Read Aghem Lumà 2 Bible Online

Lumà 2 - Aghem bible

Lumà 2

¹ À fi lo enyəa dzì è lì yo dzə̂ â ghù aletiī sə a te abugho ghù saʼa nduw ghùw aŋ ghəa a biigh ghəla ù ghəŋlo, dèe ezə̀ mo ghuūghùe wʉa ù ghəəŋ sùghò ghəa e mɔʼɔ̄ zo. Ghù fi tsɔ̂ɔ sùghò nyʉ zə̀ghà an ŋgɔ̀ʼ aŋghəa ghù ghəə̄ŋ sughò ghəa à mɔʼɔ̄ a te gho.

²A kwo nû enyəa Zə̀ kə̀ nyɔʼɔ̀ ghə̌əŋ nù abugho kə saʼâ ghî ghəla ghe ghəə̄ŋ ŋgòʼ è ghəa ghən.

³Ghù moʼnlò enyəa abugho ghù saʼa ghùw alo aghəa mo ghuūghùe wʉ̂a ù ghəəŋ sùghò ghəa e mɔʼɔ e te zo, abugho Zə̀ kə̀ lo saʼa ghî gho kə lo kuuwn baʼà naŋa səa kɔʼɔ ghû a?

⁴Kàa ghù so yia tsughuso maʼn nù dzɔ̂ e Kəzə̀ e ne zò àsùghò se e wə̄n e kwuso zo àsùghò aŋghəa kə naām lɛɛn ghù a? Ghù kwo yo enyəa dzɔ̂ e Kəzə̀ e lo aleghəŋlo enyəa ghɛ̀ ti kuwnlo am bòo tɛʼɛ a?

⁵À so kuuwn lo ko enyəa ghɛ̀ ki tùghùtùghù u tə fə̀ŋ wəla u ghəŋlo ghɛ yia zuuw yo ghəa gho. Ghəa a te a ndɔɔŋ kɔʼɔ ndùw nù aŋghəa Zə̀ kə lo dêe nʉgha u wə̄n ù pfʉa wo a te an tsuʼ wəla kə lo saʼā saʼ e wə̄n è tsəghatsəgha.

⁶ Zə̀ kə lo nyoʼn dzə̀là ndùw ko ndzə̀ŋ fə̀ ghûw aŋghəa fwàʼ kə wə̄n kə deē.

⁷Ghî ghəla ghe kəŋo alekele zən e dzûŋ zo, ŋkɔʼso àsùghò mùghù zəla e mian koʼo yo aŋghəa ghe ghəə̄ŋ zeē ghəa a dzûŋ ghò, Zə̀ kə lo â ghe fughuu mùghù è doʼn təla zo.

⁸Yia kuuwn bugho â ghì ghəla ghe kwo tsughu ko ghue e ghee zo, ghuu màʼnlo e sə̀ŋò, kuuwn tughuu nyəa ndùw aŋ ghəa biigh gho, ghe lo kòʼò tsughuu nyə aŋ ghùu fɛ̀ɛn kə nʉ̀ghà u Kəzə̀ ù pfʉa wo.

⁹Ghî ghən a dzə̀m ghe ghəəŋ ghəa a biigh gho kê lò an utsù, ghe e koʼo fə̀tsʉ̀e an ghùu Zə̀ kò, mo ghe kaʼ nùghù tsùghù a zəŋò Dzûu tò, ghe daŋso tsughu ndûw a zəŋò ghì ghə̀la ghe yô Dzûu tò[2]:

¹⁰Ghî ghən a dzə̀m ghe ghəəŋ ghəa à dzuŋ ghò Zə̀ kə̀ lo ghəəŋ nù ghe e ki kɔʼso mò, ghe e mughu alo nsəghanyəgha àsùghò alo ebughunlo, mo ghe kaʼ nùghù tsùghù a zəŋò Dzûu tò, a daŋso tsùghù ndûw a zəŋò ghì ghə̀la ghe yô Dzûu tò.

