Read Aghem Kə̀fwàʼ 26 Bible Online

Kə̀fwàʼ 26 - Aghem bible

Kə̀fwàʼ 26

¹Agelepà n dzɛ̀ ndùw â Pôl enyəa, “Ghù kì nû daʼa ko êzəŋ alebâaŋ ghue wʉ̀a.” Pôl n daŋso kele kɔʼ ghu a wən edzuŋ, kàʼ ndùw sùghò ghue ù baaŋ wo:

²“M̀ moʼò enyəa Ŋ̀ ki tuw kə̀ dzûŋ kò a Mughènaʼ Agelepà enyəa à lò an sə kə̂a Ŋ̀ ki alebâaŋ ghue waŋa aŋ ghəa ghəla Dzûu tə̀ kwuū mugho a te,

³bòʼ enyəa ghù tɔ̀ʼ kwò nû bughōo kə enaʼ kə Tə̀dzûu ko àsùughò ghəla a ghəŋlo enyəa ghî ghə̀ ndzughuun lo, M̀ buʼu kə̀ghu â ghù enyəa ghù maʼa tsughu ghue wo, ghù zəən tsughu shwaʼ waŋa wo.

⁴Dzûu tə̀n tə̀ dzə̀m kwò nû ghəa M̀ mughùu sə kɔʼ wo a te, ghe yia kwo sugho ghəa mùghò mò a te an naʼ zaŋā àsùghò an Yɛ̀lusalɛ̀m.

⁵Ghe ki kwo tsəgha nû, abugho ghe mô lô aledzàa wô, enyəa mùghò mò lo tsəgha ghùw an dzeŋe kə ghì a Falàsîi ghəla ghe mò tɔʼɔ̀ ghəəŋ ghəa a kəzə̀ ghaʼa gho.

⁶M̀ fɛ èzəŋ ti saʼa tə̀sāʼ bòʼ boo zəla ŋ ki an to kəla Zə̀ kə fə̀ to â ghê tselè tsele ghaʼā,

⁷tɔ̂ɔŋ to kəla naʼā taʼa tən èghəm à ghè tò tə bə̀ghà boō tsughu enyəa ghe lo kele nù, ghəa ghe ghoʼso kɔʼso bwiī nduw Zə̀ kò, kɔʼso zēe ndùw. À lǒ bòʼ boo zən a Mbɛ̀ɛ, ghù kòʼ Dzûu tə kwuū mugho!

⁸À lǒ kwò ghɛ̀ sô moʼò enyəa Zə̀ kə̀ yo alenìi nughù kɔʼ ghùw alo evʉ̄ a?

⁹ Ghuūghùe waŋā, mùgho mò tso kwo enyəa Ŋ̀ ki aletsoō kəŋo tsughu tədziī tə dzə̀m aletuū maʼà tsughu fwàʼ kə Yɛso ù Nazalɛ̀t wə̄n.

¹⁰Kən lò fəgha kə̀là mùgho fə̀ fwaʼ ghè kò an Yɛ̀lusalɛ̀m. Fɔ̀e tə̀ tughu tə m fughuu tsughuu kədaʼa, mùghò ŋ kwuu dzə̀là ghì ghəla ghe boo fughu â Yɛso an ndùghètsāʼ, a m bùghò ghe tsəghàsò tsughu lâŋ kò enyəa wiin ghee, mùghò n tso boo è sugho.

¹¹Mùghò m fɔeso tsughu ghee enyə an ndughu tə̀ ne tə̀n tə̀ dzə̀m, Ǹ dəmà aleghəə̄ŋ tsughu ghee enyəa ghe tuū maʼà tsughu boo zəla ghe ki. Nʉghà wə̀ ŋ ŋgee pfʉa mùghò a zəŋò ghee, mùghò m buʼù nyə̌a kaaŋ ndùw nàʼà tə tətùu Ǹ ndzaŋsō kaāŋ ndûw ko ghee.”

