Read Aghem Lumà 12 Bible Online

Lumà 12 - Aghem bible

Lumà 12

¹Yia a bugho êzəŋ a waazə̂ ghaŋa gho, à lǒ bòʼ se è kwuso zəla Zə̀ kə̀ ŋge ki a zəŋò sɛ̀ M̀ buʼū wô ghu ko â ghɛ̀ enyəa; ghɛ̀ Fughu nduw nlò ghue zɛʼɛ zo â Zə̀ kò tǒ fughu kəla ghe sɛ̂ fughu nduw â wə̄n mò ghɛ̀ kuuwn naam lò â tuw ko, mò ghɛ̀ zɔlɔ nù ghəəŋ sùghò enyəa fə̀ŋ e wə̄n e zɔlɔ. Mən lǒ kɔʼso n sə̀ŋò məla ghɛ̀ ki alefughuu â Zə̀ kò.

²Kà nlo kôom mùghù dzə̀ an dzì zəla ghî a mbī a mughū a te, zə̀ghàa tsugu nlò tò Zə̀ kə̀ kuūwn kɔʼ fə̂ŋ tɛʼɛ, tò ghɛ̀ kele moʼnlò è fughu zo. Ghɛ̀ è ke lo aledaŋso kelê fəgha kəla Zə̀ kə̀ ləghaa ghè kò — ghɛ̀ e kwo ghəa è dzûŋ zò, zəla e lô tsəghatsəgha, àsùghò zəla e lo aleghəŋlo enyəa Zə̀ kə̀ e duʼnlo a te.

³À lǒ bòʼ dzɔ̀ zəla Zə̀ kə̀ mò dê tsughu â mùghò, Ǹ dzâa wô â ghɛ̀ a dzə̀m enyəa, Kà nlò è ŋgeē kɔʼso tsəghaso ghue zo aŋghəa ghɛ̀ ki alekɔʼsō a te. Ghɛ̀ laam maʼa tsughu nlò ghue zo aletɔʼɔ̄ moʼn tsughuu ghəa zo, ghɛ̀ è lɛɛn tsəso tsughuu ko ghue zɛʼɛ zo am fə̂ŋ zəla Zə̀ kə̀ ghəŋlo enyəa ghɛ̀ gaʼ wo a zəŋò wə̄n.

⁴Sɛ̀ ki ndə̀ma tə lùʼu tə eghùe a zəŋo ghùe e sɛ̀, luʼù tə ughùe tən tə̀ dzə̀m kì nduw ko fwàʼ u ghèe nəŋo nəŋ.

⁵À lò sugho eghəla aŋghəa sɛ̀ bûʼ lô ko ndə̀m, sɛ̀ êzəŋ lo tò gwən e ughùe e mɔ̀ʼ bòʼ enyəa sɛ̀ lo alo kəfəgha kə mɔ̀ʼ sɛ̀ à ghê Kə̀lestò, sɛ̌ yia a dzeŋe təmdzəə̄ŋ kaāŋ wô ghue e sɛ̀ zò tǒ ndəm è lùʼù tə eghùe təla tə ghəə̄ŋ kɔʼ gwən e ughùe zò e mɔ̀ʼ.

⁶Kə̀chìa kì ko fughu kə wə̄n nə̀ŋò nəŋ aŋghəa Zə̀ kə fughu â sɛ̀ an dzɔ̀ e wə̄n. Abugho fughu kə ghûw ù sɛ̀ ù lì kə lo aleniī naʼn wo tum è Kəzə̀, ù n naʼn ndùw tum e te am fə̂ŋ zəla ù gaʼ tsughu â Zə̀ kò.

⁷Abugho ghùw ù sɛ̀ ù lì lo alefwaʼā â ghì a Kəzə̀ ghò, ù e bɔɔm fwaʼā nduw êzə̀; mo fughu kə ù lì kə̀ lo alezoʼn nduw ghî ghò, ù ŋ kûm zòʼn ndùw ghee.

⁸Abugho fughu kə te kə lo aledzə̀n fə̀ŋ tə aghì, ù ŋ ghəəŋ ndùw êzə̀. Mo fughu kə ghûw kə̀ lo alefughu eyôsò â ghì ghò, ghùw ù m fughuu ndùw aŋ ghùe ù mwaʼā wo. Ghùw wəla ù ki dwaʼa wo alekwuū kele àghì, ù ki alekwuū kele ghee aŋ ghu kə̀ dzûŋ kò. Wə̄n wəla ù ki fughu ko aledè edzɔ̀ â ghì ghò, ù n dêe ndùw dzɔ̀ e te zo aŋ ghùe ù ghɛɛn wo.

