Read Aghem 1 Kòlentìan 14 Bible Online

1 Kòlentìan 14 - Aghem bible

1 Kòlentìan 14

¹Ghəəŋ tsughu nlò enyəa ləgha e doʼò tsughu fəgha kəla ghɛ̀ kəŋo ghè kò, dəmà tsùghu sùghò kəla Zuʼ tə̀ Zɔlɔ tə fughuu â ghì gho, a ka dɔ̂m taŋ fughu kən enyəa ghɛ̀ è lo aledzaā shʉ̀ghà u Kəzə̀ wò.

²Ghùw wəlà ù bə̀ən kə̂aa ghəa gho an shwàʼ ù li wo enyə, ù ghəa a kə̂aa wò dzə yò â ghì ghò, ù kəaa ndùw â Zə kò, nu ghùw ù yo alezuūwkɛlɛ fəgha kəla ù kə̌aa ghè kò. Ghùw ù te nàn tə aghəa tə te enyə kə̀a wò mò à ghə̌əŋ tsughu Zuʼ tə̀ Zɔlɔ to.

³Abugho ghùw kuūwn dzâa shʉghà u Kəzə̀ wò, ù dzàa wò â ghì ghò, aletughusō tsughu ghee, dzə̀n tsùghù sùgho ghee â sə̀ŋ zò, tsəmso tsùghù sùghò ghee.

⁴Ghùw wəlà ù bə̀ən kə̂aa ndûw ghəa gho am shwaʼ ù li wo enyə yôsò kô ghue u wə̄n, wə̄n wəla ù kuūwn dzâa shʉghà u Kəzə̀ wò, ù yòsò dzeŋe kə ghì a Kəzə̀ enyəa ghe məla tsughu am fə̀ŋ è ghee zəla ghe gaʼ tsughu a zəŋò Zə̀ kò.

⁵Ǹ ləghaa enyəa ghɛ̀ a dzəm è bəən saʼa shwaʼ ù li wə̄n, yìa Ŋ̀ kuuwn ŋgeē ləghaa enyəa ghɛ̀ è biso dzaā tsughuu shʉghà u Kəzə̀ wò. Ghùw wəlà ù dzàa shʉghà u Kəzə̀ wò tsəghàsə ghùw wəlà ù bə̀ən kə̂aa ghəa gho shwàʼ ù li wo, à gɔ̀ʼɔ̀ mò ghùw fəghaan teso dzɛ̀ wò nù ghəa a te gho â ghì gho, tò ghəa a te a lo aleghəŋlo dzeŋe kə ghì a Kəzə̀ kə̀ məla tsughu am fə̀ŋ zəla ghe gaʼ tsughu a zəŋò Zə̀ kò.

⁶Êzəŋ a waazə̂ ghò, abugho M̀ bughò kaʼ wô kə̂a ghɛ̀ â ghəa gho an shwaʼ ù li wo mo ghɛ̀ zuuw yo, e sô yòsò nù ghɛ aŋ ghəa è li zo a, mò à gɔ̀ʼɔ̀ ko yo abugho M̀ bugho â ghəa è li zo alebùghò dzɛ̂ â ghɛ̀, ŋkāa Ǹ dêe fughu wô ghɛ â ghəa zəla Zə̀ kə̀ ləgha enyəa ghɛ̀ kele, ŋkāa Ǹ dzɛ̂ wô ghɛ â shʉ̀ghà u Kəzə̀ wò, ŋkāa M̀ mô fùghuu wò ghɛ̀ â tsʉ̀ zò.

⁷À lò sugho eghala am fʉ̀ghà ù buʼu wəla u ki yô mughù zò, tǒ ndɔ̄ŋ ŋkāa kəbôm, abugho nəŋònəŋ tɔʼɔ̀ dêe səā kɔʼɔ̄ yo an dzə te ghee, ghùw lò ênzə̂n alekēlê bən zə̄lā ghe buʼū lo a?

⁸Abugho mbuwlì dòʼkè tɔʼɔ̀ kûu səā wô aŋghəa ghî à lo alezuūwkɛlɛ, ghe lo alekele ênzə̂nà enyəa ghe ki alendzùuŋ tsughu ghue e tsam lo a?

