Read Aghem Kə̀fwàʼ 8 Bible Online

Kə̀fwàʼ 8 - Aghem bible

Kə̀fwàʼ 8

¹Aŋghəa ghe dəmā ghèe ghê Sìtofɛ̀ êzə̀, Sôol m boo fùghù ndùw enyəa ghe nyɔ̂ʼ fwàʼ nù alewī Sìtofɛ̀. Ghe n nùghù kɔ̀ʼ an tsuʼ u te wo, ndzaŋso səso tsughu dzeŋe kə ghì a Kəzə̀ an Yɛ̀lusalɛ̀m ènyə, ghî ghə̀n à dzə̀m n nùghù sɛ̀ɛ tìnlo è tsughu, ndza tsughu mbùʼ è Dzùdîa edzə̀m, à Sàmalìa, à n dòʼòdòʼò tsughu kô tum.

²Ghî ghəla ghe fə̀ lo mo ghe n zə zo aŋ ghəa e Kəzə̀ m bòʼò tsə̀la tsughu Sìtofɛ̀, dì tsɔ̌ʼn tsughu enyə.

³Sôol ŋ kuūwn lò ko fi aleshùaʼ ghì à Kəzə̀, nyəaa ndùw ndùghù tə̀ndùghù; kwuu sèe sə̌aa wò àghìnûu à ghìzən gho, ndùw fèe nǎaŋ ndùw an ndùghùtsāʼ.

⁴Ezə̀ŋ, ghî ghəla ghe mo sɛ̂ɛ nùghù kaāŋ nduw ŋ ŋgəaa ndùw nàʼà tə̀nàʼà, nàʼn ndùw làbəlà è te.

⁵Felêp n nùghù tsùghù ndùw an naʼ e Sàmalìa, nàʼà làbəlà è Kə̀lestò fughu â ghì a te gho.

⁶Ghî ghə̀ ŋ koʼò tsùghûu tsə̌a tia Felêp dèe tsughuu, ghe ŋ ki kaaŋ nduw ko eghɛ̂ ènyə alezə̂ən shwaʼ u wə̄n.

⁷Zʉ̀ ù biigh wə n səa nùghùun wò a zəŋò ghì ghò mo u dîin sə̌a wò nù. Ù m baaŋ kɔ̀ʼ ndə̀m è ghì à li ghəla ghe mò lô ùŋgwûndughu àsùghò bvuʼ wo.

⁸Naʼe te zə n noʼò ènyə ghe duʼnlō.

⁹Ezə̄ŋ, tûwbʉ̀ghà ù lǐ n lo tsəgha fughu alo enaʼ ghe mò tɔŋlo enyəa à lò Sǎemòn, mò ù tsòo ghə̌əŋ tsə̀ghà kô ghəa à fəən gho fughu alo kə ghā. Ù ŋ ghəŋlo dzughu zə n zûu ghì a Sàmalìa, dzàa tsə̀ghà enyəa e kɔʼ kpē nû.

¹⁰Ghî ghə̀n à dzə̀m fughu alo enaʼ — à tughoo gho àsùghò à səŋò ghò, ghe m bɔɔm zūuw ndùw ko â tûwbʉ̀ghà vʉ̀. Ghe n dzâa tsə̀ghà enyəa, “Bəghà wən lo daʼa kə Kəzə̀ kəla ghe tɔŋlo enyəa à lò Kɔʼlèŋguʼ.”

¹¹Ghe mò â wən êzə zuuw nduw ù màʼà ŋge ghəŋlo dzughu zə mgbɛɛ zūu tsə̀ghà ghee an də̀ghàa kə kəgha am fənlo e wə̄n.

¹²A m bùghò ghe kôom bughò boō fughu ndûw â Felêp, wəla ù mò naʼn wo tùm è Fɔ̀e u Kəzə̀ è dzùŋ, kə̀aa wò sùghò ghəa Yɛso Kə̀lestò, ghe fughu tsughu ghee enyə â mùghù ŋ Kə̀zə̀ mò — ayînû àsùghò yìzən gho.

¹³Ghuūghùe u Sǎemòn wə̀ n tso boo fughu daŋso èsugho. A m bùghò ghe fughu tsughu wə̄n â mùghù ŋ Kə̀zə̀ mò, ù m mughu zee ko am bùghu e Felêp, dzughu zə n zùm ndùw wən enyə abugho ù kòʼ fɛ̀ɛn tə aghəa tə ushʉ̀ghà tə nîi bəla ko.

