Read Aghem 1 Kòlentìan 2 Bible Online

1 Kòlentìan 2 - Aghem bible

1 Kòlentìan 2

¹Waazə̂ ghaŋa gho, aŋghəa mùgho fə̀ bughò a vʉ̀a ghɛ̀, Ŋ̀ ka fə bughò dzə alebùghò dêe wô enyəa Ŋ̀ ŋge ki shwaʼ ù dzûŋ wò alo edzughu ŋkāa Ŋ̀ ŋge ki tɔ wo, mùghò fè bugho ko alebùghò dzâa fughuu wô nàn kə eghəa kə̀ səŋò kəla kə lo ghè kò kùu ndùw Kə̀zə̀.

²Tɔŋlo enyəa aŋghəa mùgho fə̀ lo sɛ̀, mùgho n tsəm tsùghù enyəa Ǹ nîizə̂a tsughu ghəa ghən à dzəm mò à gɔ̀ʼɔ̀ ko Yɛso Kə̀lestò, à ka dɔ̂m tàŋ ghəa ghe fə̀ təghāa wə̄n.

³ Mùghò n lo sɛ̀, tsəəŋ təla ko enyəa aŋ ghùu tsəŋ zo enyəa Ǹ lo tɔ̀ʼɔ̀ fwàʼà dzɔ̀ɔ yǒ fwàʼ kaŋa ko.

⁴Shwaʼ waŋa àsùghò tsʉ̀ zaŋa zo fə̀ zɔlɔ nû. Ŋ̀ ka fə ghəa gho â ghɛ nəghaan kə̀a dzə̀ nû ŋkāa Ŋ̀ ka fə kə̂a sùghò an tsè n utɔ̄, mùghò fə ghəa gho â ghɛ̀ kəaa an daʼa kə Zuʼ tə̀ Zɔlɔ to.

⁵Zə fə̀ enyə lò enyəa to boo zɛʼɛ̄ e kâ mò zòʼo dòʼò dzə an tɔ u ghûw, e kuuwn zoʼò doʼò ndûw an daʼa kə Kəzə̀.

⁶Ŋ̀ ŋgəəŋ kə̀aa ko nù tɔ wo ghàʼ à ghê ghì ghəla ghe nɛɛ̄ tsughu aŋ ghəa a Kəzə. Zən kuūwn yò dzə̂ tɔ e ghì a mbī zo ŋkāa tɔ zəla ghî ghəla ghe saʼa tuw u aghì wò fɛ am mbī ki, ghî ghəla ghe ki aletsəghàa mîaa.

⁷Ghea ghəla ghàʼ kə̂aa wô fɛ̀ lǒ nàn kə tɔ e Kəzə̀, tɔ zela ghe fə̀ nàn naŋa, zəla Zə̀ kə fə̀ to naŋā â sɛ̀ to mbī e bughò kaʼā tsughu.

⁸Ghùw u mɔ̀ʼ aŋ ghì ghəla ghe fə̀ saʼā tuw u aghì wò fɛ am mbī ka fə̄ zuwkɛ̄lɛ̄ dzə ghəa ghən; tɔŋlo enyəa abugho ghe fə zuūwkɛlɛ̄ tsughuu, to ghe ka mō Mughu ù te wəla ù ki dwaʼa wo u dzə̀m təghàa dzə̀ alo kədàŋlo.

⁹ Aŋghəa e bûʼ lô ko êzə̀, ghe tɔm naŋa am Mwàʼsò kə Kəzè enyəa, “Fəgha kəla sə e lo mo e kaām kôʼ, ŋkāa tuūŋ kə lo mo kə ka n zuw sùghò, ŋkāa fəŋ è ghùw lǒ mò è kaam kele, à lò fəgha kəla Zə kə naŋā â ghì ghəla ghe ləghaa wə̄n.”

¹⁰Zə kə ŋ ghəŋlo Zuʼ tə wə̄n tə zɔlɔ tia tə nî dê fughu wo ghəa a te gho â sɛ̀. Nu Zuʼ tə zɔlɔ tə te tə kəŋo səa kɔʼɔ àghəa à dzəm, kəŋo mìan nyə̌a tsùghu ndùw ghəa a Kəzə̀ ghəla a nân doʼò nyə nduw.

¹¹Ghùw yò dzə̂ ù kwo fəŋ è ghùw, à mìa kô zə̀a fə ghûw ù te fə kwo fə̀ŋ e wə̄n. À lò sugho êzə ghùw yò dzə̂ alezuūwkɛlɛ̄ fəŋ è Kəzə, mò à mìa ko yo Zuʼ tə Kəzə̀ tə lo alezuūwkɛlɛ̄ fə̀ŋ e Kə̀zə̀.

¹²Shʉghà wəla ghe fughu â sɛ̀ yo dzə̂ u mbī wo, a lò Zuʼ tə Kəzə̀, təla tə ghənlo enyəa sɛ̀ e lo alezuūwkɛlɛ̂ fughu kəla Zə̀ kə̀ fughu à sɛ̀.

¹³Ghàʼ ghəa ghə êzəŋ e kə̂aa dzə yò an tɔ u ghûw wə̀ nsɔ̌ɔŋnchùw, ghəa ghəla ghàʼ kə̂aa wo à dèe wò Zuʼ tə zɔlɔ to aleteso dzaā nduw səŋò e ushʉ̀gha e te zo â ghì ghəla Zuʼ tə̀ Zɔlɔ tə te tə lo a zəŋò ghee.

¹⁴Ghùw wəla Zuʼ tə Kəzə̀ tə̀ yo a zəŋò wə̄n bǒom yo êsəŋò zəla Zuʼ tə Kəzə tə te tə deē ghè zò. Ŋgòʼ è àghì ghən zuuwkɛlɛ yo ghəa te gho; ghəa a te a lo elaʼsò â ghee, bòʼ à lò ko an daʼa kə Zuʼ tə̀ Zɔlɔ tə te to ghùw kè koʼòkɛlɛ enyəa kən lo fəgha kə səŋò kò.

¹⁵Ghùw wə nsɔ̌ɔŋnchùw wəlà ù ki Zuʼ tə Kəzə tò a zəŋò wə̄n zuuwkɛlɛ nù səŋò zò aŋ ghəa ghən a dzəm, ghùw nsɔ̌ɔŋnchùw ù lì vʉ̀a ù kuūwn yo alesāʼ wə̄n,

¹⁶ tò aŋghəa Mwàʼsò kə Kəzə kə dzâa enyəa, “À mòʼnlò e Mughu ù te e kwo ndughoo? À lò ndughu a, ù lò alefughu Mughu ù te â tsʉ̀ zò a? Yia a kuūwn bughoo â sɛ̀, sɛ̀ moʼn sùghò àghəa tǒ Kə̀lestò.”