⁹À fi lo enyəa aŋ ghùe zɛʼɛ̄, abugho ghùw wɛʼɛ ù lì kə̀aa ghəa gho n shwaʼ ù nughù wò mo ghî à zuuwkɛlɛ yo, ghùw lò ênzə̂n alekelê fəgha kəla ù kə̌aa ghè kò a? Ghùw ù te fi kêaa àghəa â kuɛ̌ɛ ko

¹⁰Saʼà tə lo fɛ am mbī ndza, ù li u yo dzə̂ a te mo ghî a te a zuuwkɛlɛ yo ghəa ghəla ghî a ghee à li a kəaa.

¹¹Abugho Ǹ sô kuūwn zuūwkɛ̄lɛ̄ yo shwaʼ u te wo, M̀ fi lo ghùw ù kətum â ghùw wəlà ù kə̀aa ghəa gho an shwaʼ u te wo, ghùw ù te vʉ̀a ù lò sugho ghùwkətūm â mùghò.

¹²Ghuūghùe zɛʼɛ̄ zə e lo sugho êzə̀; aŋghəa ghɛ̀ muʼū â mbuuw mò alekelê fughu kəla Zuʼ tə̀ Zɔlɔ to, ghɛ̀ è dəma təla tsughuu alekelê fughu kəla kə lo aleghəŋlo enyəa dzeŋe kə ghì a Kəzə̀ kə̀ e nomlo a te.

¹³À fi lo enyəa ghùw wəlà ù saʼā shwaʼ wə enaʼ ù nughù wò kì alegɔ̀ŋlò enyəa Zə̀ kə̀ fughu wə̄n â daʼa ko aleteso dzaā wo fəgha kəla ù kə̌aa ghè kò.

¹⁴Nu abugho Ŋ̀ gɔ̂ŋlo an shwaʼ wə enaʼ ù nughù wò mo ghî a zuuw tɔɔ yo, fèŋ zaŋa ŋ gɔ̂ɔŋ sùghò, tuw kaŋa kə ŋ kuuwn yò aŋ ghəa ghəla Ŋ̀ kəaa.

¹⁵Ǹ lo aleghəŋlo êndughō? Ǹ lo e gɔɔ̄ŋ tsughu am fə̂ŋ zaŋa, gɔ̀ɔŋ tsùghù sùghò aŋghəa Ǹ zuūwkɛlɛ tsughu a te. Ǹ lo e zoo tsughu ghəa gho am fə̂ŋ zaŋa, zoo tsughu sùghò ghəa ghəla Ǹ zuūwkɛlɛ̄ tsughuu.

¹⁶Abugho ghù gɔ̀ɔŋ ko Zə̀ kò am fə̂ŋ zə̀ghà, ghùw wəlà ù lǒ tò ghûwkətum lo ênzə̂n aledzàa tsughu enyəa “Zə e lo ko êzə̀.” Aŋghəa ghùw fughuu zɔ̀ɔŋ kò â Zə̀ kò aŋ gɔ̀ɔŋ zə̀ghà mò ù zǔuwkɛlɛ yo ghəa ghəla ghù dzàa səa wo a?

¹⁷To ghù kǔuwn kpuwso fughu ko nu zɔ̀ɔŋ â Zə̀ kò, mo e kuuwn yòsò yǒ ghùw ù lǐ vʉ̀ enyəa noo.

¹⁸M̀ fughûu kə̀zɔ̀ŋlò â Zə̀ kò enyəa Ŋ̀ kə̂aa nù ghəa gho an shwaʼ ù li wəla ghî à zuūwkɛlɛ yo tsə̀ghàsə̀ a dzəm.

¹⁹An dzeŋe kə ghì a Kəzə̀, â mùghò alekə̀aa tsughu kam tə aghəa eghə̄m an shwaʼ ù li wo mo ghî à zuuwkɛlɛ yo, to M̀ biso kə̂aa səā wô kô sə gho aghəa a tɛ mò a kwuu èghəa aletsʉ̀a ndûw ghì à li ghən a te.

