Read Aghem Kə̀fwàʼ 5 Bible Online

Kə̀fwàʼ 5 - Aghem bible

Kə̀fwàʼ 5

¹Tûwbʉ̀ghà ù lì zən e wən e fə̀ lo Ànànîas ŋ kuūwn kə̀a fèe tsùghù luʼū fə ghee fə̀ li fo ghèe wì ù wə̄n, Sàfilà,

²ghèe wən n tsɔŋ sanlo è tsughu, ghe m gbò nàŋa tsughu kə̂m kə ukʉ̄a, nì kɔ̀ʼ kə kə̂m, bùghò fùghù wò â tum tə Kə̀lestò tò.

³Pità m bvʉ â wə̄n enyəa, “Ànànîas, à lǒ kwò ghù boō tsughu enyəa Satàn nɔɔ̄ fughuu tsughu ghù enyəa ghù gbo naŋa nduw kə̂m kə ukʉa aŋ kua wəla ghù fèe tsughu luʼu kə̂a ko a te, ghù bugho kaʼn wo ghā gho â Zuʼ tə̀ Zɔlɔ to a?

⁴Tò ghù è bughò fêe luʼū kə te ko, à lǒ mò a mò yò kə̂a kò à? A m bùghò ghù fèe tsughu, kua u te wə n yo ù wʉ̂a wò à? À lǒ kwò ghù ki ŋgòʼ è mòʼn zəla am fə̂ŋ zə̀ghà a? Ghù kà gha ghən kaʼn dzə̀ â ghì ghò, ghù kàʼn ndùw â Zə̀ kò.”

⁵Ghəa Ànànîas zuw tsughu shwaʼ wə̄n, ù m bvʉ̀ wò à ghueetsə̄, kpùw è nduw. Ghùw wəla ù fə̀ zuw dzə̂ ghəa a te gho mo è tsəŋ.

⁶Ghâŋ fə̀ nûu fən m bùghò nyəm kɔʼ gwən e wə̄n alo təndzʉ̄, bòʼò nùghù sə̀ ndùw tsə̀la è nduw.

⁷Tàm tə ezuw tə n tsə̀ghà tsùghu tò təgha enyə, wi, tɔɔŋ Safilà n ndùw tsə̀ghà nyə̀ è wo mò ù kwò dzə yo ghəa yia a lo mo ghə n sə a zəŋo nùm.

⁸Pità m bvʉ̀ ndùw wən enyəa, “Dzǎa wò â mùghò, à lò enyəa wən mìaa kua wəla ghɛ̀ à nùm wʉ̂a mò fêe tsughu luʼū ko a te a?” Ù mo enyəa. “Òo, vʉ̀ mò lo kua u te wo.”

⁹Pità fi daŋso dzɛ̀ nù â wə̄n enyəa, “Zən lò è ghɛ zo, ghɛ̀ sô ndôʼ doʼò tsughu, dzɛ̀ tsùghù enyəa ghɛ̀ mɔm koʼ Zuʼ tə Mughu ù te to a? Kòʼô, ghî ghəla ghe ndûw tsəlā num wʉ̂a êzəŋ e bughōo nû, ghe sô ghù boʼn sə̌a sùghò nù.”

¹⁰Nughò vʉ n fi daŋso nùghù bvʉ̀ kpùw wò sùghò nù a tsəlà wə̄n. A m bùghò wɛ à nûu yi bugho, ghe m bùghò kòʼ wò mò ù m kpuw, ghe m bòʼò nùghù sə̀ ndùw â wən, ndùw tsə̀la naŋa tsughu am bùghu e num.

¹¹Fə̀ŋ m biso sə tsughu ghî ghə̀n à dzə̀m ghe boō fughu tsughu â Kə̀lestò, àsùghò ghì ghə̀n à dzə̀m ghe fə̀ zuw ghəa a te gho.

¹²Tum tə Kə̀lestò tə̀ n dè sə̀so tsughu ndə̀mà tə nsə̀ghàa enyə â ghì a te gho. Ghî ghəla ghe boō fughu tsughu n dzeŋe lò tsəgha ko alo fə̀tùʼù am fala kə Solomòn.

¹³Ghùw, aŋ ghì à li ghəla ghe mò tɔʼkè boo fughu â Kə̀lestò ka mo tso lɛɛn ghəŋlo enyəa e se təmādzə̄əŋ ghee, mgbaŋa kuūwn kɛɛ kaaŋ ko ghee.

¹⁴Ndə̀mà tə aghì tə̀ m fəghaan boom fughuu ndùw â Mughu ù te təmādzəə̄ŋ ndùw ghee tsə̀ghàsə̀ sûesʉ — ayîzən àsùghò yìnû ghò.

¹⁵Ghee à li ghə m buʼù bòʼn nǎaŋ sə̄a wò ghìidzaāŋ gho alo nchìa àsùghò alo ŋghàm an dziī enyəa mo Pità tsə̀ghàa nù zəŋsō kə wə̄n kə m mɔ̀m dàŋ tsə̀ghà ghee.

