Read Aghem 1 Kòlentìan 4 Bible Online

1 Kòlentìan 4 - Aghem bible

1 Kòlentìan 4

¹Ghî à ki aleniī ghaʼ tǒ ghî a kəfwàʼ a Kə̀lestò ghe naŋā tsughu enyea ghe e teso dzaā wo səŋò zəla a nân dòʼò aŋ ghəa a Kəzə.

²Ghəa zəla ghe ləghaa â ghì ghəla ghe naŋa tsughu enyəa ghe e lɛnlo â ghəa ghən gho lo ko enyea, ghe ki alefwàʼ â Mughùbè ù ghee am fə̂ŋ e ghee a dzə̀m.

³Yia a bugho mugho, Ǹ dòʼò nǎaŋ yo tuūŋ ko enyəa ghɛ̀ saʼa mùghò, ŋkāa à lo ghî à nughù gho e ghe saʼā mugho; m buʼù saʼa sùghò yò ghue waŋa wo.

⁴Fəŋ zaŋa zɔlɔ nù, à yò dzə̂ enyəa ŋ kuuwn ki yo ghəa è biigh zo. À mìaa ko mugho ù te ù lo alesaʼ mugho.

⁵A fi lo enyəa ghù ki dzə yo alesāʼ ghùw u li mo nəgha è te e kaām kpe. Saʼ è gbǒo tee zə aghəa ki alebɔɔm ləmā to Mughu ù te kê bughò; ù ke bugho nìi nǎŋ wo tsɔŋ tə aghəa tə kələm to an ndɛ, ù dèe fughuu kɔʼ môʼn zəla ghùw ki alekele aŋ ghuu Zə kò. A kê bugho an nə̀gha e te zo, Zə̀ kə̀ lo e fughu nduw ko chìa â kɛɛ wəla u kpe â wə̄n.

⁶Waazə̂ ghaŋa gho, yìa Ǹ nî kɔʼ ghue waŋa wo ghàʼ Àpolòs tǒ tsə̌a aŋ ghəa ghən enyəa to ghɛ̀ mo zoʼn kele kɔʼ fəgha kəla shwaʼ wən dzâa tsughu enyəa, “E kwo ko ghɛ̀ lô tɛ̂ɛn daŋso bəŋ ko am fəgha kəla ghe tɔm naŋā.” Tò enyəa ghɛ̀ lô kɔʼso ghî à li gho, ghɛ̀ è alechwiīlwii à gho.

⁷À kòʼò ndùghò ghəa è li zo e lo nəŋònəŋ a zəŋò ghɛ̀ a? À lò kə kwò ghɛ̀ ki a mò à kà fughu Zə kò a? Abugho à fə̀ fughu Zə̀ kò â ghɛ̀, ghɛ̀ sô fə̀ŋ tsɔ̀ɔ aŋ kwò tò a è so ghɛ̌ fə̀ fʉgha u te kele aŋ ŋgəŋ zɛʼɛ a?

⁸Ghɛ̌ ghəŋlo tò ghɛ̀ m fʉgha wən u dzə̀m ghɛ̀ mò ləghaa kele mɛ̀ʼɛ̀! Tò ghɛ̀ n dòʼò tən ghî à kuu gho! Tò ghɛ̀ m bùghò dòʼo dwəŋ wò, mò ghue zaʼa e kaam yǒ dwə̀ŋ wò! Abugho à mò lo enyəa àghì lɛɛn ghɛ̀, to sɛ̀ mô dzèŋe lɛɛn ndùw à dzəm.

⁹Nu Ŋ̀ kwo enyəa Zə̀ kə̀ n dè wò ghaʼ tsə̀təndə̄ghā tə Yɛso tò, tò ghî ghəla ghe lô bam ko aŋ ghì ghən à dzəm enyəa ghî ghə̀ e tɔʼɔ̄ koʼo wo, tò ghî ghəla ghe lo mo ghe n tsughu tsən an tia e saʼ enyəa ghe kpuuw nù. Ghe ŋ ghe ŋ ghàʼ tɔŋ zaa fɛ am mbī àsùghò â tsə̀təndə̄ghā tə Kəzə̀ tò àsùghò ghì ghò a dzə̀m.

