Read Aghem Lumà 8 Bible Online

Lumà 8 - Aghem bible

Lumà 8

¹Tò aŋghəa e lô êzəŋ, ghùw ù lì kôom bùʼ yò alebɛ mbɛ an tuw kə ghì ghən a dzə̀m ghe lô fəgha ko kə mɔ̀ʼ ghèe ghê Kə̀lestò Yɛso.

²Daʼa kə Zuʼ tə̀ Zɔlɔ kəla tə fughu mughù zò, kə m mùghò zê zə̀ghàa am bàm e Kə̀lestò Yɛso aŋ ghù daʼa kə ebo kəla è nîi wô vʉ zo.

³Tɔŋlo enyəa ghəa ghəla lâŋ kə fə̀ yo aleghəŋlo, bòʼ ghùw nsɔ̌ɔŋnchùw fə̀ lɛɛ kôom nû, Zə̀ kə̀ ŋ ghəŋlo e tsughu. Zə̀ kə̀ n nì kɔ̌ʼ Wɛ u wə̄n tùm nyə̀ wò an ghueekətsə̄ aŋ kòʼ e ghùw mbī tò kefughu, alewiī maʼà èbo.

⁴Ù fə̀ enyə ghəəŋ tsughu alekòʼ enyəa ghəa e tsəghatsəgha zəla lâŋ kə̌ fə̀ biso ki aleghəŋlo nî kə̀bəla a zəŋò sɛ̀ ghəla a lo êzəŋ mo a mughu aŋghəa Zuʼ tə̀ Zɔlɔ tə ləghaa, mò à yò dzə̂ aŋghəa gwən e ughùe e sɛ̀ è ləghaa.

⁵Tɔŋlo enyəa ghî ghəla ghe ghəə̄ŋ ghəa ghəla gwən e eghùe e ghee e ləghaa, ghe fə̂ŋ tə ghee tə bɔɔm gaʼ naŋa ndùw sùghò aŋ ghəa a te gho. Yia a bugho ghî ghəla ghe mughu an daʼa kə Zuʼ tə zɔlɔ to, ghe moʼnlò e ghee bɔɔm gaʼ naŋa nduw sugho aŋ ghəa à Zuʼ tə̀ Zɔlɔ tə ləghaa.

⁶Abugho ghùw naŋa tsughu fə̀ŋ è wə̄n am fʉgha wəla gwən e ughùe e wə̄n e ləghaa, vʉ zə ŋ kwu wə̄n. À m bùghò ghùw naŋa tsughu fə̀ŋ e wə̄n am fəgha kəla Zuʼ tə zɔlɔ tə ləghaa, ghùw ù tə ŋ kele èmùghù, lò sugho alo ebughunlo.

⁷Ghùw wəla ù nì kɔʼ fə̀ŋ è wə̄n naŋa tsughu am fʉgha wəla gwən e ughùe e wə̄n e ləghaa, ghùw ù te baam nǔ ghèe Zə̀ kò. Ghùw u te zuuw yo lâŋ kə Kəzə̀ kò, mò ù tsò buʼ yò alenaŋa làŋ kə te ko.

⁸Ghî ghəla ghe naŋā fə̂ŋ tə ghee to am fʉgha wəla gwən e ughùe e ghee e ləghaa yo aleghə̂əŋ ghəa ghəla fə̀ŋ è Kə̀zə̀ duʼnlo a te.

⁹E kuuwn lò ko enyəa ghɛ̀ ka fə fə̂ŋ tɛʼɛ tə naŋa dzə̀ am fʉgha wəla gwən e ughùe zɛʼɛ e ləghaa; ghɛ̀ laam naŋa fə̀ŋ tɛʼɛ to am fʉgha wəla Zuʼ tə Zɔlɔ tə ləghaa, abugho e kûm lò dzə̂ enyəa daʼa kə te kə lo nû a zəŋò ghɛ̀. Ghùw wəla ù ki yo Zuʼ tə̀ Zɔlɔ təla tə nughu wo aŋ ghùu Kə̀lestò fi yo dzə̄ ghùw ù Kə̀lestò.

