Read Aghem Kə̀fwàʼ 24 Bible Online

Kə̀fwàʼ 24 - Aghem bible

Kə̀fwàʼ 24

¹A m bùghò tsuʼu n tsəghà tsughu n tɛ̀, tuw kə fɔ̀e, Ànànîas n ndùw sə̀ tsùghù wò ghèe ghê tsoʼ tə̀ li to, àsùghò ghùw ù lì mò ù fə lo kəlâŋ ghe fə̀ tɔŋlo enyəa à lò Tɛtūlùs. Ghe n nì dzɛ̀ ndùw fəgha kəla ghe kwuū Pôl a te â gɔvə̀nò.

²A m bùghò ghe daŋso tɔŋɔ̄ nyə wô Pôl, Tɛtūlùs ŋ kàʼ nyə̀ ndùw ko wə̄n a lùʼù kwuu kɔlɔ̄ kaaŋ wo enyəa. “Ghəa ghàʼ bɔɔ̄m mughù dzɔ̂ ènyə alo ebūghūnlō fɛ mò à lò ghû, ghù vʉ̀a ù ghəə̄ŋ sugho a Mbɛ̀ɛ Fɛlècks ghəa yia a bwîi dzɔ̂ɔ fɛ an naʼ zən,

³an dzìi tən tə̀ dzə̀m àsùghò an lùʼù tən tə̀ dzə̀m, ghàʼ tso boo nù ghəa ghə̀n à dzə̀m am fə̂ŋ zaʼa e dzə̀m.

⁴À kǔuwn lò ko enyəa, Ŋ̀ ka nəgha zəghà è kôom zə̀ sùghò, Ǹ so M̀ buʼū tsughu kəghu enyəa, am fə̂ŋ zə̀ghà è dzùŋ, ghù nyɛʼɛ zəən tsughu shwaʼ waʼa wo.

⁵Ghàʼ kôʼ tsùghù enyəa ghùw wən lo ghûw ù ùtsù, ghùw wəla ù sòʼò kaāŋ tsû wò am bvʉa e Tə̀dzûu fɛ am mbī e dzə̀m, vʉ̀a ù lò sughò tuw ko an dzeŋe kə̀ biigh kə ghì a Nazalɛ̀t gho.

⁶Ù mò buʼū kəŋo sugho dzì aledzəso maʼà ndughu è Kəzə̀ e ne an Yɛlusalɛ̀m, a ŋ kwu kɔʼ wə̄n,[1]

⁸Abugho ghù tɔ̀ʼ bvʉʉ̄n tsughu wən â ghəa gho, ghù sò lò nû alezoʼn kele kɔʼ ghəa ghə̀n à dzə̀m a kwuū wən fɛ a te, aŋ ghùu wə̄n.”

⁹Dzûu tə̀ n təmdzəəŋ ndùw sùghò wən a lùʼù kwuu u Pôl wò, boom fughuu ndùw enyəa ghəa yì à dzə̀m lò esəŋo.

¹⁰A m bùghò gɔvə̀nò nùghù sɔ̂ʼ ndûw Pôl enyəa ù kə̀aa wô àghəa, Pôl m bɛ̀lɛ̀ tsùghù enyəa, “Ghəa Ŋ̀ kôom kele kɔʼ enyəa ghù n dòʼo ndə̀m è tə̀nùu tǒ ghùw wəla ghù saʼā naʼ zən, M̀ fɛ dzɛ̀ enyəa M̀ bâaŋ ghue waŋa êzəŋ aŋ ghùe ù ghɛɛ̄ŋ wo.

¹¹E tughuu yo â ghuūghùe wʉ̂a wo alekəŋo kele səā kɔʼ ghəa ghən gho enyəa, tsuʼu ŋ kaān tsəghà dzə̀ eghə̄m à ghè mò m bə̀ghà aŋghəa mùgho mò nduw an Yɛlusalɛ̀m alendùw fughu ŋkɔʼso â Zə̀ kò.

¹²Ghe kaām mugho kòʼ kòʼ M̀ buʼn bɔ̀ŋ mò ghàʼ à ghùw ù lì ŋkāa Ŋ̀ ghəŋlo enyəa Ǹ tsuʼū soʼò kɔʼ aghî aŋ ghəa è li zo an ndughekəzə̀ e ne an Yɛlusalɛ̀m ŋkāa, an ndùghùne ŋkāa enaʼ.

¹³Ghe bûʼ yò sughò aledè ghəa zə̄lā ghe kwuū mugho fɛ̀ a te.

¹⁴Zən lò zəla Ǹ so M̀ boō wô â ghù enyəa kùu ndùw Dzì è te, zəla ghe ŋgɔɔ̄ enyəa à lò dzeŋe fə̀ biigh fo, Ŋ̀ kɔʼsô Zə̀ kə ghê Tselè sɛ̀, boom fughuu ndùw ghəa ghə̀n à dzə̀m lâŋ kə̀ deē, ŋkāa ghəla ghiīshʉ̀ghà a Kəzə̀ à tɔm naŋā,

¹⁵chìi ndùw ko tùʼ alo Kəzə̀ to ghue e ughùe e ghee e chîi sugho, enyəa ghî a tsəghatsəgha ghèe ghê bəən tə aghì tə̀ lo kɔʼɔsə̄a nù alo evʉ ghee a dzə̀m.

