Read Aghem Kə̀fwàʼ 22 Bible Online

Kə̀fwàʼ 22 - Aghem bible

Kə̀fwàʼ 22

¹“Waazə̂ ghaŋa gho, ghê tsele ghaŋā, zəən tsughu nlò ghəa Ǹ so M̀ bâaŋ ghue waŋa êzəŋ a te an sə kɛʼɛ.”

²A m bùghò ghe fəghaan zuw nduw mò ù ghee â ghəa a kə̂aa wò an shwaʼ u Hebəlù, ghe m fəghaan nùghù nyə̀ma dòʼò tsùghù ènyə mɔŋ. Ù dzɛ̀ enyəa:

³“Ǹ lo ghùw ù Dzûu, ghe dzə tsughu aŋ naʼ e Talsùs am mbùʼ è Sìlishìa, yìa Ŋ̀ kuūwn noō fɛ̄ alo enaʼ a tsəlà Gàmalìɛl, ghe yia zoʼn kɔʼ wô mugho an tɔ̀ʼ kə umwam kə làŋ kə ghê tselè sɛ̀. Mùghò n tso ki sugho eghɛ̂ aŋ ghəa e Kəzə̀ tò ghɛ̀ a dzə̀m lò nɛ.

⁴ Mùgho fə̀ shwaʼ tsughu ghəla ghe fə̀ boō nduw Dzì zən, wiin màʼn ndùw ghee. Mùghò mò kwuu kɔ̀lɔ̀ tsùghuu àghìnûu à ghìzən gho, tuu naaŋ ndùw an ndùghùtsāʼ;

⁵Tuw kə Fɔ̀e kə̀ lo nû aletɔ̀ʼɔ̀ dzɛ̂ ghəa ghən àsùghò tsoʼ to tə dzə̀m an ndùghùkûifɔ̀e. Mùgho mǒ mwàʼsò ù niī kɔʼɔ aŋ ghùu ghee, u nduūw a vʉ̀a waazə̂ a sɛ̀ ghò, mùghò m bwìi dzì è Dàmaskùs alendùw kwuūn wô ghəla ghe lô sugho fùghù èzə̀, nìi wò ghee an Yɛ̀lusalɛ̀m, mo a ŋ ghee kɔ̂n tsùghù, enyəa a bughò fɔesō tsughu ghee.

⁶Aŋghəa Ǹ nduūw, mò Ǹ sô kùʼso ndùw Dàmaskùs, â ŋgàlàtsə̀ tò ènyə, bàŋàbàŋ kə tsə̂ kə̀ li kə m vùŋù nùghù tùghù sə̀ tsùghù wò ènyə alo kəwala an də̀ŋò kəla Ǹ lo a te.

⁷Mùghò n təghaa bvʉ̀ ndùw a ghuu, zuw tsughu dzə̀ è ghùw ù lì ù dzàa wo â mùghò enyəa, ‘Sôol, Sôol, ghù mùghò ènyə ndzaŋso bòʼ kwò à?’

⁸Mùgho m bɛ̀lɛ̀ tsùghù enyəa, ‘À lò ghû ndùghò à, Mughùbè?’ Ù mo â mùghò enyəa, ‘Ǹ lo Yɛso ghùw Nazalɛ̀t wəla ghù ndzaŋsō kaŋlo.’

⁹Ghî ghə̀là ghàʼ à ghee mò lo a dzə̀m ŋ kòʼ tsə̀ è te, kè kuūwn zuw ghəa ghə̀là ù mò kə̂a wo â mùghò.

¹⁰Mùghò n daŋso nùghù bvʉ tsughu enyəa, ‘Ŋ̀ ghəə̄ŋ ndûw êndughō a Mughùbè?’ Mughu ù te n dzɛ̀ â mùghò enyəa, ‘Nùghu kɔʼɔ̀ ghù nyə nduw an Dàmaskùs, ghe sô dzàa wò nù ghəa zəla Zə̀ kə̀ dzɛ̂ naŋā enyəa ghù ghəŋlo.’

