Read Aghem Kə̀fwàʼ 23 Bible Online

Kə̀fwàʼ 23 - Aghem bible

Kə̀fwàʼ 23

¹Pôl n sɔʼ lɛɛn ko ghì a kaŋsì enyə, dzɛ̀ â ghee enyəa, “Waazə̂ ghò, fə̀ŋ zaŋa ŋgee zɔlɔ nù an dziī zəla M̀ mughùu kɔʼ wo a te an sə kə Kəzə̀ alebùghò sə nɛ.”

²Tuw kə Fɔ̀e, Ànànîas, n daŋso dzɛ̀ tsùghù enyəa ghî ghəla ghe kuʼù ti ghèe ghee tsɔ̂ɔ nyəā ndûw wən alo edzughu.

³Pôl fi nughù dzɛ̀ ndùw nù â wən enyəa, “Zə̀ kə̀ lo tsɔ̂ɔ sughò ghù, kə̀bàŋàdzə̀m tò ghû! To ghù fi doʼ enyəa ghù sàʼa mùghò aŋ ghəa lâŋ kə̀ deē mò ghù kòom bvùʼu làŋ kə te ko aledzaā nduw enyəa ghe tsɔ̂ mùgho a?”

⁴Ghî ghəla ghe mò kuʼù ti fughu m bvʉ â wən enyəa, “Ghù sùuwn ndùw tuw kə fɔ̀e e Kə̀zə̀ à?”

⁵ Pôl mo enyəa, “M̀ mô kwò yo a waazə̂ ghò enyəa wən fɛ lo tuw kə fɔ̀e; tɔŋlo enyəa ghe tɔm naŋa am mwàʼsò kə Kəzə̀ enyəa, ‘Ghù kì dzə yo alekə̀aa bonlo èghəa â ghùw wəla ù lɛɛ̄n ghî ghə̀a ghò.’ ”

⁶Ghəa Pôl kòʼ tɔ kɔʼ enyəa dəŋò kə̀ li kə mò lo ghî a Sadùwsîi, kə̀ li kə n lo ghî a Falàsîi, ù m buʼ sə kɔʼ kəbɔ̂ŋ aŋ kaŋsì enyəa, “Waazə̂ ghò, Ǹ lo ghùw Falàsîi, wɛ mò à dzə̀ ghî a Falàsîi; ghe mugho fɛ saʼa aŋghəa M̀ boō fughu enyəa ghî a kpuuw kɔʼɔsəa nù alo evʉ.”

⁷A m bùghò ù daŋso kə̂aa tsughu enyə, shwàʼ wə n nùghù sə̀ è kɔʼ, ghî a Falàsîi ghèe ghê ghì a Sadùwsîi ghò; ndughu n nùghù dzùghùu dòʼò è tsughu.

⁸Tɔŋlo enyəa ghî a Sadùwsîi à dzɛ̂ enyəa ghî a kpuuw kɔʼɔsə̄a dzə̀ yò alo evʉ̄, enyəa tsə̀təndə̄ghā tə Kəzə̀ tə̀ yo, zʉ vʉa u yô sugho. Ghî a Falàsîi yəa kuūwn dzɛ̂ enyəa ghəa a te gho a dzə̀m lò nû.

⁹Ndə̀m kə̀ li kə n daŋso nùghù sə kɔʼ fughu, ghî a kəmwàʼsò a Falàsîi à li ghə n nùghù těe è kɔʼ, tsò è tue, dzàa enyəa, “Ghàʼ kâ kòʼ dzə̀ ghəa è li zo tûw wən bonlō. À lò aledòʼò êsəŋò enyəa zə̀ kə̀ li ko ŋkāa tsə̀ndə̄ghā e Kəzə̀ e lì maā wə̄n â ghəa a kûm bùghò kə̀a.”

¹⁰A m bùghò ndə̀m kə te kə tughu kɔʼ kpe tsughu, pfʉtəŋgə̄m n tsəŋo enyəa ghe lo alenìi sâan tsughu Pôl an ushwà, ù m fughu tsughu kəlâŋ â sùghugòʼ tò enyəa ghe tsughuu nîi nughù kɔʼ wən alo esə̀ŋ am bvʉa e ghee ghe nîi kɔʼɔ̄ wô alo kəbɛ̄lɛ̄.