²⁰Waazə̂ ghaŋa gho, kà nlò è moʼn dzə̄ ghəa gho tò wɛghêtùghu. Ghɛ̀ doʼo tsughu ko nlò tò wɛghêtùghu aŋ ghəa à biigh gho, nu ghə kwo yo nəŋònə̄ŋ aŋ ghəa è dzûŋ zò ŋkāa è biigh zo. Ghɛ̀ kuuwn ghînoo gho an dziī zəla ghɛ̀ moʼn ghea gho a te.

²¹ Ghe tɔm tsughu am mwàʼsò kə kəlàŋ enyəa, “Mùghò Mughu ù te Ǹ dzɛ̂ enyəa, Ǹ tsəghàa tsùghuu a bàâ ghì ghəla ghe kə̂aa saʼà tə tənàʼà tə̀ nughù tò àsùghò a bǎà tùu tò alekə̀a àghəa â ghì ghaŋa gho. Mò abugho M̀ bûʼ kə̂a ndûw ko ghəa gho â ghee êzə̀, ghe lo zuuw yo â mùghò.”

²²Alekəaa ghəa an shwaʼ ù li wo mo ghî à zuuwkɛlɛ yo lo tsə̌a â ghì ghəla ghe doʼkè boō fughu â Kə̀lestò, à yò dzə tsə̌a â ghì ghəla ghe boō â Zə̀ kò. Aledzaā shʉghà u Kəzə̀ wò lǒ tsə̌a a ghì ghəla ghe boō fughu â Kəlèsto, e kuuwn yo dzè tsə̌a â ghì ghəla ghe doʼkè boō fughu â Kə̀lestò.

²³Abugho ghî a Kəzə̀ à bughò zûuŋ tsughu a dzə̀m, ghee a dzə̀m yo kə̂aa kaāŋ ghəa gho an shwaʼ ù li wo mò ghùw ù ghee u mɔ̀ʼ yò alezuūwkɛlɛ̄, ghùw ù nughùnùghù vʉ̀a ù kpaʼ ndûw nyə wo fughu ŋkāa ghùw mò ù kaam boo fughu â Kə̀lestò, ghe so dzàa yò enyəa tuw u ghee wə bosə a?

²⁴Abugho ghee a dzəm kuūwn dzâa shʉghà u Kəzə̀ wò, ghùw wəlà ù dòʼkè boō fughu ŋkāa ghùw ù nughùnùghù vʉ̀a ù ndùw nyə wo fughu, ghe sò zǔuwkɛ̄lɛ̄ nǔ ghee, ghəa a te ghəla ù tɔ kɔʼ sô kɔlɔ̀ tsughu wə̄n aŋ ghəa a wə̄n à biigh gho.

²⁵Abugho tsɔŋ tə aghəa təla ù ki am fə̂ŋ bùghò dê sə kɔʼ ghue wo an ndɛ, ù lo təm tə̀ŋgūʼ a vʉ̀a Zə kò, ù e fughuu ndûw wən â kɔʼso mò, dzàa səā wô mgbaāŋ wô enyəa, “Zə̀ kə̀ kûm lò nû am bvʉa zɛʼɛ̄.”

²⁶Waazə̂ ghaŋa gho, sɛ̀ lo aledzɛ̀ êndughō a? Abugho ghɛ̀ bughò dzeŋe tsughu, ghùw u mɔ̀ʼ n tsʉ̀ kɔ̀ʼ ezom, ù lì n zoʼn wò àghì, ù n dzɛ̀ fughu wò ghəa ghəla Zə̀ kə̀ lo mo kə n dzɛ̀ â wə̄n, ghùw ù lì ŋ kə̀a wò àghəa an shwaʼ wəla ghî à zuūwkɛlɛ yo, ghùw ù lì wə̄n n teso dzàa wò ghəa a te gho. Ghəa yì à dzəm kì alelō ko aleghəŋlo enyəa dzeŋe kə ghì a Kə̀zə̀ kə̀ è nomlo.

²⁷Abugho ghî à kpaʼ lo ghe kə̂aa ghəa gho an shwaʼ ghî à zuūwkɛlɛ yo, ghe ki alelo ko a bə̀ghà ŋkāa a təgha e tɔ̀ŋ, mò ghùw wə̄n kə̀a tsughù nû, waazə̀ ù lì wən ŋ kə̀a è tsughu, ghùw u li n lo aletɔ̀ʼɔ̀ teso dzaā wo shwaʼ u te wo â ghì ghò.

