Read Aghem Lumà 15 Bible Online

Lumà 15 - Aghem bible

Lumà 15

¹Sɛ̀ ghəla sɛ tɔ̂ʼ ti am boo e sɛ̀, a ki alezuūwkɛlɛ tsughu ghî ghəla ghe tɔ̂ʼ ti yo am boo e ghee. A ka ki ko yo aleghəŋlo enyəa fə̂ŋ tə sɛ̀ tə e duʼnlo.

²Sɛ̀ ki alelaam ghəəŋ nduw ko ghəa à dzûŋ gho â waazə̂ a sɛ̀ gho enyəa ghe e lo alo duʼnlo, àsùghò enyəa ghe e tɔʼ ti sugho am boo e ghee.

³Ghuūghùe u Kə̀lestò ù ka fə ghəa ghəla ù fə̀ ghəŋlo ghəəŋ dzə̀ enyəa to ù mò dùʼnlo a te; tò aŋghəa ghe tɔm naŋa am Mwàʼsò kə Kəzə̀ enyəa, “Aŋghəa ghe mò sùuwn ghû, ghe mo fi suūwn mugho.”

⁴Ghəa ghəla ghe fə̀ ki tɔm naŋa am Mwàʼsò kə Kəzə̀ fə̀ lo alefughuu sɛ̀ â tsʉ̀ zò, enyəa to tsʉ̀ e te e mô lo aleghəŋlo sɛ̀ e lo alekaā tsughu ezə, e dzəlà tsughu sugho fə̀ŋ tə sɛ̀ aŋghəa a chiī tùʼ a te am fəgha kəla Zə̀ kə fə̀ to naŋa â sɛ̀.

⁵To Zə̀ kəla kə ghəŋlo enyəa sɛ̀ e kaa zə zo, dzə̀là sughò fə̀ŋ tə sɛ̀ mò ghəŋlo ghɛ̀ e mughu alo kəfəgha kə mɔ̀ʼ ghɛ̀ à ghê waazughù ghò aŋghəa Kə̀lestò Yɛso ləghaa,

⁶enyəa ghɛ̀ a dzə̀m lo e dzeŋe təma nduw ŋkəma mò â Zə̀ kò, tɔɔŋ Tselè Mughùbè u sɛ̀ Yɛso Kə̀lestò an dzə̂ e mɔ̀ʼ.

⁷E fi lò enyəa, e kpeeniī nlò ghue zɛʼɛ zo aŋghəa Kə̀lestò fə̀ kpenî ghɛ a te, to enyəa ghî ghə̀ e fughuu kɔʼso mò â Zə̀ kò.

⁸Ǹ so Ǹ dzâa wô â ghɛ̀ enyəa Kə̀lestò fə̀ bugho tǒ ghùw u kəfwàʼ â Dzûu tò alebùghò dêe tsughu enyəa Zə̀ kə naaŋ nù dzughu e wən zo am fəgha kəla kə fə̀ to naŋa à ghê tselê tsele a ghee gho.

⁹Ù fə̀ bugho sugho aleghəŋlo enyəa to Toʼò e mô fùghuu ŋ kɔʼso â Zə̀ kò an se è kwuso zəla Zə̀ kə ki â ghee. Ghe tɔm naŋa am Mwàʼsò kə Kəzə̀ enyəa, “E fi lo enyəa, Ǹ lo təma ŋkəma â ghù am bvʉa zə Etòʼò, mùghò e zoo ghû aŋ ndzàŋ tə ŋkɔʼso to.”

¹⁰Mwàʼsò kə Kəzə̀ chia kə dzɛ̂ kpeʼe sugho enyəa, “Ghɛ̀ e duʼnlo a Toʼò zo, ghɛ̀ à ghê ghì a Kəzə̀ ghò.”

¹¹Mwàʼsò kə Kəzə̀ chia kə dzɛ̂ kpeʼe sugho enyəa, “E təma nlò kəma mò â Mughu u te a Toʼò zò, àsùghò enyəa ghî a nàʼà tə mbī ghən a dzə̀m e fughuu wən â kɔʼso mò.”

¹²Ghùwshʉ̀ghà u Kəzə̀ Èzayà vʉ̀a ù dzɛ̀ sugho enyəa, “Ghùw kè sə̌a wò an tigh kə Dzɛsɛ̀[7], ghùw ù te kê lò tsəgha wəla ù kè bughò saʼa tsəgha tuw kə Etoʼò zò, Toʼò zə̀ e ke chiī tùʼ e ghee a zəŋò wə̄n.”

