Read Aghem Lumà 16 Bible Online

Lumà 16 - Aghem bible

Lumà 16

¹Ǹ so Ǹ dzâa wò â ghɛ̀ enyəa wàazə̀ ù sɛ̀ ù zən wə̄n, tɔɔŋ Fɔebè wəla ù fwàʼa an dzeŋe kə ghì a Kəzə̀ an naʼ e Sɛ̀ɛŋkɛ̀lìa lǒ wìzən ù dzùŋ.

²Ghɛ̀ kpeni wə̄n an zən Mughu ù te aŋghəa ghî a Kəzə̀ a lo aleghəŋlo, ghɛ̀ fughu sugho wə̄n â yòsò zəla ù ləghaa aŋ ghùu ghɛ̀, nù ù ŋ ŋgè yòso ndə̀mà tə aghì tò àsùghò ghuūghùe waŋa wo.

³Ghɛ̀ tɔɔŋ zuw tsughu Pə̀leskà[8] ghèe Akwilà, ghe fwaʼà dzə̌əŋ ghàʼ à ghee am fwàʼ kəla M̀ fwaʼa â Kə̀lestò Yɛso,

⁴Ghe mò buʼ lo nû alekpuw aŋ ghəa zaŋa. Fə̀ŋ zaŋa ŋgee duʼn nù bòʼ ghee — à kà yo ko mugho, dzweŋe u ghì a Kəzə̀ u Etòʼò wən u dzə̀m ŋgěe dùʼn sùghò nù bòʼ ghee.

⁵Ghɛ̀ tɔɔŋ zuw tsughu sugho nlò ghî a Kəzə̀ yi ghe dzeŋe bughò kpenlo an ndugho è ghê Pə̀lèskà ghèe Akwilà. Yìa Ǹ tɔɔ̄ŋ wô sughò Epaenetùs, fən waŋa wəla Ŋ̀ ŋgeē ləghaa, ù fə̀ lo ghùw ù sûesʉ aleboō fughu â Kə̀lestò am mbùʼ Ɛshìa e dzə̀m.

⁶Ghɛ tɔɔŋ zuw tsughu Mèle, wəla ù lǒ mò ù ŋ ŋgè fwàʼ â ghɛ̀.

⁷Ghɛ̀ fughu nduw sugho tɔɔŋ zaŋa zo â Andə̀lonikùs ghèe Dzunìyas, fən ghaŋa ghəla ghe lô sugho Dzûu tò, tò mugho, ghe ghəla ghàʼ à ghee fə̀ lo a dzə̀m an ndùghùtsaʼ. Ghe lò kɔ tə aghì am bvʉa e tum tə Kə̀lestò, mo à fə̀ boo fughu ghee esə̄ â Kə̀lestò, sěe mùghò.

⁸Ghɛ̀ tɔɔŋ zuw tsughu sugho Ampə̀lǐatùs, fən waŋa u dzùŋ wəla ghàʼ à wə̄n dzeŋe lo alo kəfəgha kə mɔ̀ʼ â Mughu ù te.

⁹Ghɛ̀ fughu nduw tɔɔŋ zaŋa zo â Ubanùs ghùw ù kəfwàʼ ù Kə̀lestò wəla ù fwàʼà dzəə̄ŋ sɛ̀ à ghee, àsùghò â Stachìs, fən waŋa wəla Ŋ̀ ŋgeē ləghaa.

¹⁰Ghɛ̀ tɔɔŋ zuw tsughu Apelès wəla ù tɔ̂ʼ dê sə wô ghue wo enyəa e boo fughu â Kə̀lestò. Ghɛ̀ tɔɔŋ zuw tsughu sugho kèndughu kə Àlìstobulùs kò.

¹¹Ghɛ̀ tɔɔŋ zuw tsughu ghùw ù enaʼ waŋā tɔɔŋ Helodìon. Ghɛ̀ tɔɔŋ zuw tsughu sugho ghî yia ghe lo an ndughu alô Nasissùs, ghəla ghe lô fəgha ko kə mɔ̀ʼ ghèe ghê Mughu ù te.

¹²Ghɛ̀ fughu nduw sugho tɔɔŋ zaŋa zo â Təlifaena ghèe Təlifosà ghəla ghe lo mo ghe ŋ ŋgè fwàʼ â Mughu ù te. Ghɛ̀ tɔɔŋ zuw sugho fən waŋa Pesìs, wəla Ŋ̀ ŋgeē ləghaa, wìzən wəla ù lǒ mò ù ŋ ŋgè fwàʼ ndə̀mà tə aghəa to â Mughu ù te.

¹³Ǹ tum wò sughò ètɔŋlo â Lufùs wəla Mughu ù te fə̀ tsɔʼ sə wo, ghèe zə̀ wəla ù fə̀ lô sugho tò nughò.

¹⁴Ghɛ̀ tɔɔŋ zuw tsughu Asìŋkə̀litùs ghèe Phə̀legòn, àsùghò Helmes ghèe Pàtə̀lobas àsùghò Helmas ghèe ghê wɛ a Kəzə̀ a li yia ghe lo ghèe ghee.

¹⁵Ghɛ̀ fughu nduw tɔɔŋ zo â Fìlòlogùs ghèe Dzulìa àsùghò Nɛlèus ghèe wàazə̀ ù zən vʉ̀, asugho Olìmpas ghèe ghê ghî a Kəzə̀ a li yia ghe lo ghèe ghee.