¹¹A m bùghò Ǹ sô kôom yô alekòʼ tə̀luʼū bòʼ bàŋ zəla tsə̀ zə mò bâŋ tsughu ghè zò, ghî ghə̀là ghàʼ à ghee mò lo a dzə̀m n tɛ̀ɛ nùghù ndùw mùghò aŋ kwe, a n nyə̀ wò an Dàmaskùs.

¹²Ghùw ù lì n lo a fughu alo enaʼ ghe mò tɔŋlo enyəa à lǒ Ànànîas, ghùw ù Kəzə̀ ù lì ù bɔɔ̄m bwîi tsəghà ko alo kəlàŋ, mo Dzûu təla tə mughu fughu ŋgee tsə̄ŋō sùghò wə̄n.

¹³Ù m bùghò kòʼ wò mùghò, tee kəŋo wò am bùghù zaŋā, dzɛ̀ â mùghò enyəa, ‘Sôol ŋ wàazə̀, e koʼo luʼu to.’ Mùghò ŋ kòom kàʼ wò luʼū tə̀ koʼō to an nə̀gha e te zo ko, daŋso lɛ̄ɛn kɔʼ wə̄n.

¹⁴Ù n dzɛ̀ tsùghù enyəa, ‘Zə̀ kə ghê tselè sɛ̀ kə̀ ŋ ghù nî enyəa ghù è kwo fəghà kə ləghaa, ghù koʼ Ghûw Tsəghatsəgha ù wə̄n u te, ghù zuw tsughu sugho shwaʼ u wə̄n wo alo edzughu:

¹⁵tɔŋlo enyəa ghù lo dòʼn ghùw wəla ghù teso dzâa ghəa a wə̄n gho â ghì ghə̀n à dzə̀m aŋ ghəa ghəla ghù kòʼ tsughu, zùw tsùghù è sugho.

¹⁶Ghù sò èzəŋ e kôom lə̌əm zēe ndùw kwò à? Nùghu kɔʼɔ̀ to ghe fughuu tsughu ghû a mùghù ŋ Kə̀zə̀ mò, ghù suw maʼa tsughu bôo tə̀ghà tò, mò ghù gɔ̀ɔŋ ndùw â Mughu ù te.’ ”

¹⁷“Mùghò ŋ kòom bùghò èbàm an Yɛ̀lusalɛ̀m, a m bùghò Ŋ̀ gɔ̂ŋlo am Ndughu è Kə̀zə̀ è ne, mùgho ŋ kòʼ ghəa à li gho tò Ŋ̀ kôʼ an dzǒo.

¹⁸Mùghò ŋ kòʼ Mughu ù te dzâa wo â mùghò enyəa, ‘Mba ghəŋlô ghù zəghaa tsughu Yɛ̀lusalɛ̀m, nu ghî a te a lo bōom dzə̀ yò shwaʼ wʉ̀a wò kùu wò mùghò.’

¹⁹Mùghò m bɛlɛ̀ tsùghù enyəa, ‘Mughùbè, ghuūghùe e ghee e kwo nû enyəa mùgho mò kwuu kaaŋ wo ghî ghəla ghe boō fughu â ghù an ndùghutə̀ne tə Tə̀dzûu tò tə dzə̀m, buu, kùu nǎaŋ tsughuu alo tətsāʼ.

²⁰Aŋghəa ghe fə̀ wiī Sìtofɔ̀e wəla ù fə̀ teso dzâa ghəa ghə̀a ghò, mùgho fə̀ ti sugho nû, mùgho m boom fughuu ndùw enyəa ghe wi wə̄n, kwu kele kɔ̀ʼ sùghò ndzʉ tə ghì ghəla ghe mò wiī wə̄n.’

