Read Aghem Lumà 1 Bible Online

Lumà 1 - Aghem bible

Lumà 1

¹À mwàʼsò kən kə tɔɔ wò mùghò Pôl kɔ̂ɔ fə Yɛso Kə̀lestò, à mo mugho shiāa kɔʼ Kəzə̀ enyəa Ǹ doʼò tum è Kə̀lestò Yɛso alezùghò Làbəlà e dzùŋ e wə̄n.

²Làbəlà e dzùŋ zən lo zəla Zə̀ kə fə̀ ki to naŋā â ghì a wə̄n gho, mò ù tum nàʼà wò â ghǐisʉghà a wə̄n gho, tò aŋghəa ghe tɔm naŋa am mwàʼsò kə Kəzə̀.

³Làbəlà e dzùŋ zən teso dzàa ghəa a Wɛ ù wə̄n, Yɛso Kə̀lestò Mughùbè u sɛ̀, ù fə̀ sə wo an tigh kə Dɛvìd.

⁴Zə m bùghò dè tsughu enyəa ù lo Wɛ ù Kə̀zə̀ aŋghəa Zə̀ kə fə̀ zôm nughù kɔʼ wə̄n alo evʉ̄ an daʼa kə Zuʼ tə̀ Zɔlɔ to.

⁵À lò am bàm e wə̄n Zə̀ kə̀ mò dê mughò â dzɔ̀ e wə̄n zo, nì kɔ̀ʼ mugho an tum e wə̄n aŋ ghəa e Kə̀lestò, aleghəŋlo enyəa aghî an nàʼa ten tə dzə̀m,[1] am mbī mô boo fughuu ndûw â Kə̀lestò, ghe e zuuw sugho â wə̄n.

⁶Ghɛ̀ lo sugho aŋ kɔ̀n kə ghì ghəla Zə̀ kə̀ lo mo kə n tɔŋɔ nùghù sə̀ wo enyəa ghe doʼò ghî a Yɛso Kə̀lestò.

⁷Mwàʼsò kən kə tɔɔ wò â ghɛ̀ yì a dzə̀m a fi am mbùʼ è Lumà Zə̀ kə̀ ləghaa, tsɔʼ kɔʼ ghɛ enyəa ghɛ̀ doʼo ghî a wə̄n gho. Ŋ̀ gɔ̂ŋlò enyəa to Kə̀zə̀, Tsele ù sɛ̀ ghèe Mughu ù te Yɛso Kə̀lestò mò dê ghɛ̀ â dzɔ̀ zò, ghe fughuu sugho ghɛ̀ â bughuun zo.

⁸Alekaʼa nùghu tsughu, M̀ fughuu kə̀zɔ̀ŋlò â Zə̀ kaŋa kò am bàm e Yɛso Kə̀lestò an tuw wɛʼɛ u dzə̀m, enyəa mbī e dzə̀m fɛ zuuwkɛlɛ mɛʼn wò nù enyəa ghɛ̀ m boo fughu â Kə̀lestò.

⁹Zə̀ kə̀ kwo nû enyəa ghəa ghəla a dzâa wò fɛ lò êsəŋò — Zə̀ kə̀là Ŋ̀ kɔʼso am fə̂ŋ zaŋa e dzə̀m aŋghəa Ǹ naʼn làbəlà e wə̄n e dzùŋ zən kùu ndùw Wɛ ù wə̄n, Kə kwò nû enyəa M̀ moʼn zěe nù ghɛ aŋ gɔ̀ɔŋ zaŋa nəgha tən tə dzə̀m.

¹⁰Yìa Ŋ̀ gɔ̂ɔŋ zeē sughò enyəa to Zə̀ kə̀ mò ghəəŋ tsughu enyəa Ŋ̀ ŋgəmso bughò tɛ̂ fi a vʉ̀a ghɛ̀.

¹¹M̀ mbûŋlò alekòʼò wô ko ghɛ̀ alo esə̄ tò mùghò è lo aleghəŋlo Zuʼ tə Kəzə̀ tə fughu ghɛ â fughu kə nə̀ŋò ŋəŋ ko, fə̂ŋ tɛʼɛ tə nɛɛ̄ tsughu aŋ ghəa e Mughu ù te.

