Read Aghem Kə̀fwàʼ 3 Bible Online

Kə̀fwàʼ 3 - Aghem bible

Kə̀fwàʼ 3

¹Tsuʼ ù li wo Pità ŋ kɔʼɔ ndùw an ndughu è Kə̀zə̀ e nē ghèe Dzɔ̌n an tàm tə ezūuw tə təgha â tsə̀ tò an nə̀ghà zəla ghe gɔ̂ɔŋlo a te.

²Ghe m bòʼò wò â ghùw ghe fə̀ dzə ko mò ù lǒ kə̀ŋgwûundughu. Ghe fə̀ tûwbʉ̀ghà ù te boʼn bugho naaŋ zee tsəgha a fǔu u mbɛ̀ u ndùghù è Kə̀zə̀ e ne, am fuū u mbɛ̀ wəla ghe mò tɔŋlo enyəa à lò Dzɔ̀ɔdzɔ̀, enyəa ù è nɔɛɛn zee fʉgha wo fughu aŋ ghùu ghì ghəla ghe bughò tsəghàa nyəā nduw an dzeŋe kə ghì a Kəzə̀.

³A m bùghò Pità ghèe Dzɔ̌n bughòo alebùghò tsəghàa nyə, ù n nɔ̀ɛ ndùw ghee â fəgha ko.

⁴Ghêe Pità n tɔ̀ʼ fwè wə̄n enyə, dzɛ̀ â wən enyəa, “Lɛɛn wò ghaʼ enyə.”

⁵Ù n lɛɛn kɔʼ ghee, waa kwo ko enyəa ghe sô fùghuu nǔ ghee â fəgha ko.

⁶Pità m fwə̀n dzɛ̀ ndùw â wə̄n enyəa, “Ŋ̀ ŋgəmso ki yo kua wo, Ŋ̀ kuuwn fughuu nù ghû â fəgha kə̀là Ŋ̀ ki ghè kò: an zən e Yɛso Kə̀lestò ù Nazalɛ̀t wə̄n, nùghu tee kɔ̀ʼɔ̀ ghù bwii sə nduw.”

⁷Pità n daŋso kwu kɔʼ tûw vʉ aŋ kwè ù zəa wo, tɔ̀m nùghù kɔ̌ʼ wə̄n; fwee e wə̄n zə n daŋso tùghù è tsughu à kəəŋ tə wə̄n to.

⁸Ghəa ù ghàʼ nughù teē wo, bwìi sə è nduw, ù n tsə̀ghà nyə dzəəŋ ndùw an ndughukə̀zə̀ ghèe ghê Pità. Ghəa ù ndǔuw, ù n tɛ̂ɛn bə̀la (ŋkāa, buu ndùw ùfwəŋ) ndùw, bə̀əŋ ndùw Kə̀zə̀.

⁹Ghî ghə̀n à dzə̀m ŋ koʼò ndùw ghəa ù bwìi wo a te bə̀əŋ wò Kə̀zə̀,

¹⁰ghe ŋ kòʼkɛ̀lɛ kɔʼ enyəa à lǒ ghùw wəla ù dòʼn zeē tsəgha an Dzɔ̀dzɔ̀ kə Fǔumbɛ̀ u ndughu è Kə̀zə̀ e nē; dzughu zə n zum ghee am fəgha kəla kə sə a zəŋo tûwbʉ̀ghà vʉ̀.

¹¹A m bùghò ù tsò zwən doʼò kɔʼ a zəŋò Pità ghèe Dzɔ̌n, ghî yì à dzə̀m n nyəŋ zùuŋ wò a vʉ̀a ghee am fala kə Solomòn, bùghò tèe enyə dzəəm.

¹²Pità ŋ kòʼ ghəa yì, dzɛ̀ â ghì yi gho enyəa, “Wo ghî ghə Ezə̀lɛ̂ ghò, kwə̀ən kə̀ ghɛ kɔʼɔ aŋ kwò à? À lǒ kwò ghɛ̀ sô gbeē lɛɛ̄n ghaʼ enyə à tò è so à lò daʼa kaʼā ŋkāa enyəa ghàʼ zɔlɔ nù an sə kə Kəzə̀ e ghəŋlo enyəa ghùw wən nughù bwiī wo a?

¹³ À lǒ Zə̀ kəla Abə̀làhâm àsùghò Aezìk àsùghò Yàkɔ̂b fə̀ kɔʼso tsəgha, tɔɔŋ Zə̀ kə ghê tsele a sɛ̀, kə fughu tsughu kɔ̂ɔ fə wən fo Yɛso â kɔʼso n te mò. Ghɛ̀ ŋ kuuwn nì kɔʼ wə̄n fèe fùghù sə̀ ndùw enyəa ghe wi, tùe màʼà sùghò wə̄n an sə kə Paelɛ̀t, mo Paelɛ̀t maā tsə̂m enyəa ghe zəghàa maʼà wə̄n.