²¹Mughu ù te n dzɛ̀ â mùghò enyəa, ‘Nùghu ndùw, nu Ǹ so Ǹ lɔʼsō tuū nùghù ndûw ghù a vʉ̀a Tòʼò tò.’ ”

²²Ghî a te ghə n zəən kô shwaʼ u Pôl u te wo enyə, ù m bùghò mɔ̀m tsùghù ghəa zən enyəa: ghe ŋ kòom dàŋso nùghù kaʼ è kɔʼ buʼn səā kɔʼɔ mbɔ̀ŋ an dzə̀ tə̀ tughu to enyəa, “Nǐi kɔʼ nlǒ wə̄n! Wi màʼa nlǒ wə̄n! Ù kì yo alelō â tuw ko!”

²³Ghəa ghe buʼn bɔ̀ŋ mò êzə̀, zəghaso kɔʼɔ̂ ndzʉ tə ghee edzūŋ, kwii wʉ̀a sə̌a kɔʼɔ kə̀bwə̀n edzūŋ,

²⁴pfʉtəŋgə̄m è sughugòʼ tə Lumà m fughu tsughu kəlâŋ â sùghugòʼ tə wə̄n to enyəa ghe nîi ndûw Pôl alo kəbɛ̄lɛ̄, ghe ndûw buū tsughu, aletɔ̀ʼn kele səā kɔʼ fəgha kəla ghe buʼn bɔ̀ŋ mò a te an tuw kə wə̄n.

²⁵A m bùghò ghe kwu kɔ̂n tsughu wə̄n am bwāʼ, Pôl n nùghù bvʉ kɔʼ â kɔmdzūghū vʉ̀ ù mò ti fughu enyəa, “Lâŋ kə̀ boo nù enyəa ghɛ̀ bu ghùw ù Lumà mò ghɛ̀ kâ wən bûʼ sàʼ dzə̌ aŋ ghə̀a è li zo ù kpaʼ bonlō a?”

²⁶A m bùghò ghùw ù kə̀làŋ vʉ zuw tsughu ghəa yì, ù n ndùw kòʼ ndùw pfʉtəŋgə̄m vʉ̀, dzɛ̀ â wən enyəa, “Ghù zən so foʼò tsughu è ghɛ zo enyə à? Tûw wən lo ghùw ù Lumà!”

²⁷Pfʉtəŋgə̄m vʉ n ndùw kòʼ ndùw Pôl, bvʉ â wən enyəa, “Dzǎa wò â mùghò, ghù lǒ ghù Lumà à?” Pôl bɛ̀lɛ̀ tsughu enyəa, “Òo.”

²⁸Pfʉtəŋgə̄m vʉ n dzɛ̀ enyəa, “Mùgho mò ghûw Lumà doʼō mò Ǹ zue an ndə̀mà tə ukʉ̄a.” Pôl m bɛ̀lɛ̀ tsughu enyəa, “Ŋ̀ kuuwn lǒ wɛ̀ ù kə̀tsə an naʼ e Lumà.”

²⁹Ghî ghəla ghe mò so e ndûw bvʉʉn Pôl â ghəa gho n daŋso tì zə̀ghàa tsùghu wə̄n; fə̀ŋ n sə pfʉtəŋgə̄m vʉ̀ ghəa ù kəŋ kele kɔʼ enyəa Pôl lǒ ghùw ù Lumà, yia e bən nî kûm tsughu wə̄n alo tətsaʼ.

³⁰Pfʉtəŋgə̄m ù te n ləghaa aletɔ̀ʼɔ̀ kele səā kɔʼ fəgha kəla Dzûu tə̀ kwuū Pôl a te; ù fi tsɔʼn nùghù kɔ̀ʼ nû tsaʼ to a zəŋò Pôl tsuʼ ù li vʉ̀, dzɛ̀ tsùghù enyəa fɔ̀e tə̀ tughu tə nyə ndughu ghèe ghê ghì a ghì a Kaŋsì à li ghə̀n à dzə̀m. Ù n daŋso nì tìso naŋa sə̀ wò Pôl an sə kə ghee.