¹²Zə enyə lo enyəa to sɛ̀ a dzə̀m mò lò aleyòso ghue e sɛ aleghəŋlo enyəa sɛ̀ è nomlo am boo e sɛ â Zə̀ kò.

¹³ Waazə̂ ghaŋa gho, Ǹ ləghaa enyəa ghɛ̀ kele tsughu enyəa à lò ndə̀mà tə tə̀nə̀gha M̀ moʼn tsughu alebùghò bwîin kôʼ ghɛ̀, ghəa è li zo n tsò ndùw bùghò ko enyə bùghò tə̀ghàso màʼà è tsughu. Bughò zaŋa a fi lo enyəa to M̀ mô lò alenìi nyəa wò ghì a fughu gho am bvʉa zɛʼɛ tò aŋghəa mùgho mò ghəŋlo â Tòʼò è li e zə̂.

¹⁴Fwaʼ kaŋa kə lo alenaʼn Làbəlà è dzùŋ zən â ghì ghò a dzə̀m, e ki dzə yo ghəa è li zo aleghəŋlo â ghì ghəla sə a ghee a lo mo ghə n tsʉ ŋkāa a kaām tsʉ, ŋkāa â ghì ghəla ghe kwo mwàʼsò kò ŋkāa ghe kwo yo.

¹⁵Zən lò e ghee M̀ mbûŋlò alebùghò tɛ̂ fi an naʼ e Lumà alebùghò naʼà wô làbəlà e dzùŋ e te â ghɛ̀.

¹⁶ Ǹ də̂nsò yò tuw ko alezughò Làbəlà è dzùŋ zən kùu ndùw Kə̀lestò, tɔŋlo enyəa à lǒ dzì zəla daʼa kə Kə̀zə̀ kə̀ bəghaasəa ghî ghən a dzə̀m ghe lo mo ghe m boo fughu â wə̄n, mò kə nî nùghù tsùghù a zəŋò Dzûu tò bughò tɛ̀ wò a zəŋò Tòʼò zò.

¹⁷ Làbəlà è dzùŋ zən dêe fughuu wò dzì zəla Zə̀ kə̀ ghəŋlo a te enyəa ghùw è lo tsəghatsəgha a vʉ̀a wə̄n; mò a lò ko â ghì ghəla ghe tɔ̂ʼ boo fughu â wə̄n alendùw tâa ndûw. E fɛ nyoʼn lò aŋghəa ghe tɔm naŋā am mwàʼsò kə Kəzə̀ enyəa, “À lô tuw kə zəa ghùw wəla Zə̀ kə̀ ghəə̄ŋ tsughu enyəa ù è lo tsəghatsəgha a vʉ̀a wə̄n bòʼ fə̀ŋ zəla ghùw ù te gaʼ tsughu a zəŋo Zə̀ kò.”

¹⁸Zə̀ kə̀ n dè fùghù sə̀ tsùghù wò alo kəwālā kə lo fɔeso ghì à biigh gho àsùghò ghì ghəla ghe ki fə̂ŋ tə̀ biigh to, bòʼ enyəa ghe təghaso maʼnlo êsəŋò aŋ ghəa a biigh ghəla ghe ghəŋlo.

¹⁹Ghî a te a ki nû alekwo səŋò zəla e lo kùu ndùw Kəzə̀, nu Zə̀ kə̀ n dè fughu səŋò e te zo â ghee.

²⁰Aŋghəa mbī fə̀ kaʼ nughù wo, ghî a ki nû alekwo ghaʼ e Kəzə̀ zò am fʉgha wəla kə fə̀ gbə̂n wo, chia kə dê wô sugho enyəa e lo Kəzə̀, ghe yia yo alekòʼòkɛlɛ ghəa a te gho. E fì lo enyəa, ghùw ù lì kì yo ghəa e li zo aledzàa wô e ghəŋlo enyəa ghe ka kele Zə̀ kò.

²¹ Ghəa ghe mò bûʼ kwo ko Zə̀ kò, ghe mò fughuu dzə yo ghè kò â kɔʼso mò àsùghò zɔ̀ɔŋ ko. Ghe n nî kɔ̀ʼ tɔ u ghee naŋa ndùw an làŋà tə aghəa, moʼnlò è biigh zəa e nyə lue tsughu am fə̀ŋ tə ghee.

