Read Aghem 1 Kòlentìan 15 Bible Online

1 Kòlentìan 15 - Aghem bible

1 Kòlentìan 15

¹Êzə̄ŋ a waazə̂ ghò, Ǹ so Ǹ zə̂əŋ wô ghɛ̀ an làbəlà zəla mùgho mò bughò naʼà wo â ghɛ̀, ghɛ̀ n zùw è naŋa, ghɛ̌ yia bɔɔ̄m ti ko a te.

²Zən lǒ làbəlà zəla è lo ghəŋlo Zə̀ kə̀ lo bəghāsə̄ ghɛ, abugho ghɛ̀ tɔ̂ʼ kwu kele tsughu shwaʼ wəla mùgho mò bugho naʼa, buw êzè, à f lo enyəa fəgha kəla ghɛ̀ moʼò enyə ghɛ̀ mò boo fughu a te fi lo kènughùnùghù.

³ Mùgho mò â ghɛ̀ dzɛ wo fəgha kəla mùgho fə̀ kele sugho tò ghəa è səŋò e sûesʉ zo: enyəa Kə̀lestò fə̀ kpuw bòʼ bòo tə sɛ̀, aŋghəa ghe tɔm naŋa am mwàʼsò kə Kəzə̀

⁴ enyəa ghe n tsəla tsughu wə̄n, àsùghò enyəa tsùʼu m mô kpeē tsughu ntəgha, Zə̀ kə̀ n zòm nùghù kɔ̌ʼ wə̄n alo evʉ̄, aŋghəa mwàʼsò kə Kəzə kə dzaā,

⁵ asùghò enyəa ù maā an sə kə Pità gbə̂nsə kɔ̀ʼ, bùghò gbənsə kɔ̀ʼ sùghò an sə kə tum tən èghəm à ghè tò tə bəghà.

⁶Ù n daŋso bùghò gbə̀n sə kɔʼ an sə kə aghì mo ghe n tsəghàsə bɔm to tə tɛ̀ enəghā e mɔ̀ʼ, ndə̀m è ghe e lì nǎam lò nû â tuw ko, aŋghəa e lô ko enyəa à li a mafə kpuw.

⁷Ù n daŋso gbə̀nsə kɔʼ sùghò an sə kə Dzɛ̂ms, daŋso bùghò gbə̀nsə kɔʼ an sə kə tətūm tə dzə̀m.

⁸ Mò n lo ghùw wəla ù gbə̂nsə gûŋso tsughu an sə kə wə̄n, mùghò wəla ghe fə̀ tsô vûuŋ dzə wô ko enyə mo nəgha è dzəa e mugho e kaām kpe dzə̀.

⁹ Nu am fwàʼ kə tum tə Kə̀lestò, Ǹ lo wɛ̂ɛtùghuu a zəŋò tum to tə dzəm, mò Ŋ̀ kâ bùʼ kɔ̀ʼkpē to ghe e tɔŋɔ enyəa à lǒ tum è Kə̀lestò, bòʼ mùgho mò ndzaŋso kaaŋ tsəgha dzeŋe kə ghì a Kəzə̀.

¹⁰M̀ fɛ kuuwn lò ko fəgha kəla Ǹ lo ghè kò bòʼ dzɔ̀ e Kəzə. Dzɔ̂ zəla Zə̀ kə mò dê wo â mùghò, kə ka mo sâaŋ màʼà dzə̀. Mùghò ŋ kòom kuuwn biso fwàʼ tsəghà tsùghu ghee a dzəm, à mò buʼ yo mugho, à mò lo dzɔ̂ e Kəzə zəla e lo a zəŋò mùghò.

¹¹Ŋkāa à mò kəaa wo mugho ŋkāa à mò lo ghee, kən lò fəgha kəla ghǎʼ mò kəaa ghè kò, yìa à lò fəgha kəla ghɛ boō fughu tsughu a te.

¹²Abugho ghî naʼn kaŋlo aŋghea ghe mô zôm nughù kɔʼ Kə̀lestò a te alo evʉ̄, ghɛ̀ à li a lo ênzə̂n aledzaā enyəa ghî à lo kɔʼɔ səa yo alo evʉ a?

