Read Aghem Kə̀fwàʼ 28 Bible Online

Kə̀fwàʼ 28 - Aghem bible

Kə̀fwàʼ 28

¹A m bùghò a təghasə kɔ̀ʼ wò an dzughùu, a ŋ kəŋ kele kɔʼ aŋ ghùu ghì ghəla ghe mughu a fughu enyəa ghe tɔ̂ɔŋ nàʼà fìa dzùghùu zə dzə̂əŋ ŋgəa kɔʼ enyəa à lò Maltà.

²Ghî ghə enaʼ a te ghə n dè tsùghù ghaʼ â fɛ̀ɛn kə edzɔ̀ kə̀ li ko enyə. A m bùghò à sò lo mo ghuuw zə ŋ kāʼ tsughu zo, fwo wə n lo, ghe m fəghaan kɔʼ uwən enyəa ghàʼ a dzə̀m zʉɛɛ.

³Pôl n lo mò ù ŋ kūum kaaŋ wò kaʼ kə ŋkàʼ kò, ù m kpɛ̂ɛn nyə̌a ndùw fughu alo etsə̄, ghəa wən u nûm nyə kɔʼ fughu alo ŋkàʼ, zughu n ndùw tì sə̀ wò fughu alo ŋkàʼ, nyəme kɔʼ aŋ kwe kə wə̄n.

⁴A m bùghò ghî ghə enaʼ yi kôʼ ghəa zughu zə kân aŋ kwe kə Pôl, ghe mo aŋ ghùe e ghee enyəa, “Bəghà wən e wii nû ghî ghò, ghəa ù bùʼ ti sə kɔʼ ko fɛ a n dzughùu, e dêe nù enyəa ghùw wən ki yo zə mbī zən.”

⁵Pôl ŋ kūun tsò wàn màʼà nyə tsughu ko zughu zə̀ aŋ uwə̀n mo è kâ wən nomso.

⁶Ghe m moʼò ko enyəa Pôl sò tsòo nùghùun kàʼa tsughuu nù ù è tsoō muūw sə̄a nduw ko enyə, ŋkāa ù nùghù bvʉ̂a kpuūw wô. A m bùghò ghe sô zə̄nlō an də̀ghàa kə kəgha mo ghəa è biigh è li e səa yo a zəŋò wə̀n, ghe ŋ kuūwn kɔʼ moʼnlò e ghee, kàʼ ndùw alekə̀a enyəa ù lǒ zə̀ kə̀ li ko.

⁷Zə n lo êzə̀ a fughu kùʼŋkùʼnlo, luʼū tə te tə n lo mò à kì tuw kə nàʼà fə dzughùu fì ghe mò tɔŋlo enyəa à lò Pubə̀lìus, ghùw, ù fə̀ nî naŋā ghaʼ kədzûŋ alo ntsuʼu n təgha.

⁸Zə m bùghò sə kɔʼ enyəa tselè Pubə̀lìus nyə̀ŋ a kə̀chʉ̀a â ghue wo, à nyʉ̂kəfətɔ̀e kò, Pôl n tsə̀ghà nyə̀ ndùw an dzughu e ndughu e wə̄n, nyə gaʼ tsughu aghu a zəŋò wə̄n, gɔ̀ŋlò è tsughu, baaŋ kɔʼ wə̄n.

⁹Aŋghəa ghəa ghən sə kɔʼ, ghî à dzaāŋ yìa à dzə̀m a fughu an nàʼà fə dzughùu fi n ndùw bùghò è sugho, Pôl m baaŋ kɔʼ ghee.

¹⁰Ghî a te ghə m fughu ghaʼ â kɔʼso mò an ndə̀mà tə tədzǐi, a mo e bughò nùghùun sùghò nù, ghe n dzə̀n kɔ̀ʼ sùghò ghàʼ â fʉgha wəla u mò lo aleyoso nduw ghaʼ an dzughùu alo kəkwə̀n.

