Read Aghem Kə̀fwàʼ 21 Bible Online

Kə̀fwàʼ 21 - Aghem bible

Kə̀fwàʼ 21

¹A m bùghò a zəghàa tsughu ghee, nùghù ndùw â dàŋ kò alo kəkwə̀n; ghàʼ n nùghù ndùw ko dzì tsəghatsəgha, dàŋ sə̀ ndùw an Kôs, tsʉtsʉ vʉ̀ a n zə̀ghàa tsùghu fughu, ndùw an Lhôds, a n zə̀ghàa tsùghu an Lhôds nùghù dàŋso ndùw am Patālà.

²A m bùghò a kôʼ tsughu kwə̀n kò kə daŋā am Fòenisìa, a n nyə kɔʼ a te, nùghù ndùw â dàŋ kò.

³A m bùghò a bughò tɛ̂ tsughu an lùʼù kəla a kòʼò ndûw Saepə̀lùs, a n zə̀ghàa tàʼà ndùw naʼ e te zo aŋ kwè ù kwû wò, nùghù ndùw an Sylìa, tɛ̀ sə̀ ndùw an Tâe; nu à mò lo a fughu kwə̀n chi mò ki alendùw shueʼe.

⁴A m bùghò a bwîin kəŋ kôʼ kaāŋ sə kɔʼ ghî a Kəzə̀ a li gho fughu, ghàʼ n dòʼò kə̀ŋo ndùw ntsuʼu fughu sə̀ghàmbəgha ghàʼ à ghee. Zuʼ tə̀ Zɔlɔ tə te wə n tsom kɔʼ ghee, ghe n dzɛ̀ â Pôl enyəa e kwo ù lò ndûuw daŋso an Yɛ̀lusalɛ̀m.

⁵A m bùghò a bu maʼà tsughu tsùʼu mì ghàʼ à ghee, a n zə̀ghàa è tsughu, nùghù ghàʼ â luʼū to. Ghee a dzə̀m, ghèe ghê wɛ a ghee gho, à ghii a ghee gho, ghe m bùghò tə̀ma wò ghàʼ a ŋgùŋ è dzùghù, ghǎʼ n tsughu nyaʼa tsughu fughu, gɔ̀ŋlò è tsughu.

⁶A n tɔɔŋ zuw tsughu eghue, daŋso nì kɔ̀ʼ kəkwə̀n, ghe ŋ kuūwn nùghù ndùw ebàm alô ghee.

⁷A m bùghò a zəghàa wô Tâe, bwìi ko bùghò tɛ̀ tsughu an Ptòlemàes, a n tɔɔŋ zuw tsughu waazə̂ ghaʼa yì fughu, gaʼ bwii tsughu ghàʼ à ghee fətsuʼ fə mɔ̀ʼ.

⁸33 Tsuʼ ù li vʉ̀, ghàʼ ghəla a mò bwîi dzəə̄ŋ wo ghàʼ à ghê Pôl n zə̀ghàa è tsughu, bùghò aŋ Kàesalìa, bùghò nyə̀ ndùw an ndughu alô Felêp wəla ù fə̀ lo èfɔ̀ɔŋgèle, ghùw aŋ ghì ghən sə̀ghàmbəgha ghe mò tsɔʼ kɔʼ an Yɛ̀lusalɛ̀m aleyosō wo, ghàʼ ndùw dòʼò ndùw ghàʼ à ghee.

⁹Tûw wən ŋ ki wɛ a wən à zən gho a chìakò, mo ghe ki yo num gho, ghe kə̂aa shwaʼ u Kəzə̀ wò.

¹⁰A m bùghò a doʼò kəŋo nduw tsùʼu n lǐ mǒ fughu, ghùwshʉ̀ghà ù lǐ n ndùw nùghù tsùghù wò an Dzùdîa ghe tɔŋlo enyəa à lǒ Àgabùs.

¹¹A m bùghò ù bùghò kôʼ tsughu ghaʼ, ù n nì kɔ̀ʼ kwûu fə Pôl kɔ̀n tsùghù kwe e wə̄n a te àsùghò fwee e wə̄n zo, dzɛ̀ tsùghù enyəa, “Dzûu təla an Yɛ̀lusalɛ̀m lô ghùw wəla ù ki kwûu fən kɔlɔ̀ tsùghuu enyə, ghe nîi fughuu ndûw â Tòʼò tò. À dzɛ̀ Zuʼ tə Zɔlɔ to.”

¹²A m bùghò ghàʼ à ghê ghì yi zuw tsughu ghəa ghən, a m bùʼ ndùw kə̀ghu â Pôl enyəa ù ka kɔʼ dzə̀ an Yɛ̀lusalɛ̀m.

¹³Pôl n dzɛ̀ â ghee enyəa, “Ghɛ̌ chi ghaa kwò ghɛ̀ sô bâŋsò mugho â fə̀ŋ aledì a? Ghəa à kɔlɔ̄ tsughuu a ghûw yi yo dzə̂ ghəa è li zo, mugho m boo alebùʼù kɔʼɔ̄ kpuūw daŋso an Yɛ̀lusalɛ̀m bòʼ ghəa e Mughubè ù sɛ̀, Yɛso.”

