Read Aghem Lumà 4 Bible Online

Lumà 4 - Aghem bible

Lumà 4

¹A lo aledzàa tsughu êndūghō kùu ndùw Abə̀làhâm, tsele ù ghê tsele ghaʼa a? Ù fə̀ zoʼn kele kɔʼ êndūghō?

²Abugho e mò lo enyəa Abə̀làhâm fə̀ tsəghatsəgha a vʉ̀a Zə̀ kə̀ doʼo mò à lò fwàʼ kə wə̄n, to ù mò ki ghəa è li zo ù tsɔ̌ɔ fə̀ŋ a te, mò à kǔuwn yo dzə a vʉ̀a Zə̀ kò.

³ E lo am Mwàʼsò kə Kəzə̀ enyəa, “Abə̀làhâm fə̀ boo fughu tsughu â Zə̀ kò, Zə̀ kə̀ nì ndùw wən enyəa ù lǒ ghùw ù tsəghatsəgha.”

⁴Abugho ghùw fwàʼ tsughu, ghe n tsə tsughu wə̄n, ghe nîi dzə̀ yò enyəa à lò kənamso, à lǒ bòʼ fwàʼ kə wə̄n kəla ù fwàʼ tsughu.

⁵Ghe kuuwn nìi dzə̀ yǒ ghùw enyəa ù lò tsəghatsəgha am fwàʼ kə wə̄n, à lǒ bòʼ fə̀ŋ è wə̄n zəla ù gaʼ tsughu a zəŋò Zə̀ kəla kə nîi kɔʼɔ̄ ghùw ù bǐigh kə n naŋa wò aŋ ghùw ù tsəghatsəgha.

⁶Dɛvìd fə̀ bɔɔm kəaa sugho ghəa e mɔʼɔ̄ zo aŋghəa ù fə̀ teso dzâa tsoʼnlo e ghùw wəla Zə̀ kə̀ nî enyəa ù lò tsəghatsəgha mò à yo dzə bòʼ fwàʼ kə ghûw u te enyəa:

⁷ “Dzɔ̀ lò â ghì ghəla Zə̀ kə̀ lo mo kə ŋ ghuuw màʼà ghəa a ghee à biigh gho, ghee ghəla Zə̀ kə̀ nî zə̂ sughò bôo tə ghee tə dzə̀m.

⁸Dzɔ̀ lò â ghùw wəla Mughu ù te lo kôom nîi yo bôo tə wə̄n to an taŋ.”

⁹À lò enyəa dzɔ̀ kà lo ko â ghùw wəla ghe lo mo ghe n tigh kə wən kə sugho ŋkāa? Ɛ̂ŋgaŋ dzə̂, dzɔ̀ lò sugho nû â ghùw wəla ghe lo mo ghe kaām kə wən ko kətigh n sugho. Sɛ̀ dzɛ̂ enyəa Abə̀làhâm fə̀ doʼo tsəghatsəgha a vʉ̀a Zə̀ kò bòʼ fə̀ŋ zəla ù gaʼ tsughu a zəŋò Zə̀ kò.

¹⁰Ghəa a te a fə̀ sə zən? À fə̀ lo mo ghe n sugho tigh kə wən ko ŋkāa mo ghe kaām sugho a? À fə̀ lo mo ghe kaam tigh kə wən kə n sugho dzə̀.

¹¹ Ghe fə̀ tigh kə Abə̀làhâm kə̀ bugho sugho tsughu tǒ tsə̌a enyəa ù lo ghùw ù fə̀ ki gaʼ fə̀ŋ a zəŋò Zə̀ kò, Zə̀ kə̀ n nì ndùw wə̄n aŋ ghùw ù tsəghatsəgha bòʼ fə̀ŋ zəla ù fə̀ naŋa a zəŋò Zə̀ kò mo ghe kaām tigh kə wən kə m bûʼ sugho. Zən fə̀ lo aledèe tsughu enyəa Abə̀làhâm lǒ tsele a zəŋò ghì ghən a dzə̀m ghe lo boōm Zə̀ kò, Zə̀ kə̀ lo nîi ndûw ghe enyəa ghe lo tsəghatsəgha mo ghe kaām tigh kə ghee kə m bûʼ sugho.

¹²Abə̀làhâm lò sugho tsele â ghî ghəla ghe lo mo ghe n tigh kə ghee kə sugho, mo e kâ tsò mìaa tsughu ko enyəa ghe sugho tsughu tigh kə ghee. Mo e lo nu enyəa ghùw ù te gaʼ sùghò fə̀ŋ è wə̄n a zəŋò Zə̀ kò tò Abə̀làhâm fə̀ gaʼ a te aŋghəa ghe fə̀ lo mo ghe kaām tigh kə wən kə m bûʼ sugho.

¹³ To kəla Zə̀ kə fə̀ to naŋa â Abə̀làhâm ghèe ghê waawɛ a wə̄n gho, enyəa à kè mbī e dzə̀m ki ghee fə̀ yo dzə̂ bòʼ Abə̀làhâm fə̀ zuūw lâŋ kò. À fə lo bòʼ fə̀ŋ zəla ù fə̀ gaʼ tsughu a zəŋò Zə̀ kò, Zə̀ kə̀ n nì ndùw wə̄n an tāŋ enyəa ù lò ghûw ù tsəghatsəgha.

¹⁴ Abugho e lo enyəa à fəgha kə̀là Zə̀ kə̀ to naŋa à ki alezə ghuw wəla ù zuuw lâŋ kò, e fi lo enyəa fə̀ŋ zəla ghe gaʼ tsughu a zəŋò Zə̀ kò kì dzə yo fwàʼ ko, asugho enyəa to kə Kəzə̀ kə̀ tsô lò ko dzughu è fughuu zo.