¹⁰Abugho e kuuwn lô dzə̂ enyəa Kə̀lestò lò nû am fə̀ŋ tɛʼɛ, aŋghəa e bûʼ lo ko enyəa gwən e ughùe zɛʼɛ e kpuw dòʼò nù bòʼ bòo tɛʼɛ, Zuʼ tə̀ Zɔlɔ tə fughuu nù ghɛ â mùghù zo bòʼ enyəa Zə̀ kə̀ ŋ ghɛ̀ nî enyəa ghɛ̀ lo ghî a tsəghatsəgha gho.

¹¹ Abugho e kuuwn lô enyəa Zuʼ tə Zə̀ kəla kə fə̀ zôm nughu kɔʼ Yɛso alo evʉ lo nû a zəŋo ghɛ̀, e fi lo enyəa wə̄n wəla u mò zôm nughù wo Kə̀lestò Yɛso alo evʉ lo ghəəŋ nù ghue zɛʼɛ zəla e kpuūw lo kôm kele èmùghù, bòʼ Zuʼ tə Kə̀zə̀ təla tə lo a zəŋò ghɛ̀.

¹²Waazə̂ ghaŋa ghò, e fi lo enyəa sɛ̀ ki kəndàŋ, mò ndàŋ kə te kə kuuwn yò dzə̂ alenaam ghəəŋ nduw ko ghəa ghəla gwən e ughùe e sɛ̀ è ləghaa enyəa sɛ̀ è ghəŋlo.

¹³Tɔŋlo enyəa abugho ghù mughu aŋghəa ghue u ghûw ù ləghaa, ghù lo kpuw. Abugho ghù kuuwn nî kɔʼ daʼa kə Zuʼ tə̀ Zɔlɔ to wì màʼà tsughu ghəa à biigh ghəla a lo a zəŋo ghùe u ghùw a te, ghùw ù te lo mughù.

¹⁴Ghî ghə̀n a dzə̀m ghe bwiī aŋghəa Zuʼ tə Kəzə̀ tə̀ ləghaa, à lò ghee wɛ a Kəzə̀ gho.

¹⁵ Tɔŋlo enyəa Zuʼ təla Zə̀ kə fughu wo â ghɛ̀ ghə̂əŋ dzə̀ yo enyəa ghɛ̀ doʼò tsughu kɔ̂ wò tò ghɛ̀ è kòom tsəŋo ghəa gho; tə laam ghəŋlo enyəa ghɛ̀ dòʼo tsughu wɛ a Kəzə̀ gho. À lò Zuʼ tə Kə̀zə̀ tə te to tə ghəŋlo enyəa, sɛ̀ è nughuun diī ndùw â Zə̀ kò enyəa; “Bàba! Tsele waŋa!”

¹⁶Zuʼ tə Kə̀zə̀ àsùghò fə̀ŋ tə sɛ̀ tə̀ ŋ ghəŋlo sɛ̀ yia a kele tsughu enyəa sɛ̀ lo wɛ a Kə̀zə̀.

¹⁷Ghəa sɛ̀ lò wɛ a wə̄n gho, sɛ̀ lo zəa sùghò nù fʉgha wəla Zə̀ kə fə̀ to naŋa â ghî a wə̄n gho. Sɛ̀ à ghê Kə̀lestò lò dzeŋe zəa sùghò nù fəgha kəla Zə̀ kə mò naŋa â wə̄n; tɔŋlo enyəa, abugho sɛ̀ fala dzəŋlo sɛ̀ à ghê Kə̀lestò, sɛ̀ à ghee e ke dzeŋe lo sugho a dzə̀m an səghanyəgha ŋ wə̄n.

¹⁸Ŋ̀ kwo nû enyəa fala zəla sɛ̀ fanlo êzəŋ kâ mbùʼ kɔʼ kpe alebàan ndûw ghèe səghanyəgha məla Zə̀ kə̀ lo naāŋ sɛ̀ a te.

¹⁹Tɔŋlo enyəa fʉgha wə̄n u dzə̀m ghe gbə̂n wô fɛ am mbī lə̀mlo alo mbūw alekòʼ aŋghəa Zə̀ kə̀ lo dêe fughu wô ghî ghəla à kùum lô wɛ a wə̄n gho a te.

