Read Aghem Lumà 14 Bible Online

Lumà 14 - Aghem bible

Lumà 14

¹Boo tsughu nlǒ waazə̂ ghɛʼɛ ghəla fə̂ŋ tə ghee naām noʼn kaŋlo aŋ ghəa a Kəzə̀ ghe lo am bvʉa zɛʼɛ̄, kǎ nlò è kuuwn baaŋ fom to ghɛ̀ à ghee mɔ̀ɔ ndùw fəgha kə̀là ghe moʼo ghè kò.

²Ghî a li a lo nû ghe boō tsughu enyəa to ghe zə ufʉgha u dzə̀m, ghî a li yia a lo kwo enyəa ghe ki ko alenuum təla ko tuūwfʉgha wo bòʼ enyəa ghe tɔ̀ʼ tì yo am boo e ghee â Zə̀ kò.

³Ghî ghəla ghe zəā fʉgha wo u dzə̀m kì yo alekòʼò lʉgha ghî ghəla ghe zəā yo fʉgha wo u dzə̀m. Ghî ghəla ghe kuūwn nuūm təla ko tuūwfʉ̄ghā wo ki sugho yo alesāʼ ghî ghəla ghe zəā fʉgha u te wo u dzə̀m, nu Zə̀ kə̀ ŋ ghee boo.

⁴Ghɛ̀ lò ghê ndugho â ghɛ̀ alesaʼa kɔ̀ɔ ŋ ghùw ù lì mò a? A kè tèlè tsə̀mà tsùghuu ko Mughùbè ù ghee enyəa ghe ŋ ghəəŋ dzɔ̀ ŋkāa ghe ŋ ghəəŋ bonlo. Ghe kê tèlè sə̌a ko nù fəgha ko, tɔŋlo enyəa Mughùbè ù ghee lo nû aleghəŋlo ghe sə kəfəgha.

⁵Ghî a li a moʼò ko enyəa tsuʼ fə̀ li fə lo nû fə tsəghàtaʼà sə n lì mən, ghî a li yia a lo ghe kuūwn kwō enyəa tsuʼu mən n dzəm bɔ̌ɔm lò ko eghala. Naŋa tò chìa e bɔɔm tsəma tsughu ko e wə̄n zo eghəa.

⁶Ghî ghəla ghe nî tsughu tsuʼ fə̀ li fo enyəa a lò tsuʼ fə̀ ne fo â ghee, ghe èzə ghəəŋ ko alefughu ŋkɔʼso â Mughu ù te. Ghî ghəla ghe zəa fʉgha wo u dzə̀m, ghe êzə naam ghəəŋ sùghò alefughu ŋkɔʼso â Mughu ù te, aŋghəa ghe fughuu dzə zɔ̀ɔŋ kò â Zə̀ kò a te. Ghî ghəla ghe tiī alezə̄ fʉgha ù li wo, ghe êzə ghəəŋ sùghò alefughu ŋkɔʼso â Mughu ù te, ghe yia fughuu sugho zɔ̀ɔŋ kò â Zə̀ kò a te.

⁷Ghùw ù sɛ̀ ù lì yo ù mùghù ko an saʼ è wə̄n, ù lì yo sughò ù kpuūw an saʼ è wə̄n.

⁸Abugho sɛ̀ lo â tuw ko, a mughu aŋ kɔʼso m Mughu ū te, mo a kpuw ko nû, a kpuw aŋ kɔʼso m Mughu ù te; à fi lo enyəa, abugho a lô â tuw ko ŋkāa a kpuw ko nû, à sɛ̀ ki Mughu u te.

⁹Kə̀lestò fə̀ fɛ kpuw zoō kɔʼ bòʼ ghəa ghə̀ è yi enyəa, ù è lo Mughu ù te â ghì à kpuwn gho àsùghò ghəla ghe lô â tuw ko.

¹⁰Ghɛ̀ sò waazughù à koʼò kèe mò a lǒ kwò a? Ŋkāa à lǒ kwò ghɛ̀ sô saʼa waazughù ghò a? Sɛ̀ a dzə̀m lo bùghò tènlo an tia e saʼ a vʉ̀a Zə̀ kò.

¹¹Ghe tɔm naŋa am Mwàʼsò kə Kə̀zə̀ enyəa, “Ghəa Ŋ̀ kûum lô dzə̂ â tuw ko, mùghò Mughu ù te dzɛ̂ nàŋa wò enyəa, ghî ghən à dzə̀m ke tə̀ma tsəghà tə̀ŋguʼ a tsəla mùghò, aghî a dzə̀m e ke dzaā səa wo an dzughu e tugho zo enyəa Ǹ lo Kəzə̀.”