¹¹Â tsuʼ wo an tsuʼ fə̀ èfì, Mughu ù te m bùghò těe dzə̄əŋ wò ghèe wə̄n dzɛ̀ tsùghù â wən enyəa, “Dzə̀la tsughu fə̀ŋ, nu ghəa ghù dzɛ̀ sə ndûw dzə̂ ghəa ghaŋa gho an Yɛ̀lusalɛ̀m, ghù kì sugho alendùw ghəəŋ sùghò ghəa e mɔ̀ʼɔ̄ zo Lumà.”

¹²A m bùghò tsuʼ u zuw tsughu, Dzûu tə̀ li tə n nyə tsughu utsəm, zə kɔʼ ŋkāa enyəa ghe lô tsàʼ tùŋ yo, ghe lô fəgha kə tso mʉ̀ sùghò yò, mo ghe kâ Pôl wì tsùghù dzə̀.

¹³Ghee ghəla ghe mò nyə tsəm wə̄n mò tsəgha taʼā ghə̀m mò àghì nchìakò.

¹⁴Ghe n ndùw kòʼ ndùw fɔ̀e tə̀ tughu to àsùghò tsoʼ to dzɛ̀ â ghee enyəa, “Ghàʼ ŋ kàa zə enyəa lô tsàʼ tuŋ mò ghàʼ kâ Pôl wi tsughu dzə̀.

¹⁵Ghɛ̀ ghî a Kaŋsì, ghɛ̀ ghəəŋ tsughu enyəa pfʉtəŋgə̄m enyəa ghe nîi tsughuu wô wə̄n fɛ a vʉ̀a ghɛ̀, tò è so ghɛ̀ so e fəghaan tɔʼɔ̀ tiso tsughu sàʼ è wə̄n. Ghǎʼ ŋ ghue e ndzûuŋ nàŋa tə̀n sùghò enyəa a wii wə̄n tò ù è buʼù bughò tâa wô fɛ.”

¹⁶Wɛ ù wàazə̀ ù Pôl n zuw fə̀mbɛ̀ fə ghee fə te fo, ndùw tsə̀ghà nyə̀ dzɛ̀ ndùw â Pôl alo kəbɛ̄lɛ̄.

¹⁷Pôl n daŋso tɔŋɔ tsughu komndzūghū u mɔ̀ʼ, dzɛ̀ â wən enyəa, “Nǐi kɔʼ wɛ̂ɛtùghuu wən ghɛ à wən, ghɛ̀ à wə̄n nduw a vʉ̀a pfʉtəŋgə̄m, ù kì ghəa è li zo aledzɛ̀ â wə̄n.”

¹⁸Ù n nì kɔ̀ʼ sùghò wɛ̌ɛtùghu vʉ̀, ghèe wən m bùghò kòʼ wò sùghò pfʉtəŋgə̄m, ù n dzɛ̀ ndùw â wən enyəa, “Pôl, ghùw ù ndughutsaʼ wən dzɛ̀ enyəa Ǹ nîi wô wɛ̂ɛtùghùu wən a vʉ̀a ghù, enyəa ù kì ghəa è li zo aledzɛ̀ â ghù.”

¹⁹Pfʉtəŋgə̄m vʉ ŋ kwu kɔʼ ghî fi aŋ kwē, a m bùghò ghèe wən nyɛʼɛ̄ bəŋso teē tsughu, ù m bvʉ â wə̄n enyəa, “À lò ghəa è ghɛ zo ghù so e dzɛ̂ â mùghò a?”

²⁰Wɛ̂ɛtùghu vʉ n dzɛ̀ â wən enyəa, “Dzûu tə̀ tsughu boo tsughu enyəa ghe dzâa wô â ghù enyəa ghù ni tsughu wo Pôl aŋ kaŋsì tsʉtsʉ, to è so ghe se tɔ̂ʼn səā kɔʼ ghəa à li gho kùu ndùw wə̄n.

²¹E kwo ghù lò soe kuūwn zuūw ghəa a ghee a te gho; tɔŋlo enyəa ghî à li a bêe těe wə̄n an dziī mo ghe tsəghàtàʼà ghə̀m mə̀ àghì n chìakò, mo ghe ŋ kàa n zə kɔʼ enyəa ghe lô tsàʼ tuŋ yo ŋkāa ghe lo fəgha kə mʉ̀ yo mo ghe kà Pôl wì. Ghe fi êzəŋ bɔɔm ləəm ko dzə̀ zə̀ghà.”

²²Pfʉtəŋgəm vʉ n dzɛ̀ enyəa ghî fi ndûuw ko nù, mò ù ŋ wən tɔ̂ʼ kùɛɛn tsughu enyəa, “E kwo ghù lò dzaā â ghùw enyəa ghù ŋ ghəa ghən â mùghò dzɛ̂.”