¹³To Zə̀ kəla kə ghəŋlo enyəa a chiī tùʼ alo aghəa a dzə̀m mò fughu ghɛ â bughuun zo, kə ghəŋlo ghɛ̀ e duʼnlo, aŋghəa ghɛ̀ boō fughu tsughu à ghè kò, to enyəa Zuʼ tə Zɔlɔ tə mô ghə̀ŋlo ghɛ̀ e fəghaan ŋgee chiī tsughu tùʼ.

¹⁴Waazə̂ ghaŋa gho, aŋ ghuūghuè waŋa Ŋ̀ kûm kwò nû enyəa ghɛ̀ lo ghî a dzûŋ ghò, ghɛ̀ yia a ŋge kwo ghəa gho, kwo sugho alezoʼn ghue zɛʼɛ alo aghəa.

¹⁵Mùghò ŋ ghəa gho â ghɛ̀ dô tɔ̀m wò kùu ndùw tuw u aghəa u lì wo alezə̀əŋ wô ghɛ̀ a te. Ŋ̀ ghəa ghən dôo ghəŋlo bòʼ dzɔ̀ zəla Zə̀ kə̀ dê tsughu â mùghò,

¹⁶Zə̀ kə̀ dzɔ̂ zən â mùghò dê tsùghu enyəa mùghò e lo ghùw ù kəfwàʼ ù Kə̀lestò Yɛso alefwaʼa â Tòʼò zò. M̀ fwaʼà fwaʼ kəfɔ̀e aŋghəa Ǹ zughoo wo làbəlà e dzùŋ e Kəzə̀, enyəa to Toʼò e mô lǒ tò kəfughu Zə̀ kə̀ boō enyəa ghe m kpe, mò à ghee nî sùw nàŋa kɔʼ Zuʼ tə Zɔlɔ to a vʉ̀a Zə̀ kò.

¹⁷Aŋghəa Ǹ lô fəgha ko kə mɔ̀ʼ ghàʼ à Kə̀lestò Yɛso, Ǹ lo nû aletsɔ̀ fə̀ am fwàʼ kaŋa â Zə̀ kò.

¹⁸Ŋ̀ yo alekə̀a ghəa è li zo mò a gɔ̀ʼɔ̀ ko yo ghəa ghəla Kə̀lestò lo mò ù ghəŋlo enyəa M̀ fwâʼ, to Toʼò zə̀ e zuuw nduw â Zə̀ kò. Kə̀lestò mò ghəa ghən ghəəŋ tsughu aŋ ghəa ghaŋa à kəaa gho àsùghò an shwaʼ waŋa.

¹⁹Ù fə̀ ghəa ghən ghəəŋ tsughu aŋ daʼa kə kɔ tə tətsə̌a təla mùghò fə̀ dê tsughu àsùghò sə̀ghàa mò, àsùghò an daʼa kə Zuʼ tə Kəzə̀. Zə ŋ ghəəŋ tsughu mùghò n naʼn wò Làbəlà è dzùŋ è Kə̀lestò zən an lùʼu tən tə̀ dzə̀m aŋghəa mùgho mò nughù wo an Yɛ̀lusalɛ̀m lɔʼso ŋgə̀a ndùw alendùw an naʼ zə Èlilekùm.

²⁰Dî zaŋa e mò lo enyəa to M̀ mô lò alendùw naʼa làbəlà è dzùŋ zən an luʼu təla ghe lo mo ghe kaām zuw kòʼ tsəgha ghəa e li zo a te kùu ndùw Kə̀lestò, enyəa e kwo ko Ǹ lô kôom ndûw naʼn kpeʼe nduw làbəlà zən an lùʼu kəla ghî a li a mafə bùʼ ndùw nàʼa dzə̀.

²¹Ghe tɔm naŋa am Mwàʼsò kə Kəzə̀ enyəa, “Ghe ghəla ghe lo mo ghe kaām kə̂a kòʼ tsə̀ghà ghəa a wə̄n gho â ghee, ghe lo kòʼò nǔ wə̄n, ghəla ghe lo mo ghe kaām zuw kòʼ tsə̀ghà ghəa zo kùu ndùw wə̄n, ghe lo zuuwkɛlɛ nǔ wə̄n.”

²²Zən lò ghəa zəla e mò ghəə̄ŋ tsəgha enyəa Ŋ̀ ka ghɛ bùghò bwìin kòʼ.