¹⁴Ghɛ̀ m fwə̀n tùe màʼà tsùghu ghùw ù Zɔ̀lɔ, mò ù lò sughò Tsə̄ghātsə̄ghā, kòom dzɛ̀ ndùw enyəa ghe tsʉā zəghàa səā wô ghɛ̀ â ghùw wəla ù wiī ghî ghò.

¹⁵Ghɛ̀ mo enyəa ghe fwəlà ndûw wiī maʼà ndûw Ghùw wəla ù fughuu mughùu zo, Zə̀ kə̀ ŋ kuuwn nì nùghù sə̀ kɔ̀ʼ wò ko wə̄n alo evʉ̄; ghue e ughùe zaʼā e maā ghəa a te gho a dzə̀m a kôʼ yia a dzâa wo êzə̄ŋ.

¹⁶Ghùw wəla ghɛ̀ koʼò wô fɛ, wəla ghɛ̀ mgbaŋ kwo sugho, à fɛ ghəəŋ tsughu boo zəla ù ki an Yɛso vʉ̀a ù tughu dòʼò wo. À lo zən e Yɛso zən, à boo zəla e lo aŋ wə̄n e ghəŋlo vʉ̀a ù tughuu dzɔɔ̄ aŋghəa ghɛ̀ koʼò wô fɛ.

¹⁷Waazə̂ ghò, Ŋ̀ kwo nû enyəa ghɛ̀ mò ghəa ghən mgbəŋ ghəəŋ nû, tò ghəa ghî ghəla ghe lɛnlō â ghɛ̀ mò mgbə̂ŋ ghəə̄ŋ sugho.

¹⁸À lò enyəa fəgha kela ghiīshʉ̀ghà a fə̀ naʼnlo enyəa à fə̀ naʼa naŋa Kəzə̀, enyəa Wɛ̀ ù wən ù tsùʼu kê fǎan nù, ù maā lâŋ kə te ko êzəŋ lueso.

¹⁹À fi lo enyəa ghɛ̀ ki alemàʼà ebo, ghɛ̀ koom fən wo fə̂ŋ tɛʼɛ to a zəŋò Zə̀ kò, tò ù zèe maʼà bòo tɛʼɛ, ù sùuw zɔnso tsughu ghɛ.

²⁰Abugho ghɛ̀ ghəə̄ŋ tsughu êzə̀ Zə̀ kə̀ lo ghəə̄ŋ tsughu kʉ̀ɛɛ kə̀ nyəā wô ghɛ̀, ù tuū wô sughò Kə̀lestò, tɔɔŋ Yɛso wəla ù fə̀ tsuʼ naŋā kɔʼ â ghɛ̀.

²¹Yɛso wən lo ki alekɔʼɔ̄ doʼò alo kəwālā, nəgha e Kəzə̀ è kê telè kpeē tsughu â wən alelūesō tsughu lâŋ kə kətō kə wə̄n kəla ù fə̀ ki tum naʼà wô to â ghǐishʉ̀ghà a wə̄n gho â wǐiwì.

²² Zən lǒ bòʼ ghuūghùe u Musî ù mafə̄ dzɛ̂ enyəa, ‘Kə̀zə̀, Mughù ù te kê nìi sə̌a kɔʼɔ ghùwshʉ̀ghà am bvʉ̄a e waazughù tò Ù fə̀ nî sə kɔʼ mugho. Ghɛ̀ kê kì alebɔ̄ɔm zuuw ko â wən aŋ ghəa ghən à dzə̀m ù dzàa wo â ghɛ̀.

²³E lo bughò doʼò tsughuu sughò, enyəa ghùw wəla ù dòʼkè zuw â ghùwshʉ̀ghà wə̄n, Zə̀ kə̀ lo tsaʼà nughù səā wô wən am bvʉa e ghì a wə̄n, ù dzùuw maʼà tsughu wə̄n.’

²⁴Ghiīshʉ̀ghà à li ghə̀n à dzə̀m ghe fə̀ kə̂aa sughò ghəa gho alenìi tsughu an Sǎmwɛ̀l ndùw â sə ko, ghe fə̀ bɔɔm bugho kəaa ko ghəa ghəla a nîi bala ko an tì kən.

²⁵ Ghɛ̀ fɛ lǒ, ghɛ̀ lo ghî ghəla ghɛ̀ ki alenì fəgha kəla ghiīshʉ̀ghà ghən dzaā, ghɛ̌ yia lô sugho an to kəla Zə̀ kə fə̀ to naŋā â tselè ghê tsùghò, Abə̀làhâm enyəa, ‘Ghe lo bughusô tum wə̀n ù dzə̀m am bàm e wɛ a kətigh ghə̂a.’

²⁶A m bùghò Zə̀ kə̀ shîaa sə kɔʼ kɔ̂ɔ fə wə̄n fo, kə m bùʼ tùm wò dzə̀ wə̄n a vʉ̀a ghɛ̀ enyəa ù bùghò bughuso ghɛ̀, àsùghò enyəa ù bùghò ghəŋlo ghɛ̀ ti kuwnlo aŋ ghəa ghɛʼɛ à biigh gho.”