Read Aghem 1 Kòlentìan 1 Bible Online

1 Kòlentìan 1 - Aghem bible

1 Kòlentìan 1

¹À lò mugho Pôl Ǹ tɔɔ̄ wo mwàʼsò kən ko â ghɛ̀. Zə kə̌ fə tsə̂m tsughu nû, kə n nì kɔ̀ʼ mugho enyəa Ǹ doʼò tsughu tùm è Kə̀lestò Yɛso. Ǹ lo fɛ ghàʼ à wàazə̀ waʼa Sɔ̀stɛ̂ns aŋghəa Ǹ tɔɔ̄ mwàʼsò kən ko.

² Ŋ̌ mwàʼsò kən kə tɔɔ wò â dzeŋe kə ghì a Kəzə ghəla ghe lo an naʼ e Kɔ̀lênt, ghɛ̀ ghî ghəla ghe fə̀ sûw tsughu ghɛ enyəa ghɛ̀ e lo fəgha ko kə mɔ̀ʼ ghèe ghê Kə̀lestò Yɛso aŋghəa Zə̀ kə fə̀ ghəŋlo enyəa ghɛ̀ doʼo ghî a wə̄n à zɔlɔ gho, ghɛ̀ à ghê ghì ghən à dzəm an lùʼù tən tə dzəm ghe tɔɔ̄ŋ tsughuu zən e Mughùbè Yɛso Kə̀lestò zò, tɔɔŋ Mughùbè ù sɛ̀ àsùghò ù ghee.

³To Kə̀zə̀, Tsele ù sɛ̀, ghèe Mughùbè Yɛso Kə̀lestò mò fughu ghɛ â bughuun zo ghe dêe sughò ghɛ̀ â dzɔ̀ e ghee zo.

⁴Ǹ tsôo fùghuu tsəghà ko kəzɔ̀ŋlò â Zə kò bòʼ dzɔ̀ zəla kə lo mo kə n dè â ghɛ̀ am bàm e Kə̀lestò Yɛso.

⁵À fə̀ lo sugho am bàm e Kə̀lestò Zə̀ kə fə̀ ghəŋlo enyəa ghɛ̀ e kuu alo aghəa a dzə̀m, ghɛ̀ è ki shwaʼ ù dzûŋ wò alo edzughu àsùghò tɔ wo alo ketūw.

⁶Zə n dè tsùghù enyəa Tùm è Kə̀lestò zəla ghǎʼ mò bughò naʼà wo â ghɛ̀ lǒ êsəŋò.

⁷Zən lò e ghee ghɛ̀ ki mɛʼɛ̄ fughu wəla Zuʼ tə Kəzə̀ tə̀ fughu â ghɛ̀ a dzə̀m, aŋghəa ghɛ̀ ləə̄m ndûw tsuʼ fəla Mughùbè ù sɛ̀ Yɛso Kə̀lestò lo kôom bughōo ebàm a te.

⁸Ù kè ghə̌əŋ nù ghɛ̀ è tɔʼ ti alendùw kuʼù ndûw, enyəa ghɛ̀ e ke lo mò ghɛ̀ ki dzʉ ù li wo an Tsuʼ u wəla Mughùbè ù sɛ̀ Yɛso Kə̀lestò kə̀ bugho e bàm a te.

⁹Zə̀ kəla kə fə̀ tɔŋɔ ghɛ̀ enyəa ghɛ̀ e lo fəgha ko kə mɔ̀ʼ ghɛ̀ à ghê Wɛ ù wə̄n Yɛso Kə̀lestò tɔɔŋ Mughùbè ù sɛ̀ naaŋ nù dzughu e wə̄n zo am fəgha kəla ù to naŋa enyəa e lo ghəəŋ nù.

¹⁰M̀ buʼu kə̀ghu â ghɛ̌ a waazə̂ ghò, an zən e Mughùbè ù sɛ̀ Yɛso Kə̀lestò, enyəa ghɛ̀ a dzəm kele tsughu dzə e mɔ̀ʼ, ghɛ̀ ka ndzughùun dòʼò dzə̀ aŋ ghùe zɛʼɛ̄, ghɛ̀ laam doʼō tsughu fəgha ko kə mɔ̀ʼ am fə̂ŋ e mɔ̀ʼ, ghɛ̀ è naaŋ ko dzughu zo e mɔ̀ʼ a lo eghəa.