¹⁶Zən lò e ghee M̀ bughōo mùghò Ǹ nì kɔ̀ʼ mbāŋ kə te ko enyəa mùghò è ki ko fə̀ŋ è zɔ̀lɔ a zəŋò Zə̀ kò àsùghò a zəŋò ghì ghò.

¹⁷Êzə̄ŋ, ghəa nûu tə̀ li tə tsəghà tsughu, mùgho n ndùw bùghò enyəa M̀ bughò fughu eyosò â naŋa zo àsùghò fughu kefughu â Zə̀ kò.

¹⁸Ghəa Ŋ̀ ghəə̄ŋ ghəa ghən, ghe ŋ kòʼ tsùghù mùgho am ndughèkə̀zə̀ e ne an Yɛlusalɛ̀m, mò n zɔlɔ nù, mò n yo dzə saʼ kə aghì kò, ndəm kə̀ n kè səa sughò. Dzûu tə̀ li to sə wo an Ɛshìa —

¹⁹ghe mô kì alelō fɛ an sə kə̂a ghee e kwuu wo sugho mugho, abugho ghe kpaʼ ki ghəa zo ghe kwuū mugho a te.

²⁰Ŋkāa na to ghuūghùe e ghì ghən e dzâa wô ghəa è biigh zəla mùghò mò ghəŋlo aŋ ghəa mùgho mò ti, kə̀aa ndùw àghəa aŋ kaŋsì.

²¹Ghəa zə̀n è mɔ̀ʼ ko mùgho mo naʼ səa kɔʼ aŋ kaŋsi mò ti am bvʉa e ghee mò lo zən enyəa, ‘À lǒ bòʼ Ǹ naŋa tsughu lâŋ kən enyəa ghî à kpuuw kɔʼɔsə̄a nù alo evʉ̄, ghe mugho fɛ nɛ an sə kə̂a sàʼa a te.’ ”

²²Fɛlècks, ghəa ù màʼà lô sugho mò ù tɔ̀ʼ kwò nû ghəa a Dzì è te gho, ù m gbò kə̀aa kɔ̌ʼ sàʼ è ghee è te enyəa, “Abugho pfʉtəŋgə̄m Lysìas laʼà tsughu wo, Ǹ lo saʼ saʼ zɛʼɛ̄.”

²³Ù n daŋso fughu tsughu kəlâŋ â komndzūghū enyəa ghe ki alenaŋā tsughu Pôl ghe e chiinlō, ghe e nyɛʼɛ zəghaan tsughuu sugho ù è niī kɔʼɔ kʉ̀ɛɛ ko, dzɛ̀ tsùghù sùghò enyəa ghe ka e dzûu baʼà fən a wə̄n gho enyəa ghe ka wən â fʉgha u bughò fùghù.

²⁴A m bùghò tsuʼ n lǐ n tsəghà tsughu, Fɛlècks n ndùw sə̀ tsùghù wò ghèe wì, Də̀lùsilà, mò à lò zən à Dzûu; ù n dzɛ̀ tsùghù enyəa ghe nîi wô Pôl. Ù n tɔ̀ʼ zə̌ən sùghò ghəa yìa ù kə̌a kùu ndùw fə̀ŋ è gàʼa a zəŋò Kə̀lestò Yɛso.

²⁵A m bùghò Pôl tɔ̀ʼ teso tsughu tuŋlō u ghee wo aŋghəa ghî a ki alelo tsəghatsəgha a te, àsùghò aŋghəa ghî a ki alenaŋso ghuw kə e bwìi kə ghee ko a te, àsùghò aŋghəa Zə̀ kə̀ lo saʼā ghî ghò a te an tsuʼ fə̀ guŋso fo, Fɛlècks n tɛ̀ ètsəŋ, nùghù dzɛ̀ tsùghù enyəa, “Kə̌aa nùghu ndùw ezə̀ŋ, abugho Ǹ sô ndôʼ kele tsughu nəgha zo, Ǹ sô kôom tɔŋɔ̄ wô ghù.”

²⁶Ù n chîi ko tùʼ an nə̀gha e te zo sughò enyəa Pôl so waā dzə̂a fughuu wô wən â kua wo. Ù n tsùuŋ ko êzə̄ŋ nùghù tɔ̀ŋɔ tsughu Pôl ghèe wən ŋ kə̀aa tsùghù aghəa.

²⁷A m bùghò nûu tə̀ mîa tsughu tə bə̀ghà, Pôlshius Fɛstùs ŋ kɔʼ kɔʼ ndàŋ è Fɛlècks tò gɔvə̀nò. A m bùghò ù sò ləghaa aleghəə̄ŋ tsughu enyəa fə̂ŋ tə̀ è zɔlɔ Dzûu tò a zəŋò ghee, ù n zə̀ghàa tàʼà ndùw Pôl an ndùghàtsāʼ.