Read Aghem Kə̀fwàʼ 25 Bible Online

Kə̀fwàʼ 25 - Aghem bible

Kə̀fwàʼ 25

¹A m bùghò Fɛstùs kɔʼ kɔʼ ndàŋ aŋ Kàesalìa, tsuʼu mə̀ n tsə̀ghà tsùghù n təgha, ù ŋ zə̀ghàa è tsùghù nùghù kɔ̀ʼ ndùw an Yɛ̀lusalɛ̀m.

²Fɔ̀e tə̀ tughu to ghèe ghê ghì a Dzudà à səŋò ghò, ghe n dzɛ̀ ndùw ghəa yia ghe kwuū Pôl a te â wə̄n; ghe m bùʼ ndùw kə̀ghu â wə̄n,

³nɔ̀e ndùw enyəa ghe nîi tuū kɔʼɔ̄ ndûw bə̀ghà vʉ an Yɛ̀lusalɛ̀m. À n lo mo ghe m fə̀mbɛ̀ kɔ̀lɔ naŋa enyəa ghe kwuū wi wən an dziī.

⁴Fɛstùs m bɛ̀lɛ̀ ndùw enyəa Pôl lò aŋ Kàesalìa ghe fê naŋā fughu, enyəa ghuūghùe u ghee buʼù lə̀ghaa sùghò alekùʼù ndûw fughu.

⁵Ù n daŋso dzɛ̀ ndùw â ghee enyəa, “Êzə̄ŋ, ghɛ̀ ghəəŋ tsughu enyəa ghî à səŋò ghò am bvʉa zɛʼɛ tsughuu ndûw ghàʼ à ghee, mo ghəa è li e boo am bà kə tûwbʉ̀ghà ù te, ghe ŋ kwù ndùw wə̄n.”

⁶A m bùghò ù ndòʼ doʼò sugho ghèe ghee tò ntsuʼu efāa ŋkāa eghə̄m, ù n nùghù tsùghù ndùw aŋ Kàesalìa; tsuʼ ù li vʉ̀ ù ŋ kɔʼ dòʼò tsùghù an ndàŋ è wən an ndùghùtə̀sāʼ, dzɛ̀ tsùghù enyəa ghe nîi wô Pôl.

⁷A m bùghò ù bùgho, Dzûu təla tə mò nughù tsughu wo an Yɛ̀lusalɛ̀m n nùghù zùuŋ kɔ̌ʼ wə̄n enyə, bòʼò wò ndə̀mà tə tùghùtùghù tə aghəa, naaŋ ndùw an tuw kə wə̄n, mo ghe bûʼ yò aletɔ̀ʼɔ̀ teso.

⁸Pôl mo e bâaŋ ghue u wə̄n, dzɛ̀ enyəa, “Ŋ̀ kâ làŋ kə Tə̀dzûu kə̀ bvuʼ dzə̀, Ŋ̀ kâ bǒon sùghò ghəa zo an ndughèkə̀zə̀ e ne an Yɛlusalɛ̀m, kè tsoō boōn sughò èghəa â Də̀ŋ kə ne kə Lumà kò.”

⁹Fɛstùs ŋ kuuwn ləghaa aleghəə̄ŋ tsughu enyəa fə̂ŋ tə̀ è zɔlɔ Dzûu tò a zəŋò wə̄n, ù n dzɛ̀ â Pôl enyəa, “Ghù lə̀ghaa nù enyəa ghù kɔʼ an Yɛ̀lusalɛ̀m a kɔʼɔ̄ saʼ ghû fughu an sə kaŋā a?”

¹⁰Pôl ŋ kuuwn dzɛ̀ enyəa, “M̀ fɛ ti an tia esāʼ e Də̀ŋ kə Lumà kə̀ ne ko, an lùʼù kəla ghue u Də̀ŋ kə Lumà kə̀ ne ko ù ki alesāʼ mugho a te; Ŋ̀ kâ ghəa è li e bonlo â Dzûu tò, ghue u eghùe zɛʼɛ̄ e kwo sugho nû.

¹¹Abugho Ǹ lo ghùw wəla Ŋ̀ ghəə̄ŋ boōn ghəa gho, yìa Ǹ lo mò mùghǒ ŋ ghəa è li e bonlo mò Ŋ̀ ki alekpuw a te, Ŋ̀ kəŋo yo dzì alenùghù ti evʉ; abugho à lo enyəa ghəa zəla ghe kwuu mugho a te yo èsəŋo, fəgha kə̀ li kə yo dzə̂ alenìi kɔʼ mugho kə fughuu tsəghàa ndûw â ghì ghən. Ǹ dîi dzàa ndùw â Dəŋ kə̀ ne kə Lumà kò enyəa n ləgha enyəa à saʼ wə̄n saʼ zaŋā.”

¹²Fɛstùs n sāan tsughu ghèe ghê ghì a kaŋsì a wə̄n gho, bɛ̀lɛ̀ tsùghù enyəa, “Ghù dìi alendùw a vʉ̀a Də̀ŋ kə Lumà kə̀ ne ko: ghù kì alendùw a fughu.”

¹³A m bugho tsuʼu n lǐ n tsəghà tsughu, Mbɛ̀ɛ Agelepà m bùghò aŋ Kàesalìa ghèe Bɛ̀nîs alebùghò tɔɔ̄ŋ zuw Fɛstùs.