¹³Abugho ghî à mô kpuūw kɔʼɔ səa yo alo evʉ̄, to ghe ka mō Kə̀lestò zôm nùghù kɔ̀ʼ dzə̀.

¹⁴Abugho ghe mò dôʼkè zôo nughù kɔʼ Yɛso alo evʉ, à fi lo enyəa shwaʼ wəlà ghàʼ naʼn wô fɛ, u lo kə̀nughùnùghù, àsùghò enyəa fə̀ŋ zɛʼɛ zəla ghɛ̀ gaʼ a zəŋò Kə̀lestò lò sugho kə̀nughùnùghù.

¹⁵Abugho e lo êzè, à fi lo enyəa ghàʼ kaʼnlo àgha aŋ ghəa ghəla ghàʼ naʼn wô fɛ kùu ndùw Kə̀zə̀, bòʼ enyəa ghàʼ teso dzàa wò enyəa Zə̀ kə mò zom nughuu kɔʼ Kə̀lestò alo evʉ̄, mo kə ka fə ghəəŋ dzə̀ êzə̀, abugho e lô dzə êsəŋò enyəa ghe zôo nùghù kɔ̀ʼɔ ghî gho alo evʉ̄.

¹⁶Nu abugho ghe zôo nughùun kɔʼɔ yô ghî ghò alo evʉ̄, ghe ka fə Kə̀lestò fi zôm nùghù kɔ̀ʼ sùghò.

¹⁷Abugho ghe mò dôʼkè zôo nughù Kə̀lestò, ghɛ̌ fə̂ŋ fi gaʼ màʼà a zəŋò wə̄n kə̀nughùnùghù, àsùghò enyəa ghɛ̌ fi naam mùghù ko aŋ ghəa à biigh gho.

¹⁸À fi lo sugho enyəa ghî ghəla ghe kpuwnlō mo ghe boo fughu à Kə̀lestò fi kwəlà sàaŋ nù.

¹⁹Abugho à lò enyəa tùʼ zəla sɛ̀ chiī â Kə̀lestò mìaa ko fɛ am mbī zən, à fi lo ghî a ki alekwuso èse a zəŋò ghe tsəghàa taʼà sə aŋghəa ghe kwuso a zəŋò ghì à li ghə̀n a dzə̀m.

²⁰À kǔuwn lò èsəŋò enyəa ghe maā Kə̀lestò alo evʉ̄ zôom nùghù kɔ̀ʼ, aledèe tsughu enyəa ù fə̀ lo ghùw sûesʉ aŋ ghì à kpuuwn gho ghe fə̀ zôm nughù kɔʼ alo evʉ̄.

²¹Tɔŋlo enyəa aŋghəa vʉ e fə̀ am mbī bugho am bàm e ghùw u mɔ̀ʼ; à lò sùghò eghala am bàm e ghûw u mɔ̀ʼ ghî à lo kɔʼɔ̄səā alo evʉ̄.

²²Tò aŋghəa ghî ghən a dzə̀m lo kpuwnlo aŋghəa ghe mò lô fəgha ko kə mɔ̀ʼ ghèe ghê Adàm, à lò sùghò eghala ghî ghə̀n a dzə̀m lo doʼn wo ebàm â tuw ko aŋghəa ghe lô fəgha ko kə mɔ̀ʼ ghèe ghê Kə̀lestò.

²³À sò lò ko enyəa aghî a dzə̀m kè kì ko nəgha e ghee abugho ghe kê zôo nughùun kɔʼɔ ghîi gho alo evʉ̄; Kə̀lestò lǒ ghùw ù sʉ̂esəʉ, ghî ghəla ghe lô ghî a wə̄n gho kè daŋso dzûum ndûw wə̄n.

²⁴A kê bughò an tî kə te ko, abugho ù kè dzûw maʼà tsughu dwə̀ŋ u mbī wo, àsùghò zə̀a m bǐigh məla n saʼā mbī zen, àsùghò dwaʼa wəla u lô fɛ am mbī; ù kè daŋso nîi fughuu tsəghàa ndùw fɔe u te wo u dzəm â Zə̀ kò tɔɔŋ Tsele.

