Read Aghem Kə̀fwàʼ 20 Bible Online

Kə̀fwàʼ 20 - Aghem bible

Kə̀fwàʼ 20

¹Aŋghəa ndə̀m kən ke tsughu sɛ tsughu, Pôl n tɔŋɔ zùuŋ tsùghu tsə̀təndə̄ghā tə Kə̀lestò, dzə̀n ndùw fə̀ŋ tə ghee, daŋso sə̀ kwu ndùw dzì è Màsɛ̀donìa.

²Pôl n bwìi mɛ̀ʼɛ̀ tsùghù dəŋò kə te ko kə dzə̀m mo ù dzə̀là ndùw kô fə̀ŋ tə ghì an dzə̂; daŋso bùghò nùghù nyə̀ ndùw aŋ Gə̀lês,

³ndùw dòʼò fughu tə ndzɔŋɔ tə təgha. Ghəa ù ndzùuŋ ghue wo alendùw an Silìa, ù n zuw tsughu enyəa Dzûu tə̀ li tə bee alewī wə̄n. Ù n dzɛ̀ enyəa e kôom nîi ndû dzì è Màsɛ̀donìa.

⁴Ghî ghə̀là ghèe ghee mò bwîi nduw a dzə̀m mò lo Sòpatà, wɛ̀ ù Pilhùs, ghùw ù Bɛ̀lêa àsùghò Àlestālkùs ghèe Sɛ̀kundùs, ghî a Tɛ̀sàlonikà. Gayòs, ghùw Dəlbì, n lo àsùghò Timotì; Tykə̄kùs n lo àsùghò Tə̀lòfimùs, ghî a Ɛshìa.

⁵Ghî ghən n nùghù ndùw â sə ko, ndùw lə̀ma ndùw ghàʼ an naʼ e Tə̀lôas.

⁶A m bùghò a zə kɔʼ Zə kə bɛ kəla mbvùŋ buw a te, ghàʼ n zə̀ghàa tsùghu Felèpîi, bwìi tsùghù ntsuʼu n tɛ̀ alo kəkwə̀n, ndùw kòʼ ndùw ghee an Tə̀lôas, an dòʼò fughu ewən.

⁷An tsuʼ u sûesʉ wo alo ewə̄n, ghàʼ n tsùghù dòʼò gùŋsò tsùghù aleboʼn zəā kɔʼ Kùun tə Mughu ù te. Pôl ŋ kaʼ tsughu ghəa à kəaa gho, kə̀aa àghəa â ghì ghò ènyə, kə̀aa ènyə, ndùw tɛ̀ ndùw â fə̀ŋ è utsùʼ, ù màʼà ki alezə̀ghàa səa tsughu an tsuʼ ù li vʉ̀.

⁸À n lo mò ndə̀m è tə̀lâm bàaŋ kǎaŋ tsə̀ghà fughu an dzughu e ndughu zə̀a ghàʼ dzeŋe dōʼ a te fùghù edzuŋ.

⁹Wɛ̂ɛnùu ù lì n doʼ a fughu an tɔŋ e ndughu ghe fə̀ tɔŋlo enyəa à lò Yutikùs, a m bùghò Pôl so tsôo kûu ndûuŋ ndûw ko aŋ ghə̀a à kəaa gho, wɛ vʉ ŋ kàʼ ndùw à aledzwoʼo bwii. Wɛ vʉ n dzoʼ bwii ko, bùghò kàʼ ndùw tə̀mgbii alefə̀ŋ. Ghəa mgbii tə tsəghàsə tsughu ghî fi fo, fə n nùghù tə̀ghaa kɔʼ fughu an tɔŋ è ndughu, lɔʼso bvʉ̀ mìasò sə̀ tsùghù wò à ghueetsə̄, mò à lò təndughu tə təgha alekɔʼɔ̄ ndûw; ghe m bùghò bɔŋ kɔʼ ko ègwən.

¹⁰Pôl n nùghù sə̀ tsùghù è nduw, tsughu ghaa tsughu a tsəlà wə̄n, nì nughù kɔʼ wə̄n, bala kwukele nyə̀ ndùw wə̄n, dzɛ̀ tsùghù enyəa, “Kà nlò fə̂ŋ tə̀ bâŋsò, ù kaam kpuw dzə̀!”

¹¹A m bùghò ù nùghù kɔʼ nduw ebàm edzūŋ, ghe zə kɔʼ kûun tə Mughu ù te to, Pôl ŋ kə̀aa àghəa ghèe ghee enyə, kə̀aa ènyə, tsuʼ wə n zùw sə̀ è wo, ù n daŋso zə̀ghàa è tsughu, è nughu.

