Read Aghem Lumà 3 Bible Online

Lumà 3 - Aghem bible

Lumà 3

¹À lo ŋgè lò nu dzɔ̀ alelo ghù ù Dzûu tsə̀ghasə alelo ghî ghəla ghe yô Dzûu tò zo a te a? Ŋkāa namso kə̀ li kə lo nû ghùw kele abugho ghe sugho tsughu tigh kə wə̄n ko a?

²Òo, ghəa a te a lo ndə̀m. Alekaʼa nughu tsughu, ghe fə̀ lâŋ kə Kəzə̀ kə̀ fughu naŋa aŋ ghùu Dzûu to.

³À fə̀ sə kə kwò aŋghəa ghee à li a tɔ̂ʼ tì yo am boo e ghee a? Aŋghəa ghee à li a fə̀ taʼkè ghə̂əŋ ghəa ghəla ghe fə̀ boō naŋa aleghəŋlo, e fə lo nû enyəa Zə̀ kə̀ yo sugho aleghəə̄ŋ ghəa ghəla kə fə̀ to naŋa a?

⁴ Ɛ̂ŋgaŋ dzə̂, e dɔ̂m yò aledòʼò ezə̀. Zə̀ kə̀ lo tsəghatsəgha, abugho aghî a dzə̀m bùʼ kaʼn mɛʼɛ̀ nduw ko gha gho: to aŋghəa ghe tɔm naŋa am mwàʼsò kə Kəzə̀ enyəa, “Ghù ki aledèe tsughuu enyəa ghù lò tsəghatsəgha abugho ghù kə̀aa ghəa gho, mo ghe nî nduw ko ghù an tia e saʼ, ghù n saʼ e zə.”

⁵Ghî a li a lo nû aledzɛ̀ enyəa abugho a ghəəŋ boo zo, ghî ghə̀ n lo alekòʼ enyəa Zə̀ kə lo nû tsəghatsəgha. A lo nû aledzɛ̀ enyəa, Zə̀ kə ghəəŋ boon nù abugho kə dêe nʉgha u wən ù pfʉa wo a zəŋò sɛ̀ a? (Ŋ̀ ghəa ghən gho enyə kə̀aa an dziī è ghùw nsɔ̌ɔŋnchùw).

⁶Ɛ̂ŋgaŋ dzə̂! Abugho e lo êzə̀, Zə̀ kə̀ làʼa so mbī kuuwn bòʼò saʼa ènzə̂n?

⁷Ghî a li a lo aledzɛ̀ enyəa, “Abugho gha ghaŋā à kaʼnlo a ghəŋlo enyəa Zə̀ kə̀ kele ŋkɔʼso an səŋò e wə̄n, à sò lǒ kwò ghe naam dzâa ko enyəa Ǹ lo ghùw ù bǐigh a?

⁸À lǒ kwò a yo aledzàa tsughu enyəa, bùghò tò sɛ̀ e ghəəŋ nduw ko bo zo a, tò dzɔ̂ e lo sə kɔʼ a te a?” Ghî a li a ŋgaam nɔ̀m wo ndzɔŋ am bì zaŋa enyəa à lo mugho Ŋ̀ kə̂aa ghəa ghən gho. Ŋgòʼ e ghì ghən kpe nû â Zə̀ kò alefɔeso ghee.

⁹A èzəŋ lo to a e dzɛ̂ èndugho? A lo nû aledzɛ̀ enyəa sɛ̀ Tə̀dzûu kuuwn nyɔ̀ʼ ti nû à? Ɛ̂ŋgaŋ dzə̂, tɔŋlo enyəa M̀ maa ki dzɛ̀ enyəa ghəa à biigh ghə ŋ kwù ŋgwùu ghî ghò a dzə̀m; Tə̀dzûu àsùghò ghì ghəla ghe yô Dzûu tò.

¹⁰ Ghe tɔm naŋa am Mwàʼsò kə Kəzə̀ enyəa, “Ghùw u li yo dzə̂ ù lo tsəghtsəgha, u mɔ̀ʼ kɔʼkɔʼ ŋgəmso yo dzə̂.

¹¹Ghùw u li yo dzə̂ ù zuūwkɛlɛ ghəa zəla e lo tsəghatsəgha, ŋkāa ghùw li yo dzə̂ ù lò aletɔ̀ʼɔ̀ fughuu mɛʼɛ̀ tsughu ŋkɔʼso â Zə̀ kò enyə kpekpe.

¹²Aghî a dzə̀m ghə̀ n nyuʼu dzəm to a zəŋò Zə̀ kò, ghe yia a ghəə̄ŋ boōn ndûw ghəa gho. Ghùw ù li yo dzə̂ ù ghəəŋ ghəa zəla e lo tsəghatsəgha, u mɔʼ kɔʼkɔʼ enyə ŋgəmso yò.

¹³ Shwaʼ wəla u səā wo an dzughu a ghee tɔɔŋ wò evʉ, ghe yia tsêe ghî gho aŋ ghəa a ghee à kəaa gho. Ghəa a ghee à kəaa a lo ko tǒ no zughu tsəā səā wo.

¹⁴ Ghe tsɔ̂mlò aghì, kə̀aa kaaŋ tsə̀ghà sùghò shwaʼ ù biigh wo.

¹⁵ Ghe nyômlò â ghu kə̀ wii kə aghì ko.

¹⁶Ghî a te ndûuw ko ghɛ, ghe m boon màʼnlò àghəa, ghî ghə̂ n dînlò.

¹⁷Ghe kwo dzə yo aleghəŋlo enyəa bughuun zə e lo am bvʉa zə aghì.

