Read Aghem Lumà 6 Bible Online

Lumà 6 - Aghem bible

Lumà 6

¹Sɛ̀ fɛ èzəŋ e lo to sɛ̀ e dzâa tsughu êndughō a? A sô yia ki aleghəəŋ nduūŋ nduw ko bo zo to Zə̀ kə̀ e ŋgee deē nduūŋ wo ko dzɔ̂ e wə̄n zo â sɛ̀ ŋkāa?

²Ɛ̂ŋgaŋ dzə̂! Abugho à lò aleghəŋlo ebo, sɛ̀ êzəŋ e lo tò ghî a kpuuwn gho. E fi lo enyəa sɛ̀ kôom ki yo alenaam mughu nduw ko alo ebō.

³À lǒ mò ghɛ̀ məghaa nù enyəa sɛ̀ a dzə̀m ghəla ghe mò fughu tsughu sɛ̀ â mùghù ŋ Kə̀zə̀ mò enyəa sɛ̀ doʼò kə fəgha kə mɔ̀ʼ sɛ̀ à ghê Kə̀lestò Yɛso fə̌ fi lo aledèe tsughu enyəa sɛ̀ mafə kpuw dzəŋlo sɛ̀ a ghê Kə̀lestò.

⁴ Mùghù ŋ Kə̀zə̀ məla ghe fə̀ fughu â sɛ̀ fə̌ fi lo ko to ghe tsəla dzəəŋ ndùw sɛ̀ à ghê Kə̀lestò to ghî a kpuuwn gho, enyəa to sɛ̀ mô mùghù sugho mughù è fughu zo to aŋghəa Tsele ù te fə̀ zôm nughu kɔʼ Yɛso alo evʉ̄ am fɛ̀ɛn kə kədaʼa kə wə̄n.

⁵Abugho e lo enyəa sɛ̀ à ghê Kə̀lestò mafə doʼò fəgha ko kə mɔʼ aŋghəa sɛ̌ fə̀ kpuw sugho tǒ wə̄n, sɛ̀ lo kɔʼɔ səa sùghò nù alo evʉ̄, tò aŋghəa Yɛso kɔʼ sə a te alo evʉ.

⁶Sɛ̀ kwo nû enyəa fəgha kəla sɛ̀ mò bûʼ lo tsəgha ghè kò mafə kpuw nùghùu alo kədàŋlo ghèe Kə̀lestò, enyəa to Zə̀ kə̀ mô wiī maʼa mbuw fə ghəa a biigh gho a zəŋò sɛ̀, alezèe zəghà sɛ̀ am fàŋa kə ghəa à biigh gho.

⁷Tɔŋlo enyəa ghùw wəla ù kpuw tsughu, ghe fi zê zə̀ghàa wə̄n am fàŋa kə ebo.

⁸Aŋghəa sɛ̀ lo mò sɛ̀ maā kpuw dzəəŋ sɛ̀ à ghê Kə̀lestò, sɛ̀ kûm kwò nû enyəa sɛ̀ à ghee lo dzeŋe mùghùun sùghò nù.

⁹Tɔŋlo enyəa sɛ̀ kwo nû enyəa ghəa ghəla ghe fə̀ zôm nughù kɔʼ dzə Kə̀lestò alo evʉ̄, ù kè kòom kpuw kòʼ yò, nu vʉ e kôom ki yo daʼa ko a zəŋò wə̄n.

¹⁰Vʉ zəla ù fə̀ kpuw ghè zò, ù fə̀ kpuw tən ko êsəŋò alebuū bughuso tsughu kwa wə ebō. Mughù zəla ù mughu ghè zò, ù mùghù â Zə̀ kò.

¹¹An dzîi è mɔ̀ʼɔ, a lò sugho êzə̀ vʉ e kôom ki yo daʼa ko a zəŋò ghɛ̀, ghɛ̌ êzəŋ e kuuwn mughu â Zə̀ kò aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò Yɛso.

¹²E kwo ko bo e lǒ so e kòom kele daʼa kə li ko aŋ gwə̀n e eghùe zɛʼɛ zəla e lo doʼn təla yo, aŋghəa e lô aletsəə̄n nduw ghùw aleghəə̄ŋ ghəa à biigh ghəla gwən e ughùe e ləghaa.

¹³E kwo ko ghùw wɛʼɛ lò so e nîi kɔ̀ʼɔ̂ bà kə ughùe kə wən kə̀ li ko ù naŋā tsughu tò fəgha kə kəfwàʼ kə ebō. Laam fùghù nduw nlò ghùe zɛʼɛ zo â Zə̀ kò, tò ghî ghəla ghe baāŋ nughù sə tsughu aŋ ghu kə evʉ, naŋa wò ghee â tuw ko enyəa ghɛ̀ e mughu mùghù è fughu zo. Naŋa tsughu nlò ghùe zɛʼɛ zo e dzə̀m zə elo tò fəgha kə kəfwàʼ kə Kəzə̀ kəla kə lô tsəghatsəgha.