¹¹Ŋ̀ ghəa ghən gho enyə dzàa wò â ghɛ̀ a waazə̂ ghaŋa gho bòʼ ghî à li gho an kɔn u Kəlôes ghə̀ n dzɛ̀ â mùghò enyəa ghɛ̀ zughùu zěe aŋ eghùe zɛʼɛ.

¹² Ghəa zəla M̀ moʼnlò alekə̀a wô lò enyəa, chìa am bvʉa zɛʼɛ̄ dzâa tsùghùu enyəa, “Ǹ lo ghùw ù Pôl.” Ŋkāa, “Ǹ lo ghùw ù Àpolòs.” Ŋkāa, “Ǹ lo ghùw Sɛfàs.[1]” Ŋkāa, “Ǹ lo ghùw Kə̀lestò”,

¹³À lò enyəa Kə̀lestò dzùghùun dòʼò nù à? Ŋkāa à lò enyəa à mò lo Pôl ghe mò təghāa an tuw wɛʼɛ, ŋkāa ghe mò ghɛ a mùghù ŋ Kə̀zə̀ m fughu an zən e Pôl a?

¹⁴ M̀ fughûu zɔ̀ɔŋ kə Kəzə enyəa Ŋ̀ ka mō ghùw wɛʼɛ ù lì â mùghù ŋ Kə̀zə̀ n nyɔ̂ʼ fughu mò à gɔ̀ʼɔ̀ ko yo Kə̀lespòs ghèe Gayòs.

¹⁵Êzə̀, ghùw sò yò dzə̂ alevùŋù nîi ndûw enyəa ghe mò ghɛ â mùghù ŋ Kə̀zə̀ m fughu an zən zaŋā.

¹⁶ (M̀ maā mùghù ŋ Kə̀zə̀ m fughu ko nû sùghò â Stɛ̀fanàs ghèe ghêe ghì a wə̄n gho a dzəm alo kəbē; Ŋ̀ kôom kwò dzə yo enyəa M̀ maā ghùw ù li â mùghù ŋ Kə̀zə̀ ŋ kôom fùghù kpeʼe sùghò).

¹⁷Kə̀lestò ka fə mugho tùm wò dzə enyəa M̀ bughò mùghò è fughuu mùghù ŋ Kə̀zə̀ mò, ù mò mugho tum wo enyəa M̀ bughò zughòo làbəlà è wə̄n è dzùŋ, Ŋ̀ ka mo làbəlà è te zughòo dzə an dzùghù è kpəŋō zo. Ŋ̀ ka mo ləgha dzə enyəa tùm è dàaŋ kə Kə̀lestò bùghò doʼò kənughùnùghù mò e kì yo daʼa ko.

¹⁸Dàaŋ kə Kə̀lestò kə lo elâʼsò â ghì ghəla ghe lo alo kəleŋe, yìa à kuūwn lô daʼa kə Kəzə kò â sɛ̀ ghəla ghe bəghaasəa tsughu.

¹⁹ Ghe tɔm naŋa am Mwàʼsò kə Kəzə̀ enyəa, Ǹ lo ghəəŋ tsughu ghî ghəla ghe moʼò enyəa ghe tɔɔ nù e ke yo aleghə̂əŋ ghəa è li zo. Ǹ lo ghəəŋ tsughuu nù ghî ghəla ghe moʼò enyəa ghe ŋgee tɔɔ nù kele tsughu enyəa tɔ u ghee u ki yo fwàʼ kə̀ li ko.

²⁰Ghùw ù te wəla ù mòʼò enyəa e tɔɔ nù, ù wɛ̀ɛ à? Ghùw wəla ù dzɛ̀ enyəa e kwo kəmwàʼsò, ù wɛ̀ɛ à? Ghùw wəla ù mòʼò enyəa e ŋge kwo alesughu kətuw alo eghəa, u wɛ̀ɛ à? Zə kə kâ mgbaŋ naŋa enyəa tɔ e mbī zə e lo elâʼsò à?