¹⁴A m bùghò a nyɔ̂n ke wə̄n, a mo è zəghaa, dzɛ̀ tsughu ko enyəa, “Ghəa a te a doʼò ndûw aŋ ghəa Mughu ù te tsəm.”

¹⁵A m bùghò tsuʼ n te tsəghà tsughu, aŋ kùum tsùghù fʉgha waʼa, nùghù ndùw a lùʼû kɔʼɔ wo an Yɛ̀lusalɛ̀m.

¹⁶Tsə̀təndə̄ghā tə Yɛso tə̀ li to tə sə wo an naʼ e Kaesalìa fə̀ nduūw ko ghàʼ à ghe a dzə̀m, ghe n nì ndùw an ndughu alô Mnasòn, ghùw u Saepə̀lùs ù lì, tsə̀ndə̄ghā è wǐi, enyəa ghàʼ ndûw nyə alô wə̄n.

¹⁷A m bùghò a bugho an Yɛ̀lusalɛ̀m, waazə̂ ghaʼa yi fughu m kpènì kɔ̀ʼ ghaʼ aleduʼnlo.

¹⁸A m bùghò tsuʼ fə̀ li fi, ghàʼ à ghê Pôl n ndùw alendùw kôʼ Dzɛ̂ms; tsoʼ tə n lo fughu ghee a dzə̀m.

¹⁹A m bùghò ù tɔ̄ɔŋ zuw tsughu ghee, ù n tāŋsō dzɛ̀ kɔ̀ʼ ndùw ghəa ghə̀là Zə̀ kə̀ fwâʼ tsughu â zəŋò Tòʼò tò am bàm e fwàʼ kə ghee.

²⁰Ghəa ghe zuw tsughu ghəa a te gho, ghe m fughu ukɛɛ â Mughu ù te, dzɛ̀ â Pôl enyəa, “Ŋ wàazə̀ Pôl, kǒʼ ndə̀mà tə təkām tə ghì a Dzùdîa təla tə boo tsughuu, àsùghò aŋghəa dzaŋadzaŋ tə kɔʼn ghee alo kəlàŋ a.

²¹Ghe ŋ ghù â ghee teso enyəa ghù zòʼn kâaŋ ghì a Dzùdîa ghə̀n à dzə̀m ghe lo am bvʉa e zə Etòʼò enyəa ghe zəghàa maʼà làŋ kə Musî, dzàa ndùw â ghee enyəa ghe ki dzə yo alesughoo twigh u wɛ a ghee wo, ghe ka tso naŋa sùghò bughōo kə enaʼ ko.

²²Ghe lo kele ko nù enyəa ghù m bùghò. A sô êzəŋ e ghəŋlo ênzə̂n êzəŋ à?

²³À fi lo enyəa ghù kì aleghəəŋ nduw ghəa ghəla ghàʼ dzâa wo â ghù; ghî à lo fɛ a chìakò mo ghe maā kàa n zə ghèe ghê Zə̀ kò.

²⁴Nǐi kɔʼ ghî ghə̀n, ghɛ̀ à ghee nduw sūw maʼa tsughu ghue zo, ghù tsə fughu nduw kua u ghee wo, to ghe kɔɔ̄ maʼà tsughu tuw u ghee. Ghee a dzə̀m kele tsughu enyəa ghə̀a ghəla ghe mò kə̂aa â ghee lo kə̀nughùnùghù; nyəa ghuūghùe wʉ̂a ù laam naaŋ sùghò kə̀làŋ.

²⁵Yia a bughò Toʼò zəla e boō fughu tsughuu, a m mwàʼsò kò â ghee tɔm ndùw, tsughu tsən tsughu a te enyəa ghe ka e zəa fʉgha wəla ghe fughu nduw ŋkāa ghe sɛ̂ nduw â mùʼù mò, àsùghò kàŋ tò, asùghò nyòm təla ghe wi mo bɔe wī nû, ghe zəghàa maʼà sughò ènùŋlò.”

²⁶Tsuʼ ù li vʉ̀, Pôl n daŋso nì kɔ̀ʼ ghî yì, ghèe ghe n ndùw sùw màʼà tsùghu ghue ghee, tsə̀ghà nyə̀ ndùw alo etsūghū alendùw ghəəŋ tsughu enyəa ghe kele tsughu tsùʼù məla ghe ki aledòʼò kəŋo ndûw aŋ ghəa ghe sûw tsughu ghee zo, sěe ghe lo bughò fughuu fughu ko an tuw u ghee a dzə̀m.

²⁷A m bùghò tsùʼù mən sə̀ghàmbəgha mîan mɛʼn kəə̄ŋ wo, Dzûu təla tə mo lô tə Ɛshìa tò, ghəa ghe kôʼ tsughu Pôl am Ndughu è Kə̀zə̀ è ne, ghe n tsùʼ sòʼ kɔ̀ʼ aghî, ghe ŋ kwu kɔʼ wə̄n.

