Read Aghem 1 Kòlentìan 10 Bible Online

1 Kòlentìan 10 - Aghem bible

1 Kòlentìan 10

¹ Waazə̂ ghaŋa gho, Ǹ ləghaa enyəa ghɛ̀ kele tsughu fəgha kəla kə fə sə a zəŋò ghê tsele a sɛ̀ ghəla ghe fə̀ bwîi nduw a bǎà Musî, aŋghəa ghee a dzəm fə̀ dâŋ sə kɔʼ dzùghùntsòʼ a tsəla mbàʼ.

²Ghe m fughu ghee a dzə̀m â mùghù ŋ Kə̀zə̀ mò aŋghəa ghe mò bwîi nduw a bǎà Musî am mbàʼ zə̀ àsùghò an dzùghùntsòʼ e te.

³ Ghee a dzəm n dzeŋe zəa kô fʉ̀ghazəa u shʉ̀ghà[3] ù mɔʼɔ̄ wo,

⁴ mʉa sùghò fəgha kə mʉa kə shʉ̀ghà kə mɔʼɔ̄ ko; nu ghe fə mʉa an Nɛ kə ushʉ̀ghà kəla kə mò bughōo ghèe ghee, Nɛ kə te kə fə̀ lo Kə̀lestò.

⁵ Ǎ ŋ ŋgəəŋ lò ko êzə mò fəŋ è Kəzə zɔ̀lɔ yo a zəŋò ndə̀mà ghee à li gho; ghe mô è kpuwnlo, gwən a ghee ghə n ndza tsughu ŋgwən e dzəm.

⁶ Êzə̄ŋ, ghəa ghən fɛ lò alekʉ̀ɛɛn sɛ̀ enyəa to sɛ̀ kâ mò ləghà ndùw dzə ghəa à biigh gho tò aŋghəa ghe fə̀ ghəŋlo.

⁷ Kà nlò doʼò ndùw ghî ghəla ghe kɔʼso mùʼù mò tò aŋghəa ghee à li a fə̀ ghəŋlo. Ghe tɔm naŋa am Mwàʼsò kə Kəzə̀ enyəa, “Ghì a te ghə̄ n tsùghù dòʼò tsughuu alezə, ghe mo è mʉ, daŋso nùghù kɔ̀ʼ â bən zo.”

⁸ A ki dzə yo aledzə̀n kə̀ghu aŋ ghəa à nuūŋ kaaŋ gho tò ghee à li a fə̀ ghəə̄ŋ kaŋlo, ghee kam tə aghì ŋghəm m bə̀ghà à kam to tə təgha fə̀ bvʉ̂ kpuw wo alo fətsūʼ.

⁹ A ki dzə yo naŋā tsughu Mughu ù te enyəa a e mɔɔ̄ koʼō, to ghee à li a fə ghəŋlo zughu tə n nūum wī tsughu ghee.

¹⁰ A ki dzə yo aleshwənlo, aŋghəa ghee à li a fə̀ ghəŋlo, tsə̀ndə̄ghā è Kəzə̀ zəla è dzùuw maʼn ghî ghò m bùgho wì màʼà tsughu ghee.

¹¹Êzə̄ŋ, ghəa ghən fə̀ fɛ a zəŋò ghee sə kɔʼ tǒ ekʉ̂ɛnlò â ghì ghò a dzə̀m, ghe ŋ kuūwn tɔ̄m naŋa tsughu enyəa à dòʼò tsughu etsʉ̂ â sɛ̀ an tì kən êzə̄ŋ a mbī so e bughò mîaa.

¹²À fi lo enyəa ghùw wəlà ù kwo enyəa e tɔ̂ʼ tì nû, ù nìi kɔʼ eghômlò, ù lò neē bvʉā.

¹³Ghəa è li e yo dzə̂ e fəmsō ghɛ mo e kaām fəmso kòʼ tsə̀ghà ghì à loʼ gho. Zə̀ kə̀ nâaŋ dzughu e wə̄n, vʉ̀a ù yò dzə̂ alebōo enyəa ghəa è li e tsoom ghɛ̀ mo zə n tsə̀ghàsə̄ daʼa kɛʼɛ ko. Abugho ghəa e bughò tsoōm kɔʼ ghɛ, kə n dè wò sùghò dzì zəla ghɛ̀ lo aletiī sə a te, nyəa ghɛ̀ è lo alekɔlɔ fəŋ aŋ ghəa e te zo.

¹⁴Waazə̂ ghaŋa ghəla Ŋ̀ ŋgeē ləghaa, ghɛ̀ zəghaa maʼa tsughu alekɔʼsô mùʼù mò.

¹⁵Ŋ̀ ghəa ghən kə̂aa wò tò Ŋ̀ kə̂aa ndùw â ghì à tɔɔ gho, ghɛ̀ lɛɛn tsughu fəgha kəla Ŋ̀ kəaa ghè kò.

¹⁶ Wùa zəla sɛ̀ dzeŋe mʉā səa kɔʼ a te abugho a kɔʼsō Zə kò, à mgbàŋ yò kâŋ tə Kə̀lestò a sɛ̀ dzeŋe mʉā a? À m bùghò a boʼn zə kɔʼ bɛ ko, à fi mgbaŋ yò gwən e Kə̀lestò a dzeŋe zəā a?

¹⁷Ghəa bɛ kə lô ko kə mɔ̀ʼ mò sɛ̀ kuūwn lǒ ndə̀m, a fi lo enyəa sɛ̀ lo ko gwən e ughùe e mɔ̀ʼ, nu sɛ̀ a dzəm dzeŋe zəa kô bɛ kə mɔʼɔ̄ kə te ko.