¹⁶Ndə̀mà tə aghì tə̀ n nughùun wò nàʼà tə beē to luu nyəa wò an Yɛ̀lusalɛ̀m, nìi nyə̌a wò ghìidzaŋā gho à ghəlà zʉ̀ ù biigh u fughuu ghee â tsù wò, ghe m baaŋ tsughu ghee enyə à dzə̀m.

¹⁷Tuw kə fɔ̀e ghèe ghê ghì ghə̀n à dzə̀m ghèe ghee mò lo a dzə̀m (tɔ̂ɔŋ dzeŋe kə tə̀ Sadùwsîi) n daŋso kàʼ ndùw aleghòʼ. Mʉ̌ʉn kə ŋ ghəəŋ tsughu ghee,

¹⁸ghe ŋ kwū kɔʼ tətum, dzə̀n ndùw ghee an ndùghùtsāʼ.

¹⁹A m bùghò â tsuʼ wo tsə̀ndə̄ghā è Mughu ù te m bùghò tsʉ̌ʉn tsughu bwâʼ u ndùghùtsāʼ nì sə̀ wò ghee, sə̀ dzɛ̀ tsùghù â ghee enyəa,

²⁰“Ndǔw tee kɔʼ nlò an Ndughene è Kə̀zə̀, ghɛ̀ buʼ tsughu kəaa nduw shwaʼ u mbì è fùghù zən u dzə̀m â ghì a te gho.”

²¹A m bùghò ghe zuw tsughu shwaʼ wə̄n, ghe m bwə̀n ndùw nyə̀ ndùw an Ndughene â zùwzùw kə utsūʼ ko, ndùw dàŋso ko â sə ko â ghì zoʼn gho. A m bùghò Tuw kə fɔ̀e kə̀ ndûw bugho ghèe ghê ghì a wə̄n gho, ghe tɔŋɔ̄ tsughu kaŋsì à tsoʼ tən tə̀ dzə̀m an Ezə̀lɛ̂, ghe n tùm ndùw àghì an ndùghùtsaʼ enyəa ghe ndûw nîi wô ghê Pità.

²²Gwè tə tɔ̄ʼ ti mo e ndûuw fughu, kè kôʼ ghee fughu an ndùghùtsāʼ. Ghe fi nughù wò nù ebàm, bùghò nàʼà wò enyəa,

²³“A ndûw kòʼ ndùw mò ndùghùtsaʼ bɔɔm nyōʼn fè dòʼò dzɔ̀ ko nù, ghîichiīn yia a bɔɔm ti kaāŋ sugho am fuū e təndughu e te zo. Yia a so e kuuwn tsʉ̄a nyəa ndùw fuū e təndughu e te zo, kè kôʼ ghǔw fughu à tèetè.”

²⁴A m bùghò ghùwne ù gbè tə tɔ̄ʼ zuw tsughu ghəa yì ghèe ghê fɔ̀e tə̀ tughu to, kwə̀ən kə̀ ŋ kɔʼ ghee, tuw kə m kpuuw ghee enyəa à sò yia tsə̀ghàa kə̀ kwo.

²⁵Ghùw ù lì n daŋso ndùw è bugho, bùghò nàʼà wò enyəa, “Ghɛ̀ ghɛ à, ghî ghə̀là ghɛ̀ mò dzə̂n naŋā an ndùghùtsaʼ ti an ndūghēnē, zoʼnlo àghì!”

²⁶Ghùwne ù te n daŋso nùghù tsùghu ghèe ghê gwè tə tɔ̄ʼ to, ndùw nì wò ghee, mò à kǔuwn yò dzə̂ alo esə̀ŋ, ghe màʼà tsəŋō enyəa ghî à lô təə̄m ghee alo atīa.

²⁷A m bùghò ghe bughò â ghee, ghe n nì tìso naŋa sə̀ wò ghee an sə kə kaŋsì. Tuw kə fɔ̀e kə̀ m bvʉ̄ʉn ghee â ghəa gho,

²⁸â ghee enyəa, “A mò tɔʼ kʉɛ̄ɛn tsughu ghɛ enyəa e kwo ghɛ̀ lô zoʼn ghî ghò aŋ ghəa a tûw wə̀n, ghɛ̌ yəa tsʉ̂ ghî ghò, tsʉ̂ zɛʼɛ zə e ndza tsughu Yɛ̀lusalɛ̀m e dzə̀m, ghɛ̀ yia ndôʼ tsə̂m tsughu sughò aledzəso ghàʼ am vʉ e tûw wə̄n.”

²⁹Pità ghèe ghê tum tə̀ li ti m fə̄ŋsō bɛ̀lɛ̀ tsùghu ghee enyəa, “Ghàʼ ki alebɔ̄ɔm zuuw ko â Zə̀ kò, à yò dzə̂ â làŋ kə ghûw ù lì kò.