²⁸Abugho ghùw yo dzə̂ aleteso dzaā wo shwaʼ u te wo, ghe m bɔɔm dòʼò mɔŋ an dzeŋe kə ghì a Kəzə̀ kə te ko — ghe kə̀a tsughu ko aŋ ghùe e ghee àsùghò â Zə̀ kò.

²⁹Ghɛ̀ m fughu tsughu sùghò kəbûʼ â ghiīshʉ̀ghà a Kəzə̀ ghò a bə̀ghà ŋkāa a təgha, ghe n dzɛ̀ wò sùghò ùshʉ̀ghà, ghî à li ghə n lo aletɔ̀ʼɔ̀ lɛɛ̄n nyəā tsughu ghəa yia ghe ghiīshʉ̀ghà yi mô dzɛ̂ wo.

³⁰Abugho Zə̀ kə̀ dê fughu wô ghəa zo a ghùw ù li wəla ù mò doʼ enyəa ù dzàa wô â ghì gho, ghùw wəlà ù mò buʼù kə̂aa ghəa gho ŋ kə̀a bùghù dòʼò è kɔʼ.

³¹Tɔŋlo enyəa to ghɛ̀ a dzəm ŋgəə̄ŋ kəaa shwaʼ u Kəzə̀ wò abugho chìa kə̀aa mɛʼn tsughuu, wàazə̀ ù lì wə̄n ŋ kə̀a è tsughu, aleghəə̄ŋ enyəa ghî à zoʼn kɔʼ ghəa a te àsùghò aledzə̀n fə̀ŋ tə ghee.

³²À fughu kəla ghùwshʉ̀ghà ù Kə̀zə̀ dzàa shʉghà wò a te kwu kele wə̄n.

³³Zə̀ kə̀ ləghaa yo enyəa sɛ̀ è ndzəghaan lo kaaŋ tsəgha, kə kuuwn ləghaa enyəa sɛ̀ è lo alo kəfəgha kə mɔ̀ʼ. Aŋghəa e lo an dzweŋe u ghì a Kəzə̀ à zɔlɔ gho a dzə̀m,

³⁴ghîzən a ki aledòʼò mɔŋ abugho ghe lo an dzeŋe kə ghì a Kəzə̀. Nu ghe ki dzə yo daʼa kə̀ li ko alekə̀a èghəa, ghe ki ko alebɔɔ̄m zuuw nduw ko â num a ghee gho aŋghəa lâŋ kə̀ deē.

³⁵Abugho ghe mô ləghaa alekelê ghə̀a è li zo, ghe m bvʉ̄ ndùw â num a ghee gho an ndughu tə ghee: tɔŋlo enyəa à lò ghəa a tùw kə dəla ko â wìzən alekəaa ghəa gho an dzeŋe kə ghì a Kəzə̀.

³⁶Hô! À lǒ mò shwaʼ u Kəzə u fə̀ tso kaʼ nughu tsughu alô ghɛ̀ a? Ŋkāa à lò enyəa kà lò ko â ghɛ̀ à ghe mò bughò kə̂a shwaʼ u Kəzə̀ wə̀n à?

³⁷Abugho ghùw mòʼò enyəa e lo ghùwshʉ̀ghà ŋkāa e lo ghùw wəla ù ki Zuʼ tə̀ Zɔlɔ to, ù kì tsughu boō tsughu enyəa ghəa ghəlà Ǹ tɔɔ̄ wô fɛ à tsə̀ghàso tsughu Mughu ù te enyəa Ǹ tɔɔ̄ wô.

³⁸Abugho ghùw tsùghòsò maʼà ghəa ghən gho, ghe lo tsughòsò maʼà sughò wə̄n.

³⁹Waazə̂ ghaŋa gho, à fi lo enyəa ghɛ̀ ki alemuʼū â mbuuw mò aledzaā shʉghà u Kəzə̀ wò. Ghɛ̀ ka bughu naŋa dzə̀ alekəaa ghəa ghò an shwaʼ ù li wəla ghî à zuūwkɛlɛ yo.

⁴⁰Ghəa a te gho a dzə̀m kuuwn bɔ̌ɔm ki alebwiī kɔʼɔ nduw shìa fə̀shìa aŋghəa a ki alebwìi a te.