²³Aŋghəa e lo êzəŋ enyəa mùgho m fwàʼ mɛ̀ʼɛ̀ kǎaŋ wô fwàʼ kaŋa ko am mbùʼ zən, àsùghò aŋghəa mùgho mò dîi kêe tsəgha an ndə̀mà tə tənùu alebùghò kôʼ ghɛ̀,

²⁴M̀ ŋgə̀mso kùum mòʼn nù alebəŋo kòʼò daŋa tsəghà ghɛ̀ abugho Ǹ lo nduūw daŋso an naʼ e Spɛ̂ɛn, tò sɛ̀ kê dzeŋe kele tsughu nyàaŋ fə enəgha fə̀ dzûŋ fò a dzə̀m, tò ghɛ̀ e lo alefughu mugho â yòsò zò alendùw daŋso fughu.

²⁵À sò lò ko êzəŋ enyəa Ŋ̀ ki aletsə̀ghà tsughu ndûw dzì an Yɛ̀lusalɛm alendùw fughuu daŋà tsəghà èyòsò â ghì a Kəzə̀ ghəla ghe lo fughu.

²⁶Tɔŋlo enyəa dzeŋe kə ghì a Kəzə̀ chi an Masadonia àsùghò an naʼ e Akɛyà mò ŋgee duʼn nû aletsə̀mà tsughu alechuūw tsughu ukʉa enyəa ghe fughuu ndûw tò eyosò â dzeŋe kə ghì a Kəzə̀ gho ghəla ghe ŋgəmso yo an Yɛ̀lusalɛ̀m.

²⁷Aŋghəa à mò bûʼ tsə̂m tsughu Toʼò zò alefughu eyôso; alekùum nîi tsughu, ghe ki alechuuw ŋgùu kò â Dzùu tò, to ghe e yoso ghee a te. Aŋghəa e lo enyəa Toʼò e mafə kele sugho nwamso wəla Zuʼ tə̀ Zɔlɔ tə fughuu â Dzûu tò, Toʼò e fi ki sugho nû alefughuu Dzûu tò â yòso zò am fʉgha u ghee wəla ghe ki.

²⁸Abugho Ǹ lo mîaso tsughu fwàʼ kən ko, mò mùghò m fùghù nùghù ndùw sùghò fəgha kəla ghe mò chuw tsughu enyəa Nù ndûw fughu â ghee, Ǹ lo daŋso səā nughù tsughu alendùw an Spɛ̂ɛn, Ǹ bəŋo koʼò daŋà tsəghà ghɛ̀ abugho Ǹ nduūw.

²⁹Ŋ̀ kwo tən nû enyəa abugho Ǹ lo bugho fì a vʉ̀a ghɛ̀, Ǹ lo ghəəŋ nù Kə̀lestò lo ŋgeē fughu ghɛ â bughuso zo.

³⁰M̀ buʼu kə̀ghu â ghɛ̀ a waazə̂ ghaŋa gho an zən e Mughu ù te Yɛso Kə̀lestò àsùghò an daʼa kəla Zuʼ tə̀ Zɔlɔ tə fughu â ghɛ̀ enyəa, ghɛ̀ təmadzəəŋ wo mùghò alegɔɔ̄ŋ zee â Zə̀ kò an tuw kaŋa.

³¹Ghɛ̀ e gɔɔ̄ŋ tsughu enyəa ghî a yia ghe lo an Dzùdîa mo ghe kâ bǒo fughu â Kə̀lestò lò so e nomso mùghò. Ghɛ̀ e gɔɔ̄ŋ tsughu sugho enyəa ghî a Kəzə̀ a yi an Yɛ̀lusalɛm e ke lo alo eduʼnlo alekpeēnî fəgha kəla Ǹ so Ǹ ndûw fughu à ghee.

³²Ghɛ̀ e gɔɔ̄ŋ tsughu sugho enyəa mùghò e lo alebùghò sə fi a vʉ̀a ghɛ̀ abugho Zə̀ kə̀ boō dzə, mò fə̀ŋ zaŋa zɔlɔ nù, àsùghò enyəa M̀ bughò zʉ̂ʉn daŋà tsəghà ughue fì èzə̀ sɛ̀.

³³To Zə̀ kəla kə fughuu sɛ̀ â bughuun zo e lo ghɛ̀ a ghee a dzə̀m. Zə e lo ko êzə̀!