Read Aghem Lumà 10 Bible Online

Lumà 10 - Aghem bible

Lumà 10

¹Waazə̂ ghaŋa gho, fəgha kəla Ǹ diī ghè kò àsùghò gɔ̀ɔŋ zaŋa zo lo enyəa, to Zə̀ kə̀ mò ghəŋlo ghî ghə Ezə̀lɛ̂ à zə kətuw.

²Ǹ lo nû alekùum dzâa wô â ghɛ̀ enyəa ghe ki nû ghɛ̂ zò alefwaʼā â Zə̀ kò, à sò kǔuwn lò ko enyəa ghe kwo yo dzì zəla ghe lô aletsə̀ghà a te.

³Ghe kaam kwo dzə yo dzì zəla Zə̀ kə̀ naāŋ ghùw a te tsəghatsəgha a vʉ̀a wə̄n, Ghe ŋ kuuwn də̀m è tsughu, kəŋ tsughu è ghee dzì alelo tsəghatsəgha a te. Ghe ŋ kè kuuwn boō dzì zəla Zə̀ kə̀ nîi ghî ghò a te enyəa ghe doʼò tsəghatsəgha a vʉ̀a wə̄n.

⁴Tɔŋlo enyəa Kə̀lestò mafə bughò fwàʼ mɛ̀ʼɛ̀ fəgha kəla lâŋ kə fə̀ ki alefwàʼ, zən fə̀ lo aleghəŋlo enyəa mò à lò ko ndughoo ù boō fughu tsughu dzə̄ â wə̄n, Zə̀ kə n nì ghùw u te aŋ ghûw u tsəghtsəgha.

⁵ Fəgha kəla Musî fə̀ tɔm naŋa kùu ndùw ghùw wəla ù ləghaa aledòʼò tsəghatsəgha mo ù ghə̌əŋ ghəa ghəla lâŋ kə̀ deē fə̀ lo enyəa, “Ghùw wəla ù naāŋ lâŋ kò kì alemughu mò à lò kəlâŋ.”

⁶ Fəgha kə̀là Mwàʼsò kə Kəzə̀ kə̀ kuuwn dzaā kùu ndùw ghəa ghùw bùghò doʼn tsəghatsəgha a te a vʉ̀a Zə̀ kò bòʼ boo e wə̄n lo enyəa, “Ghù ki dzə yo alebvʉa tsughu am fə̂ŋ zə̀ghà enyəa, à kè lò alo kəwala kɔʼɔ ndùw ndùgho.?” (Aledzàa tsughu enyəa, ù so ndûw nîi tsughuu wô Kə̀lestò a),

⁷Ŋkāa enyəa, “À lò ndughoo ù lò alenyəa tsughuu ndûw an naʼ zə evʉ̄?” (Aledzàa tsughu enyəa, à lǒ mò ù so e ndûw zôo nughù səā kɔʼɔ̄ wô Kə̀lestò alo evʉ̄ a)?

⁸Kən kuuwn lò fəgha kəla ghe tɔm naŋa am Mwàʼsò kə Kəzə̀ enyəa, “Shwaʼ u Kəzə̀ ù kuʼù lò ko enyə ghɛ̀ à ghee. Ghɛ̀ buʼù kə̀aa nù, vʉa u lô sugho am fə̀ŋ tɛʼɛ” — tɔɔŋ shwaʼ wəla sɛ̀ zughòo kaŋlo enyəa ghî ghə̀ e gaʼa fə̂ŋ tò a zəŋò Kə̀lestò.

⁹Abugho ghù dzɛ̀ sə wo an dzughu e tughō zo enyəa Yɛso lò Mughu ù te, boo tsùghù sùghò am fə̂ŋ zə̀ghà enyəa Zə̀ kə̀ mafə wə̄n alo evʉ̄ zôm nùghù kɔʼ, ghù lo zəa nù tuw ko.

¹⁰Bòʼ à lò fə̀ŋ zəla ghùw gaʼā tsughuu a zəŋò Zə̀ kò enyəa è kə̀ ghəŋlo enyəa ghùw ù te doʼò tsəghatsəgha, à lò sugho bòʼ enyəa ghùw dzâa sə̌a wò an dzughu e tughō zo enyəa ù bǒo fughu â Yɛso e ghəŋlo enyəa ù zə kətuw.

¹¹ Mwàʼsò kə Kəzə̀ kə̀ dzɛ̂ enyəa, “Ghùw wəla ù boō fughu â Zə̀ kò, fəgha kə̀ li kə kê ghə̂əŋ kòʼ yò enyəa ù kelê tuw kə̀ dəla ko.”