²³Pfʉtəŋgə̄m vʉ n daŋso tɔŋɔ tsughu ghê komndzūghū a bə̀ghà, dzɛ̀ â ghee enyəa, “Ghəəŋ naŋa tsughu nlǒ bɔ̀m n tə̀sùghugòʼ mò m bə̀ghà, àsùghò ghə̀m sùghugòʼ mǒ səghāmbəgha ghe nyəŋo kʉ̀anyòm wo, àsùghò mbɔ̀m n tə̀sùghugòʼ mò m bə̀ghà ghe shʉ̂aan ghɔŋ gho, ghe ki alendùw aŋ Kàesalìa nɛ â tsuʼwo an tàm tə ezuuw tɛ̀ndzūghū â tsuʼ wo.

²⁴Ghəəŋ tsùghù sùghò nlǒ kə̀anyòm ù li wo â Pôl alenyəŋo nduw a te, ghɛ̀ bɔɔm ni nduw wə̄n alô Fɛlècks, gɔvə̀nò mò kǎakàa fə̀ kâ wən kɛ̂.”

²⁵Ù n daŋso tɔ̄m tsughu kəmwàʼsò aŋ ghəa zən: ù n tɔm tsughu enyəa,

²⁶“À lo mugho Claudìus Lysìas, M̀ tɔɔ wo mwàʼsò kən ko. Mbɛ̀ɛ, M̀ fùghù wò ghù â tɔɔŋ zo, Gɔvə̀nɛ̀ Fɛlècks.

²⁷Dzûu tə̌ fə̀ kwu kɔʼ tûw wə̄n, ləghaa alewī, ghàʼ à ghê sùghugòʼ tə̀ n sə kpeen ndùw à tè, bəghasə̄ tsughu wə̄n ghəa a zuw tsughu enyəa à lǒ ghùw u Lumà.

²⁸A m bùghò Ǹ sô ləghaa alezūw ghəa zəla ghe kwuū wə̄n a te, mùghò n nì tsùghù wò wən aŋ kaŋsì è ghee.

²⁹Mùghò m bùghò kəŋ kele kɔʼ enyəa ghe wən kwuu kùu ndùw ghəa e làŋ kə ghee, mò à kǔuwn yò dzə̂ eghəa to ghe ewī wə̄n a te ŋkāa mo ghe lo aledzə̀n wə̄n a te an ndùghùtsāʼ.

³⁰Yia bugho ghe sô tsɔŋ dzɛ̂ fughu tsughu â mùghò enyəa ghe nyəm tsəm wo an tuw kə tûwbʉ̀ghà vʉ̀, yìa Ǹ daŋso nî tum fughu wo wə̄n a vʉ̀a ghù, dzɛ̀ tsùghù sùghò â ghì ghəla ghe kwuū wən enyəa ghe bughò taŋsô dzɛ̂ ghəa ghəla ghe kwuū wən a te fì à vʉ̀a ghù.”

³¹Sùghugòʼ tə̌ fi tsughu nì kɔ̀ʼ sùghò nù Pôl, an làŋ chia ghe nî kɔʼ, nì ndùw wən an Antipātə̀lìs â tsuʼ wo.

³²Tsuʼ u tsʉtsʉ vʉ̀, ghe ŋ kòom nyə̀ wò èbàm alo kəbɛ̄lɛ̄, mo ghe ŋ ghì a ukʉ̀anyòm à zəghàa ndùw enyəa ghe nughù daŋso ndûw ghèe ghê Pôl.

³³A m bùghò ghî a ukʉ̀anyòm ghən bugho tɛ̂ tsughu aŋ Kàesalìa ghèe ghê Pôl, ghe m fùghù ndùw mwàʼsò chì â gɔvə̀nò, ghe fùghù tsəghà ndùw sùghò Pôl â wə̄n.

³⁴A m bùghò ù tɔɔ̄ŋ kɔʼ mwàʼsò kə te ko, ù m bvʉ â Pôl enyəa ghù sə̀ am mbùʼ è ghɛ̌ zò. A m bùghò ù zuw tsughu enyəa Pôl sə̀ an Sìlishìa,

³⁵ù mo enyəa, “Ǹ sô shwaʼ wʉ̀a ù zəənlo abugho ghî ghəla ghe kwuū ghû bùgho.” Ù n dzɛ̀ tsùghù enyəa ghe e chiīn tsughuu wə̄n am mbɛ̀ e Hɛlɔ̀d.