¹⁰Ghàʼ lo tò fʉgha ù laʼsō wo aŋghəa ghàʼ fwaʼa â Kə̀lestò, ghɛ̀ yia kuūwn tɔɔ̄ aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò. Ghàʼ lo bvùʼù mə aghì, ghɛ̀ yia kuūwn lô ghî à tughūu gho. Ghe kɔʼso ghɛ̀, ghe yia kuūwn chwiīlwiī ghāʼ.

¹¹Alebùghò sə êzə̄ŋ, dzəŋ n za ghaʼ, fəŋ è m̀mùghu zə̀a è zuʼso ghàʼ, a ki yo ndzʉ tə səŋò tò a zəŋo e eghùe, ghe n zàʼa ghàʼ alo ŋkwə̀n, ghàʼ yia a ki sugho yo luʼū kə mughuun ko.

¹² Ghàʼ yia wiī ghue zaʼa zo am fwàʼ ù tughu wo. Abugho ghe sûuwn wô ghaʼ, ghàʼ ŋ kuuwn fughuu ndùw ghee â bughuso zo; à m bùghò ghe ndzaŋso kaāŋ ghaʼ, ghàʼ ŋ kuuwn kɔlɔ tsughu ko tə̀fə̀ŋ.

¹³Abugho ghe boōn zən ghaʼā gho, ghàʼ n dəmà ko alekə̀a shwaʼ ù dzûŋ wò. Ghàʼ yia a bughò doʼò tsughu dzʉ u mbī wo êzə̄ŋ, tò fəgha kə kwəlā maʼn ko am fʉgha wən ù dzəm.

¹⁴Ŋ̀ ghəa ghən tɔɔ wò dzə yò aledə̀nsò wô tuw kɛʼɛ, à lò alekʉ̀ɛn wô ghɛ̀ tò wɛ ghaŋā à tsuʼu gho.

¹⁵Tɔŋlo enyəa abugho ghɛ̀ bûʼ ki ko ghî à chinlo a ghɛ̀ gho təkam eghə̄m aŋghəa ghɛ̀ à ghê Kə̀lestò lò fəgha ko kə mɔ̀ʼ, ghɛ̀ ki dzə yo ghê tsele ndə̀m. Nu mùgho mò doʼō tsele wɛʼɛ aŋghəa ghɛ̀ mò bugho doʼò fəgha ko kə mɔ̀ʼ ghɛ̀ à ghê Kə̀lestò Yɛso mò ghɛ̀ zuw tsughu làbəlà è dzùŋ e te.

¹⁶M̀ fɛ buʼu wò kəghu â ghɛ̀ êzəŋ enyəa ghɛ̀ ni ghuw kə e bwìi kaŋa ko.

¹⁷Zən lò e ghee Ǹ dzɛ̂ enyəa Ǹ tuu wò nù Timotì, wɛ waŋā ù tsùʼu wəla ù gaʼ fə̀ŋ a zəŋò Mughu ù te, ù zə̂əŋ wô ghɛ̀ an dzìi taŋā tə ghəəŋ tə aghəa to aŋ ghəa M̀ fwaʼa â Kə̀lestò, aŋ ghəa Ǹ zoʼn kaŋlo an luʼū ten tə dzəm an ndzweŋe u ghì a Kəzə̀ wən u dzə̀m.

¹⁸Ghɛ̀ à li a dêe èghue, tò a è so mùgho mò bughōo yo a vʉ̀a ghɛ̀.

¹⁹Ǹ lo kuūwn kùʼù bùghò tàa nù a fì a vʉ̀a ghɛ̀, abugho Mughu ù te boō dzə. Abugho Ŋ̀ kê bugho, Ǹ lo kəŋo kele səā kɔʼ mùghò â nə ko daʼa kəla ghî à ghaŋso ghə eghùe ghən ki, mò à yò ko ghəa ghəla ghe kə̂aa səā wo alo edzughu.

²⁰Nu fɔ̂e u Kəzə̀ ù yo ko an dzughu è fughuu zo, u lo an daʼa kəla u ki.

²¹Ghɛ̀ ləghaa kə̀ kwò à? M̀ bughò â kwùu zò alô ghɛ̀, ŋkāa â ləgha zo am fə̂ŋ è bùghùnlo à?