¹²Tɔŋlo enyəa, abugho e bugho aŋ ghəa a zəa a kətuw gho, nə̀ŋònəŋ è li yo a zəŋò ghì a Tə̀dzûu ghò àsùghò Tòʼò zò. Ghe dzeŋe ki ko Mughu ù te u mɔ̀ʼ, ù lo Mughùbè ù ghee, vʉ̀a ù mwàʼa â ghì ghəla ghe gɔ̂ɔŋ nduw â wə̄n.

¹³ Tɔŋlo enyəa Shwaʼ u Kəzə̀ ù dzɛ̂ enyəa, “Abugho ghùw tɔŋɔ tsughu zən e Mughu ù te zo, ù n zə kətuw.”

¹⁴Ghî à sô lo ênzə̂n alenɔɔ nduw èyôsò zò â wə̄n a, mo ghe kâ â wə̄n boo fughu a? Ghe lo sugho ênzə̂n aleboō fughu â wə̄n a, mo ghe kaām ghəa è li zo zuw kòʼ tsə̀ghà kùu ndùw wə̄n a? Ghe lo sugho ênzə̂n alezuw ghəa a wə̄n a, mò ghùw ù lì kâ bùghò nàʼà wò shwaʼ u te wo â ghee a?

¹⁵ Ghùw lò sugho alebùghò naʼà ênzə̂n tum lo, mo ghe kâ wə̄n tum sə wo a? Tò aŋghəa ghe tɔm taŋā am Mwàʼsò kə Kəzə̀ enyəa, “À ŋgè lǒ dzɔ̀ɔdzɔ̀ kə eghəa enyəa ghî ghəla ghe naʼn wo làbəlà è dzùŋ bùghòo nù.”

¹⁶ À sò kǔuwn lo ko enyəa à yò dzə aghî a dzəm ghe lo mo ghe m boo làbəlà è dzùŋ è te. Tɔŋlo enyəa ghùwshʉ̀ghà ù Kə̀zə̀, Èzayà fə dzɛ̀ naŋa enyəa, “Mughu ù te, à mò lo ndugho ù mò boo fughu â shwaʼ u sɛ̀ wò?”

¹⁷Ghùw gàʼa ko fə̀ŋ alo eghəa mò ù ŋ ghəa e te e zuw, ghùw tum è tè zuuw ko abugho ghe naʼn wo làbəlà è Kə̀lestò â wə̄n.

¹⁸ Ǹ sô fɛ kuuwn bvʉā wô enyəa, à lò enyəa ghe ka mo tùm è dzùŋ zən zuw ŋkāa? Ŋ̀ kwo enyəa ghe mafə zuw, nu Shwaʼ u Kəzə̀ u dzɛ̂ enyəa, “Ghe n zùghòo ŋgəa tsughu shwaʼ u te wo am mbī e dzə̀m. Bâ kə mbī kə̀ li ko yo mo ghe kaām shwaʼ u te wo a fughu zuw.”

¹⁹ Ǹ so ŋ kôom bvʉa kpeʼē tsughu enyəa; À lò enyəa ghî ghə Ezə̀lɛ̂ à ka fə zuwkɛlɛ̄ ŋkāa? Nu Musî fə lo ghùw ù sûesʉ aledzàa wô shwaʼ u Kəzə̀ wən â ghee enyəa, “Ǹ lo nìi wò aghì an naʼ zəla ghɛ̀ moʼò enyəa à yò dzə̂ naʼ e səŋò zò, Ŋ̀ ghəə̄ŋ tsughu ghî ghaŋa ghə e ki mʉ̌ʉn ko a te. Ǹ lo nîi wô ghì a laŋà kə enaʼ kə li ko enyə, Ŋ̀ ghəə̄ŋ tsughu nə̀ghà mə̀ è pfʉa ghe a te.”

²⁰ Ghùwshʉ̀ghà Èzayà fə̀ do dzɛ sə wo shwaʼ u Kəzə̀ â ghee an dzughu e tugho zo enyəa, “À fə̀ mugho laam kəŋ kele ghî ghəla ghe fə̀ kəŋo dzə̂ yo mugho. Mughò m bùgho dè wò ghue waŋa â ghì ghəla ghe fə̀ buʼù bvʉā tsəghà yô mugho.”

²¹ A ŋ kuuwn bùghò â ghì ghə Ezə̀lɛ̂ ghò, Zə̀ kə̀ n dzɛ̀ enyəa, “Mùgho ŋ ghu ghaŋa a tsʉ naŋa zee alekpeē nîi nyəa wô ghì ghəla ghe zuūw yo â mùghò àsùghò ghəla ghe tuū màʼn ghəa ghaŋa gho.”