²⁰ À ka fə tsə̂m kɔʼ dzə̀ fʉgha wə̄n fɛ am mbī enyəa u e lo kə̀nughùnùghù, à lǒ bòʼ à fə̀ tsəm tsughu Kəzə̀ enyəa ghəa a te ghə e lo êzə̀. Zə̀ kə mafə fôʼ nàŋa tən enyəa,

²¹e lo zèe zə̀ghà nù fʉgha wən wo u dzə̀m enyəa e kwo u lò kôom kpuūw fîanlo, u e kuuwn ndzəə̄m mughu sugho alo nsəghanyəgha tò wɛ a Kəzə̀.

²²A kwo nû enyəa alekaʼā nughù wô bùghò tɛ̀ wò êzə̄ŋ, fʉgha wən u dzə̀m ghe fə̀ gbə̂n wo dînlo am fɔɔn zəla ghe zuūw tò wìzən lò soʼō wɛ.

²³ À bùʼ kà yo ko fʉgha u te wo u dînlo am fɔnlo e te zo, ghuūghùe e sɛ̀ ghəla sɛ̀ bûʼ ki Zuʼ tə̀ Zɔlɔ to tǒ fughu kə Kəzə̀ kə sûesʉ ko, sɛ̀ zuuw efɔnlo, dìi sughò nʉghà ù nʉ̀ghà aŋghəa sɛ̀ ləmlo enyəa Zə̀ kə̀ lo bughò nîi naŋa tsughu sɛ̀ tò wɛ a wə̄n; asùgho enyəa kə zuū səā sughò tuw kə sɛ̀.

²⁴À lò bòʼ tùʼ zəla sɛ̀ mò chiī ghè zò aŋ ghəa ghən e mò ghəŋlo ghe bəghasə̄ sɛ̀. Abugho a ki dzə̂ fəgha ko, a kôom kì yo alechì tùʼ a te. À lò ndugho a bugho ù ki fəgha ko a, ù n naam kòom chìi ko tùʼ a te?

²⁵Abugho sɛ̀ moʼnlò alekele fəgha kə̀là a kaām ki yo, a ŋ ka tsughu ko èzə alechì tùʼ am fəgha kə te ko.

²⁶À lò sugho eghəla, Zuʼ tə̀ Zɔlɔ tə bughò yòsò nû sɛ̀ aŋghəa a bûʼ ki ko yo nûŋ wò. Tɔŋlo enyəa sɛ̀ bûʼ tɔ̀ʼ kwò yo ghəa zəla sɛ ki alegɔŋlō a te; ghuūghùe u Zuʼ tə̀ Zɔlɔ tia tə buʼù gɔ̂ŋlo an tuw u sɛ̀ alo edì mò ghùw yò dzə̂ aleteso dzɛ̂ shwaʼ u te wo.

²⁷Zə̀ kəla kə koʼò tɔɔ̄n nyəā wô fə̂ŋ tə sɛ̀ tò kwò nû moʼnlò e Zuʼ tən to: bò Zuʼ tə̀ Zɔlɔ tə te tə gɔ̂ŋlò an tuw ghì a Kəzə̀ an dziī zəla Zə̀ kə̀ ləghaa ghè zò.

²⁸Sɛ̀ kwo nû enyəa alo aghəa a dzə̀m, Zə̀ kə̀ fwaʼa ko alekòʼ enyəa ghî ghəla ghe ləghaa wə̄n e mugho dzɔ̄. Ghən lò ghî ghə̀là kə̀ fə̀ tɔŋɔ̄ aleghəŋlo enyəa ghəa ghəlà kə mò fôʼ naŋa a bughò sə êzə̀.

²⁹Ghî ghəla Zə̀ kə mò ki kwo ziī ŋ ghee tsuʼ naŋa enyəa ghee e lo sugho tǒ wɛ ù wən ù nùu wən, enyəa wɛ ù wə̄n ù nùu ù wən e lo wɛ ù sûesʉ am bvʉa e ndə̀m è ghì ghəla ghe boō fughu â Zə̀ kò.