¹²Ghe n nì ndùw wɛ̂ɛnùu vʉ an ndughu mò ù lò â tuw ko, fə̂ŋ tə̀ n ndòʼ kòom nyə̀ wò sùghò ghee.

¹³Ghàʼ n daŋso ndùw nyə kɔʼ alo kəkwə̀n, bàŋ dàŋsə̀ ndùw an naʼ e Asòs; alenìi daŋà tsəghà Pôl a fughu, ù màʼa fə̀ naʼà naŋā tsughu êzə̀, kuuwn nùghù wò alo aghùw.

¹⁴A m bùghò ù bùghò kwuūn wô ghaʼ an Asòs, ghàʼ à ghee n dzeŋe nyə̄ kɔʼ alo kəkwə̀n, nùghù ndùw an Mìtə̀lenì.

¹⁵A m bùghò tsuʼ u tsʉtsʉ vʉ̀, ghàʼ n zə̀ghàa tsùghu fughu, ndùw sə̀ ndùw am bà kə̀ li ko mo a lɛɛn dàŋà ndùw naʼ e Kios. A m bùghò tsʉtsʉ ù lǐ vʉ̀, ghàʼ n zə̀ghàa tsùghu fughu ndùw sə̀ ndùw an Samòs; kòom zə̀ghàa tsùghù Samòs tsʉtsʉ vʉ̀, daŋso bùghò sə̀ wò an naʼ e Mìlɛtùs.

¹⁶À mò êzə lo Pôl màʼà ləghaa aletsə̀ghàa taʼà Ɛfɛ̄sùs enyəa e lô boōn nəgha zo am mbùʼ è Ɛshìa, aleghəə̄ŋ tsughu enyəa mo e bo ko ènzə̂n e lo alenyə an Yɛ̀lusalɛ̀m tsuʼu Pɛntɛ̄kɔ̀st.

¹⁷A m bùghò Pôl lò am Mìlɛtùs, ù n tum tɔŋɔ tsughu tsōʼ tə dzeŋe kə ghì a Kəzə̀ tə Ɛfɛ̄sùs enyəa ghe bughò kôʼ ghee.

¹⁸A m bùghò ghe bughò kôʼ wo wə̄n, ù n dzɛ̀ â ghee enyəa, “Ghɛ̀ a dzə̀m kwò nû mughùu zaŋa zo aŋ ghəa sɛ̀ mughùu kɔʼ wo alenìi nughù tsughu tsuʼ fəla mugho fə̀ tiso tsughu ghuw ko fɛ am mbùʼ è Ɛshìa.

¹⁹Ghɛ̌ yia mgbaŋ kwo ghəa ghəla mùgho mò tɔ̂ʼ maʼà tsughu ghue wo a te alefwàʼ â Mughùbè ù sɛ̀, alo efālā àsùghò sə̀ mò alo kətūw aŋ ghəa ghəla Dzûu tə̀ mò geē naāŋ kaŋlō an tuw kaŋā.

²⁰Ghɛ̀ kwo nû enyəa Ŋ̀ ka mō sə̂əm kòʼ tsəghà aletsʉ̀ ghɛ̀ ŋkāa aleghə̂əŋ ghəa zə̄lā e ki aleyòso ghɛ̀; ghəa mùgho mò zoʼn tsəghà ghɛ dzîi dziī àsùghò ndùghù tə̀ndughu,

²¹geen ndùw ghì a Dzûu àsùghò Tòʼò zò enyəa ghe a dzə̀m kuūwn kɔʼ emwam, ghe boo ndûw â Zə̀ kò àsùghò â Mughùbè ù sɛ̀, Yɛ̀so Kə̀lestò.

²²Ǹ nyəa ndùw èzəŋ an Yɛ̀lusalɛ̀m aŋghəa Zuʼ tə̀ Zɔlɔ tə ləghaa; Ŋ̀ kwo yo fəgha kela kə lo səā fughu a zəŋò mùghò.

²³Fəgha kə̀là Ŋ̀ kwo ghè kò, à lò fəgha kə̀là Zuʼ tə̀ Zɔlɔ tə te dzâa wo â mùghò an nàʼà tə̀n tə̀ dzə̀m Ǹ nduūw enyəa ghe lo dzə̀là nù mugho an ndùghètsaʼ àsùghò enyəa tsû ù lo kwuu nù mugho.

