Read Aghem 1 Kòlentìan 12 Bible Online

1 Kòlentìan 12 - Aghem bible

1 Kòlentìan 12

¹Êzəŋ a waazə̂ ghaŋa gho, kùu ndùw ghəa a fughu kəla Zùʼ tə Zɔlɔ â ghì gho, Ǹ ləghaa yo enyəa ghɛ̀ doʼo alo kəŋgòmsò aŋ ghəa a te.

²Ghɛ̀ kwo nû enyəa ghəa ghɛ̀ mò naām lô Toʼò zò, ghe n sêe mə̀ŋso kaaŋ ghɛ̀, ghɛ̀ ŋ kɔʼso ndùw mmùʼù mò ŋ kə̀aa yò ghəa gho.

³Ǹ ləghaa enyəa ghɛ̀ kele tsughu enyəa ghùw ù lì yo dzə̂ ù kə̀a ghəa gho an daʼa kə Zuʼ tə Kəzə̀ lò aledzàa tsughu enyəa, “Kəfəm a zəŋò Yɛso!” Ù lì yo sughò ù lò aledzàa səa wô tughō enyəa, “Yɛso lò Mughu ù te.” À mìaa kô Zuʼ tə̀ Zɔlɔ to aleghəŋlo enyəa ù dzàa tsughu êzə̀.

⁴Fughu kəla Zuʼ tə̀ Zɔlɔ tə fughuu â ghì ghò lǒ nəŋōnə̄ŋ, dèe êzə̀ mò à dzeŋe fughuu kô Zuʼ tə̀ Zɔlɔ tə̀ mɔʼɔ̄ te to.

⁵Ndə̀m tə ufwàʼ tə̀ lo kaaŋ nû, a lò ko Mughu ù te u mɔ̀ʼɔ ù ghəŋlo enyəa chìa è fwaʼa nduw fwàʼ kə wə̄ ko nəŋōnə̄ŋ.

⁶Dziī tə lo sugho nəŋònə̄ŋ aleghəŋlo àghəa a te, yìa à lò ko Zə kə mɔʼɔ̄ ko kə dêe fughuu dziī ten tə̀ dzə̀m â ghì ghò a dzə̀m.

⁷Zuʼ tə̀ Zɔlɔ tə te tə fwaʼà a zəŋò kə̀chìa aleyoso ghî ghò a dzə̀m.

⁸Zuʼ tə̀ Zɔlɔ tia tə ghəŋlo ghùw ù lì kə̂aa shwaʼ wəla ù ki tɔ wo, â ghùw Zuʼ tə̀ Zɔlɔ tə̀ mɔʼɔ̄ tə te tə m fughu wə̄n tɔ wo alezuuwkɛlɛ ghəa gho.

⁹Â ghùw ù lì, Zuʼ tə̀ mɔʼɔ tə te tə m fughu wə̄n â fə̀ŋ e te alebiso boō fughu tsughu â Kə̀lestò, à ghùw ù lì, Zuʼ tə̀ Zɔlɔ tə te tə m fughu tsughu wə̄n â dwaʼa wo alebaaŋ ghî dzaŋa gho;

¹⁰â ghùw ù li, Zuʼ tə̀ Zɔlɔ tə te tə m fughu wə̄n â fughu kə deē kə nsə̀ghàa kò; â ghùw ù lì, Zuʼ tə̀ Zɔlɔ tə m fughu tsughu wə̄n â fughu kə̀ dzaā kə ushʉ̀ghà u kə Kəzə̀ wò; â ghùw ù lì, Zuʼ tə̀ Zɔlɔ tə te tə ŋ ghəəŋ tsughu wə̄n alekwo enyəa fən lǒ zə̀a fə̀ dzûŋ fò ŋkāa à lǒ fə̀ biigh fo; â ghùw ù lì, Zuʼ tə te tə ŋ ghəəŋ tsughu wə̄n enyəa ù è kəaa ghəa gho an ndə̀m è sàʼà tə tənàʼà; â ghùw ù lì Zuʼ tə te tə ŋ ghəəŋ tsughu ù e zuuw dzaā wo ghəa gho an ndə̀m è sàʼà tə tənàʼà.