¹²“À mò lo bòʼ ghəa ghən fɔ̀e tə̀ tughu tə mò fughu tsughu daʼa ko, mùgho n nyə̀ ndùw an Dàmaskùs.

¹³Â ŋgàlàtsə̀ ènyə a Mbɛ̀ɛ, ghəa Ǹ nduūw an dziī, mùgho ŋ kòʼ tsə̀ è lì nùghù bâŋ sə tsughu wô alo kəwālā, mò è bàŋ tsə̀ghà èzuuw, zə̀ m bàŋ ŋgəa kɔʼ dəŋò kə̀là mùgho mò lo a te à ghì ghə̀là ghàʼ à ghee mò nduūw a dzə̀m.

¹⁴A m bùghò ghàʼ bvʉ̂ ndûw a ghueetsə̄, mùgho n zuw dzə̀ è ghùw ù lì è dzàa wo â mùghò an shwaʼ u Hebə̀lù enyəa, ‘Sôol, Sôol, à lǒ kwò ghù sò ndzaŋsō mugho à? Ghù tsò wii sùghò ghue wʉ̀a kə̀nùghùnùghù enyəa ndzàŋso mùghò.’

¹⁵Mugho m bvʉ tsughu enyəa, ‘À lò ghû ndùgho a Mughubè?’ Mughubè ù te n daŋso dzɛ̀ tsùghù enyəa, ‘Ǹ lo Yɛso wəla ghù ndzaŋsō kaŋlo.

¹⁶Nùghu tee kɔʼ am fwēe zəghà, tɔŋlo enyəa soo kə eghəa kəla M̀ bughò dê wô ghue waŋā wo â ghù, à lò alenìi kɔʼ ghû enyəa ghù è fwaʼā â mùghò; teso dzàa ndùw ghəa ghaŋa ghəla ghù lǒ mò ghù ŋ kòʼ àsùghò ghə̀là Ŋ̀ kê dêe wo â ghù.

¹⁷Ǹ lo bəghaasəa ghù aŋ ghu kə ghì ghə Ezə̀lɛ̂ àsùghò aŋ ghu kə Tòʼò tə̀là Ǹ lo tuū ndûw ghû fughu.

¹⁸Ghù kì aletsʉ̄ sə a ghee, ghù ni nughu sə wo ghee alo kələ̄m, ghù naŋa sə wo an tsə̂, ghù ni nughu tsughu sugho ghee aŋ ghu kə Satàn, ghù ni wo ghee a vʉ̀a Zə̀ kò, to abugho ghe lo gaʼ tsughu fə̂ŋ tò a zəŋò mùghò, a lo ghuūw māʼà kɔʼ bôo tə ghee, ghe nîi kɔʼ bala e ghee am bvʉa e ghì ghə̀là Zə̀ kə̀ shîaa kɔʼ.’ ”

¹⁹“Mbɛ̀ɛ Agelepà, mùghò fə̀ bɔɔm zuw nduw fəgha kəl a ghùw wəla ù nùghù wo alo kəwālā bughò dzɛ̂ wo à mùghò an udzǔo.

²⁰Sʉ̂esʉ mùgho n dzɛ̀ tsùghù an Dàmaskùs, daŋso ndùw an Yɛ̀lusalɛ̀m, daŋso zùghòo ŋgə̀a wò Dzùdîa edzə̀m, dzɛ̀ ndùw â Tòʼò tò, enyəa ghe kuuwn kɔʼ fə̂ŋ tə ghee, ghe boō ndûw Kə̀zə̀, ghe e fwaʼā nduw sugho ghəa ghəla a dêe tsughu enyəa ghe ŋ kūwnlō.

²¹Zən lò e ghee Dzûu tə̀ mò kwu tsughu mugho am ndughènêkə̀zə̀ an Yɛlusalɛ̀m, dzɛ̀ enyəa a wii tsughuu nù.