²⁵ Nu Kə̀lestò tèlè ki ko alezə ndàŋ è kədə̀ŋ e wə̄n alendùw tâa tsughu an tì kəla Zə̀ kə̀ kê nîi naāŋ wô ghîikətuw a wə̄n gho a tsəla efwēe e wə̄n

²⁶Ghùwkətuw wə ebàm wəla ghe kê ki aletəmazəa mɛʼɛ̀ kɔʼɔ̄ lo evʉ.

²⁷ Tɔŋlo enyəa Mwàʼsò kə Kəzə kə̀ dzɛ̂ enyəa, “Zə kə n naŋa fʉgha wo u dzə̀m enyəa Kə̀lestò gaʼnlo aghuw a te.” Abugho a dzɛ tsughu enyəa, “Ufʉgha u dzə̀m.” E fi dêe dzə yo enyəa a taŋ dzəŋlo â Zə kò a te. À lò Kəzə̀ kə fughu fʉgha wo u dzə̀m enyəa Yɛso gaʼnlo aghuw a te.

²⁸Abugho fʉgha wən ù dzə̀m bùghò doʼò tsughu a tsəlà wə̄n, ghuūghùe u Wɛ̀ ù te u lo daŋso doʼò tsughuu sughò a tsəlà Zə̀ kò, kəla kə naŋā fʉgha wən ù dzəm a tsəlà Wɛ ù wə̄n, enyəa à mìaa ko Kə̀zə̀ alo aghəa a dzə̀m, chia kə lɛnlo â ghəa gho a dzə̀m.

²⁹Abugho e mô lo enyəa ghe zôo nùghùu wò yò ghî ghò alo evʉ̄, e mô so e moʼnlò êndughō alenì mùghù ŋ Kə̀zə̀ a an zə e ghì à kpuuwn gho a? Abugho à lò èsəŋò enyəa ghe tso yò dzə̂ alezòo nughù kɔʼ ghîikpuuwn gho alo evʉ̄, ghî à sô mùghù ŋ Kəzə n nîi kwò an zən a a ghee à?

³⁰Â ghàʼ sughò, à sò lǒ kə kwo ghàʼ sô naāŋ ghue zaʼa zo an utsù nəgha tən tə̀ dzə̀m a?

³¹Ǹ lo ko an dzughu zə evʉ̄ an tsuʼu mən n dzə̀m, tò aŋghəa Ǹ tsɔɔ̄ fə̀ŋ a te a zəŋò ghɛ̀ aŋghəa sɛ̀ lô fəgha ko kə mɔ̀ʼ sə̀ à ghê Mughùbè ù sə̀ Kə̀lestò Yɛso.

³² Abugho e mô kpɛʼɛ lô enyəa M̀ mafə ŋgè kə bu ghàʼ à ghê nyòm tə ŋgwən to, aŋghəa ghî à buʼù nîi ko ghəa gho a te, M mô a te so e zəa kɔʼɔ kə̀ kwò? Abugho ghe yò alezòo nughù kɔʼ ghî à kpuuwn gho alo evʉ̄, ghən lò ghəa ghəla ghî à li a dzâa tsughu enyəa, “Bùghò nlò tò sɛ̀ zə, a mʉ, tɔŋlo enyəa sɛ̀ lo kpūuwn nù tsʉtsʉ.”

³³E kwo ko ghùw ù lì lô bughò sêe məŋso tsughu ghɛ̀, “Fən à biigh a boon màʼn ghùw ù dzùŋ.”

³⁴Kwən nyə̀ wò nlò an tɔ wɛʼɛ ù səŋò wò, ghɛ̀ ka ghəa à biigh a kôom ghə̌əŋ sùghò. Ghɛ̀ â li a kwo dzə yo Zə kò. Ŋ̀ ghəa ghən â ghɛ̀ kə̂aa wò enyəa Ǹ dənsò tsughu tuw kɛʼɛ̄.