¹¹A m bùghò ndzɔŋɔ tə tsəghà tsughu tə tə̄ghā, a n nì kɔ̌ʼ kwə̀n kə̀ li ko kə nughu wo an naʼ e Alɛ̀ʼzandà ghe mò tɔŋlo enyəa à lǒ Zʉ̀ wə Nndzə̀. Kə mò bughuo tee wo a fughu bòʼ à mo lo tî kəla kʉ̌ɛɛ kə biigh kə tsəghaa tsəgha a te.

¹²A n ndùw nyə̀ ndùw an nàʼà fə̀ li fo ghe tɔŋlo enyəa à lǒ Sìlakùs, dòʼò tsùghu a fughu alo ntsuʼu n təgha,

¹³A n zə̀ghàa tsughu fughu, daŋso nùghù nyə̀ ndùw an Lhɛgìum. A m bùghò tsuʼ fə tsəghà tsughu fə mɔ̀ʼ, kʉ̀ɛɛ kə emàm kə̀ li kə n nùghù kaʼ tsughu etsəghà, tsʉtsʉ vʉ̀, a m bùghò nyə̀ wò am Puteolì.

¹⁴A m bùghò kòʼ wò waazə̂ ghaʼa à li gho fughu èzə̀, ghe mo enyəa ghàʼ mughùu tsughu ghàʼ à ghee n tsuʼu sə̀ghàmbəgha. A fi bughò nyə̀ wò nù an Lumà.

¹⁵Waakəzə̀ yi fughu n zuw tsughu zwɔ̂ŋ waʼa, lɔʼso bùghò tɛ̀ mìa wò to am Bekewə̄n kə Apìus àsùghò luʼ kə bəŋo bwii ko ghe fə̀ tɔŋlo enyəa à lò Atsə à Təgha alebùghò kôʼ ghàʼ. A m bùghò Pôl kòʼ tsughu ghee, ù m fughu zɔ̀ɔŋ kə Kəzə̀, fə̀ŋ n daŋso nyə tsughu wə̄n.

¹⁶Ghəa a nyə ndûw an Lumà, ghe n zə̀ghàa tsùghù Pôl enyəa ù è mughu aŋ ŋgə̄ŋ ghèe sùghugòʼ zəla è chiīn wə̄n.

¹⁷Tsuʼu mə̀ n tsə̀ghà tsùghù n təgha, Pôl n tɔŋɔ tsughu Dzûu təla tə lô tuw wo fughu; a m bùghò ghe tsuŋ wo, ù n dzɛ̀ â ghee enyəa, “À waagho, à mò lo an Yɛ̀lusalɛ̀m ghe mò nî fughu nyə tsughu mugho aŋ ghùu gɔvəmɛ̀n è Lumà tǒ ghùw ù ndùghūtsāʼ mò Ŋ̀ kâ ghəa e bonlo â ghì a sɛ̀ ghò ŋkāa an làŋ kə ghê tsele â sɛ̀ kò.

¹⁸A m bùghò ghe sô saʼ mugho, ghe n ləghaa alezə̀ghàa maʼà mùghò, ghəa e màʼà buw an saʼ zaŋā to ghe e wī mugho a te.

¹⁹A m bùghò Dzûu tə̀ sô tue, mùghò m buʼ tsughu kəghu enyəa to ghe mô nîi tuū wô mugho a vʉ̀a Də̀ŋ kə̀ ne ko an Lumà, dèe èzə̀ mò M̀ bûʼ kì bən sugho yo ghəa zo alekwū naʼ zāŋā a te.

²⁰Zən lò e ghee M̀ mô dzɛ̂ enyəa Ŋ̀ koʼò tsughu ghɛ, sɛ̀ kə̂aa tsughu aghəa. Ghe mugho fɛ alo tətsāʼ kûm nàŋa aŋ ghəa e ghûw wəla Ezə̀lɛ̂ chǐi tùʼ a te.”

²¹Ghî yi mo â Pôl enyəa, “Ghàʼ kaām mwàʼsò kə̀ li kə fɛ kòʼ kə nughù wo an Dzùdîa kùu ndùw ghù. Aŋ waazə̀ a sɛ̀ ghəla ghe buʼù bughòo tsəghà sughò fɛ, ù lì kaām bughò nàʼà kòʼ ŋkāa kə̀aa kòʼ ghəa è biigh è li zo kùu ndùw ghù.