³⁰Zə̀ kə ghê tselè a sɛ̀ kə̀ mò nî nughu kɔʼ Yɛso alo evʉ̄, mò ghɛ̀ ŋ wən wi mò ghɛ̌ wən təghàa kɔ̀ʼ alo kədàŋlo.

³¹Zə̀ kə̌ wə̄n kɔʼso naŋa kɔʼ aŋ kwe u wə̄n ù təma wo tò kətuw à Bəghambī enyəa ù lò kpɛʼɛ̄ ghəŋlo ghî ghə Ezə̀lɛ̂ à maʼà ghəa a ghee a biigh gho tò Zə̀ kə̀ ghuūw maʼà bòo tə ghee.

³²Ghàʼ fɛ ti aleteso dzaā wo ghəa ghən, ghàʼ à ghê Zuʼ tə Kəzə̀ tə̀là ù fughuu â ghì ghəla ghe boō tsughu â wə̄n.”

³³A m bùghò ghe zuw tsughu ghəa ghən, ghe n sàʼsò mìasò ndùw èghue enyə, ləghaa alewī ghee.

³⁴Ghùw ù Falàsîi ù lì a fughu aŋ kaŋsì ghe fə̀ tɔŋlo enyəa à lô Gàmalìɛ, mò à lò sugho dèekə̀làŋ, ghùw mo ghî a te gho a dzə̀m tsə̀ŋo wə̄n; ù n nùghù těe è kɔʼ, fughu tsughu kəlâŋ enyəa ghî a te a kə̂aa naŋa səā ndûw ghê Pità a beē.

³⁵Ù n daŋso dzɛ̀ â ghee enyəa, “Wo ghî ghə Ezə̀lɛ̂ ghò, tɔ̀ʼɔ mǒʼn tsughu nlò fəgha kəla ghɛ̀ ləghaa aleghəŋlo â ghì ghən,

³⁶tɔŋlo enyəa a fə̀ bugho fɛ an tì kə̀ li ko Tǐodàs n nùghù kɔ̀ʼ fɛ dzàa wò enyəa e lo sugho ghùw ù lì, bɔm tə aghì tə̀ n tsə̀ghà tə̀ŋò ndùw a bǎà wə̄n tò təchìakò. Ghe ŋ wi tsughu wə̄n, dzùm sàaŋ màʼà kɔ̀ʼ ghî ghə̀n à dzə̀m ghe mò tsəghà təŋò doʼò nduw a bǎà wə̄n, dzeŋe kə wə̄n kə te kə m kpùw è nduw.

³⁷Dzudàs, ghùw ù Galèlîi wə̄n, m bùghò nùghù sə̀ kɔ̀ʼ sùghò a bǎà wə̄n, tî kəla ghe lô taŋā ghî ghò fɛ, sè nùghù ndùw sùghò də̀ŋò kə àghì kə̀ li ko a bǎà wə̄n; ghe ŋ wì sùghò wə̄n, dzùm sàaŋ màʼà kɔ̀ʼ sùghò ghì ghə̀n à dzə̀m ghe mò tsəghà təŋò nduw a bǎà wə̄n.

³⁸Yia bugho alo ŋ ghə̀n êzə̄ŋ, Ǹ so Ǹ tsʉ̂a wô ghɛ̀: nǐi nùghu nlò sə zo a zəŋò ghì ghən, ghɛ̀ zəghaa maʼa ghee; tɔŋlo enyəa abugho e lo enyəa à lǒ ghùw nsɔ̌ɔŋnchùw ù ge tsughu ghəa zən, e lo bvʉ̀a nù.

³⁹Mò à lò enyəa à ghee â daʼa kə fughu Kəzə̀, ghɛ̀ lo tsò yò dzɛ̂ alebughū naŋa ghee. To ghɛ̀ lo bən būʼ būghō koʼ tsughu enyəa ghɛ̀ bəla būu kə̀ŋgè ghɛ̀ à ghê Zə̀ kò!” Ghe n zuw tsughu tsʉ̂ e Gàmalìa.

⁴⁰A m bùghò ghe daŋso tɔŋɔ̄ nyə wo tum tə te to, ghe n tsɔʼ tsughu ghee alo təkwùu, fughu tsughu ghee â làŋ kò enyəa e kwo ghe e kôom kə̂aa kôʼ èghəa kùu ndùw zən e Yɛso, daŋso zə̀ghàa màʼà tsùghu ghee.

⁴¹Ghəa ghe zəghaà tsughu ndùghù Kaŋsì, ghe n duʼnlo enyəa Zə̀ kə̀ mâa ghee nî tò kəfəgha aleghəə̄ŋ tsughu enyəa ghe fala aŋ ghùu tuw kə̀ dəla ko aŋ ghəa e Yɛso zən.

⁴²Ghe ŋ kè tsoō bughū naŋā kôʼ alekəā zēe an ndughene àsùghò ndùghù tə̀ndughu enyəa Yɛso lò Wɛ̀ ù tsùʼu.