¹⁴Ghəa tum tən an Yɛ̀lusalɛ̀m zuw tsughu enyəa Sàmalìa m boo shwaʼ u Kəzə̀ wò, ghe n tùm tsùghù ndùw Pìta ghèe Dzɔ̌n fughu.

¹⁵Ghee a te gho a bə̀ghà n tsùghù ndùw fughu, gɔ̀ŋlò an tuw u ghee enyəa to Zùʼ tə̀ Zɔlɔ tə mô nyəā tsughu a zəŋò ghee.

¹⁶Mbuu à mò naam lo mò zuʼ u te u kaām kāan nyəa a zəŋo ghùw ù ghee ù u mɔ̂ʼ; mo ghe ghee fughu tsughu ko ghee â mùghù ŋ Kə̀zə̀ mò an zən e Mughubè Yɛso.

¹⁷Pità ghèe Dzɔ̌n n ndùw gàʼn ndùw àghu an tuw u ghee, Zuʼ tə̀ Zɔlɔ tə n nyəa tsughuu ghee a zəŋo e eghùe.

¹⁸Ghəa Sǎemòn kòʼ tsughu enyəa tum tə ghùw mɔ̂ɔ tsùghuu ko aŋ ghu, ù ŋ kele kɔʼ Zuʼ tə̀ Zɔlɔ to, ù n dzə̀ wò ùkua,

¹⁹â ghee enyəa, “Fughu sùghò nlò mugho â daʼa kən, mùghò è bɔŋɔ gaʼa nduw sugho ghu ko a zəŋò ghùw, ù ŋ kele kɔ̀ʼ sùghò Zuʼ tə̀ Zɔlɔ to.”

²⁰Pità n dzɛ̀ â wən enyəa, “Ghù fə̄m ghàa kua wʉ̀a wò, ghəa ghù mòʼò enyəa ghù lò alenì ùkua ghù zue namso kə Kəzə̀ kò a te!

²¹Ghù tso ki yo ghu ko aŋ ghəa ghən, mbuu fə̀ŋ zə̀ghà dzə̌a nù an sə kə Kəzə̀.

²²Ghù fi ki alemàʼà tsughu bòobò tə aghəa təghà tə te to, ghù gɔɔŋ nduw â Mughu u te enyəa bugho dzì lǒ ù ghuūw maʼà ndûw bòobò kə eghəa kəla ghù mò moʼō ghè kò am fə̂ŋ.

²³Ŋ̀ kôʼ tsùghù enyəa ghù vʉ ŋge ki kəmʉ̀nlo, ghù vʉ̀a ù lò sugho am fàŋà kə ghəa à biigh ko.”

²⁴Sǎemòn m bɛ̀lɛ̀ ndùw enyəa, “Gɔ̌ɔŋ fughu ndǔw nlò â mùghò â Mùghu ù te, to ghəa ghə̀là ghɛ̀ kə̂a tsughu lò kwuū mugho.”

²⁵Ezə̄ŋ ghəa Pità ghèe Dzɔ̌n teso dzɛ̂ tsughu ghəa a Mughu ù te gho, ghe n nùghù tsùghù a lùʼù kwəlā wo ebàm an Yɛ̀lusalɛ̀m, nàʼà kwən tsughu ko tùm è dzùŋ è te dzîidziī enyə an ndə̀mà tə nàʼà mə̀là n lò a tsəlà Sàmalìa.

²⁶Tsə̀ndə̄ghā è Mughù ù te fi daŋso bùghò dzɛ̀ nù â Felêp enyəa, “Nùghu kɔʼɔ̀ ghù tsughu nduw am gbà u emàm wò an dziī zəla è nùghù tsughu aŋ Yɛ̀lusalɛ̀m, tsə̀ghàa nyə̌a ndùw aŋ ŋgwə̄n, tsughuu ndùw aŋ Gazà.”

²⁷Felêp fi nughù nùghù ndùw nù. Êzə̀ŋ, ghùwkǎa ù Ètǐopìa ù lì ù mò ù kwuū Nàʼtùm ù Ètǐopìa kò, n tsəghàa dzì a fughu. Tûw wən mò bugho alebùghò kɔʼso Kə̀zə̀ an Yɛ̀lusalɛ̀m,

²⁸ù n sô kwə̀la nyəa ndùw èbàm aŋ nwaŋ u kəkə̀anyòm u wə̄n, tɔɔŋ ndùw mwàʼsò kə ghûwshʉ̀ghà ù Kə̀zə̀ Èzayà.