³⁰Zə e lô sugho enyəa, ghî ghəla Zə̀ kə̀ lo mo kə m bàʼ nàŋa sə̀ wò bâ kə̀ mɔ̀ʼ, à lò ghəla kə fə̀ tɔŋɔ̄ enyəa ghe e lo ghî a wə̄n gho. Ghe a te ghəla kə fə̀ tɔŋɔ̄, kə ŋ ghəŋlo, ghe yia doʼò tsəghatsəgha a vʉ̀a wə̄n, chia kə ghəŋlo enyəa ghe kele sughò kɔʼso məla kə ki.

³¹Abugho ghəa alo enyə, a n lo to a e dzɛ̂ èndugho a te à? Abugho Zə̀ kə̀ ti sɛ̀ à ghee, ghùw wəla ù kòom lo tò ù è tsûuwn lɔ̀m kə sɛ̀ à lò ndughoō?

³²Wən wəla ù fə̀ tâʼkè ghôʼ wɛ ù wə̄n, kuuwn nì fùghù sə̀ wò wə̄n tò kəfughu an tuw u sɛ̀ a dzə̀m. Abugho ù fə̀ lô alenìi fughuu səā wô Wɛ ù wə̄n ù nùu, fəgha kə̀ li kə kôom lò nû à ghèe wɛ u wə̄n lo aledòʼò mò ghe kâ â sɛ̀ nî fùghù wò à?

³³À lo fəgha kə̀ nsɔ̌ɔŋnchùw kə̀ ghɛ ko kə lô alekòom bamsô dzughu e ghûw mò Zə̀ kə̀ ŋ wə̄n shîaa a? À lò Kəzə̀ kə ghəŋlo enyəa ghî à doʼò tsəghatsəgha a vʉ̀a wə̄n.

³⁴À lò ndugho ù lò aledzɛ̀ enyəa a m bvʉ̌ saʼ a? À lǒ mò à lǒ Kə̀lestò Yɛso wəlà ù mò kpuw dzə a, ŋkāa à lǒ wən wəla ghe mò zôm nughù kɔʼ alo evʉ a, vʉa u doʼ ezəŋ an kwe u Kəzə̀ u təma wo, dìi fughû dì e sɛ̀ à?

³⁵À lò kə kwò kə lò alesɛ̀ɛ nughù səā wô sɛ̀ an ləgha zəla Kə̀lestò ki â sɛ̀ a? À lò utsû u lô alesɛ̀ɛ maʼa sɛ̀ a ŋkāa efala a, ŋkāa kə̀fə̀mso, ŋkāa à lǒ dzə̀ŋ, ŋkāa elɛ ŋkāa kə̀tsə̀ŋso a, ŋkāa à lò evʉ?

³⁶ Ghe tɔm naŋa am Mwàʼsò kə Kəzə̀ enyəa, “Ghe wiin ghàʼ tsùʼù mən n dzə̀əm dzə̀m aŋ ghəa zəghà, ghe yia ghe lɛɛ̄n ghaʼ ghən tǒ ndzì təla ghe ki sughoo wī.”

³⁷Ghəa è bûʼ lô ko ezə̀, sɛ̀ yia tsôo naam tughu tsəghà nduw ghəa a te gho a dzə̀m am bàm e Kə̀lestò wəla ù ləghaa sɛ̀.

³⁸Tɔŋlo enyəa Ŋ̀ kwo nu enyəa evʉ, kàa emughù, tsə̀təndə̄ghā tə Kəzə̀, ŋkāa dwə̀ŋ ù saʼa wo, fʉgha wəla u lo, ŋkāa wəla u naām ki alebùghò ŋkāa udwaʼa,

³⁹ŋkāa fʉgha wəla u lo edzuŋ ŋkāa àsùghò wəla u lo aŋ ghueekətsə̄, ŋkāa fəgha kə nsɔ̌ɔŋnchùw kə̀ li kə̀ yo dzə̂ am mbī e dzə̀m kə lo yò dzə̂ alegbòo sɛ̂ɛ sɛ̀ an ləghaa zəla Zə̀ kə̀ ki a sɛ̀ a m bàm e Yɛso Kə̀lestò Yɛso Mughùbè ù sɛ̀.