²²Alebùghò sə nɛ, M̀ mughu mò à mùghò yosò Kə̀zə̀, zən lò e ghee Ǹ ti fɛ, tesô dzàa wò ghəa ghən â ghì ghə̀n à dzə̀m, ghî a ulwə̄n àsùghò ghì à səŋò ghò. Ŋ̀ kə̂aa dzə̀ yò ghəa è fughu è li zo, M̀ bɔɔm kə̀aa kô fəgha kəla ghiīshʉ̀ghà a Kəzə̀ a fə̀ dzɛ̂ naŋā ghèe ghê Musî enyəa kə kê bùghò sə̌aa nù.

²³Ghe fə̀ dzâa enyəa, ‘Kə̀lestò ki aletèlè bughò kpuūw tsughuu dzə̂, ù dòʼò tsughu ghùw sʉ̂sʉ alekɔʼɔ̄sə̄ alo evʉ̄, alebùghò tsʉ sə a aghì àsùghò a tətòʼò ghò.’ ”

²⁴Aŋghəa Pôl naām baāŋ ghue wo êzə̀, Fɛstùs n nùghù dzɛ̀ sə kɔʼ an dzə̂ è tughu enyəa, “Pôl, ghù zə̀ghaa nù! Mwàʼsò kə̀a kə̀là ghù ŋge zoʼn tsughu enyə, kə n tuw kə̀a kə̀ sâʼ màʼà.”

²⁵Pôl mo enyəa, “Ǹ zəghaa dzə̀ yò à Mbɛ̀ɛ, Fɛstùs. Ghəa ghə̀là Ŋ̀ kə̂aa səā wô fɛ, à lò êsəŋò, yia a kwuū ghəa zo.

²⁶Mughènaʼ Agelepà kwò nû ghəa ghə̀n à dzə̀m: Ǹ ndzəmà kə̀aa ndùw nù ghəa a te gho â wə̄: tɔŋlo enyəa Ŋ̀ kwo nû enyəa ghəa ghə̀là Ŋ̀ kə̂a fɛ à dzə̀m, è li e yo a te mò à lǒ è fughu zo â wə̄n; nu ghəa ghən ka mo tsɔŋ sə̀ dzə̀.

²⁷Mbɛ̀ɛ Agelepà, ghù bǒo nû fəgha kəla ghiīshʉ̀ghà a Kəzə̀ a fə̀ dzɛ̂ naŋā? Ŋ̀ kwo nû enyəa ghù m boo.”

²⁸Agelepà n daŋso nùghù bvʉ tsughu â Pôl enyəa, “Ghù mòʼò enyəa aŋ kə̀mà fə̀ enə̀ghà fən ghù lò nû aleghəŋlo Ǹ doʼò ghùw Kə̀lestò?”

²⁹Pôl mo enyəa, “Kàa à lò kəma fə kəgha ŋkāa dəghàa kə kəgha, gɔ̂ɔŋ zaŋa â Zə̀ kò e lo enyəa à ka bûʼ kà dòʼò ko ghû, to ghî ghə̀n à dzə̀m ghe zəə̄n shwaʼ waŋa wo nɛ̄ mò doʼò tsughu ghî a Kə̀lestò tò mugho, mò à kǔuwn yò dzə ghùwndughūtsāʼ tò aŋghəa Ǹ lo êzəŋ.”

³⁰Də̀ŋ chi kə n daŋso nùghù kɔ̌ʼ ghèe ghê gɔvə̀nò à Bɛ̀nîs àsùghò ghì ghə̀là ghèe ghee mò doʼ a dzə̀m:

³¹a m bùghò ghe nughù sə nduw, ghe n sə̀ kə̀aa tsùghù aŋ ghùe e ghee enyəa, “Tûw wən ghəəŋ dzə̀ yò ghəa è li zo tò ù è kpuw a te ŋkāa tò ù è kɔʼ ndùghùtsaʼ a te.”

³²Agelepà n daŋso dzɛ̀ tsùghù â Fɛstùs enyəa, “To a mâa tûw wən zəghàa abugho ù mò doʼŋkè nɔɔ̄ wô enyəa a nîi tuū ndûw saʼ e wə̄n a vʉ̀a Də̀ŋ kə ne ko an Lumà.”