²²Ghe dzâa enyəa ghe tɔɔ nù, dèe ezə̀ mo ghe laʼsò nùʼ.

²³ Ghe tuu alefughu ŋkɔʼso â Zə̀ kəla kə doʼò tən, ghe ŋ kuuwn kɔʼso m̀mùʼù ghe bɔm mò fwènlo àghì, fwenlo nnwən, tənyôm à zughu to.

²⁴Ghə̄a ghî à lo mo ghe ŋgee laʼsò nù, Zə̀ chia kə zəgha tsughu ghee enyəa ghe e ghəəŋ nduw dzə̀adzə̀ tə aghəa təla fə̂ŋ tə ghee tə tsoo kɔʼɔ ghee aleghəŋlo. Ghe ŋ ghəəŋ kaaŋ sugho dzə̀adzə̀ tə aghəa təla gwən e eghùe e ghee e ləghaa am bvʉa e ghee.

²⁵Ghe nîi kɔ̀ʼɔ səŋò è Kəzə̀ kuuwn kɔʼɔ alo agha, ghe yia tsə̀ghà tə̀ŋò tsughu alekɔʼso fʉgha wəlà à bɔm tsughu Zə̀ kò, kuuwn yò alekɔʼso Zə̀ kəla kə bɔm fʉgha u te wo; tɔɔŋ Zə̀ kəla ghî a ki alefughuu kɔʼso mò â ghè kò nəgha tən tə̀ dzə̀m! Zə e lo ko êzə̀.

²⁶Zən lò e ghee Zə̀ kə̀ zəghà tsughu ghee enyəa ghe e ghəəŋ nduw dzə̀adzə̀ tə aghəa təla ghe ləghaa aleghəŋlo. Yîzən a ghee yia nuŋù ghue zo aŋ ghùe e ghee, mo ghe ki yo aleghəŋlo êzə.

²⁷Yînûu a ghee a bɔɔm lò sugho ezə̀, kòom nǎaŋ tàʼn tsùghuu tsughuu a yîzən, də̀ghàan ndùw aleghəə̄ŋ ghəa à dəla a kətuw gho ghèe ghê yìnûu à li gho. Ghùw ù te m bɔŋɔ kɔʼɔ ndzughu e wə̄n wən à nəŋ ko, bòʼ ghəa a ghee à biigh ghəla ghe ghəŋlo.

²⁸Tò aŋghəa ghî a mò lo mo ghe n tùe màʼa enyəa ghe yo dzə̂ to ghe e kelè mòʼnlò è səŋò zò a zəŋò Zə̀ kò, Zə̀ chìa kə zəghàa maʼà tsughu ghee aleghəə̄ŋ nduw ko ghəa ghəla ghe mô ki yo aleghəŋlo.

²⁹Ghe n lo mo ghəa à biigh ghə ŋ ghee alo tə fə̂ŋ lue dòʼò: ghəa a te a lo ebo, sə̀ à səa gho. Ghe ki kəmʉ̀nlo, à kʉ̀mè zo, winlo àghì, bàa eghue, tsèe kàŋlo àghì, ki kəghòʼ, màʼn sùghò tə̀fom.

³⁰Ghe m maʼn kǎaŋ tə̀nùʼ, baa Kə̀zə̀, ki dzughu e biigh zo, kɔʼso eghue, dèe eghue, ghî a te a kəŋo utsù, bùʼù zuuw sùghò yo â ghê tsele.

³¹Ghe tughuu â fə̀ŋ tò, ghe naaŋ yo dzughu e ghee zo, ghe ki yo fə̀ŋ è dzùŋ, ghe ki sugho yo se e kwuso zo a zəŋò ghùw.

³²Ghəa ghe bûʼ kwo ko enyəa lâŋ Kə̀zə̀ kə dzɛ̂ enyəa ghùw wəla ù ghəəŋ ghəa ghən gho, namso kə wə̄n kə lo evʉ, ghe yia naam ghəə̄ŋ ko ghəa a te gho; fəghaan dzəla nduw sugho esəŋ a zəŋò ghì ghəla ghe ghəəŋ ghəa a te gho.