¹⁸ Ghe tsoo tsəŋo yo Zə̀ kò aŋ ghəa è li zo.”

¹⁹Sɛ̀ mo èzəŋ kele enyəa abugho lâŋ kə Musì kə̀ dzâa ko êndùghō, kə dzâa ndùw â ghî ghəla ghe mughu â tsəlà làŋ kə te ko. Mò à èzə lo alefèe naŋā dzughu a ghee a dzə̀m enyəa ghe ka e dzaā kaaŋ tsəgha enyəa ghe lo tsəghatsəgha, àsùghò enyəa Zə̀ kə̀ lo saʼa àghì a dzə̀m am mbī.

²⁰ Zə̀ kə lo dzàa dzə̀ yò enyəa ghùw ù lì lò tsəghatsəgha bòʼ enyəa ù mò tɔʼɔ̀ naaŋ tsəghà lâŋ kò, nu lâŋ kə̀ ghəəŋ nù ghùw ŋ kele enyəa e ŋ ghəəŋ bo zo.

²¹Ezə̄ŋ, Zə̀ kə̀ n dzì è wən zəla ù naāŋ ghî gho a te tsəghatsəgha a vʉa wə̄n dê fughu wò, mò à yò dzə aŋghəa lâŋ kə̀ deē, aŋghəa e bûʼ lo ko enyəa lâŋ kə Musî àsùghò ghiīshʉ̀ghà a Kəzə̀ à teso dzâa ghəa a te gho.

²² Zə̀ kə̀ ghəŋlo enyəa ghî à dòʼò tsəghatsəgha a vʉ̀a wə̄n abugho ghe boō fughu tsughu â Yɛso Kə̀lestò. Zə̀ kə̀ ghəŋlo enyə â ghì ghən a dzə̀m ghe boō fughu â Yɛso Kə̀lestò, mò nəŋo nəŋ yo a te

²³Nu aghî a dzə̀m m bo e ghəŋlo, ghe yia bvʉ̂ kômlo aledòʼò an səghanyəgha ŋ Kə̀zə̀.

²⁴Zə̀ chia kə ghəəŋ tsughu an dzɔ̀ e wə̄n enyəa ghî a doʼo tsəghatsəgha a vʉ̀a wə̄n. Kə fə̀ enyə ghəəŋ tsughu aŋghəa Kə̀lestò Yɛso fə̀ bughò zue sə wô tuw u aghì wò mo ghî kâ fəgha kə̀ li ko a te tsə tsə̀ghà ndùw.

²⁵Wə̄n wəla Zə̀ kə fə̀ nî fughu sə wo enyəa ù bùghò kpuw vʉ e kəmùwnlo to kâŋ tə wən tə sûuw maʼa bòo tə aghì ghəla ghe boō fughu â wən. Zə̀ kə fə̀ enyə ghəŋlo aledèe tsughu enyəa kə lo tsəghatsəgha. Nu â wǐiwǐi, kə mò kɔɔn tsughu fə̀ŋ, kə̀ n tsò zhə̌ən zə̀ghàa sùgho bòo tə aghì.

²⁶À fə̀ lo aledèe tsughu êzəŋ enyəa ghuūghùe u wən u lo tsəghatsəgha àsùghò enyəa à lǒ wə̄n ù ghəŋlo enyəa ghùw bùghò dòʼò tsəghatsəgha a vʉ̀a wə̄n bòʼ boo zəla ghùw ù te ki â Yɛso.

²⁷Sɛ̌ ezə̄ŋ ki aletsɔ̀ fə̀ŋ aŋ kwo a? Fəgha kə̀ li kə tso yò. À lǒ kwò a sô yo aletsɔ̀ fə̀ŋ a? À lò enyəa sɛ̀ tɔʼɔ̀ bwìi aŋghəa lâŋ kə Musî kə̀ dêe ŋkāa? Ɛ̂ŋgaŋ dzə̂, à lǒ bòʼ fə̀ŋ zəla sɛ̀ gaʼ tsughu a zəŋò Zə̀ kò.

²⁸Tɔŋlo enyəa a n tɔʼn kele sə kɔʼ enyəa à lò ko fə̀ŋ zəla sɛ̀ gaʼ tsughu a zəŋò Yɛso e ghəŋlo enyəa ghùw dòʼo tsəghatsəgha a vʉ̀a Zə̀ kò, mò a yò dzə bòʼ enyəa ghùw tɔ̀ʼɔ bwìi aŋghəa lâŋ kə̀ deē.

²⁹Alenìi tsughu, à lo mò Zə̀ kə̂ ka lò ko kə Tə̀dzûu kò, chia kə kuūwn buw kə Ghì ghəla ghe yô Dzûu tò à? Ɛ̂ŋgaŋ dzə̂, kə ka yò ko kə Tə̀dzûu tò, kə lo sugho Zə̀ kə ghì ghəla ghe yò Dzûu tò.

³⁰ Zə̀ kə̀ lo ko kə mɔ̀ʼ, e fi lo enyəa kə lo ghəəŋ nù enyəa Tə̀dzûu àsùghò ghì ghəla ghe yô Dzûu tò dòʼò tsəghatsəgha a vʉ̀a wə̄n an dzì è mɔ̀ʼɔ bòʼ fə̀ŋ zəla ghe gaʼ tsughu a zəŋò Yɛso.

³¹E sò yia fɛ mòʼnlò enyəa lâŋ kə̀ kôom yò aŋghəa a boō fughu dzə â Yɛso Kə̀lestò à? Ɛ̂ŋgaŋ dzə̂, e laam lò enyəa a n lueso lâŋ kə te ko.