¹⁴A m bùghò ghe doʼò kəŋo nduw fughu an ndə̀m è ntsùʼu, Fɛstùs n nì màʼà wò tsù u Pôl â də̀ŋ chì, â wən enyəa, “Ghùw ù lì lò nû Fɛlèks mò nughù naŋā taʼà fɛ an ndùghùtsāʼ;

¹⁵a m bùghò Ǹ nduw an Yɛ̀lusalɛ̀m fɔ̀e tə̀ tughu to ghèe ghê tsoʼ tə Tə̀dzûu tò ghò, ghe ŋ kə̀aa wò mùghò â ghəa a wə̄n gho, dzàa wò enyəa to a mô saʼ sāʼ è kɔ̀lɔ̀ tsughu Pôl.

¹⁶Mùghò m bɛ̀lɛ̀ ndùw ghee enyəa e yo tsəghà dzə̂ am bùghòo kə tə̀ Lhumàn enyəa a lo alekwuū fughuu səā ndûw ghùw mò ù kaan ndûw kpènlo an tia e sāʼ ghèe ghùw wəla ghèe wən dəmā, aŋ ghəa ù lò alebɔŋɔ̄ kele sughò dzì alebaāŋ sughò ghue u wə̄n.

¹⁷A m bùghò ghe dzeŋe ndûw bughò fɛ, mùghò ŋ kè bonlo enəghā, tsʉtsʉ vʉ̀, mùghò n daŋso nyə̀ nì kɔ̀ʼ bala zaŋā an tia e sāʼ, dzɛ̀ ndùw enyəa ghe nîi nyəā wô ghùw ù te.

¹⁸A m bùghò ghî ghəla ghe kwuū wən nughù teē kɔʼ, ghe ŋ kè kə̂a ghəa è li zo e boō tǒ bòobò tə aghəa təla M̀ mô moʼō:

¹⁹ghe m fwə̂n kì ko ghə̀alò n lǐ mò ènyə ghe baāŋ fom to a te ghèe ghee mo a mɔ̂ɔ ndùw ghəa a Kəzə̀ a ghee, àsùghò Yɛso ù lì, mò ù maā kpuw, Pôl vʉ̀a kuūwn dzɛ̂ enyəa ù lǒ â tuw ko.

²⁰A m bùghò Ǹ sô kəŋ ke dzì aŋ ghəa Ǹ lô aletɔ̀ʼn ghəa ghə̀n a te, mùgho m bvʉ tsughu â wən enyəa ù yia ləghaa nù enyəa a ndûw saʼ wə̄n an Yɛ̀lusalɛ̀m aŋ ghəa ghən a.

²¹A m bùghò Pôl sò kuūwn buʼ ndûw ghu ko ghe zəghàa tsughu ko ghee tò də̀ŋ kə̀ ne kə lô bughò saʼ ghee, mùgho n dzɛ̀ tsùghù enyəa ghe naŋā tsughu wə̄n, Ŋ̀ kê bughò nîi tuū ndûw wən a vʉ̀a Də̀ŋ kə Lumà kə̀ ne ko.”

²²Agelepà n daŋso dzɛ̀ â Fɛstùs enyəa, “Ǹ ləghaa nù alezuūw tsughu shwaʼ u tûwbʉ̀ghà ù te mùghò â mughu.” Festùs n dzɛ̀ enyəa, “Ghù lo zuuw nù shwaʼ u wə̄ wo tsʉtsʉ.”

²³Tsʉtsʉ vʉ̀, Agelepà ghèe Bɛ̀nîs n ndûw bùghòo aŋ kɔʼso tə aghəa, bùghò tsə̀ghà nyə̀ ndùw an sàŋ ghèe ghê pfʉtəŋgə̄m àsùghò ghì à səŋò ghǒ fughu alo enaʼ. Fɛstùs n daŋso dzɛ̀ è tsughu ghe n nì nyə̀ wò Pôl.

²⁴Fɛstùs n dzɛ̀ tsùghù enyəa, “Mbɛ̀ɛ Agelepà, à ghɛ̀ ghən à dzə̀m ghɛ̀ lô fɛ sɛ̀, ghɛ̀ koʼò nǔ ghùw wəla Tə̀dzûu ghə̀n à dzə̀m mò tɔm wô mugho â mwàʼsò kò an tuw kə wə̄n, an Yɛ̀lusalɛ̀m àsùghò fɛ̀, nàʼn wò ko enyəa ù kì alekpūw.

²⁵Mùgho ŋ kòʼ tsughu enyəa ù kamo ghəa e bonlo tò ù è kpuw a te; aŋ ghəa ghuūghùe u wən u mò dî dzɛ̂ ndûw sughò enyəa e so e kô də̀ŋ kə ne ko, mùgho n dzɛ̀ enyəa Ǹ nîi tǔu ndùw nǔ wə̄n.

²⁶À kǔuwn lò ko enyəa Ŋ̀ ki yo biso kə eghəa ko kùu ndùw wən aletɔɔ̄ fughuu ndûw â mughùbè waŋā. Zən lǒ e ghee Ǹ nî wo wən an sə kɛʼɛ̄, M̀ biso nì wò wən an sə kəā a Mbɛ̀ɛ Agelepà enyəa abugho a sô tɔ̂ʼ bvʉʉ̄n tsughu wən â ghəa gho, Ǹ sô wǎa lò alekele èghəa aletɔ̄m.

²⁷Nu â mùghò e ghəəŋ yo tɔ wo alenìi tuū ndûw ghùwdùghùtsāʼ mo a kâ tsǔʼn tsughu ghəa ghəla ghe kwuū wə̄n a te.”