²⁴Ŋ̀ kâ bùʼ nì tuw kaŋa tò kəfəgha abugho M̀ kpaʼ lô dzə̂ alemìasò kɔʼ ŋgəa zəla Ŋ̀ ŋgəāa kaŋlō àsùghò fwàʼ kə̀là mùghò fə̀ nî kɔʼ aŋ ghùu Mughu ù te Yɛso Kə̀lestò, alezùghòo làbəlà è dzùŋ kùu ndùw dzɔ̂ e Kəzə̀.

²⁵Êzəŋ, aŋ ghɛ ghə̀là Ǹ lo mò mùgho n zùghòo kǎaŋ wò fɔ̂e ù Kəzə̀ wò am bvʉa zɛʼɛ̄, Ŋ̀ kwo nû enyəa ghùw wɛʼɛ u mɔ̀ʼ lo kòom kòʼ kòʼ yò kwaʼ u sʉ waŋā wo.

²⁶M̀ fɛ kùu dzàa wò nù â ghɛ̀ nɛ an tsuʼ fən, enyəa Ŋ̀ ki yo ghu ko am vʉ e ghûw wɛʼɛ ù lì,

²⁷nu Ŋ̀ ka mō shwaʼ u Kəzə̀ wò â ghɛ̀ nân dzə̀.

²⁸Nǐ nlò ghôom zò aŋ ghùe zɛʼɛ̄ àsùghò a zəŋò ghì ghəla Zuʼ tə̀ Zɔlɔ tə fughu naŋā enyəa ghɛ̀ è lɛnlo. Ghɛ̀ è lɛɛn sugho â dzeŋe kə ghì a Kəzə̀ zəla ù fə̀ zue sə wo aŋ kàŋ tə wɛ̀ ù wə̄n.

²⁹Ŋ̀ kwo nû enyəa abugho Ǹ lo buw am bvʉa zɛʼɛ̄, ghî à li a lo ndùw bùghòo nù tò ubʉgha, ghe bughò saʼà maʼà tsughu ghɛ.

³⁰Ghî à lī lo buʼù səā kɔʼɔ̄ sugho am bvʉa zɛʼɛ̄ ghe e kaʼn wo ghā gho, alekwuū ŋgwûu tsughu tɔ u ghì a Kəzə̀ enyəa ghe nughù wo a bàâ ghee.

³¹Ghɛ̀ ki aletisō kɔʼ kətuw, ghɛ̀ è moʼn tsughuu tsʉ̂ zəla mùgho mò fughuu tsəgha â ghɛ̀ tsuʼu mən ndzə̀m alo tənùu tə təgha.

³²M̀ fɛ êzəŋ fughuu nyəa tsughuu ghɛ̀ aŋ ghu kə Kəzə̀, àsùghò an shwaʼ u wən ù dzûŋ wò; wəla kə lo alebɔɔ̄ tīsō ghɛ̀, wəla ghəə̄ŋ sughò ghɛ̀ zə fʉgha wəla u lɛɛ̄n ghî ghəla ghe lo mo ghe ŋ ghee sûw màʼà.

³³Ŋ̀ kaām ndzʉ tə ghûw tə̀ mbaaŋ nì kòʼ, ŋkāa kua u ghûw.

³⁴Ghuūghùe zɛʼɛ̄ e kwo nû enyəa mùgho mò fwaʼ tsughu aŋ kwe zaŋā zən alekele fʉgha wəla mùgho mò ləghaa, àsùghò u ghì ghə̀là ghàʼ à ghee mò lò a dzə̀m.

³⁵Aŋ ghəa ghən a dzə̀m, mùghò mò â ghɛ̀ fɛ dē tsughu enyəa abugho ghù fwàʼà tsughuu alo esə̀ŋ, ghù kì aleyosō ndûw ghî à lɛɛ gho, mòʼn tsùghûu shwaʼ u Mughu ̀u te Yɛso, ghəa ù fə̀ dzɛ̂ tsughu enyəa, ‘Bughuso e lo aŋ ghə̀a à fughuu nduw a ghûw ghə̀n tsə̀ghàsə ghəa à mgbɛɛ nɛlɛ a kəghū ghən.’ ”

³⁶A m bùghòo ù kə̀a tsughu êzə̀, ù n tsughu nyaʼa è tsughu, ghèe ghee ŋ gɔ̀ŋlò è tsughu.

³⁷Ghee a dzə̀m m gbən tsughu edî, dìi, mǎaŋ kaaŋ tsə̀ghà Pôl

³⁸Ghe mò fəghaan dìi sùghò bòʼ, ghəa yia Pôl mò dzɛ̂ tsughu enyəa ghe lô kwàʼ u usʉ̄ u ghee kôom kòʼ kòʼ yòʼ. Ghe n daŋso ndùw tə̀ma nyə kɔʼ wə̄n alo kəkwə̀n.