ghù.’

²⁹Waazə̂ ghaŋa ghò, Ǹ so Ǹ ndzəmà kə̂aa wô àghəa â ghɛ̀ kùu ndùw tsele ù ghê tsele ù sɛ̀, Dɛvìd, enyəa ù fə̀ kpuw tsughu nû, ghe n tsəla tsughu wə̄n, shîaa e wə̄n zəa e naām lo fɛ sɛ̀ bùghò sə̀ nɛ̄.

³⁰ Ǹ so Ǹ dzâa tsughu enyəa ghəa Dɛvìd wən màʼa fə̀ lo mò ù lò ghûwshʉ̀ghà ù Kə̀zə̀, vʉ̀a ù mò kwo sughò enyəa Zə̀ kə̀ mafə to naŋa enyəa kə lo tsuʼu naaŋ ù Dɛvìd an ndàŋ è kədə̀ŋ tò aŋghəa Dɛvìd fə̀ lô sugho də̀ŋ kò,

³¹Dɛvìd ŋ kòʼ zìi ndùw ghəa yì gho â sə ko, kə̀aa wò ghəa Bəghambī lo kɔʼɔ̄ səā a te alo evʉ̄ aŋghəa ù fə̀ dzɛ̂ tsughu enyəa: ‘Ghe ka mo wə̄n naŋatàʼà dzə̀ â naʼ zə evʉ̄ zo, gwən e wə̄n zə ŋ kè fîaa buŋù sughò.’

³²Zə̀ kə̀ maā Yɛso wən zôm nì nùghù kɔ̀ʼ, ghàʼ ghən à dzə̀m fɛ ti ko aŋ ghəa e te zo.

³³Zə̀ kə̀ ŋ wən kɔʼso naŋa, vʉ̀a ù lò êzəŋ aŋ kwe u Kəzə̀ ù təma wo, vʉ̀a ù mò nî kɔʼ Zùʼ tə̀ Zɔlɔ təla Zə̀ kə fə̀ to naŋā aŋ ghùu Tsele ù te. Fəgha kə̀là ghɛ̀ koʼō ezə̄ŋ à kə̀là ghɛ̀ zuūw, à kwə̀n fughu tsughu wə̄n â ghàʼ.

³⁴ Dɛvìd kafə̄ kuūwn kɔ̀ʼ dzə̀ alo kəwālā, ghuūghùe u wə̄n wə ŋ kuuwn dzɛ̀ tsughu ko enyəa, ‘Mughu ù te Kə̀zə̀ fə̀ dzɛ â Mughubè waŋā enyəa, Dòʼo tsughu aŋ kwe waŋā ù təma wo,

³⁵ghù ləma tsughu Ŋ̀ ghəə̄ŋ tsughu ghîikətuw ghə̂a à doʼò tsughu fəgha kə̀a kə̀ gaʼŋ kə aghùw kò.’

³⁶À fi lo enyəa ghɛ̀ ghî ghə Ezə̀lɛ̂ kele tsughu enyəa Yɛso wəla ghɛ̀ mò nî təghāa, Zə̀ kə̀ ŋ wən naŋa am Mughu àsùghò aŋ Kə̀lestò.”

³⁷A m bùghò ghe zuw tsughu ghəa yì, fə̂ŋ tə̀ m bàa tsùghu ghee ēnyə̄, ghe m bvʉ â Pità ghèe ghê tum tə̀ li ti enyəa, “Waazə̂ ghò, ghàʼ êzəŋ e dzə̂ ènzə̂n?”

³⁸Pità n dzɛ̀ â ghee enyəa, “Ti màʼa nlò bo zo, ghɛ̀ ni kɔʼ mùghù ŋ Kə̀zə̀ mò an zən e Yɛso Kə̀lestò, to ghe ghuūwmāʼà bòo tɛʼɛ; ghɛ̀ lo bɔŋ kele sugho Zùʼ tə̀ Zɔlɔ to.

³⁹To kən lò â ghɛ̀ à ghê wɛ ghɛʼɛ̄ gho, àsùghò â ghì ghəla ghe lɔʼsō mughùu nduw, mò à lò ghî ghə̀n à dzə̀m Mughu ù te, Zə̀ kə sɛ̀ lǒ mò ù ŋ ghee tɔŋɔ.”

⁴⁰Pità ŋ ŋge buʼ tsughu kəghu â ghee enyə, kə̀aa kpèʼe sùghò ndə̀mà tə ushwaʼ tə̀ li to, dzàa ndùw â ghee enyəa, “Baaŋ sə nlò ghue zɛʼɛ zo aŋ ghùu bəən tə aghì tə nɛ ten.”

⁴¹Ghî ghə̀ n zuw shwaʼ u Pità vʉ̀ boo fùghù è nduw, ù m fughu tsughu ghe â mùghù ŋ Kə̀zə̀ mò; kam tə aghì tə̀ m baʼso wò am fɔe kə ghee tə təgha an tsuʼ fə̀ efì.

⁴²Ghe n tēe ten tsughu ko alezuuw tsʉ̂ è tətum zə̀ àsùghò aŋ ghəa a ghee à ghəəŋ dzəəŋ gho, zəa dzəŋlo, gɔ̀ɔŋ dzə̌əŋ sùghò.

⁴³Tum tə te tə n dè sə̀sə tsughu nsəghàa ènyə, ghî ghə̀n à dzə̀m mo ètsəŋ.

⁴⁴ Ghî ghəla ghe mò boō tsughu n dòʼò kɔʼ ko alo fətùʼù, dzeŋe têen dzə̂əŋ fʉgha wən ù dzə̀m ghe ki.

⁴⁵Ghe n nì fèe tsùghù fʉgha u ghee, dzùghùu fughu kɔʼ kua u te wo â ghì ghə̀n ghe mò ki yô fəgha ko.

⁴⁶Ghe n dzeŋe ndùw zěe tsə̀ghà ko an ndughu è Kə̀zə̀ e nē tsuʼ ndzə̀mdzə̀m, bwìi zə̌a kaaŋ ndùw ndughu tə̀ ndughu, ghe n zə̂aa fʉgha u ghee tsoʼnlo etsoʼnlo am fə̂ŋ e mɔ̀ʼ.

⁴⁷Ghe ŋ kɔʼso Kə̀zə̀, ghî ghə̀n à dzə̀m n ləghaa ghee. Mughubè ù te m bəghaasəa tsughuu àghì tsuʼu n tsùʼu, baʼso wò aŋ kɔ̀n kə ghee.