¹⁸ Kòʼ nlò ghî ghə Ezə̀lɛ̂ ghò a, ghî ghəla ghe zəā fʉgha wəla ghe sɛ̂ ndûw alo kətsaʼ mgbaŋ yò kəfəgha kə mɔ̀ʼ ghèe ghê ghì ghəla ghe fwaʼa fughu alo kətsāʼ a tsəlà Zə̀ kò à?

¹⁹M̀ fɛ ləghaa aledzɛ̀ èndūghō a? À lò nû enyəa fʉghàzəa wəla ghe kɔʼɔ fughuu nduw â mùʼù fò lò nû fəgha kə̀ li ko a? Ŋkāa à lò enyəa mùʼù fə̀ lo nû fəgha kə̀ li ko a?

²⁰ Ɛ̂ŋgaŋ dzə̂, Ǹ dzɛ̂ enyəa ghî ghəla ghe kwo yo Zə̀ kò, ghe fʉgha u ghee u ndûw fùghuu ndùw â zʉ̀kɔ̂ŋ wò, mò à yò dzə̂. Ǹ ləghaa yo enyəa ghɛ̀ è təmadzəəŋ ghɛ̀ à ghê zə̀a m bǐigh mò.

²¹Ghù yò dzə̂ alemʉ̄a aŋ wùa è Mughuù te, ghù è mʉa sugho aŋ wʉ̀a è zə̀a m bǐigh mò. Ghù yò dzə̂ alezə̄a dzəəŋ ghɛ̀ à Mughu ù te zəa dzəəŋ sugho ghɛ̀ ghê zə̀a m bǐigh mò.

²² À lò enyəa a dəmà aleghəŋlo enyəa Zə̀ kə̀ pfʉso kɔʼ unʉghà à? À lǒ mò sɛ̀ tughu tsə̀ghà nǔ Zə̀ kò à?

²³ Ghî à li a dzâa tsùghù enyəa, “Ŋ̀ ki nû daʼa ko aleghəŋlo àghəa dzə̀m.” À kǔuwn yò dzə̂ aghəa à dzəm a lô ghəa à dzûŋ ghò an sə kə Kəzə̀. “Ghe n sɛ̀ zəghàa màʼà enyəa sɛ̀ e lo aleghəŋlo àghəa a dzə̀m.” À kǔuwn yò dzə̂ aghəa à dzəm a lô aleyòsò ghùw.

²⁴E kwo ko ghùw lò kaā fwaʼà ko an dzughu e wə̄n, ù kì alefwaʼā fughuu nduw sugho â ghì à li gho.

²⁵E pfʉa nyòm zən e dzə̀m ghe fênlo an tia e nyôm mò ghù kà ghəa gho am fə̂ŋ zəghà bvʉ̀nlo, ghəa a te a lô fəmso fə̀ŋ zə̀ghà.

²⁶ Ghe tɔm naŋa am Mwàʼsò kə Kəzə̀ enyəa, “Ghueekətsə̄ àsùghò fʉghà wən u dzə̀m u lo a te à kì Mughu ù te.”

²⁷Abugho ghùw tɔŋɔ̄ ghû alo ezə̄, mò ù kà bǒo fughu â Kə̀lestò, ghù vʉ̀a ghù tsəm tsughu alendùw, mò ù nì wò ko kə̀ kwò, zə̂a mò ghù kà ghəa gho a te bvʉnlo am fə̂ŋ zə̀ghà, ghəa a te a lô fəmso ghû.

²⁸Abugho ghùw ù lì kpaʼ kuūwn dzɛ̂ wo â ghǔ fughu enyəa, “Ghe mô nyòm zən sɛ nduw alo fəmùʼù.” Ghu vʉ̀a ghù zuwkɛlɛ tsughuu ghùw vʉ̀, aleghəŋlo enyəa e kwo fə̀ŋ è ghùw ù li lô fəmso wə̄n,

²⁹mò M̀ moʼò fə̀ŋ è ghùw vʉ̀, mò à yò dzə fə̀ŋ zə̀ghà, kà zə dzə̀ fʉghàzəa u te wo. Mò à sò lo kwo ndzə̀əm kə emùghù kaŋa kê so lo aŋ ghu kə bəən kə utɔ kə ghùw ù lì a?

³⁰Abugho Ǹ zə mò mùghò m fughu zɔ̀ɔŋ kò a te â Zə̀ kò, ghe sô mùghò saʼâ kwò alo eghəa mò mùghò m fughu zɔ̀ɔŋ kò a te a?

³¹À fi lo enyəa abugho ghù zəā ŋkāa ghù mʉā fəgha kə li ko, e ghəəŋ ghəa a te gho alefughuu nduw zɔ̀ɔŋ kò â Zə̀ kò.

³²Kà e ghəŋlo enyəa fəgha kəla ghù zəa doʼò tsù ù li wo â Dzûu tò ŋkāa â Tòʼò zò ŋkāa â dzeŋe kə ghì a Kəzə ghò.

³³M̀ dəmà sùghò enyəa to ghî ghən à dzəm mò dùʼnlo aŋ ghəa ghəla Ŋ̀ ghəŋlo a dzəm, Ŋ̀ kəŋo dzə yò alekēlê fəgha kə̄la kə dzɔɔ̄ â mùghò, à lǎam lò kəla kə sô dzɔ̂ɔ ndəm è àghì, enyəa to ghe mô zə kətuw.