¹⁴Bo e lo kòom kì yo daʼa kə̀ li ko a zəŋò ghɛ̀, mbuu ghɛ̀ kôom yò dzə a tsəlà làŋ kò, nu ghɛ̀ êzəŋ kuuwn mùghu an dzɔ̀ e Kəzə̀.

¹⁵A lo aledzàa tsughu êndughō êzəŋ a? À lò enyəa sɛ̀ ki aleghəəŋ nduw ko ghəa a biigh gho aŋghəa sɛ̀ sô kôom mughu yo a tsəla làŋ ko a, bòʼ a sô kuuwn mùghù an dzɔ̀ e Kəzə̀ à? Ɛ̂ŋgaŋ dzə̂!

¹⁶Ghɛ̀ kwo yo enyəa abugho ghɛ̀ boo tsughu alezuuw lâŋ kə ghûw kò tò ukɔ̂, ghɛ̌ fi lo ukɔ̂ â ghuw ù te a? Ghɛ̀ lo aledòʼò ùkɔ̀ â ghəa à biigh gho, ghə n nì wò èvʉ, ŋkāa ghɛ̀ e zuuw nduw â Zə̀ kò, to ghɛ̀ e mughu mùghù e tsəghatsəgha zo.

¹⁷E sô kuuwn lò ko enyəa, a fughu kəzɔ̀ŋlò â Zə̀ kò enyəa ghɛ̀ ghəla ghɛ̀ mo bûʼ lô tsəgha kɔ̂ wò â ghəa a biigh gho, ghɛ̀ bwîi nù aŋ ghəa ghəla ghî ghəla ghe mo zoʼn ghɛ a te fə̀ fughu naŋa â ghɛ̀.

¹⁸Aŋghəa ghe lo mo ghe ŋ ghɛ̀ am fàŋà kə ebo zê zə̀ghà, ghɛ̌ èzəŋ lo ukɔ̂ â Zə̀ kò aleghəəŋ ghəa ghəla a lô tsəghatsəgha.

¹⁹Ŋ̀ ghəa ghən fɛ â ghɛ̀ kə̂aa wo tò ghùw nsɔ̌ɔŋnchùw, tɔŋlo enyəa ghəa à li a lo nû a tughuu â ghùw alezuūwkɛlɛ. À fə̀ bugho an tì kə̀ li ko, ghɛ̀ n nì kɔ̀ʼ ghùe zɛʼɛ naŋa tsughu tò ukɔ̂ aleghəəŋ kaaŋ tsə̀ghà dzə̀adzə̀ tə aghəa to àsùghò ndə̀mà tə ghəa a biigh to a te. An ndziī è mɔ̀ʼɔ è te, ghɛ ni kɔʼ sugho ghue zɛʼɛ zo e dzə̀m tò ukɔ̂ aleghəəŋ ghəa ghəla a lǒ tsəghatsəgha, ghəla a ghəŋlo enyəa ghùw e zɔlɔ.

²⁰Tî kə̀la ghɛ̀ mò lô tsəgha kɔ̂ wò â bo zo, ghɛ̌ fə̀ ki yo ghəa è li zo aleghəŋlo aŋ ghəa ghəla a lô tsəghatsəgha.

²¹Alebùʼù nîi tsughu, namso kɛʼɛ kə mò lo kwò aŋ ghəa à biigh ghəla ghɛ̀ mò buʼù ghəəŋ tsəghà a, mo a ghəŋlo enyəa ghɛ̀ e ki tuw dəla ko êzəŋ a? Ghəa a te lo ko aletɔŋɔ wo evʉ.

²²À sò kuuwn lò ko enyəa êzəŋ wəla ghe lo mo ghe ŋ ghɛ am fàŋa kə təbòo kə̀ zê zə̀ghà, ghɛ̀ yia lô kɔ̂ wò â Zə̀ kò, namso kɛʼɛ kə lo mughù è zɔlɔ zo. Ghəa a te a nîi wò mùghù è doʼn təla zo.

²³Ghɛ̀ kele tsughu enyəa, namso kəla ghùw kele am bo zəla ù ghəə̄ŋ tsughu lò evʉ, Zə̀ chia kə kuuwn tsôo ndzə̂əm fughuu ko mughù è doʼn təla zo am bàm e Kə̀lestò Yɛso, Mughùbè ù sɛ̀.