¹⁵Tɔŋlo enyəa, luʼu kəla lâŋ kə̀ lo a te, Zə̀ kə n dêe nʉ̀ghà u wə̄n u pfʉa wo a zəŋò ghì ghəla ghe bvʉ̂sò màʼn lâŋ kə te ko. A m bùghò luʼu kəla lâŋ kə̀ buw a te, ghù yò dzə̂ alezuw enyəa ghùw bvʉ̀ kə̀lâŋ fùghù èzə̀.

¹⁶Zə̀ lò e ghee à mìaa ko fə̀ŋ zəla ghùw gaʼ tsughu a zəŋò Zə̀ kò è ghəŋlo enyəa ù kele dzɔ̀ e Kəzə̀. Dzɔ̂ zən fɛ lo tǒ tsə̌a aledèe wô enyəa Zə̀ kə̀ lo ghəəŋ nù ghəa ghəla kə fə̀ to naŋa â waawɛ ghə Abə̀làhâm ghò a dzə̀m — ghəla ghe gaʼ tsughu fə̀ŋ a zəŋò Zə̀ kò tò aŋghəa Abə̀làhâm fə̀ gaʼ sugho fə̀ a zəŋò Zə̀ kò a te. E ka yò ko â ghì ghəla ghe zuuw lâŋ kò, mo dzɔ̂ e te e lo sugho â ghì ghəla ghe gaʼ sugho fə̀ŋ a zəŋò Zə̀ kò tò Abə̀làhâm, tɔŋlo enyəa Abə̀làhâm lo tsele ù sɛ̀ a dzə̀m.

¹⁷ To aŋghəa ghe tɔm naŋa am mwàʼsò kə Kəzə̀ enyəa, “Mùghò ŋ ghəŋlo enyəa ghù è lo tsele â ndə̀mà tə tənàʼà.” To kən kə lo êsəŋò a sə̌a Zə̀ kəla Abə̀làhâm gaʼ fə̀ŋ a zəŋò ghè kò. Zə̀ kəla abugho ghùw kpuw ko nù, kə n zòm nàŋa wò ghùw u te ebàm. Mo fəgha kə yo tsəgha ko nu, kə n ghəəŋ tsughu enyəa kə səa kɔʼ, kə e lo.

¹⁸ Abə̀làhâm fə̀ gaʼ fə̀ŋ a zəŋò Zə̀ kò, ù n chîi tùʼ am fəgha kəla Zə̀ kə fə̀ dzɛ̂ enyəa kə lo nìi nù bəla ko, aŋghəa e fə̀ bûʼ lô ko ghəa è tughu zo â ghùw aleboo. Zən lò e ghee ù fə̀ bughò doʼo tsele ù n dəmà tənàʼà. Ù n tèlè bùghò dòʼò kò tsele ù ndə̀mà tə̀nàʼà an dzughu zəla Zə̀ kə fə̀ dzɛ̂ naŋa â wə̄n enyəa, “Wɛ ghə̂a a kê lò ndə̀m tǒ sə̀ghàbəlà mə̀la n lò edzūŋ.”

¹⁹ Abə̀làhâm fə̀ kɔʼɔ nduw bɔm fə tənùu, fə̀ŋ è wə̄n zəla ù fə̀ gaʼ tsughu a zəŋò Zə̀ kò ŋ kè tsoō kwuūwn koʼò tsəghà, tò aŋghəa ù fə̀ bûʼ kwo ko nû enyəa ghue u wə̄n u kôom tɔ̀ʼɔ̀ fwàʼà yò àsùghò enyəa wi u wən tɔɔŋ Sàla fə̀ lo sugho kəkɛ̀.

²⁰Tuw kə ka fə kpuw kòʼ dzə̀ Abə̀làhâm an to kəla Zə̀ kə fə̀ to naŋa wo â wə̄n. U n tee tən tsughu ko am fə̀ŋ zəla ù fə̀ gaʼ tsughu a zəŋò Zə̀ kò. Ù n dzə̀n tsùghu fə̀ŋ, mgbɛɛ fughuu tsə̀ghà ko ùkɛɛ â Zə̀ kò.

²¹Ù fə̀ kwo tən nû enyəa Zə̀ kə̀ ki nû daʼa kə te ko aleghə̂əŋ ghəa zəla kə mò to naŋā.

²²Zə̀ lò e ghee fə̀ŋ è wən zəla ù fə gaʼ tsughu a zəŋò Zə̀ kò fə̀ ghəŋlo Zə̀ kə̀ n nì ndùw wə̄n an tāŋ enyəa ù lò ghùw ù tsəghatsəgha.

²³Shwaʼ wəla ghe tɔm naŋa am Mwàʼsò kə Kəzə̀ enyəa, “Ghe fə̌ wə̄n an taŋ ni tò ghûw tsəghatsəgha bòʼ fə̀ŋ zəla ù fə̀ gaʼ tsughu a zəŋò Zə̀ kò.” Shwaʼ u te u fə̀ ka yo â Abə̀làhâm.

²⁴Shwaʼ u te u lo sugho â sɛ̀. Zə̀ kə̀ lô sɛ̀ nîi sùgho aŋ ghì a tsəghatsəgha gho êzə̀ bòʼ sɛ̀ gaʼ fə̀ŋ a zəŋò wə̄n wəla ù fə̀ zôm nughù kɔʼ Mughùbè ù sɛ̀ Yɛso alo evʉ̄.

²⁵ Yɛso wəla Zə̀ kə fə̀ fughu sə wo enyəa u kpuw bòʼ bòo tə sɛ̀. Zə̀ kə n zòm nùghù kɔʼ wə̄n alo evʉ enyəa to Zə̀ kə̀ mô nîi naŋa sɛ̀ aŋ ghì a tsəghatsəgha gho.