¹¹Ghəa ghən a dzə̀m ènyə, à ghə̌əŋ tsughuu kô Zuʼ tə̀ Zɔlɔ tə̀ mɔʼɔ̄ tə te to enyəa ghe e lo êzə̀, təla tə fughuu ko chìa â fughu kə wə̄n aŋghəa tə tsə̂m tsughu.

¹² Aŋghəa gwən e mɔ̀ʼ e ki ndə̀m e nyùŋ u ughùe, mò à lǒ ndə̀m è nyùŋ u ughùe zen e ghəəŋ kɔʼ gwən e ughùe zən zo, à lò sughu ghəa è mɔʼɔ̄ êzə̀ â Kə̀lestò.

¹³À fə̀ lo sugho Zuʼ tə̀ Zɔlɔ tə̀ mɔʼɔ tən to ghe fə̀ fughu sɛ̀ â mùghù ŋ Kə̀zə̀ mò a te — ŋkāa à lǒ Tə̀dzûu ŋkāa à lò Etoʼò, ukɔ̂ ŋkāa ghî ghəla ghe ndzə̂əm mughu — Zə̀ chia kə dzə̂n wô Zuʼ tə̀ Zɔlɔ tə mɔʼɔ tə to am fə̀ŋ tə sɛ̀.

¹⁴Nu à kà yò ko nyùŋ kə ughùe kə mɔ̀ʼ gwən e ughùe è ki, nyùŋ ughùe ù lo ndə̀m.

¹⁵Abugho ghuw kə mô lo aledzaā tsughuu enyəa, “Aŋghəa Ǹ yô dzə̂ ghu ko, M̀ fi yo dzə nyùŋ kə ughùe kò.” To e ka mò tsò dòʼò dzə enyəa ghuw kə yo dzə̂ nyùŋ kə ughùe.

¹⁶Abugho tuūŋ kə mô dzâa tsughuu sughò enyəa, “Aŋghəa Ǹ yô dzə̂ sə zo, M̀ fi yo dzə nyùŋ kə ughùe kə̀ li ko.” To e kà mò daŋso dòʼò dzə enyəa tuūŋ kə yo dzə nyùŋ kə ughùe kò.

¹⁷Abugho gwən e ughùe e dzəm è mô lô sə zo, to e maʼà ghəa a zūuw ênzə̂n? Ŋkāa abugho gwən e ughùe e dzəm è mô lô tuūŋ ko, to e maʼà luʼu tə lemè zǔuw ênzə̂n?

¹⁸À fɛ kuuwn lò enyəa à fə̀ nyùŋ u ughùe u te wo u dzə̀m biaan naŋa kaaŋ wo Kəzə̀ êzə̀ aŋghəa kə mò tsə̂m tsughu enyəa zə e lo êzə̀.

¹⁹Abugho nyùŋ u te wo u dzə̀m mo lo ko kə mɔ̀ʼ, to gwən e ughùe e te e mô nùghù wò ghɛ̀?

²⁰Aŋghəa e lo êzə̀, nyùŋ u ughùe u lo ndə̀m, gwən e ughùe zəa e lô ko e mɔ̀ʼ.

²¹Sə e yo aledzɛ̀ â ghu ko enyəa, “Ŋ̀ ki yo ghəa è li zo ghàʼ à ghù.” Ŋkāa tuw kə e soō â ghuw ko enyəa, “Ŋ̀ ki yo ghəa è li zo ghàʼ à ghù.”

²²À fɛ fwə̂n lò enyəa nyùŋ u ughùe wəla u lô ko to u nyɛʼɛ lɛ̄ɛ tsəghà tsùghù waazə̂, u naam ki ko kəfwàʼ.

