Read Aghem 1 Kòlentìan 13 Bible Online

1 Kòlentìan 13 - Aghem bible

1 Kòlentìan 13

¹Abugho Ǹ saʼ kaāŋ wô saʼà tə tənàʼà tò, bùghò sàʼ ndùw sùghò shwaʼ u tsətəndə̄ghā tə Kəzə̀, mò Ŋ̀ kuuwn ki yo ləgha zo a zəŋò ghì ghò, M̀ fi tsôo bùʼn sùghò mbɔ̀ŋ to mbəŋlo ŋkāa ŋgòm lò kuū.

² Abugho Ŋ̀ ki fughu kə te aledzaā shʉghà wò, asùghò tɔ wo alezuuwkɛlɛ nàn tə aghəa to, àsùghò ki fə̀ŋ è te aledzàa ndûw â kàʼà tò enyəa tə səə̄n nughù tsughu, tə n səəŋ nùghù tsùghù è sugho, mò kuuwn ki yo ləgha zo â ghì gho — M̀ fi lo kənughùnùghù.

³Abugho Ǹ tso bûʼ nî fughu sə mɛʼɛ̀ ndûw ko fʉgha wən ù dzəm Ŋ̀ ki â ghì à laa gho, bùʼ fughu daŋso ndùw sùghò ghue waŋa enyəa ghe kpâa maʼà ndûw, mò Ŋ̀ kuuwn ki yo ləgha zo â ghì ghò, Ǹ yo dzə̂ aletsoō zə fəgha kə li ko a te.

⁴Ləgha e ghəəŋ nù ghî ghə̀ n zumso tsughu eghue. Ləgha e ghəəŋ nù ghî ghə n dêe èdzɔ̀ aŋ ghùe e ghee. Ləgha e ghəəŋ dzə̀ yò enyəa ghùw è ki mʉ̌ʉn ko am fəgha kə ghûw ù lì, ləgha e ghəəŋ dzə̀ yo enyəa ghùw e kɔʼso kaaŋ ghue wo, ŋkāa ù è tsɔɔ̄ fə̀ŋ alo eghəa.

⁵Ləgha e ghəəŋ dzə̀ yò enyəa ghùw ù e dala ŋkāa enyəa ghùw è deē ghue wo; ləgha e ghəəŋ nù enyəa ghùw ka e nyəā naaŋ wàazə̀ aŋ ghəa è biigh zo.

⁶Ləgha e ghəəŋ nù enyəa ghùw ka e tsoʼnlo aleghəəŋ ghəa à biigh gho, mò à lò enyəa ghe e tsoʼnlo aleghəəŋ ghəa ghəla à lô tsəghatsʼha.

⁷Ləgha e ghəəŋ nù ghùw n lo alenaŋa fə̀ŋ a zəŋò wàazə̀, ghùw n lo alechiī tùʼ alo eghəa, ghùw n lo alebàʼ mbàŋ an tuw kə wàazə̀, ləgha e ghəəŋ nù ghùw n lo alekɔlɔ fèŋ alo aghəa a dzə̀m.

⁸Ləgha e kê mìaa kòʼ tsəghà yò, yia abugho shʉ̀gha ù dzaā wo, u kê bùghò tsə̀ghàa mìan nù. Alesaʼa kaaŋ saʼà tə ndə̀mà tə tənàʼà tò, ghəa a te a kê tsə̀ghàa mìaa nù, etɔ, e kê bùghò tsə̀ghàa mìaa sùghò nu.

⁹Tɔŋlo enyəa a kwo mɛʼɛ̄ tsəgha yo a dzə̀m, a kwo mɛʼɛ̄ sugho yo shʉghà wò u dzəm.

¹⁰Abugho fəgha kəla kə kɔʼ kpe tsughu bugho, kəla kə lo mo kə kâ kɔʼ n nùghùu è tsughu.

¹¹Aŋghəa mùgho fə̀ naam lo aŋ wɛ̂ɛtùghu, ki sugho tɔ u wɛ̂ɛtùghu, mòʼnlò àghəa tǒ wɛ̂ɛtùghu; a m bùghò M̀ bughò kpe tsughu aŋ ghûw, mùghò n ndòʼ zəghàa màʼà ndùw sùghò ghəa a wɛ̂ɛtùghu.

¹²Fəgha kəla sɛ̀ koʼò êzəŋ tsô lò ko tò vʉʉn kə kəzəŋso alo kəlùŋgɛ̀lɛ; a lo daŋso bughò koʼò dzəə̄ŋ kàʼ mə̀ esʉ̄ sɛ̀ à ghê Kə̀lestò. Fəgha kəla Ŋ̀ kwo êzəŋ kùu ndùw Kə̀lestò nǎam lò ko kəkə̂m; Abugho ù laʼà bugho ebàm, Ǹ lo bùghò kèle mɛ̀ʼn kɔ̀ʼɔ nù ghəa a te gho tò aŋghəa Zə̀ kə̀ tɔ̂ʼ kwo mugho a te.

¹³E fi lo enyəa ghəa ghən à təgha dòʼò tən nû to mbī kê bughò mîaa, ghəa a te a lo: alegaʼ fə̀ŋ a zəŋò Kə̀lestò, alechìi tùʼ alo eghəa àsùghò ləgha zo. Zəla e kuūwn bvuʼ ghəa a te gho a dzəm à lò eləgha.