¹²Ghùw e ke taŋso dzaā nduw ko ghəa a ghùe u wə̄n gho â Zə̀ kò, taŋso dzàa ndùw sughò soo kə eghəa kəla kə fə̀ ghəŋlo enyəa ù ghəŋlo êzə̀.

¹³À fi lo enyəa sɛ̀ e ka e koōm saʼa ghue e sɛ̀ zò, sɛ̀ e laām dəma tsughuu enyəa a ka e naaŋ dzə tia e utwaʼ zo an dziī ŋkāa kə̀ fàŋa â waazə̂ a sɛ̀ gho tò â ghee aleghəŋlo èbo.

¹⁴Ŋ̀ kwo nû aŋghəa Ǹ lô fəgha ko kə mɔ̀ʼ ghàʼ à Mughu ù te Yɛso enyəa fʉghazəa ù li yo dzə̂ u dzɔ̂ɔ yo â ghì ghò alezəa. Abugho ghùw ù li kuuwn moʼnlò enyəa fʉghazəa u te u dzɔ̂ɔ yo alezə, a fi lo enyəa e dzɔ̂ɔ yò â wə̄n alezəa fʉghazəa u te wo.

¹⁵Abugho e lo enyəa fəgha kəla ghù zəa kə fəmso wàazùghù, a fi lo enyəa ghù dèe yò ləgha zo â wə̄n aŋghəa ghù naam zəa ko fʉghazəa u te wo. Kà e ghəəŋ dzə enyəa fəgha kəla ghù zəa boōn maʼà ghùw mò Kə̀lestò maā bugho kpuw an tuw kə wə̄n

¹⁶Kà nlò è ghəŋlo enyəa fəgha kəla ghɛ̀ kwo enyəa kə dzɔ̂ɔ nù â ghɛ̀, ghî ghə̀ è kuuwn moʼnlò enyəa kə dzɔ̂ɔ yò.

¹⁷Nu Fɔ̂e u Kəzə̀ u ki yo ghəa e li zo aleghəŋlo ghèe ghəa a zəa gho ŋkāa a mʉa a kəfəgha gho, à kǔuwn lò alemughu alo ebughunlo àsùghò an duʼn zəla Zuʼ tə̀ Zɔlɔ tə fughuu, àsùghò enyəa a e mughu mughù zəla e zɔlɔ an sə kə Kəzə̀.

¹⁸Abugho ghùw fwàʼa â Kə̀lestò an dziī zən, zə ŋ ghəŋlo Zə̀ kə̀ n duʼnlo, ghî ghə ŋ kɛɛ ghùw ù te.

¹⁹Sɛ̀ ki aledəma tsughu ko aleghəŋlo enyəa sɛ̀ e lo alo ebughunlo àsùghò enyəa sɛ̀ e tughu dzɔɔ̄ am fə̀ŋ zəla sɛ̀ gaʼ tsughu a zəŋò Zə̀ kò.

²⁰E kwo ko fəgha kəla ghɛ̀ zəa kə lô so e boon màʼn fwàʼ kə Kəzə̀ kò. Ghɛ̀ lo nû alezə ufʉgha u dzə̀m, e kǔuwn boo ko alezə fəgha kəla kə lo aleghəŋlo enyəa ghùw u lì bvʉ̀ aleghəŋlo èbo.

²¹E dzɔ̂ɔ yò alepfʉa nyòm ŋkāa alemʉa lʉ̀ mò, ŋkāa aleghə̂əŋ ghəa è li zo e lô aleghəŋlo wàazùghù ù lì ghə̂əŋ ghəa e biigh zo.

²²Fəgha kəla ghɛ̀ boo fughu a te, ghɛ̀ naŋa tsughu ko am fə̀ŋ tɛʼɛ ghɛ̀ à ghê Zə̀ kò. Dzɔ̀ lo â ghì ghəla ghe saʼa yô ghue e ghee zo abugho ghe ghəə̄ŋ ndûw ghəa zəla ghe kwo enyəa e lo tsəghatsəgha.

²³Ghùw wəla tuw kə kpuūw wən am fəgha kəla ù zəa ghè kò, Zə̀ kə̀ n nì ghuẁ u te enyəa ù m bvʉ̌ saʼ abugho ù zə fʉghazəa u te wo, nu ù kà ghə̌əŋ dzə̀ ghəa zəla ù e dêe enyəa ù boō fughu â Zə̀ kò. Ghəa zəla ghùw ghəə̄ŋ tsughu mo e dêe tsùghù enyəa ù kà bǒo fughu â Zə̀ kò lò ghəa è biigh zo.