Read Aghem Lumà 13 Bible Online

Lumà 13 - Aghem bible

Lumà 13

¹Aghî a dzə̀m kì alezuuw nduw â ghì ghəla ghe saʼā tuw u ghee wo. Tɔŋlo enyəa ghùw ù lì ki yo dwaʼa wo alesaʼa tuw u aghì wo à gɔ̀ʼɔ̀ ko mò à dzɛ̀ Kə̀zə̀ enyəa zə e lo êzə̀. Ghî ghə̀n a dzə̀m ghe saʼa tuw u aghì wo u dzə̀m, à mo tsuʼ naŋa Kəzə̀.

²Ghùw wəla u tuū alezūw â ghì ghəla ghe saʼa tuw u ghee wo, ù fi tuu màʼn ghì ghəla Zə̀ kə naŋā. Ghùw wəla ù ghəŋlo êzə̀, ù fi dəghànlò ùlʉ̀ghà enyəa Zə̀ kə lo dâŋ a te alefɔeso wə̄n.

³Tɔŋlo enyəa ghî ghəla ghe ghəə̄ŋ ghəa à dzûŋ ghò kì dzə yo aletsəŋo ghî ghəla ghe saʼā tuw u ghee wo. À lǎam lò ghî ghəla ghe ghəə̄ŋ boōn ghəa gho ki aletsəŋo ghî ghəla ghe saʼā tuw u ghee wo. Abugho ghɛ̀ ləghaa alelō mò ghɛ̀ ki yo tsəŋ zo ghɛ̀ à ghê ghì ghəla ghe saʼā tuw wɛʼɛ wo, ghɛ̀ è ghəəŋ tsughuu ghəa zəla e dzɔɔ̄, to ghe e kɛɛ ghɛ a te.

⁴Tɔŋlo enyəa ghe lo ghî a kəfwàʼ Zə̀ kə̀ naŋā wo aleghəŋlo enyəa ghɛ̀ è mughu mughù è dzûŋ zò. Mò ghɛ̀ kuuwn ghəəŋ dzə̀ ghəa à biigh gho, ghɛ̀ ki nû aletsəŋo ghee, nu ghe ki nû daʼa ko alefɔesō ghî ghò. Ghe lo ghî a kəfwàʼ a Kəzə̀, Zə̀ kə̀ naŋā enyəa ghe fɔeso sugho ghî ghəla ghe ghəə̄ŋ ghəa à biigh gho.

⁵À fi lo enyəa ghɛ̀ ki yo alekaa zuuw ko â ghì ghəla ghe saʼā tuw wɛʼɛ wo bòʼ ghɛ̀ tsəŋo enyəa Zə̀ kə̀ lô fɔeso ghɛ, à kǔuwn lò sugho enyəa ghɛ̀ kwò nû am fə̀ŋ zɛʼɛ enyəa ghɛ̀ ki aleghəŋlo êzə̀.

⁶Zən lò e ghee ghɛ̀ ki sugho alechuuw ŋgùu kò[6], tɔŋlo enyəa ghî ghəla ghe saʼā tuw u sɛ̀ wò lò ghî a kəfwàʼ a Kəzə̀, ghe kûu fwàʼà â Zə̀ kò aŋ ghəa ghən.

⁷Ghɛ̀ e fughuu nduw fəgha kəla ghɛ̀ ki alefughu tsəghà ndûw â ghee: mò à lǒ mwàʼsò kə̀ chuuw ko, ghɛ̀ n chùw è nduw, chuuw ndùw sùghò chuw tɛʼɛ, ghɛ̀ m fughuu ndùw kɔʼso məla m kpe â ghee.

⁸Ghɛ̀ ka e kele dzə ghùw u lì â ndàŋ kò. Ndàŋ kəla ghɛ̀ ki ko alekele mîaa ko enyəa ghɛ̀ è ləghaa ghue zɛʼɛ zo; tɔŋlo enyəa ghùw wəla ù ləghaa dzə̂ ghî ghò fi lueso kə̀làŋ.

⁹Lwâŋ wən enyəa, “Ghùw kì yo alesəā nûŋlò, ghùw kì yo alewī ghùw, ghùw kì yo aletsɔ̄ŋ, ghùw kì yo alenaŋa esə am fəgha kə ghûw.” Àsùghò lwâŋ ù li wə̄n u dzə̀m, à ghee kwu kɔlɔ kɔʼ lâŋ kən enyəa, “Ghù kì aleləgha ghùw wəla ù lo am bùghu zəghà tò aŋ ghəa ghù ləghaa ghue wʉ̀a wò a te.”

¹⁰Abugho ghùw ləghaa dzə ghùw wəla ù lo am bùghu e wə̄n, ù kòom yò aleghəəŋ ghùw ù te â bo zo. E fi lo enyəa, aledè èləgha â ghùw, à lò alelueso ulwàŋ u dzə̀m.

¹¹È li zəa e lô sugho enyəa, ghɛ̀ kwo nû nəgha zəla e lo ghè zò êzə̄ŋ, nəgha zə m kpe êzə̄ŋ â ghɛ̀ alezòo nughu kɔʼ alo təmgbii. Tɔŋlo enyəa nəgha zəla sɛ̀ ki alezə kətuw a te mô êzəŋ e su, tsə̀ghàtàʼà aŋghəa a fə̀ kuʼù boo fughu tsughu a te â Zə̀ kò.

¹²A êzəŋ e lo ko tò â lə̌əmlə̌əm tə utsuʼ to, a tsûuŋ tsùghuu ko enyə, tsuʼ u zuūw nyəa wò nù. To sɛ̀ mô bughū naŋa aleghəəŋ ghəa gho a tsəla kələ̄m, sɛ̀ nîi kɔʼ mughù e zɔlɔ zo tǒ ndzʉ tə tsam sɛ̀ dzəlà kele a zəŋo e ughùe.

¹³To sɛ̀ mô nyòʼn ghəəŋ ndùw aghəa tò ghî ghəla ghe mughu an tsə̂, mò à yò dzə̂ alo kələ̄m. Sɛ̀ ki dzə yo alendùw an lùʼu təla ghe mʉa kala lʉ̀ mò a te, ghəəŋ sùghò ghəa à nuūŋ gho fughu, ŋkāa ki sugho yo alemughu dzə̀adzə̀ kə emùghù ko, ŋkāa alebwiī baā kaaŋ tsəgha ghəa gho, ŋkāa aleki mʉ̌ʉn ko.

¹⁴Ghɛ̀ dzəla kele tsughu Mughu ù te Yɛso Kə̀lestò a zəŋò ghɛ̀ tò təndzʉ, àsùghò enyəa e kwo ko ghɛ̀ lô naāŋ tuw ko aŋ ghəa ghəla gwən e ughùe e zɛʼɛ e ləghaa enyəa ghɛ̀ e ghəŋlo.