²¹Tɔŋlo enyəa ghəa è fə lô enyəa ghî a mbī yo dzə̂ alekele Kə̀zə̀ an tɔ e ghee, Zə kə̀ n ləgha kɔʼ aletsəghàa tsughu an làʼsò zəla sɛ̀ zughòo kaŋlō enyəa kə bəghāsə̄ ghî ghəla ghe boō fughu tsughu â wə̄n.

²²Nu Dzûu tə ləghaa alekòʼ tətsə̌a aledèe tsughu enyəa à làbəlà zən fughu wò Kəzə̀, ghî a Gəlês yia kəŋo ghî ghəla ghe lo alekə̀a wô ghe â tɔ wo.

²³Dzûu tə̀ kuuwn ləghaa yo làbəlà è dzuŋ zəla ghàʼ naʼn wo kùu ndùw Kə̀lestò wəla ghe mò təghāa alo kədàŋlo, làbəlà e te zə̀a è lò elâʼsò zò â ghì a Gəlês ghò,

²⁴Yia kuūwn bughò â ghì ghəla Zə kə lo mo kə ŋ ghee nî, ŋkāa à lò Dzûu tò, ŋkāa ghî Gə̀leʼ ghò, làbəlà e te lo Kə̀lestò wəla ù ki daʼa kə Kəzə̀ àsùghò tɔ u Kəzə̀ wò.

²⁵Tɔŋlo enyəa lâʼsò e Kəzə è tughu tsəghà tɔ e aghì ghə̀n a dzə̀m, lɛɛ e Wə̄n zə e tughu tsəghà sə sə̂ŋ e ghì gho a dzə̀m.

²⁶Waazə̂ ghaŋa gho, kòʼo tsughu aŋghəa ghe mò tɔŋɔ ghɛ a te, ndəm zɛʼɛ mò yo dzə̂ ghî à tɔɔ gho an sə a ghì a mbī gho, ndəm zɛʼɛ ŋ ki dzə yo daʼa kə li ko, ndəm zɛʼɛ ŋ kè seā sughò an ndùm tə səŋò tò.

²⁷Zə ŋ kə̀ m fwən nì kɔ̀ʼ fəgha kəla kə lo elâʼsò am mbī aledə̀nsò tsughu tuw u ghì à tɔɔ gho, Zə kə̀ n shìaa kɔ̌ʼ bvùʼù mə ŋ ghəanlò am mbī aledə̀nsò tsughu tuw kə ghì à tughu gho a te.

²⁸Ù n shìaa kɔ̀ʼ ghəa ghəla ghe chwiīlwiī àsùghò lwənso mə ŋ ghə̀an mò, bùʼ shìaa kɔ̀ʼ sùghò ghəa ghəla a buw alo aghəa aletsughuso maʼà ghəa ghəla a lô ghəa gho.

²⁹Zən mò lo aleghəə̄ŋ tsughu enyəa ghùw è yo aletsɔ̀ fəŋ an sə kə Kəzə.

³⁰Nu à lò Kəzə̀ kə fughuu ghɛ â mùghùu zəla ghɛ̀ mughu alo kəfəgha kə mɔ̀ʼ ghɛ̀ à ghê Kə̀lestò Yɛso. Zə̀ kə̀ ŋ ghəən tsughu enyəa sɛ̀ e ki tɔ wo am bàm e Yɛso. Yɛso ŋ ghəəŋ tsughu enyəa sɛ̀ e lo tsəghatsəgha a sə kə Kəzə̀ àsùghò enyəa sɛ̀ e lo ghì a Kəzə̀ à zɔlo gho, zùe sè sùghò tuw u sɛ̀.

³¹ Zən lò e ghee ghe tɔm naŋā am Mwàʼsò kə Kəzə̀ enyəa, “Mò ghùw tsɔ̀ɔ fəŋ, ù è tsɔɔ̄ nduw fə̀ŋ am ghəa zəla Mughu ù te lo mò ù ŋ ghəŋlo.”