⁹E kuūm deē nduw nlò ləgha zo â ghì ghò. E baā nlò ghəa ghəla a dzɔ̂ɔ yo, tughu ndùw aleghəəŋ ghəa à dzûŋ ghò.

¹⁰E kûu ləghaa nduw nlò ghue zo tò waazə̂, ghɛ̀ è ki mbuuw mò aledeē nduw kɔʼso mò aŋ ghùe zɛʼɛ.

¹¹E fwaʼā tsughuu nlò alo kədaʼa, kà nlò è lɛɛ dzə, ghɛ̀ e fwaʼā nduw â Mughu ù te am fə̂ŋ zɛʼɛ e dzə̀m.

¹²Ghɛ̀ e duʼnlo an tùʼ zəla ghɛ̀ chiī ghè zò. Ghɛ̀ kɔlɔ tsughu nlò fə̂ŋ tò an tsù wɛʼɛ, ghɛ̀ è gɔŋlo an nə̀gha tən tə̀ dzə̀m.

¹³E teen nduw nlò fʉgha wɛʼɛ wo ghɛ̀ à ghê ghì a Kəzə̀ ghɛʼɛ ghəla ghe ki yo. Ghɛ̀ naŋa tsughu ndughu tɛʼɛ to tughō â ghì ghəla ghe bwîin wo alo ghɛ̀.

¹⁴E dii dzaā nduw nlò tsû wɛʼɛ wo â Zə̀ kò enyəa kə bughusô ghî ghəla ghe ndzaŋso kaāŋ ghɛ, ghɛ̀ n dzâa ndùw enyəa Zə̀ kə̀ bughuso ghe, ghɛ̀ ka ghe e tsɔɔ̄m dzə.

¹⁵E lo nlò alo duʼnlo ghɛ̀ à ghê ghì ghəla ghe duʼnlo, ghɛ̀ e dinlo ghɛ̀ ghê ghì ghəla ghe dîin sugho.

¹⁶E mughu nlò alo kə fəgha kə mɔ̀ʼ ghɛ̀ à ghê ghì ghò a dzə̀m. Kà nlò è kɔʼso ghue zo, laam bǒo tsughu nlò aleghəəŋ zumso tə aghəa to ghɛ̀ à ghê ghì a ulwən gho. Kà nlò è moʼō enyəa ghɛ̀ tɔ tsə̀ghà ghì à li gho.

¹⁷Kà nlò è tsəa bo zo alo ebō. E dəma tsughu nlò aleghəəŋ ghəa ghəla a dzɔɔ̄ an sə kə aghì.

¹⁸Abugho e lo alelo êzə̀, ghɛ̀ è dəma təla tsughu nlo aŋ ŋgəŋ zɛʼɛ aleghəəŋ ghəa ghəla a nîi wô bughun zo â ghɛ̀ à ghê ghì ghò a dzə̀m.

¹⁹Waazə̂ ghaŋa gho, kà nlò è diī ŋgə̀mà tò a zəŋò ghì ghò; mò ghùw ghə̌əŋ boon tsughu ghɛ â ghəa zo, ghɛ̀ n zə̀ghàa ndùw â Zə̀ kò, kə n dè nʉghà u wə̄n u pfʉa wo a te; tɔŋlo enyəa ghe tɔm naŋa am Mwàʼsò kə Kəzə̀ enyəa, “Ǹ lo dìi tə̀ŋgə̀mà a zəŋò ghì ghəla ghe ghəə̄ŋ bo zo, Ǹ lo tsəā tsəghà ghì ghəla ghe fəmso ghî à li gho. À dzɛ̀ mùghò, Mughu ù te.”

²⁰Mwàʼsò kə Kəzə̀ chia kə kuūwn dzɛ̂ sugho enyəa, “Abugho ghùw ù kə̀tuw wʉ̂a dîi dzə̀ŋ, ghù ŋ ki alefughū nduw wə̄n â fə̀ghàzəa ko, mò ù dìi fə̀ŋ è zuʼso, ghù m fughu ndùw wə̄n â fəgha kə̀ mʉa ko; tɔŋlo enyəa abugho ghù ghəə̄ŋ dzə êzə̀, ghù ghəəŋ nù ù n lo an tuw kə̀ dəla ko.”

²¹E kwo ko ghəa à biigh a lô tughū tsəghàa ghɛ, ghɛ̀ kuuwn ki aletughū tsə̀ghà ebo an dzɔ̀ zɛʼɛ zəla ghɛ̀ ghəə̄ŋ nduw à ghì gho.