¹¹ Nu Zə̀ kə̀ bâa yo kpii wo.

¹²Ghî ghəla ghe yô Dzûu tò kwo yo lâŋ kə Musî kò. Abugho ghe ghəəŋ tsughu bo zo, ghe naam ləŋe ko nù aŋghəa ghe mo bûʼ kwo ko yo lâŋ kə Musî kən ko. Dzûu tia tə ki lâŋ kə Musî kò, abugho ghe ghəə̄ŋ tsughu bo zo, Zə̀ kə̀ n saʼ ghee aŋ ghəa lâŋ kə te kə deē.

¹³Tɔŋlo enyəa a yo dzə̂ ghî ghəla ghe zhəən ko lâŋ kò ghe lô tsəghatsəgha an sə kə Kəzə̀, à lǎam lò ghî ghəla ghe naaŋ lâŋ kò ghe lô tsəghatsəgha an sə kə Kəzə̀.

¹⁴Ghî ghəla ghe yô Dzûu tò ki dzə yo lâŋ kə Musî kò. Abugho fə̀ŋ tə ghee tə ghəŋlo enyəa ghe ghə̂əŋ ghəa zəla e boō dzəə̄ŋ ghè làŋ kò aŋghəa ghe bûʼ ki ko yo lâŋ ko, e fi dêe enyəa ghe kwo nû ghəa zəla ghe ki aleghəŋlo àsùghò zəla ghe ki yo aleghəŋlo aŋghəa ghe bûʼ ki ko yo lâŋ kò.

¹⁵Mwam e ghee e dee nù enyəa fəgha kəla lâŋ kə̀ ləghaa lo nû am fə̀ŋ tə ghee. Dzì zəla ghe lɛɛ̄n ghəa gho a te dêe nù enyəa lâŋ kə̀ kûum lò nû am fə̀ŋ tə ghee aŋghəa moʼnlò e ghee bughoo an nə̀gha e li zo zə ŋ kɔ̀n tsughu ghee, an nəgha è li zo zə n dzɛ̀ â ghee enyəa ghe n ghəəŋ dzɔ.

¹⁶Ghəa ghən lô bəla kə nîi abugho tsuʼ fəla Zə̀ kə kê saʼa ghî ghò a te am bàm e Kə̀lestò Yɛso an nàn tə aghəa tə ghee. Zən lǒ Làbəlà zəla Ǹ zughòo naʼnlo, è dèe êzə̀.

¹⁷Ghɛ̀ ghəla ghɛ̀ dzɛ̂ enyəa ghɛ̀ lo Tə̀dzûu, ghɛ̀ tsəghà tə̀ŋò dòʼò tsughu an làŋ kə Musî, ghɛ̀ yia tsɔ̂ɔ sugho fə̂ŋ tò enyəa ghɛ̀ lo ghî a Kəzə̀.

¹⁸Ghɛ̌ yia kwo fəgha kəla Zə̀ kə̀ ləghaa enyəa ghɛ̀ è ghəŋlo, ghɛ̀ yia kwo sugho êsəŋò, bòʼ ghɛ̀ n zoʼn kele lâŋ kə Musî kò.

¹⁹Ghɛ̀ yia tɔ̂ʼ kwo sugho enyəa ghɛ̀ lo ghî ghəla ghɛ̀ deē dzì â ghì ghəla ghe kwo yô lâŋ kò, asugho enyəa ghɛ̀ lo tǒ tsə̀ a ghì ghəla ghe lo alo kələm,

²⁰kwo sugho enyəa ghɛ̀ lo ghî ghəla ghe fughuu tsʉ zo â ghì à laʼso gho, zoʼn sughò wɛghêtùghu Ghɛ̀ yia kwo sughò enyəa lâŋ kə Musî kə̀ dêe nù ghɛ â ghəa ghə̀n a dzə̀m ghɛ̀ ki alekele kùu ndùw ghəa zəla e lo êsəŋo.