³⁵Ghùw ù lì nǎam bvʉa tsughuu ko nù enyəa, “Ghe ghùwkpǔuw zôo nùghùun kɔʼɔ ênzə̂n alo evʉ̄? Ghe sô yia boʼò ki ŋgòʼ e gwen e ughùe è ghɛ̀ zo a?”

³⁶Ghùw ù te boʼò làʼsò ênzə̂n! Abugho ghù tam tsughu fəgha ko, kə yo alefùuw səā kɔʼ, à gɔ̀ʼɔ̀ mo kə kpuw tsughu nû.

³⁷Fəgha kəla ghù taā ndûw sugho, kə bûʼ yò dzə̂ aŋ gwən e ughùe tò kəla kə fûuw sə kɔʼ, abugho à tsò lò ko sə e kue ŋkāa sə e fəgha kə li ko.

³⁸Zə kə̀ ŋ kuuwn fughu tsughu sə e fəgha kə te ko â gwən e ughùe zəla kə tsəm tsughu, fughuu ndùw ko ŋgòʼ â gwən e ughùe e wə̄n zo.

³⁹Gwən a ughùe a dzə̀m à yo dzê alo eghəla e mɔ̀ʼ, ghî à ki ŋgòʼ e mɔ̀ʼ, nyôm tia tə ki è ghee, nwən mìa ŋ ki e ghee zo sughò, tsəghaa tia tə ki sugho è ghee.

⁴⁰Gwən a ughùe a fʉgha u kəwālā lo nû, a fʉgha u ghueekətsə̄ yia a lô sugho; nyəghanlo e kòʼ e fʉgha u kəwālā e lo nəŋ, e fʉgha u ghueekətsə̄ zəa e lô sugho nəŋ.

⁴¹Bâŋ zə ezūuw e lo nəŋ, bâŋ e dzɔ̄ŋ zəa e lo sugho nəŋ, bâŋ zə nsə̀ghàbəlà zəa e lô sugho nəŋ; Sə̀ghàbəlà mìa n lò sugho êzə mò chìa kì nduw ko bâŋ e wə̄n nəŋ.

⁴²Ghən lò ghəa ghəla a kê bɔɔ̄m lo a te abugho Zə̀ kə̀ zôo nughùun kɔʼɔ̄ ghî ghò a te alo evʉ̄. Fəgha kəla ghe tam nduw kə fîaa nù, kəla ghe nî sə kɔʼ wo kə fîaa dzə yò.

⁴³Abugho ghe taā nduw, zə n laan yo alekòʼò ndûw, à m bùghò ghe nî sə kɔʼ wo, zə ŋ ŋgee lanlo alekòʼò ndûw. Abugho ghe taā nduw, ghə n tughu yo, à m bùghò a noō sə kɔʼ wo, ghə n tughuu dzɔ̀ ki sugho esə̂ŋ.

⁴⁴Abugho a tam nduw, a taa nduw ko gwen e te zo, à m bùgho e fûw sə kɔʼ wo, Zuʼ tə Kəzə̀ tə n nyəən tsughu a zəŋo ghè zò. Abugho gwən e ughùe è lo, ghue wəla u ki Zuʼ tə Kəzə̀ tò n lo sugho.

⁴⁵ Zən lò e ghee ghe tɔm tsughu enyəa, “Ghùw ù sûesʉ, Adàm, m bùghò dòʼò wò ghùw wəlà ù mùghu am mbī.” Adàm wə̀ ebàm wən bùghò dòʼò wò Zuʼ tə Kəzə̀ təla tə fughuu mughù zò.

⁴⁶Zuʼ tə̀ Zɔlɔ tə kɛ fə bughò dzə̀ esə̄, à fə̀ sə kə bugho ghùw sěe Zuʼ tə̀ Zɔlɔ tə sô bughoo.

⁴⁷Ghe fə̌ ghùw ù sûesʉ wən bɔm sə kɔʼ alo təzùʼ, ù lò ghueekətsə̄. Ghùw ù ebàm wən n sə tsùghù wo alo kəwālā.