²⁸Ghî a te ghə m buʼnlo mbɔŋ, dzàa tsùghù enyəa, “Wo ghî ghə Ezə̀lɛ̂ ghò, tɔ̌ɔ wò nlò! Wən lò tûw wəla ù tsʉ̀ boōn tsughu ghî ghò luʼū ten tə̀ dzə̀m enyəa ghe ka e zuuw â ghì ghò, ghe ka e naaŋ lâŋ kò, ghe ka e kɔʼso sugho luʼū kən: vʉ̀a ù mò fəghaan ndûw nî nyə wô sughò ghî a Gə̀lês ghò fɛ am bêne ko, nùʼn bǒon tsughu luʼū kə̀ baa kən!”

²⁹Ghe mò enyə kəaa ghe màʼa fə̀ lo mo ghe maā wən enaʼ bûʼ kòʼ ghèe Tə̀lòfimùs, ghùw Ɛfɛ̄sùs, tûw wəla ghe mò moʼò enyəa Pôl maā wə̄n am be kə ndughene è Kəzə̀ nî nyə̀ wò.

³⁰Naʼ zə n nùghù těe kɔʼ enyə alo efwēe e dzə̀m, ghî ghə̀ n nyə̀ŋ zùŋlò è wò; ghe n nì kɔ̀ʼ Pôl, sè nùghù sə̀ ndùw wən am bêne ko, daŋso dzʉ̀ʉn kɔ̀ʼ ugbâʼ.

³¹Ghəa ghe dəmà kaŋlō alewī wə̄n, kɔmdzūghū wəla ù mò lô tuw ko an saʼ kə təsùghugòʼ n zuw làbəlà è te enyəa Yɛ̀lusalɛ̀m e dzə̀m tì alo efwēe.

³²Ù n daŋso mbā nì kɔ̀ʼ təsùghugòʼ à ghê dzə̀kɔm a ghee, nyə̀ŋ nyə̀ tsùghù ndùw a zəŋò ghee: a m bùghò ghe nughù kôʼ kɔʼ komndzūghū ghèe ghê sùghugòʼ tò, ghe m bughu naŋa tsughu alebū Pôl.

³³Komndzūghū vʉ ŋ kuʼso kəŋo è wo, nì nùghù kɔ̀ʼ Pôl, dzɛ̀ tsùghù enyəa ghe kûu tsughu wə̄n alo tətsāʼ tə bə̀ghà. Ù m bvʉ̀ tsughu enyəa Pôl lò ndughoo, àsùghò fəgha kə̀là ù bonlō.

³⁴Ghî à li gho an nɔ̀e kə aghî chi m buʼn dzàa kɔ̀ʼɔ alo mbɔ̀ŋ enyəa à lò kən, à li gho enyəa à lò kəchî. A m bùghò ù sə̀ yô aletɔ̀ʼɔ̀ kelê soo kə eghəa, dəm kə màʼà ŋge lo, ù n dzɛ̀ tsùghù enyəa ghe nîi ndûw â wən alo kəbɛ̄lɛ̄.

³⁵A m bùghò ù bùghò tɛ̂ tsughu alo ŋkɔʼɔ, sùghugòʼ tə̀ m biso bòʼò kɔ̌ʼ wə̄n alebòʼò, bòʼ ndə̀m kəla nɔ̂e kə aghì chi mò ghəə̄ŋ wo ghè kò.

³⁶Tɔŋlo enyəa nɔ̂e kə aghì kə̀ mò səŋo wo ko ebàm buʼn wò m̀bɔ̀ŋ enyəa, “Wi màʼa nlǒ wə̄n!”

³⁷A m bùghò ghe so e naŋā nyə̄ ndûw Pôl alo kəbɛ̄lɛ̄, ù m bvʉ tsughu â kɔmdzūghū vʉ enyəa, “Ǹ lo nû aledzàa wô ghù â ghəa è li zo a?” Komndzūghū vʉ mo enyəa, “Ghù kwò nû shwaʼ u Gə̀lês wò à?

³⁸À yò ghû ghùw ù Edzìpt wəla ù mò sôʼ kɔʼ tsû wò, nì nùghù sòʼ ndùw â kam tə àghì tə chìakò aŋ gwə̄n mo ghe wii àghì à?”

³⁹Pôl m fwə̀n dzɛ̀ â wən enyəa, “Ǹ lo ghùw Dzûu, ghe dzə an Talsùs am mbùʼ è Sìlishìa, Ŋ̀ sə an nàʼ è ne zo. Kee â ghù, M̀ buʼu kə̀ghu, na tò ŋ kə̂aa ndûw àghəa â ghì ghən.”

⁴⁰A m bùghò Komndzūghū vʉ fughu tsughu wə̄n â bùʼ kò, Pôl n tee kɔʼ kɔʼ alo ŋkɔʼɔ, fòʼn ndùw ghee â ghu gho enyəa ghe doʼò tsughu mɔŋ. A m bùghò ghe ndôʼ də̂m sugho, ghî à nughù zuw doʼò tsughu mɔ̄ŋ, Pôl ŋ kàʼ ndùw ghee â ghəa à kəaa gho an shwaʼ u Hebə̀lù, dzɛ̀ â ghee enyəa.