²¹Ghɛ̀ sô zoʼn ghî gho aŋ ghəa ghən, ghɛ̀ kuuwn yò alezoʼn ghue zɛʼɛ a? Ghɛ̀ sô zoʼn ghî ghò enyəa ghe ka e tsɔŋɔ a, à sò lǒ kwò ghɛ̀ sô kôom tsɔŋɔ kaŋlo a?

²²Ghɛ̀ zoʼnlo aghì enyəa ghe ka sə nùŋlò, a lǒ mò ghɛ̀ nûuŋ kǎaŋ yo? Ghɛ̀ dzɛ enyəa ghî a ka e kɔʼso muʼu mò, à lǒ mò ghɛ̀ kuuwn tsɔŋɔ gbɛlɛ̀ kaaŋ tsəgha ndughu təla mùʼù n lo a te.

²³Ghɛ̀ tsɔ̂ɔ tə̀fə̀ŋ enyəa ghɛ̀ kwo nû lâŋ kə Musî kò, a sò lò kwo ghɛ̀ fughuu tuw kə̀ dəla ko â Zə̀ kò aŋghəa ghɛ̀ kôom bvʉ̂sò maʼn lâŋ kò a?

²⁴ Ghe tɔm naŋa an Mwàʼsò kə Kəzə̀ enyəa, “Ghî ghəla ghe yô Dzûu tǒ Zə̀ kə̀ fɛ shuwnlò mò à lò ghɛ a Dzûu tò.”

²⁵Abugho ghe sugho tsughu tigh kə ghûw kò, a lò ghəa e dzûŋ zò abugho ghùw u te bwîi aŋghəa lâŋ kə Musî kə̀ deē, abugho ghue u ghùw u te ù bwìi yo alo kəlàŋ, a mo soō to ghe mo biso sugho dzə̀ tigh kə ghûw u te.

²⁶Abugho ghùw wəla ù yô dzə ghùw ù Tə̀dzûu naaŋ lâŋ kə Musî kò mo ghe kâ bùʼ sùgho ko tigh kə wə̄n ko, a fi lo enyəa Zə̀ kə̀ lo nû alenaam nî enyəa ghe n sugho tigh kə ghùw ù te ko:

²⁷E fi lo enyəa abugho ghùw wəla ghe tâʼkè sugho tigh kə wə̀n kuuwn bwîi aŋghəa lâŋ kə Musî kə̀ deē sô sàʼa nù ghû ghùw ù Dzûu enyəa ghù ŋ ghəəŋ bo zo, tɔŋlo enyəa ghù kǐ mwàʼsò kə̀ kəlàŋ ko aŋ ghu kə̂a, ghe yia lô sugho mo ghe n sugho tigh kə̂a kò, ghù vʉ̀a ghù kuuwn bvuʼu lâŋ kò.

²⁸Tɔŋlo enyəa ghɛ̀ tɔ̂ʼ yo ko Dzûu tò aŋghəa ghɛ̀ feēn Dzûu to, sugho e kətigh e ghûw zə e ka yò ko aŋghəa lâŋ kə̀ deē.

²⁹ E kuuwn lò enyəa ghùw ù Dzuu kà yò ko aŋ gûw è ùghùe, ù bǎa lò ghùw Dzûu am fə̂ŋ zəla ù gaʼ tsughu a zəŋò Zə̀ kò. Ghəa à sughoo a kətigh a ka yò ko aŋ gûw è ughùe, ghəa a te a nîi sùghò kəbəla am fə̂ŋ è ghùw, mò ghəa a te a bughoo an dzii tə ushʉ̀ghà u Kəzə̀, à kà yò ko aŋghəa ghe tɔm naŋā alo kəlàŋ. Kɛɛ u ghûw u te u nughuun wo dzə̀ yò aŋ ghulô ghùw. À lò Kəzə̀ kə fughu wə̄n â kɛɛ wo.