²⁹Zuʼ tə̀ Zɔlɔ ti tə n dzɛ̀ â Felêp enyəa, “Dzǔu kwuun ndùw nwaŋ u kəkə̀anyòm ù vʉ̂ ghɛ̀ è kuʼū bwiī nduw.”

³⁰Felêp fi nyəŋ kəŋo ndùw nù, zùw ndùw mo tûw vʉ vʉ̀a ù tɔɔ̄ŋ mwàʼsò kə ghùwshʉ̀ghà Èzayà kò, ù m bvʉ â wən enyəa, “Ghù zǔuwkɛ̄lɛ̄ to nù fəgha kə̀là ghù tɔŋlo a?”

³¹Tûw vʉ m bɛ̀lɛ̀ tsùghù enyəa, “Ǹ sô lò ênzə̂n alezuūwkɛlɛ mò ghùw kà â mùghò teso dzɛ̀ wǒ a?” Ù n daŋso tɔŋɔ tsughu Felêp enyəa ù nyəā kɔʼɔ̄ doʼò tsughu am bùghu e wə̄n.

³² Dəŋò kə tùm è dzùŋ kə̀là ù fə tɔŋlo fə̀ lo kən; “Ù kʉ̌ɛɛ kèe yò tǒ ndzì zəla ghe sê ndûw alo etīa alendùw wi, ŋkāa tò tsʉ u ndzì wəla u zuūw təla ko mɔŋ a vʉ̀a ghùw wəla ù kɔɔ̄ nyûŋ tə wə̄n to.

³³Ghe n tue tsughu alenyɔ̀ʼɔ̀ sāʼ wən kədzûŋ, də̀nsò tsùghù tuw kə wə̄n. À lò ndugho aletesô wɛ a wə̀n à; tɔŋlo enyəa ghe n tuw kə wə̄n kə nî nùghù am mbī.”

³⁴Kɛ̀ chi m bvʉ â Felêp enyəa, “Mò à, ghùwshʉ̀ghà wən ghəa ghən kə̂aa ghəa a ndugho gho? À lò a ghùe a wə̄n gho ŋkāa a ghûw nùghù ghǒ a?”

³⁵Felêp fi kaʼ tsughu nû ghəa à kəaa gho; nì nùghù tsùghù an də̀ŋò kə̀là ghùw vʉ mò tɔŋlo, dzɛ̀ kɔ̀ʼ ndùw tùm è Yɛso è dzùŋ zə̀.

³⁶Felêp n daŋso dzɛ̀ â wə̄n enyəa, “Abugho ghù boō tsughu dzə̂ aŋ am fə̂ŋ zə̀ghà e dzə̀m, a lo nû alefughu ghû â mùghù ŋ Kə̀zə̀ mò êzə̄ŋ.” Ù m bɛ̀lɛ̀ tsùghù enyəa, “Mùghò m boo enyəa Yɛso lǒ Wɛ ù Kə̀zə̀.”

³⁷Aŋghəa ghe bwîi nduw an dziī, ghe n ndùw kòʼ tsùghu dzùghù è lì; kɛ̀ chi n daŋso dzɛ̀ tsùghù enyəa, “Àhâ kòʼô, dzùghùu zə̀n à! À tùghûu kwò Ǹ sô yô alenì mùghù ŋ Kə̀zə̌ a?”

³⁸Ù m fughu tsughu kəlâŋ enyəa nwaŋ u tee, ghèe Felêp n nyə̀ tsùghù ndùw fughu an ndzughù, Felêp m fughu tsughu wə̄n â mùghù ŋ Kə̀zə̀ mò.

³⁹A m bùghò ghe sə kɔʼ wo fughu an dzughù, Zuʼ kə Mughu ù te kə n vùuŋ tsù nì nùghù kɔ̀ʼ Felêp, kɛ̀ chi kə ŋ kè kôom kôʼ wə̄n, kə n tsò dǔʼn nùghù dàŋso ndùw ko e wə̄n zo.

⁴⁰Felêp n tɛ̀tsə̀n ko mò ù sò lò an Azotùws mò ù sò nàʼn ndùw Làbəlà è dzùŋ zən naʼà tə̀nàʼà, tsə̀ghàa dàŋso ndùw, nàʼà ndùw tɛ̀ ndùw aŋ Kàesalìa.