²²Ghàʼ kuuwn ləghaa nù alezūw moʼn zə̀ghà; nu ghàʼ kwo nû enyəa ghe tsôo kə̀aa bǒon kaaŋ tsə̀ghà kô ghəa a dzeŋe kəla ghù lò a te an lùʼu ten tə̀ dzə̀m.”

²³A m bùghò ghèe ghee ndôʼ boō naŋā tsughu tsūʼ fo, ghe m bùghò kòʼ wò sùghò wə̄n, ghee ndə̀m, an lùʼù kəla ù mò mughu a te. Ù n tesô ghəa e te zo â ghee, alezìi tsughu â bwə̀làbwə̀là tò ndùw kùm ndùw an nə̀gha è gûŋsò zò, dèe fùghuu kɔʼɔ tsə̌a tə fɔ̀e u Kəzə̀, də̀mà ndùw sùghò enyəa e tsʉ̂ʉn nughù kɔʼ ghee kùu ndùw Yɛso aŋ ghəa lâŋ kə Musî kə̀ deē àsùghò shwaʼ u ghǐishʉ̀ghà a Kəzə̀ ghò.

²⁴Ghî à li ghə m boo fùghù ndùw sùghò am fəgha kəla ù mò kəaa, à li ghə ŋ kè boo.

²⁵Ghe n nughù ndùw mo ghe baaŋ ndùw tə̀fom, aŋghəa Pôl sò dzɛ̂ nduw â ghee enyəa, “Zuʼ tə Zɔlɔ tə fə̀ lo tsəghatsəgha aledzɛ̀ â ghê tsùghò am bàm zə Èzayà, ghùwshʉ̀ghà, enyəa,

²⁶ ‘Ndǔw kòʼo ndùw ghî ghən, ghù dzɛ nduw enyəa, Ghɛ̀ lo e mgbāŋā zuuw nduw ghəa gho, zuuwkɛ̄lɛ̄ yo, ghɛ̀ è mgbaŋa koʼō nduw, kòʼòkɛ̀lɛ yo.

²⁷Tɔŋlo enyəa, ghî ghən m fə̀ŋsò dòʼò, tuŋlō u ghee vʉa u tughūu alezūw aghəa; ghe yia kəmā naŋā tsughu sə a ghee gho; enyəa e kwo ko ghe lô so e koʼò àghəa an sə a ghee, ghe lô zuūw sugho, enyəa e kwo ko ghe lô zuūwkɛlɛ̄ sugho am fə̂ŋ è ghee, e kwo ko ghe laʼà bâŋà kôʼò wô mùghò tò M̀ baāŋ kɔʼ ghee.’

²⁸Ghɛ̀ ki alekele tsughu enyəa ghe n shwaʼ u tùw kə̀ zəa u Kəzə̀ wən nî tùm fùghù ndùw â Tòʼò tò, ghe lo zuuw nù.”

²⁹[A m bùghò Pôl kə̂aa mɛʼɛ̀ tsughu ghəa ghən, Dzûu ti n zə̀ghàa è tsughu, buʼn ndùw ko m̀bɔ̀ŋ dzîidziī, ghe baāŋ ndûw fom to alo eghùe.]

³⁰Pôl m mùghùu fùghù nûu tə̀ zəŋè tò tə bə̀ghà mò ù mùghù ko am mbə̀ghà è wə̄n, mò ù tsə̌a ndùughù è wən à nəŋ ko, kpeenìi ghì ghə̀n à dzə̀m ghe bughò koʼō wə̄n,

³¹kə̀aa ndùw kô ghəa e fɔ̀e u Kəzə̀, zoʼn ndùw sùghò àghì kùu ndùw Mughu ù te Yɛso Kə̀lestò an ndɛ, mo fəgha kə li kə təghàsò sùghò yò wə̄n.