²³Nyùŋ u ughùe wəlà sɛ̀ doʼkè tɔʼɔ̀ naŋa èsə a te, à lò u ghee sɛ̀ ghôom tsəghàso a te, wəla kôʼ è kuūwn dzɔ̂ɔ yo, yia a tɔʼɔ̀ ghôom tsughu enyə a te

²⁴Mo wəla a ŋge gaʼ sə zo a te ndoʼò ləghaa zēe yo ŋgòʼ è ghòom zə. Zə kə n nì nyùŋ dzə̌əŋ kaaŋ wo nyùŋ u ughùe u dzə̀m, wə ŋ ghəə̄ŋ kɔʼ gwən e ughùe e mɔ̀ʼ, ghəəŋ tsughu enyəa nyùŋ u ughùe wəla a ləghaa yo alekòʼ u e ki kɔʼso mò.

²⁵Zə̀ kə̀ ŋ ghəəŋ tsughu enyəa to gwəne ughùe ù kamò dzùghùu dòʼò dzə̀, enyəa nyùŋ u ughùe ù è dzeŋe lɛnlo â ghue e ghee zo.

²⁶Abugho nyùŋ kə ughùe kə mɔ̀ʼ kə̀ fanlo, nyùŋ ù li wən n dzeŋe fala mɛ̀ʼɛ̀ ndùw ko u dzə̀m; mo ghe fughu ŋkɔʼso â kə li ko, nyùŋ u te wə n dzeŋe duʼn ŋgə̀a ndùw ko ù dzə̀m.

²⁷Êzə̄ŋ ghɛ̀ fɛ lǒ tò gwən e Kə̀lestò, chìa vʉ̀a ù lò nduw ko nyùŋ kə ughùe kò kə mɔ̀ʼ aŋ gwən e te zo.

²⁸ Zə kə fə̀ sûesʉ tsuʼ naŋa kɔʼ tum tə Kə̀lestò esə̄ an dzeŋe kə ghì a Kəzə̀, kə n daŋso tsuʼ naŋa kɔʼ ghiīshʉ̀ghà a Kəzə̀, aŋ ghì a kə̀təgha gho Zə̀ kə n tsuʼ naŋa kɔʼ ghê wàdè, daŋso tsuʼ kɔʼ ghî ghəla ghe deē sə̀ghà mò, daŋso tsuʼ naŋa kɔʼ ghî ghəla ghe baāŋ ghì a dzaŋa gho, kə n tsuʼ naŋa kɔ̀ʼ ghì ghəla ghe kwo alebianlo àghəa aleyoso aghì, tsuʼ tsughu ghiīshʉ̀ghà, tsuʼ tsughu, tsuʼ tsughu ghêe wàdè, tsuʼ tsughu ghî ghəla ghe deē səghàa mò, tsuʼ tsughu ghəla ghe baāŋ ghî ghò, tsuʼ tsughu ghəla ghe yôso, daŋso tsuʼ naŋa kɔ̀ʼ sùghò ghəla ghe saʼā ndə̀m è sàʼà tə tənàʼà tò.

²⁹À lǒ mò à lò aghî à dzə̀m tum tə Kə̀lestò to a? À lǒ mò à lo ghee a dzə̀m ghiīshʉ̀ghà a Kəzə̀ ghò à? À lǒ mò à lo ghee a dzə̀m ghêe wàdè à? À lǒ mo à lo ghee a dzə̀m ghe deē səghàa mò à?

³⁰À lǒ mò à lo ghee a dzəm ghe ki fughu kə baaŋ kə aghì kò à? À lǒ mòg à lo ghee a dzəm ghe saʼà ndə̀mà tə təsàʼà tò à? Ŋkāa à lǒ mò à lo ghee a dzəm ghe lô alezuuw dzaā wo ghəa gho an shwaʼ u e naʼ ù nughù wo à?

³¹E Kuuwn dəma ko nlò alekele fughu kəla kə tsəghàsə wən u dzə̀m. Ǹ lo dèe wò ghɛ̀ â dzì zəla è ŋgeē dzɔɔ̄.