¹⁶Ghɛ tɔɔŋ zuw tsughu nlo ghue zɛʼɛ zo am fə̀ŋ tə̀ zɔlɔ to. Ndzweŋe u ghì a Kəzə̀ wən u dzə̀m fùghù wò ghɛ̀ â tɔɔŋ zo an zə̀n e Kə̀lestò.

¹⁷Waazə̂ ghaŋa gho, ghəa zəla Ǹ naam ki aledzɛ̀ wô â ghɛ̀ lo enyəa, ghɛ tsʉ naŋa kɔʼ sə ghɛʼɛ gho a zəŋo ghì ghəla ghe ghəŋlo enyəa ghî ghə̀ e tsɔɔ̄n kaaŋ tuw wo, ghe ŋ ghəŋlo ghùw n yo aletɔʼɔ tee am boo e wən. E kwo ko ghɛ̀ lo boōm naāŋ ŋgòʼ è ghì a te gho, nu ghe nîi wô aghəa mo a boom dzəəŋ yo ghèe fəgha kəla ghe mò zoʼn ghɛ a te.

¹⁸Ŋgòʼ è ghì a te gho fwaʼà dzə̀ yò â Mughùbè ù sɛ̀ Kə̀lestò, e ghee lò ko alekə̄ŋ buʼ kə unʉ̀ghà kə ghee. Ghe koʼò tsùghû ghì ghəla boo e ghee e lo mo e tɔ̂ʼ tì yo, ghe ni kɔʼ kpə̀ŋòkpə̀ŋ tə ushwaʼ tsèe ghee a te ghe n nəghaan sùghò ghe alo kənōm.

¹⁹Aghî a dzə̀m kǔuwn kwo nû enyəa ghɛ̀ zuuw nù â Mughu ù te. Ghəa a te yia a ghəə̄ŋ mugho, yìa Ŋ̀ ŋgeē duʼnlo. Ǹ ləghaa enyəa ghɛ̀ è ki tɔ wo aleghəəŋ təla ko ghəa a dzûŋ ghò, àsùghò enyəa ghɛ̀ e ki yo ghu ko aŋ ghəa à biigh gho.

²⁰Zə kəla kə fughuu sɛ̀ â bughuun zo lo kùʼù foʼso màʼn nù Satàn, kə lo ghəəŋ tsughu ghɛ̀ e ki daʼa ko a zəŋò wə̄n. Gɔ̂ɔŋ zaŋa e lo enyəa to Mughùbè ù sɛ̀ Yɛso Kə̀lestò mo dè ghɛ a dzɔɔ e wə̀n zo.

²¹Timotì, ghùw ù kəfwàʼ waŋa tum wò ghɛ̀ â tɔɔŋ zo. Lusìus ghèe ghê Dzasòn àsùghò Sòsispatà tɔ̌ɔŋ zùw wò sùghò ghɛ̀.

²²À lò mugho Tesius wəla n tɔm fughu tsughu mwàʼsò kən ko â Pôl, M̀ fughuu wò sùghò ghɛ â tɔɔŋ zò an zən e Mughu ù te.

²³Gayòs wəla M̀ mughu alo wə̄n, mò à lò sugho a fughu an ndughu ghî Kəzə̀ à bughò təmadzəŋlo dzɛ enyəa Ǹ tɔɔŋ zuw wo sughò ghɛ̀. Elastas wəla u naaŋ kəaa kə kua u enaʼ ko ghèe wàazə̀ ù sɛ̀ Kwatùs fughuu wò sùghò ghɛ̀ â tɔɔŋ zo.

²⁴[Gɔ̂ɔŋ zaŋa e lo enyəa to Zə̀ kə̀ mo dê ghɛ̀ â dzɔ̀ e wə̄n zo am bàm e Mughùbè ù sɛ̀ Yɛso Kə̀lestò. Zə e lo ko êzə̀.]

²⁵To sɛ̀ mô fùghuu ŋkɔʼso â Zə̀ kò. Kə lo nû aleghəŋlo enyəa ghɛ̀ è tɔʼ ti am boo zɛʼɛ̄ â wə̄n aŋghəa ghɛ̀ zoʼn kele kɔʼ Làbəlà e dzùŋ zəla Ǹ zughòo naʼn fɛ ezən. Làbəlà zən kùu ndùw Yɛso Kə̀lestò n dè fùghù sə̀ wò nàn kə eghəa kəla Zə̀ kə fə̀ ki nân naŋa â wîiwì.

²⁶Yia a bughò êzəŋ, tò aŋghəa ghiīshʉ̀ghà a fə̀ a dzɛ̂ zîi naŋa, asùghò aŋghəa Zə kəla kə doʼò tən dzɛ̀ tsughu enyəa, shwaʼ wən lo â Naʼà tə mbī to tə dzə̀m, enyəa abugho ghe zuw shwaʼ u te wo, ghe e lo aleboō fughu â Kə̀lestò, ghe e zuuw nduw â wə̄n.

²⁷To sɛ mô fùghuu ŋkɔʼso â Zə̀ kə̀n kə̀ mɔ̀ʼ kə ki tɔ wo u dzə̀m am bàm Yɛso Kə̀lestò to mbī kə̂ bughò mîaa. Zə e lo ko êzə̀!