Read Aghem Kə̀fwàʼ 6 Bible Online

Kə̀fwàʼ 6 - Aghem bible

Kə̀fwàʼ 6

¹Ghəa kɔ̂n kə tsə̀təndə̄ghā tə Yɛso kə̀ dûuw wo, Dzûu təla tə mò kə̂aa shwaʼ u Gə̀lêk wò n tàm ndùw Tə̀dzûu təla ghe mò kə̂aa shwaʼ u Hebə̀lù wò an shwaʼ bòʼ ghe mò baā ukpiī am fʉ̀ghàzəa wəla ghe mò dzughùu fughuu tsəgha â yiikpūw gho alo fətsūʼ.

²Tum tì èghəm à ghè tò tə bə̀ghà n tɔŋɔ naŋa tsughu ghî ghə̀n à dzə̀m ghe mò lo mo ghe m boo fughu â Kə̀lestò, dzɛ̀ â ghee enyəa, “À yò dzə̂ ghəa è dzûŋ zò alebàʼà naŋā kɔʼ alekə̀aa shwaʼ u Kəzə̀, a kôom nughù təŋò doʼò ndûw aŋ ghəa fʉ̀ghàzəa.

³Waazə̂ ghaŋa gho, ghɛ̀ tsɔʼ sə wò nlò ghî ghǒ sə̀ghàmbəgha am bvʉa zɛʼɛ, ghî ghəla ghɛ̀ kwo enyəa ghe tɔ̂ʼ tì nû, tɔ̀ʼɔ̀ tɔ̌ɔ sùghò, ki sugho Zuʼ tə Kəzə̀, a lô alenaŋā tsughu ghee am fwàʼ kən,

⁴ghàʼ, am bà kaʼa, a kuūwn doʼò təla tsughuu ko alegɔ̀ŋlò, ghàʼ e zoʼn nduw sugho ghî ghò an shwaʼ u te wo.”

⁵Fə̂ŋ tə ghee yìa à dzə̀m tə̀ n zɔ̀n ndùw ènyə am fəgha kəla ghe dzɛ̂ tsughu; ghe n tsɔʼ kɔʼ Sìtəfɛ̀, ghùw mò ù bǒo fùghù bùʼ nù, ki sugho Zuʼ tə̀ Zɔlɔ to, ghèe Felêp, àsùghò Pə̀lokolùs, àsùghò Nìkanò, àsùghò Timòn, àsùghò Palmɛ̄nàs àsùghò Nikɔ̀lɔ̂s tɔɔŋ ghùw ù Antìok ù fə̀n doʼò wô Dzûu.

⁶Ghe n nì tìso naŋa sə̀ wò ghì ghən an sə kə tum tì, tum ti tə ŋ gaʼ n naŋa ndùw àghu a zəŋò ghee, gɔ̀ŋlò è tsughu.

⁷Shwaʼ u Kəzə̀ wə̀ n ndûuw ndûuŋ ko â sə ko; kɔ̂n kə aghì kəla ghe mò boō fughu tsughu, kə m biso dùw tsùghù ènyə an Yɛ̀lusalɛ̀m, ndə̀mà tə tə̀fɔ̀e tə̀ m boo tsughu aŋ Kə̀lestò.

⁸Sìtofɛ̀ mò lo ghùw mò ù kì bughuso e Kəzə̀ a zəŋò wə̄n ndə̀m, ki kədaʼa kə ŋ ghəŋlo è tsughu ù n dè sə̀so tsughu nsəghàa ènyə â ghì yì.

⁹Ghî à li gho ghe mò lô ghî ghò aŋ ghì a Sàŋ è tə̀ Fə̀lɛ̂dmɛ̂n (aŋ ghəa ghe mò tɔŋlo a te), n daŋso nùghù těe è kɔʼ, kàʼ nyə̀ ndùw fom tə̀ baaŋ to ghèeghê Sìtofɛ̀. Ghən mò lo aghî ghe sə wo an Sìlɛ̂n, àsùghò an Alɛ̀ʼzandà, an Sìlesìa asùghò an Ɛshìa.

¹⁰Ghe ŋ kuūwn ghà kè alebàan ghèe ghê Sìto an tɔ àsùghò an daʼa kə Zùʼ tə̀ Zɔlɔ kəla ù mò kə̂aa ghəa gho a te.

¹¹Ghe n daŋso tsɔŋ tsuʼ kaaŋ wò ghì à li gho enyəa ghe e dzaā tsughuu enyəa, “Ghǎʼ mò zuw ù təghaso kə̂aa boōn ghəa a Musî ghò àsùghò a Kəzə̀ ghò”

¹²Ghe n tsùʼ sòʼ kɔ̀ʼ aghî, tsuʼ sòʼ kɔ̀ʼ tətsōʼ à ghǐimwàʼsò ghò; ghe n daŋso nùghù bàʼn kwu kɔʼ Sìtofɛ̀, nì wò wən aŋ kaŋsì.

¹³Ghe n nì nàŋa wò təbvʉ̂nɔ̄ʼ enyəa ghe ŋgaām bughò dzâa wô enyəa, “Tûw wən kaān tsō dòʼò kòʼ mò ù kə̀aa bǒon yo ghəa a Ndùghù è Kə̀zə̀ e ne zən àsùghò làŋ kə Musî kò,

¹⁴nu ghàʼ maā zuw ù kə̀aa enyəa Yɛso ghùw Nazalɛ̀t wən lo sàʼà màʼn tsùghûu Ndùghù è Kə̀zə̀ e ne, ù kuūwn kɔʼ ghəa ghə enaʼ a sɛ̀ ghəla Musî fə̀ fughu naŋā â sɛ̀.”

¹⁵Ghî ghə̀n à dzə̀m ghe mò lo a fughu aŋ kaŋsì n tɔ̀ʼ fwè wən enyə, kòʼ tsùghù enyəa sʉ u wən u nyəghaan ko tò sʉ u tsə̀ndə̄ghā è Kə̀zə̀.