⁴⁸Tò aŋghəa ghe fə̌ ghùw ù sûesʉ bɔm sə kɔʼ lo təzùʼ, aghî a dzə̀m fi lo sugho təzuʼ. Ghî ghəla ghe lo alo kəwālā bɔɔm lò sugho tǒ ghùw ù sûesʉ wəla ù fə̀ sə tsughu wô alo kəwālā.

⁴⁹Tò aŋghəa sɛ̀ bɔɔ̄m lô sugho tǒ ghùw ù sûesʉ wəla ghe fə̀ bɔm sə kɔʼ alo təzùʼ, sɛ̀ kê bɔ̌ɔm lò sugho tǒ ghùw wə̀ ebàm wəla ù fə̀ sə tsughu wô alo kəwālā.

⁵⁰Fəgha kəla ŋ kəā ghe kǒ a waazə̂ ghaŋa gho lo enyəa, fəgha kə təkàŋ kə yo alenyə am fɔ̀e u Kəzə, fəgha kəla kə yo alefìaa kôʼ yo dzə̂ alezə bəla e fəgha kəla fə lo alelo alefìaa.

⁵¹ Kòʼo nlò! Natò Ǹ dzâa wô ghɛ̀ â nàn kə eghəa kə li ko! Sɛ̀ ghən a dzəm lo kpuuw mɛ̀ʼn yo, a lo kuuwn tsòo dzeŋe nùghùun kǔuwn kɔʼɔ ko èkòʼ enyə alo enəgha e mɔʼ tsuetsue, tò abugho a mwɛ̂ɛn tsughu se gho, abugho mbuwlì kè kùm guŋù sə wo.

⁵²Nu abugho mbuwlì è te kê kûm sə wo, ghî à kpuwnlo a kê zôo nughùu wô, ghe doʼò təla wô â tuw ko, kôʼ e ghee e kê kuūwn kɔʼɔ̄ sughò.

⁵³Tɔŋlo enyəa gwən zəla e boō mianlo kê kuūwn kɔʼ kôʼ e wə̄n zo alô n zəla e yo aleboō mîaa kôʼ. Gwən zəla e kpuūw sugho kè kuūwn kɔʼ alô n zəla e kê kpuūw koʼò tsəghà yo.

⁵⁴ Abugho gwən zəla e boō mianlo kê kuūwn kɔʼ kôʼ e wə̄n zo alô n zəla e yo aleboō mîaa kôʼ, àsùghò enyəa gwən zəla e kpuūw sugho kè kuūwn kɔʼ alô n zəla e kê kpuw kôʼ tsəghà yo, à fi lo enyəa shwaʼ wəla ghe tɔm naŋā am mwàʼsò kə baa ko ke lo êsəŋò enyəa, “Zə̀ kə̀ n vʉ e tughu tsəghà!”

⁵⁵ “O vʉ zo, dwaʼa wʉ̂a ù wɛ̂ɛ alekòom təma zə aghî a te a? O vʉ zo, fən zəghà zəla ghùw təghaa ghî ghò a te zɛ̂ à?”

⁵⁶Vʉ e daʼa kə wə̄n kə kele am bo zəla ghùw ghəə̄ŋ tsughuu. Lâŋ chia kə fughuu bo zo.

⁵⁷Sɛ̀ ki alefughuu zɔ̀ɔŋ kə Kəzə aŋghəa kə fughu tsughu sɛ̀ â daʼa ko aletughuu tsəghà evʉ àsùghò bo zo am bàm e Mughubè ù sɛ̀, Yɛso Kə̀lestò.

⁵⁸Waazə̂ ghaŋa ghəla Ŋ̀ ŋgeē ləghaa, tɔ̀ʼɔ tee tsughu nlò, e kwo ko fəgha kə̀ li kə lô noʼsò ghɛ. Ghɛ̀ fughu nduw ghue zɛʼɛ zo alefwaʼā ko â Mughu ù te, ghɛ̀ e kwo tən enyəa fwàʼ kɛʼɛ kəla ghɛ̀ fwaʼā â Mughu ù te yo dzə kə̀nughùnùghù.